Akijahda thilman kal (Khamna thei ho kikha vanga abol le ajoh...

Akijahda thilman kal (Khamna thei ho kikha vanga abol le ajoh tam cheh)

325
0
SHARE

Akijahda thilman kal
 (Khamna thei ho kikha vanga abol le ajoh tam cheh)
Daan to kikal hijongleh kihinsona dia mi hon abol khat chu govt nin khadi (khaam di) ati vang’a abol hon aguh a abol thou thou ahi. Khamna thei lah a lou le ai ho hi khamna thei maimai hilouva gu (poison) ahidan hi ane hon jong hejongleh aduchat jeh a thivahna thei gu kine ahi ti henasa’a apet petna duchat khat nehna di bou akhohsah joh ahi. Chief Minister (CM) N Biren lamkaina BJP govt hin abul lang’a pat gamsung’a ‘war on drugs’ (khamnathei chung’a gal bolna) kiti thupi ahinchepito lhon’a ‘tobacco product’ (dum’a kon kisem neh le mom) ho – zarda, talab, khaini leh adang dang ho khaa di ahintia chomkhat chu niseh tobang’a hiche tobacco product ho dukan hoa kon alomlom’a kiloidoh a kihallha jing anahi. Aban’in Kaani (poppy) chung’ah ahungchu’n kaani lei ho aga lophat (apah teng) banvatchai di ti chepi ahung hikit nin ahi. Gamsung tah ah Kaani a kon Heroin No 4 kisemna aum’e ti hetdoh ahung hikit jeh in akisemna mun ho buluna ahung umkit nin dangka Crore aja a sim jatman matdoh ahung hikitne. Tun khamna thei lah a ju chung’a chuhdi ti ahung hikit tolhon’in nisehleh muntin’a jujoh holeh ju matdohna ahung ha umkit tai. Hitobang natoh hi thilpha tah ahivang’in ichan hung che’a ichan hung phachomdi hinam tipa hi lungdon um ahi. Nehloudi, bolloudi kiti ho hi aphatlou jeh a akhaam hon akhaamgot ahin hinlah anehon aneh thou thou, bol loudi kiti jong abol hon aboljing thou thou ahijeh in mihem amatah kigel lhahna aumlouleh koi jahda manna ahaidi, anga di tamlou ahi.
‘Tobacco product’ ho kimat jing’a alomchang’a kihal lhah jing vang’a hiche thil hoa kivei hon angai ngaija kiveina aboljing thou u, anela lhomchom dehlou ahi. Kaani lei bol leh juhon/jusem jong chutima ahi. Kaani lei bol ho seibang’a local ju (jukha) hon/sem hon jong kihinsona dia kabol u ahi atiu ahi. Ahin khamna theileh tahsa tongkha thei ju hihen neh le don dangdang hileh ane adon hohin hinna dia kaneh kadon ahi atitheilou u ahi. Thilphalou khat abol loule hithei talou johsahna (addict) kiti alhung teng avaigeilang hiji ahitai. Hiche jeh a ‘addict’ che masang’a ngah thei ahi ti kihabolna aum theina dia kihilna leh kithem chuhna masapen chu insung (family) ahi. Daan nin aphallou ho joh di, sem di, sumkol veina a pohle di kiti hi akihakha laise’a athil ho man (price) kal cheh cheh bep ahi. Tulah ju hung kihamat jeh a juman akal di jong acham’a lha hidi ahi. Ahin hiche jeh a ju akimu tapon koima judon jong aumtapoi kiti theidehlou ahi. Khamnathei louchang le abong ho jong niseh tobang’a hijat jat man akiman’e kiti jing, apolea kiveina a nei ho jong kimanman jeng, ahia ajoh leh ane akham ajabep hijing kit thou ahi. Akijahda thil hohi akihamatna akimu alhom teng aman (price) jong kal ahi. Ahin Bazar’a thil khat kijoh chu atam (anienjeng jung) teng aman (value) khelhaji ahi.