Akichehlou loi umjongleh ahatdi kisei masata (Asandi avomdi hetna di Nikho...

Akichehlou loi umjongleh ahatdi kisei masata (Asandi avomdi hetna di Nikho hung lhungpai dita)

164
0
SHARE

Akichehlou loi umjongleh ahatdi kisei masata 
(Asandi avomdi hetna di Nikho hung lhungpai dita)

 

                                  Kon govt ahinsem diham ti seithei ahilou hi thukhat ahitan, koi to kon govt ahinsem khom’a koi le koi party hung kikhen diham ti hi Centre keu hilouva Manipur State dimun gei jong kichiehmo sesu’a seiloi um ahi. NPF (Naga) leh BJP ho Manipur’a kivopjom dileh kikhen di thu jong kichiehlou ahi. May 18 ni’a Kohima a NPF ho meeting’a akihou lhahnau jong thuso (media) hon ajat chom cheh in report apeuve. Loi khat nin May 23 ni’a Lok Sabha election result kiphon jouleh NPF hon Manipur a BJP adalhah diu ahi tia sei, abangkhat nin BJP le NPF Manipur a kikhenna umdehlou din kihoulhahna aumtai ti ahikitne. Manipur chief minister N Biren in NPF to BJP kikah a kiboina ho seitoh thei ahi ati hi boina aum’e ti nopna leh NPF ho lunglhai louna hetpehna (recognise) abol tina ahi. Chomkhat chu BJP ho jong Centre ahia State ahia kisonlelna khat vang ahinnei u ahidan thusoh hoa kon muthei anahi. Hiche hi India gamsung pumpi’a aban ban’a vote lhahna ahung che to lhon’a ginchat umho seina a kon  hidi ahi. Kisong tah a ‘Seat’ (MP) hijat jat kamu diu, kakai diu ahi tia thuso hoa samle political party holeh kihetsah tah a hiche khuche party in Seat hijaja ahinmua govt ahinsem di, ahinsemlou di tia sei themgao lhem ho kijumsona di nikho hi May 23 leh hung kichieh jeng jung pandi ahitai. Hitobang hi tuchung Lok Sabha election keu ahidehpon phatdang’a election ana umji hoa jong angaina ahi. Tutua Centre a Ruling vaipo a lamkai a pang BJP lamkai holeh a supporter honjong Election Campaign kipat til lang leh vote kilhahpat dikon geija chu BJP in achang seh a govt semkham MP (seat) 300 lang ahinnei di ahi tia kisong tah a anaseileu ahi. Chomkhat jouvin Seat 300 lang’a kon’in govt semkham bep MP 272 vang BJP in ahinnei ding ahi ti BJP lamkai len hogeijin ahinsei u ana hikit tai. Vote lhahna ‘Phase’ tamjo ahung kichai lang’in BJP in Seat amudi jat kisei hi jakhat lang’in ahung khesuh kit tan, 272 a pat 170 vel bep hidin ahung kisei tai. Vote lhah kichaisoh nung’in BJP Seat mudi kitnin 300 vel hidin TV News channel tamjon ‘Exit poll’ a kon ahinkalsah kit tauve.
TV News Channel nei ho hi political party ho ngen ham, achohdosa ngen uham ahijeh a hiche khuche party in Seat hijaja amudi ahi tia seimasatna (prediction) aneijiu hi ‘propaganda’ jat khat jong ahi. TV Channel hon ‘exit poll’ a kon seimasatna aboljiu ho jong kibangjilou, adei chieh u ahat dia asei masat jiu tam, ahivang’a alhangpi’a adih jong tamji kit ahi. ‘Exit Poll’ kiti vote lha mipi hoa kon koi hat diham ti kidong’a kisei ahin Election Commission nin abonchang keija vote lhah kichai kah a koiman aseidohlou dia thugahna anei ahi. Ipi hileh Centre a BJP leh aloi NDA in govt ahinpoh kitleh gamsung pumpi kivaipohna jong chomkhat tadi a dia angaija che ding, ijem tia Non-BJP govt ahung umdohleh akhup athal’a kilehdileh akikheldi jong hung umtheidi ahi. BJP in Centre ahinpoh jomleh Manipur’a jong koi party kiphin jongleh ahat tah a lamkai (chief minister) kikhel ham tilou angaija thil jouse chejom di ahijeh in anavahna khat umdi ahi.