Akicheh umthei lou (Election le exam bol dile bollou di kicheh...

Akicheh umthei lou (Election le exam bol dile bollou di kicheh theilou)

224
0
SHARE

Akicheh umthei lou
(Election le exam bol dile bollou di  kicheh theilou)

Tupet tah a Manipur a akichehlou phabep umjongleh thil khoh cheh 2 aum’e. Hichu, MLA by-election leh MPSC noija MCS exam 2016 Main exam velbol di kiti hi ahi. Hiche teni hi lhakit October/November a bol dia kisei ahi. Central govt leh Election Commission of India invang Manipur by-election hi October lha a Bihar MLA election to boltha dia asei ahi. Ruling BJP govt ninvang ipi corona umle umloule by-election hi boldoh jengdi atidi hetsa ahi. Ahin Manipur a political party dangdang holeh phaicham civil mipi kiloikhomna jatjat honvang tu hitobang natna um dinmun’a by election bldi hi adeilou u ahi. Mipi’n election hi boycott bol henlang Candidate phabep hi akitetpi umlou leh Campaign kihabolna umlouvin bankai dohle ti hi Ruling party in phaje asahdi khat ahikitne. Ahin election chu boltei dia aumleh kon kum khat valbep Term a di bou ipia pang diham tintin moh tetda kitlou di ahi. Phaicham a AC phabep leh thinglhanga  Tamenglong AC a vang election a dia kigotna leh kiphondohna  leh vote campaign bolpan loi jong umpan saosao ahitai.. Bihar a jong tupet dinmun hitobang lah a MLA election umdi deilou jong umkit ahijeh in Manipur MLA by-election hi ijem itileh Bihar thu thua hung kikai maithei ahi. Tua Manipur by-election hi 2022 MLA general election a dia kithem chuhna (rehearsal) khat jong ahidi jeh a Term kichai dikon hijongleh ichan hamkhat kiboltona um thoudi ginchat ahi. Natna jeh a mipi vang alomlom’a kikhopma polling booth hoa kinehto le saotah tah kigolna ho aumdi tahsan ha umlou ahi. Ajeh chu vote lhahna hi hoilai hileh sum lona khat ahitah jeh a sum themkhat loa natna kilah khah sanga moh umthimdi dei hung tamdi ahi.

Ana kikahlha 2016 MCS exam velboldi kiti thua jong MPSC in Court thupeh suhbulhitna dia October lha leh Main exam velbolbol kitdi kiti ahi tin avel vellin hilchetna apeh toh Admit Card kilah didan holeh exam boldidan ho aneije. Alang khatna hiche exam a ana lolhingsa holeh Student kiloikhomna jatjat hon hiche exam thua CBI thukholna kichai kah in avellin kibol thei ponte ti chungchon’a tu natna hibangse solaija exam boldi kiti hi nikhat thu jong ahilou jeh in boldi anoplounao aphong jing kit uve. Hiche exam bol teitei di hung kiti taleh koi boina khat suhlhap malah akhoh cheh hungso di jong nailam thei ahi. Mi tamjo jahda di khat henasa’a kipodohji hi boina holna khat ahbou hiji ahi. Chuleh mipi honjong mi thamkhat phatchomna di bou gelna’a thunei vaipo ho sei le tohgon khat nelkal teija suhboi teidi kiti jong umji ahijeh in alang langa aphadi gelna aum ngai ahi. Corona jeh a tukum February/March lha a pat tugeija vannoi pumpi hi imajouse asuh asah umhei talou, tua hi  India jong vannoija corona natna tamnapen lah a ani channa hung hidoh, Manipur jong positive le athi jat kibe jing ahi. School, college ho kihonglou, Imphal a Ima keithel jong kihongloulai, curfew jong nilhah nidan 5 a pat jingkah nidan 6 gei kikoi jing nalai, Christian ho houin kikhopna jong kikhah nalai. Hitobang dinmun’a election le nikho ijat ham lutna exam boldi kiti vang ngol thubuh ahi.