Aji that kiti hung tam (Anu that apa angaidam dem?)

Aji that kiti hung tam (Anu that apa angaidam dem?)

234
0
SHARE

Aji that kiti hung tam

(Anu that apa angaidam dem?)

                          Mihem-te lah a khansetna lah a mitha kiti hi umjing mong ahitah jongleh thukhat ahitan hinlah ajinu, ajipa that kiti jong Manipur ah ahung ha um cheh cheh tai. Hitobang thilsoh hi sopi meilhei holah ah tulah ahung ha um lheh in akilang’e. Manipur Imphal a kon India pumpi sung geija dia ‘Fashion Designer’ minthang Robert Naorem penna nu kum 66 a teh/upa Rekha Naorem kitha thua ajipa ginmo ahijeh a police in amat kiti hi datmo umtah ahung hikit tai. Amasa’a chu Robert Naorem pa in ain uva kol mistri natong ho sum thua akinahpi’a ahouset jeh a kol mistri hohin sunkahlah mi umloupetna ajinu anatha uva ginmo ana hiu ahi. Kol mistri natong ho chun atha tahbah u ahileh jammang del, kisel mangdel diu ahin hiche kithani nilhah lang mama’a matdoh a aumthei uleh kisel/jam abollou u tina ahi. Sana khi, sana khutjem ho lahpehna di maimaija khamnathei bol ho khat insung’a gachomlutna mi athalomdi tahsan umlou ahi. Koiman ana ginchatlou beh akithat nu jipa ginmo ahung hi chu ajeh bei hilou, ahiteina di phot chetna phabep hung kimudoh a kon ahi. Insung’a Robert pa kengkho nung’a thisan anat, amat keu hilouva asangkhol atoka hoa jong thisan anat/amat thuholna nei police hon ahinmudoh a kon police in anamat ahi. Hiche keu hilouva kol mistri natong ho thudoh kinei honjong thengsel’in seidoh hihjongleu athuseidan uva kon Robert pa hin ajinu atha ahidan ginmo thei, hetdoh thei hung hidan ahi. Ajipa hin atha tahbah hijongleh kilep khonteh di ahijong hetsa ahi. Ahin hitobang thilse bol’a police in thudoh tanglou hel’a avel vel’a aneiteng achaina leh kisihna lungthim ahinnei jia athilbol ho ahinseidohji ahi. Tha di timong hilou maithei, kinah, lunghan lungton jeh a avoh, ajepleh thilokha jong hithei ahi. Avohlihna, ajeplihna’a kimang hi dia ginmo thisan bena manchah kimandoh chu insung’a candle kitunna thihtum neo khat ahi. Nupa, jicha kikah a kinel, kinahna leh kijep kiti hi ajeh thupi behlouva kon jong kipandoh a kivohlih, kijeplih gei solojina thusoh hi tam ahijeh a Robert Naorem nu kitha thu jong hi ipi jeh chet ahi akihetloulai vang’a thadi mong kiti ahilou di tahsan um ahi.

            Kon ipi jeh a Rekha Naorem atha, avohlih khah hitajongleh “Rekha JAC” kiti kisemdoh paijeng’a mithat ho abon uva matdoh ahia gotna kipeh tokah a thilong kila loudi, ni 5 kah a akisei suhbulhit ahilouleh kiphinna khohtah kineidi hung kiti kit jong hi chena lhongpi (akibol ngai) khat nin ahung umdoh tai. Hiche hi adon achanglou khat ahi. Mithat dia ginmo umholeh mat theichan police in amat nung’a gihna jatjat kisei hi ipi kidoina hiji hitam, ole govt nin longman dit hen (compensation pe hen) kitina ngap hitam? Thina leh kithana jouse’a govt themmo kichansah bang jengji hi Manipur mi ho lungput hidoh ahitan adih behseh hiloudi ahi. Ahin kithana thua koi hileh mona nei ho phatah a achandilom gotna pehdi kitivang thildih ahi. Robert Naorem injong khonung’a hitabang thilsoh umlouna dia koi hileh anu that ho gotna lhingsetna pehdi adeidan asei hi adih ahi. Ahin koidang hilouva ahingpa mama anahi khahleh kingaidam jeng hen atidi ham vang akihepoi. Hichelai hi aboina hiji ahi.