AIDS natna gimneimo jepjep dan’a kihe

AIDS natna gimneimo jepjep dan’a kihe

593
0
SHARE

December 1 hi angaiya International AIDS day (AIDS nikho) tia kimanjing bang’in tukum injong vannoi munchuom-chuom ah hiche nikho hi lamchuom-chuom’a manna kin ana um’in Manipur ajong State govt hetpehna leh panlahna’n district jouse ah anakimang’e. Hiche nikho kimandan hi ahung kikhel jepjeptan, kum phabep masang AIDS thu hung kihaseipat til’a bang’a amin akiseipoh jongleh mi kichaleu tobang vang chu ahitapoi. AIDS natna hi khamna thei lou le ai ne le kikap hoa kon’a kilato leh numei pasal choplop chopphai toh tahsa kitimatna hoa kon ahi hi chapang’a apat tehse lekha helou honjong ahet ahitai. Manipur hi khamna thei lou le ai lah-a AIDS polutpen’a pang Heroin No. 4 kiti kikapthoa hoa kon kiha thejal diehsetnin akiseiye. Hiche hi Number 4 kisemna leh hung kipohlutna gamto Manipur kinaijeh, ahung kipohlutna lampi le kotbul ahikhah jeh ahijong mijouse het tobang ahitai. Khamna thei lou le ai hi No 4 bou hilou tulai dieh dieh in pharmacy a lou le ai hokeu hilouva dukan dung’a kijoh nehding hilouhel thil hojong khamna thei dia kimangcha’a kine, kichep, akhu kinah/kihiptho jong atamtai. Hiche hin khamna thei kitiphot chu tulai khangthah hon aholu ahitai ti mudoh theina khat ahi. Dendrite kitijong hi nehding, chepding’a kisem hilouhel ahin tulai khangthah chapang langhon khamnathei khatnin amang’un phat chomkhat lunggel nopsahna deijeh in hinkho pumpi suhsetnin aumtheiye. Kumsehleh AIDS nikho kimanjina ho ah AIDS natna thu kipatdan leh kichandan ho, Govt leh NGO hon hiche natna suhnemna dia pan alahnaho report pehna in aneijiuvin hinlah ipijeh-a tulai khangthah holah-a hitobang khamna thei kiti phot hol le bol um hitam tilang holdoh-a lampi dih a puidi ti lampang hi lhasam jepmin akilang’e. Heroin Number 4 kikapna heu (syringe) kikop hojeh bouva AIDS natna kilason toa mi thi hiloudi ahi. AIDS hivei natna louva jong khamna thei lou le ai haneh hochu atahsa ahatohkhah teng hinna le damna hidehloudi ahi. Ju jong khamna thei leh tahsa tongkhathei ahijeh in ahadonval ho aphatlouva ahinkho akichaithei jeh in ju hadonjing hojong chu AIDS natna pu tobang ahina khat hithou ahi.
Ipi ijat kiseileh AIDS kiti hi tulai vannoi leiset’a nat le hivei lah a mitam thina pen ahijing’e. 2012 lang chun Manipur gamsung’a mijat Lakh 6 lang Test kibolna ana um’in mi 40,000 (sang somli) val chu Positive – hiche natna hit in atohkhah, hiche lah-a chu chapang 2000 (sangni) ahin, No.4 kikap akon 28%; numei kijoh 10.56%; pasal le pasal huh le jon kitimatna akon 17% ahi. Hiche ‘AIDS figure’ hi dih hen dihmoleh Manipur chu mitamtah AIDS in atohkhah ahitan hinkho tamtahjong aphaat louva kichai jing ahi. India sung’a thingnoimi hatna Manipur a govt sepai pang ho hi thingnoi meichang sang’a AIDS natna kilah a thi tamjon akiseiye. Manipur akiti leh thingnoi hatna, AIDS dimna a kihe, Churachandpur khopi jonghi AIDS Capital khat’a kisei ahi. Govt. leh NGO hon AIDS suhbeina ding’a sum tamtah-tah abuhlhah uhi sumkol veina’a kimangdan injong akiseiye. AIDS hi kichat umtah thinathei ahivang’in kivendoh thei ahi hetna (awareness) ahung ha umjepjeptai. AIDS thu ahung kihasei patlaiya amin akisei maimai jongleh atimul kithoujeng tam anahin tulang vanghin chutitah-a gimnei natna dan’in jong koiman ageltapoi. Ahin Medical Research lang’a ijat machalna aumvang’a AIDS jendamna tahtah kipodoh loulai ahi. Pathen thua kihipuihoina leh nuthu pathu ngaina umphotleh khamna thei bolleh natna jatjat ho lhomdi ahi. Ahin tulai hi ipi khantouna hitam nule pa te tahbahjong anopnopma chon tamkit ahi. AIDS hi gimneimo jeptadan’in umjongleh hinkho donglai bantan’a pangjing chu ahithou thouve.