Ahing chang’a meija kihallihna gam le mi (Numei chung dehdeh a kihabol)

Ahing chang’a meija kihallihna gam le mi (Numei chung dehdeh a kihabol)

78
0
SHARE

Ahing chang’a meija kihallihna gam le mi
(Numei chung dehdeh a kihabol)
   Ningkum December lha a Unnao kiti Uttar Pradesh a district khat sung’a kum 23 numei khat hunam’a kisuhset jouva police in mona nei mi 5 anamat chu lhadoh a aumjou uva numeinu Court a achena a analamtin uva kerosene asunkhum uva meija ahallih kit u ahitai. Hyderabad a Veterinary doctor nungah khat mi 4 in hunam’a asuhsetnu jong chu kichepna’a aneijou u, khohelouva aumpetna ahing chang’a meija ahallih tho uva kisei ahi. Unnao ‘rape case’ a mona nei ho hi mibolthei leh Politician hon apanpi a kisei ahijeh uva Jail’a kon ‘Bail’ a lhadoh a ana um uva kisei ahi. Court a athu (case) chelhajing ahitolhon’a suhsetna um numeinu chu Court a anachena’a ana suseho mama’n meija anahallih u ahi. Numeinu hi insung hahsa a kon ahijeh a akilhonpile di mi jong ana umlou khat hitam, hitia kibol jeng hi daan le thupeh umlouna leh mihem hina kiti umlouna gam le society toh kilou mongmong ahitai. Meija kihal jeh a atahsa jakhat lah a somko meijin akah kiti adamdohdi chu hahsa ahi (jakhat lah a somnga jong hahsa nalai ahi). Hichu doctor hon “heart attack” a thi ahi atinahlai u ahi. Hiche hi misuse le mithat ho mihaosa mibolthei ahijeh uva doctor ho adihlou aseisah u tina hikit jeng ahi.
Mihem khat ahing chang’a meija kihallih kiti kihabolna hi vanoi leiset chung gamdang leh society dang’a akijakha behpon hinlah India a kol le vai te lah a hitobang mihem hina umlou hi ahihabol lheh e. Ama macham’a kithatgoa meija kihal lihloi jong aum’in, gotna pehna a khat nin midang khat ahallih loi aum’in, kiphinna khat thua govt themmo chansahna dia amale ama kihallih/kihallihgo loi hi India a angaina tobang khatna um ahi. Hitobang Hindu te lah dehdeh a aha umna abul hi ivetleh malai khang’a pat Hindu numei khat chu aji/apasal athiteng ajipa chung’a kitahna leh lungsetna sangpen vetsahna’a aji thipa kigona meikong sung’a numei nu chu ahing chang’a anakichomlutjia ajipa toh thikhomji anahi. Hichu Hindu te Custom a “Sati” kiti chu ahi. Hiche Sati thu hi numei ho amaho nopma abol u ahi tiloi, thempu hon anop ada’a ajipa kihalna meilah a alelutjiu ahi tiloi jong aum’e. British ten India anapohlai uva hitobang mihem hina lutlou thilbol hi anakha u ahi.
Tukhang’a Hindute lah a numei meija kihal kiti tamna hi Dowry kiti ji, pasalman kipe chung’a lunglhailou (eitampeh poi tia) jeh a ajipa leh atehpinu ham’in aji, amounu kerosene meija chapma hallih te ahi. Numei ajon jeh a meija hallih kiti jong aum’e. Tulang’a hi numei hunam’a suhset jouva meija hal kiti hi misuse ho khutnung, chil, thisan, botui naat hoa kon kholdoh matdoh a aumlouna di ti ahi. Unnao ‘Rape Case’ a chu numeinu hin koikoi hichanchan them mona nei ahiuve ti Court a aseidoh di jeh a meija kihallih ahi. Hiche thu hi UP a politics kilutsah ahitai. UP CM Aditya Yogi in apetpetna numeinu insungmite Dangka Lakh 25 apeh, lhambuh bepma cheng te ahijeh uva inn hoi khat jong sahpeh dia kitep ahi. Numeinu apa invang sum kadeipoi, kachanu that ho Hyderabad a numei suse’a meija hallih ho kibolna bang’in kiban kaplih hen ati ahi. Mivaicha ahivanga sumle paija chohtheilou ho hi mi nasa ahi.