Ahat hat changpah umkhat kipedi

Ahat hat changpah umkhat kipedi

245
0
SHARE

Ahat hat changpah umkhat kipedi

(Biren vs Biswajit)

                                    Tah niti mongle tia kiboltona hi Manipur govt vaipo Chief Minister (CM), Minister leh MLA ho kah a um ahitah jeh in kon ahinjo diham ti hung kichehna di sot talou maithei ahi. Ajeh chu kiboina hi Centre lamkai ho kom’a Governor geijin ama satah a agalhut ahitah jeh in Centre injong suhlhapna beija sot tah amoh koilou di ahi. 2017 MLA election kichaija BJP lamkaina govt (ministry) aselchang’a ana ki umsah a pat itih chanpi boina beija hung chejom diu ham ti hi ginmo anahipeh ahi. Ajeh chu govt hi party khat sheh in apoh/asem ahileh aje-je um ahin party phabep kiloikhom’a kisem ‘coalition govt’ kiti hi lamkai ho athepten’a mijouse lung lhaina ahilouleh kilang khinna umdoh jengji ahidan ‘Parliamentary system’ a kivaipohna thusim’a dim ahi. CM N Biren kheldoh dia BJP MLA tamjon hatah a aphuut jeh uva Biren jong vompi kikapkha’a kisuhang hung bangdoh a asonlha dia lamkai cheh a agel Deputy CM Y Joykumar leh Minister Biswajit portfolio hoicheh – Finance, Power leh PWD ho alahdoh peh jeng ahi. Cabinet Reshuffle um’a hiche portfolio ho minister dang kipe hijongle thukhat chu CM Biren amatah in akituh kit nahlai ahi.  Hiche department hoa sum chena ho kholna nei dia jong Senior IAS officer khat lamkaina’a Committee kisemdoh ahi. Hiche a kholchilna phaten hung umleh anekha di hi koidang hilouva CM Biren mama hung hidi ahi tia Y Joykumar in asei ahi. Ajeh chu department hoa dangka Crore 2 chunglam sum kilahdohna phot lekha (File) jouse CM kom kilhutna ama phatsahna (approval) kila ahijeh in sum kisuhchatvaina aumtah jongleh department minister bou themmo kichan theiloudi ahi ati ahi. Minister Y Joykumar leh Minister Biswajit hi portfolio hoi cheh chang lhon ahin CM sang’a portfolio thupi cheh tam chanjo hi Biswajit hinalai di ahin ipi jeh pen’a CM Biren phuhlhuhna dia akihapei pen’a pang ham ti hi datmo um khat jong ahi. Biswajit hi kiphinna phu dia ato kheuloi BJP MLA dang um himaithei ahi.

            Ijem tia Centre in CM Biren ahinkheldoh louleh Biswajit leh anungjui (supporter) mi 14/15 hohin BJP adalhah uva party dang khat (Faction) asem ujongleh mi 21 lah a hop thum’a hop ni (two third) alhinset jeh un ‘Anti defection law’ in ahopjoulou diu ahi. BJP MLA 14/15 hohi Congress a kon ajamdoh ho simtha louva akigopkhom ujongleh govt semkham valset diu ahi. Congress ho ban’a NPP jong mi 4 hinalai ahiuvin N Biren kheldohna di govt phot a jao diu, atosot diu jong acham’a lha hung hidi ahi. Biswajit Cabinet a kon haina lekha sep dia kisei jong hi kathi le khat, kahinle khat tia bolthei thei boldi atina hijengdi ahi. Hitobang koi hatjo am ti kivetna a hi ajonchih jep hon panpi tum neilou tobang’a  ahat jojo changpah umkhat kapehdi tia avet tho diu, ahat lang lang ahinbel kit diu ahi. Hiche kahlah a hi Biren dei hon Biren nin ajodi ti, Biswajit group tosot hon Biswajit hon ajodi tia kihoulim nopna a aneigam ahitan Election result kiphon masang’a themgao lhem jatjat umdoh bang kit ahitai.