Agape Children Home in DC Kpi lemna nei, district kimu hi nulou...

Agape Children Home in DC Kpi lemna nei, district kimu hi nulou palou chaga te din jong khovah abang’e ti

246
0
SHARE

Kaybie Chongloi,
Kangpokpi DHQ, Dec.22: Kum 45 nailam nunga Kangpokpi District Deputy Commissioner masapen T. Ranjit Singh, IAS chu tunin Agape Children Home a Nulou palou, genthei chaga chapang ho thalheng in Home Father, Hekhup Joseph Kipgen le atohkhompi mi phabep in lemna le vailhun na aneijun ahi.
DC chamber sunga tunilhah lam nidan 3 vel’a lemna le vailhunna anei nauva, Agape Children Home Father, Hekhup Joseph Kipgen le aloihon DC T.Ranjit Singh chu thinga kisem memento le nampon Saipikhup khat ana peuvin ahi.
Phat ong neiman loujen’a kisaboi jing Kangpokpi District DC, T.Ranjit Singh in kipatah in Agape Children Home in thilpeh anei ho akisan in, district thah lihleh’a DC ahijeh’a tohding thamding tamjeh’a akisah boina ho jalla phat deibanga apehthei loujeh in akiphatlam na thujong aphongin ahi.
Aman aseibena’a, agangtheipen’a ima kasuhtup loule fund jouse Senapati district a che che nalai ding chule development umding hojong ahibanga hunglut theilou laiding ahijeh in suhtup ding le semtoh ho agantheipen a semtoh a suhtup ding kati ahi ati.
Phatchomcha sunga chun Hekhup Joseph Kipgen in Agape Children Home thudol chomchan hilchenna aneijin chule Home a um chapang hon alemnau thu DC pa kom’a aseitolhonin chaga nulou palou hodin kisonpi umtah nu le pa hung hijingin ati.
” Man of Work (Mi pontho, mi tomngai) tia kihe nangma Kangpokpi district adia DC masapen a kaneiju hi kavangu aphan, adeh’a chagate kinepna thah kondohna mipa le lungmonga aumjing natheiju mipa nahung hiding kakinep nau ahi”, tinjong Home Father Hekhup Joseph Kipgen in alemna thuseija chun aseijin ahi.
Alangkhatna, thusomi hotoh DC chamber pamlanga akihouna’a, Agape Children Home Father Hekhup Joseph Kipgen in district ihinmu’u tolhonin koima akipah lou iumpouvin, khantouna le machalna tampi ahung puntah ding kinepna lentah ineibang’un chaga, nulou palou tinjong amaho dia kho hungvah bangin agellui ati.
Hichan geija chaga gentheite kipana le kinepna chule atumbeh’a amaho tobang dia khovah banga geljeng theina chan eihin lhut’u Pathen ithangvah un chule district dinga ahinkho ana mollem ho, genthei hesoh anathoh ho, nute, chule MLA ho le MDC ho jaonan ilamkai hou jana tothon achung uva kipathu kaphong uve tinjong Agape Children Home Father pun aseijin ahi.
Kipathu aseina’a, ACH Father Hekhup Joseph Kipgen in Chief Minister O.Ibobi Singh a Government chunga jong kipathu aphongin adeh’a Kangpokpi district MLA thum ho le MDC ho chule lamkai dang dang ho chunga akipanau aphongin ahi.
District ihinmu’u hi chagate kinepna bangin khovah a hungpan jingtheina din Congress Government le MLA thum hon jong pan hinla jingu hen tin temna jong aneijun ahi.
Agape Children Home a na gentheitah’a khosa na chateu vin Manipur Government, MLA thum ho, MDC ho, District Administration le lamkai hodin kabolthei pen’u taona kahin kopjing uvin, gamsung khantou machalna nasatah a kilungtoh tah’a nahin boipi jing uva chaga genthei keiho jong neihin geldoh jing diuvin kahin tem uve tinjong ACH Father Hekhup Joseph Kipgen in aseijin ahi.