Adindohle alhuh hung kitoh thei

Adindohle alhuh hung kitoh thei

297
0
SHARE

Adindohle alhuh hung kitoh thei
 (NPP lamkai masa ho kibolna dihlou)

Thingnoi thingchung party, hou thu politics thu hileh lamkai thua kiboina/kichuna aumteng party kiti chu alhuhna kipanji ahi henesasa a Manipur State NPP (National People’s Party) sunga state president thua boina ahung umdoh hi akit election a akisuhmona diu hung hithei ahi. Achesa August 24 ni’a National NPP President leh Meghalaya chief minister Conrad Sangma in Manipur a NPP minister Kaysii ‘interim’ president din “appointment  order” tobanga lekha ahinthot chu party kivaipohna daan umsa toh akitohpoi tia ajing mama’a Manipur NPP sunga loikhat hon Thangminlen Kipgen term kitna dia State president pojom dia analhendoh kit u ahi. NPP National president nin ajing’in akhoh cheh order ahinsona ah Thangminlen Kipgen sehseh hitalouvin Manipur State NPP lamkai dang 3 – Ajang Khongsai, Working President, Dr. Ph. Jilasana toh (vice president) leh Sushil Huidrom (vice president) party a kon kum 6 nodohna order ahinso kit tai. National president leh Manipur NPP lamkai ho Party daan sukeh a ki ngohtou ahi. State a Interim president kiti chu party sunga election umkah chomkhatna dia tina ahin lhendi ahijongleh National president nin State party a lamkai ho dong louva ama macham’a amoh lhendoh jeng dan’a ngohna um ahi. State party lamkai honjong  Central Election Committee ho jaona a election chu chomkhat agah ngadoh thei u hilou ham? Conrad hin Manipur a NPP MLA/minister hoto kihoutoh uva abol u ahileh Manipur NPP lamkai masa ho chunga kipaje ahetlou u tina ahi. Ajeh chu NPP hi National political party khat anahivang’a athisa tobang’a ana um chu tua akinodoh ho hapanna jal’a achesa 2007 Manipur MLA election dikon’a ahinchohing kit uva Thangminlen leh meilhei khat le ni hiche party a kon MLA anakaidoh ahi. Hichea pat NPP hi tunia National party khat hung hidoh ahi.

(Late) PA Sangma Congress a kon NCP a anachom, NCP hon ana nodoh kit jeh uva suhna di ahetlou laitah a Manipur a hung’a NPP hi ahungjopma, tua achapa Conrad leh Agathi Sangma injong aga aneh lhon ahi. Tua Manipur a NPP MLA/minister hojong hi ali uva Congress holeh BJP hon ticket peh dia anadeilou ngense anahiuvin NPP ticket anamu uleh tunia hitobang dinmun lhung gam’u tithei ahi. Thangminlen MLA ahitah lou vanga party hi phatah a avetkol jing jeh a party thupidom hon ticket apehnomlou hon 2017 MLA election a NPP hi dong lhutna a ananei khah uleh ipile ipi vang kitoh kha hitam abon uva minister ahinau khat hung hidoh ahi. NPP hi NDA partner khatna aumjeh a Meghalaya a jong govt asemjou, Nagaland, Assam leh Arunachal Pradesh a jong govt semna a ‘partne’ khatna pang thei u ahi. NPP tunia National level geija ahung umdoh thei hi Meghalaya a Sangma te jeh ahithouve. Ahin Sangma te ahung kipat thah kitnau hi Thangminlen jaona a Manipur a NPP hinchoh hing kit ho ahijeh un tua moh notthap thei hilou diudol ahi. Tuchung Manipur a BJP govt hung kisemdohna a panlapen jong NPP anahi, chohchi bolpen’a pang jong NPP hidan ahijeh a NPP hi party dang vetnom changlou diu ahi. NPP ho boltheina hung kipan bep ham kiti tu mapan louva lamkai thua akiboi uhi adindoh ule alhuh u kitoh hung nailam thei ahi. Party khat president hi MP/MLA ahikhel ngailou ahijeh in NPP hojong akisuhtupna diu vaigei loulai ahi.