Aboltheipa chu adih hijeng tina hisoh

Aboltheipa chu adih hijeng tina hisoh

100
0
SHARE

Aboltheipa chu adih hijeng tina hisoh

                         Minister Th. Shyamkumar Congress party a kon BJP a anachoplut thua Congress hon Manipur High Court a hehna anabol uchu aphachom talou ahitai. High Court nin Minister Shyamkumar thu hi Assembly Speaker Court nin aseidi ahibouve tia akhut ahin kilhao chu ahung hiti di sotna pat hetsa anahi. Adihtah chu seilouva mijouse het – election akaidohna party adalhah a party dang’a achoplutleh MLA ahina a kon kikahdi (disqualify) ti hi 10 Scheduled noiya Anti Defection Law a um ahi. Hiche Anti defection Law hi kum somni masang lang’a BJP ho maman Centre a vai anapoh lai uva anaboldoh u ahin abollonao jong MLA ho minister kichu jeh a party khatna kon suhchop touchop athoji jeh uva govt kivaipohna aboiji jeh anahi. Hiche daan hung umdoh jeh a Manipur a jong sot tah govt kivaipohna boilouva ana um ahi. Ahin tua BJP hon aboldan uhi Anti defection Law to kikal louva lampi jatchom jepma MLA ho kibol ahi. Hiche hi Manipur keu hilouva tua Karnataka a jong kibol ahi. MLA party a kon achopdoh kal u ni ijat sung’a ‘disqualify’ kiboldi ti aumlou jeh a Speaker in athu seilouva achutikoi jongleh Term kichai kah a seilouva umdoh thei tina ahi. Karnataka a Chief Minister Kumaraswamy chu Assembly a mi ijat anei kivetna a MLA lhomjo aneitah jeh a a-govt chu lhu ahitai. Tua hi BJP lamkai BS Yeddurapapa hi govt sem dia acham’a lha a kigel jeng ahin, semjong asemtei di ahitai. Karnataka Assembly a govt semna dia MLA 104 ngai ahin tua hi BJP ho 105 hiu, Congress leh JDS kigom hi 99 bou hiu ahitai. Hichu Congress MLA 12 holeh JDS MLA 3 chu MLA hina’a kon haina lekha apeh uva Speaker in asanpeh asanpehlou thu seina jong umdehlou, Assembly a ‘Confidence Motion/Trust Vote’ (CM Kumaraswamy in mi aneilhing hinam ti vetna) um masang’a Bombay lang’a alhohdoh uva Hotel khatna aban hentup uva kisei ahi. Congress leh JDS MLA 15 lang Assembly a atamjo kivetna’a ajao tahlou jeh uva BJP ho atamjo hijeng u, hicheto lhon’a govt asem diuva umjeng ahi, Hiche hi gontohsa a kibol ahidijong acham’a lha hidi ahi.

                Manipur ahia, Karnataka ahia Congress MLA achomdoh hohi BJP hon milhinna dia anei u ahijeh a Assembly Speaker in Term kichai kah a achungthu u seilouva ahinchuti koidi ginchat umtah ahi. Karnataka a Congress leh JDS haina lekha peho chu Minister chanlou jeh a kiphin u ahin tua hi Minister hung hidiu hinam hinvetdi hi hung nom di ahi. Manipur leh Karnataka a BJP ho bolthemdan hi agul la thilou, moltum jong bonglou kiti bang’a Anti Defection Law jong tongkhalouva MLA  loikhat akoi u ahi. Hiche hi BJP ho Centre a thuneina mun’a atoupet u ahijeh a State hoa jong ichan ham’a anopnop aboljou u ahi. Hiche hi Congress ho hijongleu ichuom hilou maithei u ahi. Masanga chu Centre a Ruling hilou party in apohna State chu ajeh thupilou tah khat jeh a President’s Rule (PR) kimoh koijengji anahi. Tulang’a BJP ho thepdan hi BJP govt pohlouna State khat jong PR koikhum sang’a Anti Defection Law tongkha louva MLA loikhat peile’a BJP tundoh di ti tobang ngen ahitai. Tu tua Manipur govt sung’a politics kiboltona (lamkai di kichuna) a hi BJP ho sung mama ahijeh a Centre in boipi kham asahlou bou hidi, Minister Shyamkumar keu hilouva Congress akon BJP a chomlut hose jong ‘disqualify’ kibol louva  ahung galkai diu jong ginchat umtah ahi. Hitobang hi O Ibobi Congress honjong Trinamul a kon Congress a anachomlut MLA hojong anabol thou u ahi.