9th January, 2021 News

9th January, 2021 News

39
0
SHARE

Manipur a COVID-19 Vaccination Programme January kichai langa kipan maithei ahi tia Health Director in sei

Imphal, Jan 8(ET): Manipur a COVID-19 Vaccination Programme tulha January lha kichai lang leh State sunga Health Centres 246 hoa kipan dinga ginchat um ahidan Health Service Director Dr K Rajo in aseiyin ahi. Chuleh COVID-19 Vaccination dingtoh kisaiya Dry Run jong State sunga District 16 ho ah Friday nikho chun lolhingtah in akichai tai tinjong Imphal Lamphelpat mun a COVID-19 thua thulakhom ho maiya ahoulimna a Rajo in aseiyin ahi.

Ministry in COVID-19 Vaccine 2 – Covishield leh Covaxin jong Testing chom chom kibol jouva phatsahna anei ahidan jong aphongdoh in chuleh hiche Vaccine hi anungu umlou ahidan leh mihem a dinga kichat umlou ahidan jong Rajo in aphongdoh in ahi.

COVID-19 Vaccination a dinga Health Centre 246 kilhengdoh ho lah ah 138 hi Government Centre ahi in, chuleh 108 hi Private Centre ahi in, Health Ministry thupeh dungjuiya First Phase a lou kikap ding hohi adeh a Health Worker ho hiding ahidan jong aseibei.

Hiche COVID Vaccine leh Medical Equipment (Suringes, Cotton, Hand Gloves) ho poh le nading in jong Directorate in Van 12 tah gontoh sa in akoiyin ahi. Chuleh Vaccine kikap jouva boina toh aum khah leh avetkol nading mun jong semtoh sa in akikoi tai tinjong Dr. Rajo in aseiyin ahi.

Aman aseibe na a chun, COVID-19 Vaccination  umding toh kisaiya kisinsahna IEC (information, education and communication) jong Government Department chom chom holeh CSO hotoh kithokhom a Awareness Programme bolna ding tohgon jong achelha jinge tinjong aseiyin ahi.

COVID-19 natna a kon a dandohna nei umjing toh kilhon in Recovery Rate 97% alhing tan chuleh thinatoh 9% alhing tan, COVID Appropriate Behaviour ho adeh a Maitom kitom jing, Feet 6 kikah a midang toh kikahtah a um jing leh Khit kisil ngim jing tiho hi COVID-19 akon a kiven dohna theipen ahitoh kilhon a juijing nalai dingin jong Rajo in aseiyin ahi.

State sunga Private Health Centre mun chom chom a Government in thupeh abol kalval a COVID Test kibolna man tam tah tah kilahna thu a aseina ah, Health Department akon a Team hon hiche thua kholchilna kineiya, Government teppeh na banga Private Centre hon Test bolman alah nadiuva vetsuina kinei ding ahi tinjong Director in aseiyin ahi.

Hiche Press Conference kineina a pan anala Health Worker ho leh thulakhom honjong COVID-19 natna doudalna dinga COVID Appropriate Behaviour juicheh dingin jong kitepna ana neiyun ahi.

Xxxxxxxxxx

Nikhat sung’a Manipur a COVID-19 natna jeh’a thi umlou; Case agoma 28,579 lhingta

Imphal, Jan 8(ET): Manipur a COVID-19 natna nei thahbeh a 48 kimudohbe toh kilhon in agomin 28,579 apha tan, chuleh natna a kon a mi 58 in damdohna aneikit toh kilhon in damdohna nei agomin 27,735 alhingtai tin State Health Department thusodoh chun atahlangin ahi.

Tuni nikho a natna thahbeh a kimudoh ho lah a mi 36 hi Imphal West akon ahiuvin, Imphal East leh Thoubal akon mi 4 cheh, 2 hi Tamenglong, chuleh Tengnoupal leh Noney akon mi khat cheh ahi tinjong COVID-19 Common Control Room thusodoh chun atahlangin ahi.

Natna a kon a athahbeh a damdohna nei aumbe kit toh kilhon in tule tua COVID-19 Active Cases mi 480 aum nalaiyin chuleh Recovery Rate jong 97.04 per cent in akaltoube in ahi. Tuni nikho chun COVID-19 natna jeh a thina toh ana umpon chuleh thina toh jat agomin 364 ahijing nalaiyin ahi tinjong atahlang in ahi.

COVID-19 natna nei hotoh tahsa kisuhkhahna nei jouse akinthei pen a chom umdoh diu, Covid Control room ahi louleh District CMO ho Testing bol nadia akijahmatpi diuva hetsah ahi. Thukin leh boina neihon akinthei pen a phatseh a Covid Common Control Room Number-1800-345-3818 Call abol jing thei diu ahi. Chuleh Home Isolation toh kisai jouse Home Isolation Helpline Numbers- 0385-2414009 (State head quarter) leh – 8415944151 (Thoubal) Call abol jing theiyu ahi tinjong State Health Services in atahlahbe in ahi.

Chuleh koi hijong leh Government Doctor ho Online a doh le sah neinom jousen Sunday nikho tailouva (10am – 3 pm) gei Google Play Store a eSanjeevaniOPD app Download ahilou leh www.esanjeevaniopd.in akon a bol jing thei ahi.

Lungthim boina nei hon Number 104 Manipur Mental Health Helpline (9 am to 9 pm) sung Call abolthei diu ahidan jong State Health Department in atahlang in ahi.

Xxxxxxx

African Swine Fever hin mihem asukha poi tia Thoubal Veterinary Department Joint Director in sei

Thoubal, Jan 8(ET): African Swine Fever (ASF) kiti vohcha natna chikhat hin mihem asukha pon chuleh natna jong mihem in akilahson theipon, hinla gancha hochunga natna kipeson tuo thei leh ajen nading aum nailou jeh a gancha ho venbit ding angaiye tin Joint Director Veterinary Department, Thoubal, RK Khogendrajit in Friday nikho chun aphongdoh in ahi.

Thulakhom ho henga aseina a chun, Thoubal District sunga um Salungpham Village a Vohcha natna kithejal lou nading in pan hatah in akilan ahi. Salungpham mun a Piggery Farm khat a kon a Vohcha 70 val athi thu akijah toh kilhon in Department in December 3 chun Sample ho ana kilakhom in Director, Veterinary Department hengah ana kilhut in ahi tin aseiyin ahi.

Chuleh hiche Sample kilakhom hochu State Disease Laboratory in Bhopal a Lab a kholchilna nei ding in ana thotdoh uvin, kholchilna kineitoh kilhon in Vohcha ho chu African Swine Fever natna nei ahidan photchet in ahung um in ahi. Hiche photchetna ahung kimutoh kilhon in District Magistrate Thoubal in January 2 nikho chun Salungpham leh akimvel ana kikhah in, Vohcha ho joh leh pohdoh ana kikham in ahi tinjong aseiyin ahi.

Hiche natna hung kipatdohna munpi hi Salungpham a um Shairesh Multiple Farm akon ahi in, hiche mun leh akimvel kilometres 1 sung chu Infected Zone in phondoh in aum in, chuleh kilometres 9 sung chu Surveillance Zone in phondoh in aum kit in, chuleh mun 3 tah Free Zone a phondoh ahitoh kilhon in vetlhahna akinei jing in ahi tinjong aseibei. Department akon a Team honjong 27×7 a vetsuina anei jingu ahidan jong aseiyin ahi.

Chukit leh, thusoh ho a ana kisodoh, Salungpham mun a Poultry Farm khat a Ahcha tamthim athi thu akisodoh toh kilhon in Joint Director, Veterinary Thoubal makaina in Team hon Sample lahkhomna aneiyun Sanjenthong, Imphal East mun a Disease Investigation Laboratory of State Veterinary Directorate mun a kholchilna nei dingin ana thotlut kit un ahi.

Hiche Test kibolna a kon chun ahcha thi hohi Ranikhet Disease (RD) natna jeh a thi ahi dan hetdoh in aum in, ahcha thi ho hi ahpul/ahcha nat a thi ahilou dan jong photchet ahi.

XXXXXX

Mount Iso leh Dzuko a gam meikah jeh a gamsa ho asuhkhahlou ahidan PFA in phongdoh

Imphal, Jan. 8(UNA): People for Animals (PFA) Manipur in thusodoh anei nauvah Mount Iso leh Dzuko gammang lah a gamsa holeh ju le va ho asuhkhah dan hetdoh thei in aum poi atiuvin ahi. Hinla, gam meikah ana umjeh in kho huinun dan asulamdang in, ahivangin tuni chan in gamsa thi le man hetdoh leh mudoh aum naipoi tin thuso chun aseiyin ahi.

Managing Trustee PFA L. Biswajeet Meitei min a thusodoh chun aseina ah, PFA Manipur akon Volunteer hon nikho 2 sunga gam meikah jeh a akahkhah na mun jouse kholgilna akineiyin, gam meikah in asuhkhah gamsa ho hol na leh akahkhah ho jen ding in ana vaikon doh un ahi. Hinla, gam meikah jeh a gamsa leh ju le va akahlih muthei leh hetdoh ana umpon ahi. Hinla, Volunteer hon vahcha holeh gamsa ho umna buh akahna nung homkeo phabep amudoh un ahi tin thusodoh chun aseiyin ahi.

Gam meikah ana letlheh vang in, mei kong neo cha cha leh tuol juiya akah jeh leh akahna mun khat a akahjom jing theilou jeh in gamsa leh ju le va umho dinga mun bitlai jep hoa jamdoh man theina aphatcha a umthei ahi. Gamsa phapeb ho gam meikah phahlou najep gammang lah a um hidinga ginchat ahi in, chuleh meikah nalah a um dinga ginchat um Sakhi leh Vompi ho jeng jong meikah akon a kihuhdoh thei hidiuva ginchat ahi tinjong thusodoh chun aseiyin ahi.

 Chukit leh meikahna hi Nagaland hop langa kon a molvum a pat Manipur langa mun nemjep langa hung kamat ahi in, hiche jeh a gamsa ho ki huhdoh man hidinga ginchat ahi. Lhang sang ho noilang hi gammang ahi in, Manipur lang hop in akahkhah na hi Song tam na mun ahi in, hiche lah a gamsa aum diu jong ginchat ahi behsehpoi tinjong aseiyin ahi. Meikah um masanga jong hiche gammang lah a gamsa um behseh lou dinga jong ginchat ahi.

Hiche gam meikah phelmit ahina dia mun tijat umtah leh mun dap na mun a pan hinla NDRF, SDRF, District Administration, Manipur Fire Service, Manipur Forest Department, Manipur Police, local volunteer, NGO leh Manipur Government chunga pachatna jong aphongdoh un ahi.

Thingphung sang tah tah tamna mun leh tui umna thei ding aumlou jeh in nathu go mei in akah ho hui in amut na lang langa mei akahmat jing ahidan jong thusodoh chun aseiyin ahi.

PFA in thuso aneina a chun MLA Khangabok A/C O. Surjakumar, Loibi Adventure, Singjamei, Ningombam Ideal Youth Club, Thoubal hon Association chunga kithopina apeh jeh uleh kholchilna leh vilna kinei lolhinna thei dinga kithopina hinpe Deputy Commissioner Senapati Th. Kiran Kumar, Divisional Forest Officer D. John leh Chairman Singsong Village H. Kaiho chungah kipathu jong ana phonhdoh un ahi.

Xxxxxxxx

Manipur in Khamthei bol ho vetkolna ding lupna 50 umna Centre semdoh vah tading

Imphal, Jan 8(ET): Manipur government in Government of India kithopina noiya khamthei bolho vetkolna mun ho a Seat Capacity alhom toh kisaiya lupna 50 umna Centre khat kihongdoh vah ding ahitai tin Social Welfare Director Ngangom Uttam Singh in Friday nikho chun aphongdoh in ahi.

Uttam Singh in State Social Welfare department gonna noiya nikhat sung chelha ding ‘Substance Use and Welfare Schemes’ kiti thupi mangcha in City Convention a Workshop kineina a chun Resource Person hina in houlimna ana neiyin ahi. Aman aseina a chun, tu le tuhin Government of India kithopina nooyah khamthei bolho a ding in Integrated Rehabilitation Centres for Addicts (IRCA) 21 aum in chuleh agomin Seat Capacity 300 aum in ahi. Hinla, State sunga khamthei a kibuol apunbe jing jeh in adol tapoi tin aseiyin ahi. Hitoh kilhon a State Government in mi 50 umna thei dinh Khamthei bol ho umna mun ding ahin semdoh vahding ahitai tinjong aseibei.

Alangkhat ah, Private a kisem khamthei bol ho koina mun a juiding dan hojong State Government in ahin semding ahi tinjong aminphah in ahi. Private Rehabilitation Centre ho a Human Rights kipalkeh jing toh kilhon a Government of India juiding dan leh thupeh hetsahna abol ho ajui cheh diuva State Government in hetsahna ahin neiding ahidan jong aseibei.

Chuleh, ‘Drug Policy and Public Participation’,  kit thupi mangcha a Uttam in aseina a chun Drugs leh khamtheina toh kisai State Government in gelkhohna anei lheh in, hitoh kilhon chun Psychotropic Substances 2019 toh kisaiya Manipur state Policy manchah in ana um in ahi.

Hiche kimanchah dan lhangpi aseina ah, adeh a atup pipen chu Manipur sunga dantoh kitohlouva lung sungol thei ding khamna thei thil ho akon kikangse ding tihi ahi.

 Drugs leh khamtheina hung machal dan hi lam chom chom akon a hung kondoh ahi in, hiche ho doudalna dinga jong lam chom chom a kon a doudalna natoh chepi angaidan aseiyin chuleh kithokhom a pan lah angaidan jong aseiyin ahi.

Kin-gon kiman na a Resource Person dang khat, Head of Department of Psychiatry, Regional Institute of Medical Sciences (RIMS), Dr RK Lenin Singh in aseina ah, khamtheina a kibuol leh ngolpi hi aneo apat alen gei ho lah a akithe thang in ahi. Drugs leh khamtheina hi State sung bouseh hilouvin, India sung pumpi ah amachalbe jing in ahi.

Ministry of Social Justice and Empowerment in atadoh Magnitude of Substance Use in India 2019 a thulhut kimu dungjuiyin, khamtheina a kibuol kum 14 noilang ho chu 1 percent ahi in, hinla tuhin kum 10 noilang honjong khamtheina ah aki saboi tauve tin aseiyin ahi. Kum lhom a khamthei bol apunbe laise a Society a setna kibe cheh jing ding ahi tinjong aseibei.

Drugs leh khamtheina a kingolsah apunbe jing jeh in insunga kinah kabaona jeh in State sunga adeh a numei hon athohlel pen un ahi. Manipuri numei ho a dinmun u dopsang ding tia seiphong ahijing vang in Gamsung pumpi a insunga kinah kibaona tamneipen ho lah ah Manipur a 3th na in apang tan ahi.

Mipi hon khamthei bol ho hi gucha michom leh themmo chang ho banga gel louva, a vangse ahiuve tia lahjoh ding ahi. Society a kon a geldan leh vetdan ahoilou jeh injong khamtheina a kingolsah a lhalut atam in ahi. Midang ho hindan banga puilut joh ding hi athupi ahi.

State sunga um khosung kiloikhomna ho lehCivil Voluntary Organisation chom chom honjong kin-gon kimanna a chun pan ana lauvin ahi.

Xxxxxxx

Dan toh kikal a kilhou Kaani lei acre 150 kivatse

Imphal, Jan 8(ET): State sunga dan in aphal lou Kaani lei kilhou suhmangna natoh achelhah jingtoh kilhon in tunin NAB Team, Imphal East District , Saikul PS, NCB, District Administrative Staff, Home Guards, Imphal district Police, 1 Column of 15 A.R., Horticulture Dept leh Forest Department hon

  1. Basu, SP/NAB makaina leh leh Officer phabep lah a Addl SP NAB, DSP CDO/IE, AC 5th IRB, OC SMG, OC NAB PS panna in Sagolmang PS noiya um Maharani Hill Range a dan in aphallou Kaani lei acre 70 ana vatseuvin ahi. Hiche kivatset toh kisaiyin NAB PS, in case jihlutna ana neiyun ahi.

Alangkhat a, Addl.SP/CDL Shankerjit Loitongbam, Addl.SP/CDL Augustine J.Khongsai, OC/CKG Insp.Rafi leh SP/Chandel N.Madhunimai makaina noiya RL/CDL Personnel 60 leh NAB Team a Personnel 10 leh SI Manikshaw panna in Chandel Police leh NAB ho kithokhom na Team hon Chakpikarong Police Station a kon a 11km vel a gamlha Leisen kho a Kaani lei acre 80 vel ana vatchai/sumang kit un ahi. Chakpikarong Police Station ah Case jihlut in ana umkit in ahi.

Tuni chan in dal kal a Kaani lei kibol agomin Acres 1420 tobang 2020 – 2021 sung in suhmang in aum tan ahi.

Xxxxxxx

Hengbung a Aromatic Crops toh kisaiya Awareness ana um

Kangpokpi, Jan 8(ET): CSIR-Central Institute of Medicinal and Aromatic Plants(CIMAP), Lucknow, Uttar Pradesh holeh Foundation for Environment and Economic Development Services (FEEDS) ho kithokhom na in ‘Improved Cultivation and Processing Technology of Aromatic Crops for Income enhancement of tribal farmers’  kiti thupi mangcha in FEEDS Campus, Hengbung, Kangpokpi District mun ah Awareness Programme ana neiyun ahi.

CSIR-CIMAP akon a Officials hung ho lah a chun Manoj Kumar Yadav, Ishrar Ali leh Mipin Kumar chuleh Dr. Dhanaraj Singh Thokchom, Senior Scientist, FEEDS Hengbung hon Kingon kimanna sunga Training Session a chun Resource Person hina in pan ana lauvin ahi.

Lemongrass, Rose leh Citronella ho leilho ding dan, lam chom chom a kimanchah ding dan semdoh ding dan leh sum le pai mutheina a manchah dingdan ho jong Resource Person ho akon in ngailhah in ana um in ahi

Kangpokpi leh Senapati District sunga kho chom chom akon a  Loulhou miho, Khangdong holeh numei hon jong Awareness Programme kineina a chun pan ana lauvin ahi.

Xxxxxxxxxxx

Moreh a  Covid Mock Drill kibol

Tengnoupal, Jan 8(ET): Covid 19 akon kivenna ding toh kisai in tuni in Tengnoupal District sung a um Sub–district Hospital Moreh/Primary Health centre (PHC ) a Health care worker ho in Mock Drill Rehearsal ana bol uvin ahi. Mock drill chu Dr. Kh. Gojen singh Chief Medical officer (CMO) Tengnoupal District vetsuina noi a anakibol ahi.

Mock drill toh kisai in Moreh sung a um Health care worker 25 lam ang a vaccine kap doh na jong ana kinei in ahi. Tengnoupal Primary Health centre ( PHC) a Health care worker 25 ho ang a jong vaccine kap doh na ana kinei in ahi. Kingon a Dr.kh.Gojen singh Chief Medical officer (CMO) Tengnoupal District in ahoulimna a tuni mock drill hi phate a achelhah le ahunglhungding kal ni sung ahi vaccine kap doh na kingon kinei pan ding ahitan ahi ati.

Xxxxxxxxx

Manipur temperature

Imphal, Jan. 8(ET): Manipur gamsung athahbeh in ahung dap khohse kit tan, Thursday ni a chu gamsung temperature in anem pena 9.58 degree Celsius chan anaphah chu, Friday nin 5.4 degree Celsius chanin ana jhesuh kit in ahi. Alangkhat a state Directorate of Environment and Climate Change akon thulhut kimu dungjuiyin gamsung temperature in asang penin 29.84 chan ana phan ahi.

Friday nichun, temperature nemna pen Churachandpur district anahi in, 5.4 degree Celsius cha anapha in, district sunga temperature asanpen pet in 27.99 degree Celsius chan anaphan ahi. Chuleh temperature san na pen Noney district anahi in, 29.84 degree Celsius chan anapha in,  district sunga temperature anempen pet in 11.42 degree Celsius cha nana phan ahi.

Bishnupur district sunga anem penin 9.12 degree Celsius chan ana geiyin, asang penin 25.64 degree Celsius chan ana geiyin ahi.

Imphal East district sunga anem penin 9.67 degree Celsius chan ana geiyin, asang penin 28.37 degree Celsius chan ana geiyin ahi.

Imphal West district sunga anem penin 7.48 degree Celsius chan ana geiyin, asang penin 25.5 degree Celsius chan ana geiyin ahi.

Kakching district sunga anem penin 9.46 degree Celsius chan ana geiyin, asang penin 26.64 degree Celsius chan ana geiyin ahi.

Kangpokpi district sunga anem penin 8.58 degree Celsius chan ana geiyin, asang penin 26.51 degree Celsius chan ana geiyin ahi.

Senapti district sunga anem penin 7.22 degree Celsius chan ana geiyin, asang penin 24.62 degree Celsius chan ana geiyin ahi.

Tamenglong district sunga anem penin 9 degree Celsius chan ana geiyin, asang penin 25.34 degree Celsius chan ana geiyin ahi.

Tengnoupal district sunga anem penin 11.56 degree Celsius chan ana geiyin, asang penin 29.67 degree Celsius chan ana geiyin ahi.

XXXXXXXX

Japi manchah thei dinga Litan lei semphat hita

Imphal, Jan. 8(UNA): Vice President BJP Bishnupur District Committee Shanjoy Ahanthem in Gun lui chunga kido Litan lei (bridge) ana nemphat chai toh lhonin Friday nia Pombikhok muna Kumbi Kendra Progressive Front hon kingon neocha abolnau achun japi in amanchah pan nadingin pehdoh in ana umtai.

Manchah theilou a phatsotpi ana um, Litan lei tia kihe Kumbi A/C a um Pombikhok leh Nungu kikah a kijotmato nadinga kido lei hi Shanjoy Ahanthem in ama satah a sanction abola ana semphat ahi.

Kingon achun Vice President BJP Bishnupur District Committee Shannoy Ahanthem, President BJP Kumbi Mandal S. Angousana, General Secretary Ajad, Vice President Sugnu BJP Mandal Ng. Sonia, Pradhan Nominee Wangoo GP A. Kishorjit, Ex-ZP Member Borayangbi Wangoo Zilla Parishad A. Broken, Pradhan Borayangbi GP Th. Binokumari, Nominee Th. Romesh chuleh Ward member Th. Biranjoy in pan analauvin ahi.

Lei chunga kido thingho alui val jeh ahilouleh a ngot val jeh a simlai khat leh loubolmi khat in lei alem laiya hiche lei chunga pat vadung twi lah a akhehlut lhona thina anato lhonna thilsoh geldoh pumin, Shanjoy Ahanthem in lei kisemphat chai toh lhona macho a hitobang thilsoh aumkit louding akinep dan aseiyin ahi.

Kingon achun lei kisemna a toh le tham a panla ho kipa vetsahnan delsil (shawl) hoppehna jong ana nei uvin ahi.

xxxxxxxxx

Kwa na/do bora 6 ana kiman

Imphal, Jan. 8(UNA): Northern United Clubs’ Organization (NUCO) toh Pheidinga Meira Paibis (PMP) volunteer ho leh Pheidinga Youth Development Committee (PYDC) panlah khomna combined team khat in Friday nichun Kwa na bora 6 ana mandoh uvin, hiche Kwa na/do bora 6 ho chu ana sumang tauvin ahi.

NUCO general secretary Th. Johnson Mangang in thuso abolna achun Dk. 1.5 lakhs vel man hiding ginchat um Kwa na/do bora 6, Sapermeina lama kon hung car (registration number MN06LB2000) khat a kon matdoh a ana uma, kwa na/do kiman hochu Pheidinga a asuhmang u danin aseiyin ahi.

NUCO in PMP member jouse leh PYDC volunteer hon kwa na/do kimatna thunga kithopina leh tosotna aneina chunga kipa thu ana seiyin ahi. State sunga kona tahsa sukha thei khamna thei jouse suhmkang na dingin stakeholder in tosotna nei cheh dingin jong ngehna aneiyin ahi.

xxxxxxxxx

Law College staff hon toumun kiphinna bol

Imphal, Jan. 8(UNA):A joint sit-in-protest was staged at LMS Law College on Friday demanding absorption of the existing teaching and non-teaching staff of the college before any fresh recruitment.

Recruitment thahbeh aum masanga Law College a teaching leh non-teaching staff aumsa ho lahlut masat ding ngehnan Friday nichun LMS Law College muna toumun kiphinna ana umin ahi.

Hiche Friday ni a LMS Law College Complex, DMU mun toumun kiphinna achun LMS Law College a teaching leh non-teaching staff honjong pan anala uvin ahi.

Guest Lecturer Thingbaijam Linthoi in thuso bol miho koma aseina achun principal panna a college a  hi 1998 a pat regular teacher 6 bou aumin, jilkung lhahsam jeh a research scholars, LLM, PG leh PhD course ho class jong achesa kum 7 sunga chu ana lahtah jing u dan ana seiyin ahi.

State government in hiche college a dinga tunaicha a teaching staff 4 athahbeh a lahbe dinga hetsah thuphon ana neichu guest lecturer aumsa 5 ho lahlut a aum joutengle bou staff thah 4 chu asan thei bepdiu ahi dan aseibe’n ahi. Chuleh staff thah kilahbe masanga teaching leh non-teaching staff aumsa ho sutoh masa dingin state government henga ngehna jong aneiyin ahi.

XXXXXXXX

Nghathal thilsoh toh kisaiya mi 2 Police hon mandoh ta; Nghathal leh Kanan kimvel 144 CrPC kikoi

B.Lalboi Gangte

CCpur. Jan 8 (ET): Nghathal kho’a boina sangtah janni (Jan. 7) nikho’a anasodoh toh lhon’a boina chung’a pasal khat nasatah’a anakisukhah jeh chun Imphal khopi’a jending in anapo uvin ahi tin thulhut chun aseiyin ahi. Hetthei khat chu thilsoh hi chapang hon khat in Lalbiakson (15) S/o (L) Khenthang, D. Phailen anavoh nao vedio Whatapps leh Social Media chom chom’a anasodoh utoh lhon’a kisai’a chapang lunghang honkhat in Nghathal field mun’a kisu toding in Social Media dung’a anathethang uvin ahi. Hiche thu hi CCpur Police in ahetdoh phat in Nghathal field mun’a duty anapo uvin ahin nilhah lam nidan 6:00 akon in Nghathal field leh akimvel’a khangdong tamtah anakisuto uvin ahi. Phat chom chakhat kah in mi 100 val akipundoh khom phat uvin social organization chom chom in jong amun anadellut pai in ahi.

Hiche toh lhon’a hiche phatsung chun mipi kipunkhom hon Police ho heng’a agannathei pen’a Lalbiakson vo lah’a pan la James amandoh ding uvin Police toh anakinoto uvin mipi lam joh atam val phat in Police in jong re-enforcement anakoube uvin ahi. Chuleh boina ho suhthim sang’a asang lam in amano ding dinmun’a aum ding phat in mipi ho nojah na ding in Mock bomb, Teargas ho anakap uvin mipi anano cheh uvin ahi. Tun Nghathal thilsoh toh kisai’a Nghathal leh Kanan kimvel lah 144 CrPC phondoh in aum in chuleh Additional District Magistrate Thangboi Additional DC CCpur in Nghathal kho leh akimvel’a boina akhohset na lou ding in avesui ding in Jangminlien Lupho,SDC/Executive Magistrate Churachandpur mopoh na anape in ahi.

Alangkhat’a thilsoh na chung’a boina suthep ding’a panla Paukhankhual suhkhah anahi toh lhon’a nilhah nidan 11:00 in Chiengkawnpang mun’a CT Scan ala uvin chu jouvin Imphal ah refer anabol uvin tun Raj Medicity ah aki admit tan chuleh MLA V. Hangkhanlian leh aloinu Dr. Kimboi tenin aboipi lhon in ahi. Hetthei khat chu voh’a um Lalbiakson loipa hi chapang phabep in Marian Street, D. Phailen mun’a anamat uva chu jouva anavoh utoh lhon’a voh’a um pa phone mangcha in Lalbiakson kou ding in asol uvin ahi. Lalbiakson jong hiche mun alhun in aloipa toh avohtha uvin ahin aloipa chu ana jamdoh man in ahi. Thilsoh toh kisai’a  CCpur District Police in kholchil na anei uvin kivoh na video apan la mi 2 amandoh uvin ahin mat’a um teni hi kum lhinglou ahijeh lhon in Juvenile Justice Act. noi’a booked bolkhum ahi. Chuleh gang group toh kisai’a chatloh ho chung’a action khoutah’a kila ding ahi tin Police akon thulhut chun atahlang in ahi.

xxxxxxxxxxxxxxx

DHS, Ccpur tohgon nanoi’a “Covid-19 Vaccination Dry Run” chelha

B.Lalboi Gangte

CCpur. Jan 8 (ET) : District Health Society (DHS) Churachandpur tohgon nanoi in tunin (Jan. 8) mun 3 a Covid-19 lou kap ding dan toh kisai’a “Covid-19 Vaccination Dry Run” anachelhah in ahi. Hcihe Dry Run hi mun 3 a anei nao’a District Hospital mun’a Dr. Vumchinpau Tonsing, CMO in avekol in, CHC Singngat mun’a Dr. Romeo Sanate, District AIDS Control Officer chuleh PHC Saikot mun’a  Dr. T. Nengkhanmang, District Malaria Officer in avekol in ahi.

Hiche toh lhon’a Dry Run phatsung in Centre khat’a mi 25 in pan anala in agom’a mi 75 in pan anala uvin ahi. Coronavirus (Covid-19) lou ding’a India Govt. in Emergency Use Authorization (EUA) ding’a phalna apeh lou (medicine) Oxford-AstraZeneca-Serum vaccine (Covishield) leh Bharat Biotech vaccine in asem Covaxin hung lhung vah ding ahi jeh’a akap ding dan gontup na ding’a kingon hi anei’u ahi. Hiche lou (medicine) ahung lhun teng phase a kap hi ding hiche dungjui’a Phase masapen’a frontline worker jouse, Phase ni na’a tahsa kum 50 chung lam chuleh Phase thum na’a khangthah tahsa hatlai kum 50 noilam ho hi ding ahi.

xxxxxxxxxxxxxxxx

BJP Ccpur tohgon nanoi’a nikho 2 chelha ding Mandal Level Training khumkha hita

B.Lalboi Gangte

CCpur. Jan 8 (ET) : Bharatiya Janata Party (BJP) Churachandpur noi’a Mandal chom chom in VPC Hall, Bethel Veng, New Lamka mun’a nikho 2 chelha ding Mandal Level Training ananei’u tunin (Jan. 8) khumkha ahitan ahi. Kingon achun Vungzagin Valte, Minister, Transport, Tribal Affairs and Hills, GAD, 60 Singngat MLA, Ginsuanhau, Chairman, MANIREDA Govt. of Manipur, Professor Saikhom Tikenra Singh, State President, BJP Manipur chuleh Ex-MDC hon pan anala uvin chuleh Khaipao Haokip, President, BJP Churachandpur kingon ana lamkai in ahi. Training phatsung’a chun BJP kivaipoh dan toh kisai’a Party member kikhom ho Resource Person chom chom hon kichuhna anape uvin ahi.

Kingon phatsung’a Minister Vungzagin in houlimna aneina’a training hi Covid-19 natna um jing lai ahi toh lhon’a SOPs jui’a kibol ahi jeh in Mandal chom chom akon lamkai jousen pan ala thei pon ahi. Hiche kingon kibol lona ajeh hi BJP hi ipi ham ti kichen tah’a hatchet ding deina’a kibol ahidan leh Manipur gamsung’a mipi jouse in party chungchon’a hamphat na amu ding deisah na’a kipum khat ding lunggel natoh nei’a um ahidan aphongdoh in ahi. BJP hi sakho toh kisai’a akisei leh sakho doudal bang’a mitakip in amehmat hi jong leh asung thu tah’a Sakho chikim umna BJP ahi. Christian Missionary suhgenthei kiti hi Congress phatlai in thilsoh atam jo in ahin Centre ah BJP in vaihop akon  Christian ho suhgenthei na nasatah in akhenem in ahi ati. Aman aseibena’a Congress vaihop nanoi’a Gandhi innko bou luboh um jong leh BJP Govt. noi in vang natong hoi jouse dinmun hoi changthei ahi dungjui’a keima jong Cabinet Post dinmun kachan thei ahi. Manipur panna’a BJP in Centre a vai-ahop akon kijot matto na lamlen leh khantou na tamtah muthei ding aum naban’a damthei nalam toh kisai’a Centre Govt. noi’a Prime Minister in ahin patdoh PMJAY chuleh Manipur a Chief Minister in apatdoh CMHT ho patdoh ahi nachung’a gamsung mipi tamtah in damlou natoh kisai’a hamphat na lentah achang thei tan ahi tinjong seibei.

Hiche toh lhon’a MANIREDA Chairman, Ginsuanhau in houlimna aneina’a BJP hi dem ding umlou Political Party khat ahi naban’a gamsung’a numei ho dopjang khai na ding’a scheme chom chom patdoh in aum in ahi. Hiche lah’a inn tin’a twi kai peh ding, innsung’a neh hol numei ho ding’a Gas connection manbei’a peh ding ti ahi toh lhon’a numei jouse in tosot na apeh ding’u hi kilomtah ahi ati. Chuleh BJP Govt. vaihop nanoi’a Churachandpur District jong hamphatna tamtah achan naban’a maban’a Medical College sahdoh nading jong phatsah ahitoh lhon’a CCpur District akon kum seh’a MBBS chai thei ding mi 100 tobang hung um doh thei ding ahitai. Hetthei khat chu BJP vaihop sung’a keima Constituency bou in jong Behiang Police Station semphat leh Sub-Division semthah in aum in, Thanlon a jong Residential School ho hondoh thei ahi dungjui’a themjil tamtah nu le-pa kom pansa’a themjil na anei thei ding’u ahi ati. Aman aseibena’a MDC election aum teng jong leh BJP ticket jouse tosot cheh ding in mipi heng’a ngehna anei in ahi.

xxxxxxxxxxxxxxxx

CM advisor Dr. Sapam Ranjan Singh lamkai na’a Medical team hon District Hospital, Ccpur vetlhah na nei

B.Lalboi Gangte

CCpur. Jan 8 (ET) : Tahsa damthei na ding toh kisai’a Manipur Chief Minister Advisor, Dr. Sapam Ranjan Singh, MLA Konthoujam Assembly Constituency lamkai nan tunin Medical team khat in District Hospital, Churachandpur vilna anei uvin chuleh Covid-19 lou pohlut ahi teng man ding dan toh kisai’a CCpur District kigon tupna vetlhahna ananei uvin ahi. Medical Team hochu Dr. Vumchinpau Tonsing, Chief Medical Officer (CMO) Churachandpur lamkai nan Dr. Vanlalkungi, Medical Superintendent, Dr. Jamthianlal Valte, Deputy Medical Superintendent, Dr. Paulunmang Vaiphei, District Family Welfare Officer (DFWO), Lamsanglian, District Program Officer (DPO) NHM, Seiboi Mate, District Data Manager (DDM) chuleh Medical staff hon vailhunna anei uvin ahi. Chuleh amasapen in Covid-19 dalna ding’a lou CCpur  pohlut ahiteng akikap na’a kiman na ding mun Waiting Room, Vaccination Point leh Observation Room ho vetlhahna anei uvin ahi.

Hiche toh lhon’a MS Conference Hall mun’a Media Briefing achun Advisor to Chief Minister on Health Dr. Sapam Ranjan hin jui medical team Dr. N. Shyamjai Singh, State Mission Director, NHM, Dr. P. Shyamsunder Singh, Director, Health & Family Welfare, Rajeev Irengbam, State Program Manager, NHM, Dr. Jururani, State Program Officer, UNDP, Romee Hijam, Program Officer, UNDP, Dr. D. Apao Remai, Surveillance Medical Officer, WHO leh Arun Meitram, Consultant, UNICEF ho tahlang na anei uvin ahi. Hiche phatsung’a Dr. Sapam Ranjan in Waiting Room, Vaccination Point leh Observation Room ho vetlhah na anei toh lhon’a Observation Room a mi tamjo khat-vei’a kap ahi thei na ding in lupna 8 umbe thei na ding’a kehletbe ding ahi dan aphongdoh in ahi. Covid-19 akon mitakip kivenbitna ding’a kitah tah’a mipin pan alah cheh ding in temna anei in chuleh tuni Covid-19 Vaccination Dry Run District 2 velha ding’a kondoh’u ahi dan atahlang in ahi. Maban’a District 14 a chelha ding chuleh Manipur pumpi’a tuhin Positive case 400 val um in natna akon damdoh percent 97 alhing tan ahi.

Xxxxxx

Forest Minister Awangbow Newmai in COSFOM website hongdoh

Imphal, Jan 8(ET): Forest, Environment and Climate Change Minister Awangbow Newmai in tuni chun Community-based Sustainable Forest Management for Water Resources Conservation in Manipur (COSFOM) website www.cosfom.mn.gov.in hondohna kin main conference hall, Forest Headquarters, Sanjenthong ah ana mangin ahi.

COSFOM hi Indo-German Programme ‘Climate Change Adaption in the Himalaya’ noiya Sustainable Community Forestry, Soil and Water conservation noiya um ahi. Hiche hi Government of India project ahi in chuleh Federal Government of Germany in, KfW akona German Development Bank, Frankfurt in Manipur Forest Department executing agency hina noiya agon ahi in chuleh hiche hi Community Forestry and Water Conservation Society Manipur (CF & WCS).

Hiche project hin Community based leh watershed hojong tui manchah dan ahoina dinga tohgon anei ahi. Chuleh

Minister Awangbow in Chief Guest hina ah team ho chungah akipa nathu aseiyin chuleh hiche website kihongdoh hin Project jong alolhin sahthei ding ahi ati. Aman hiche project a natong mopohna nei Officer honjong mipi in aphatchom pi theina dinga natong dingin temna aneijin ahi. Hiche project hi tu dinmun a akipan til hijongleh district 2 ahuop ding ahi (Ukhrul leh Kangpokpi division), chuleh hiche project in maban a district jouse ahuop ding akinepna thu jong aseiyin ahi.

Principal Chief Conservator of Forest and Head of Forest (PCCF leh HoFF) leh COSFOM a Vice Chairman,  Kereilhouvi Angami in aseina ah, Government of Manipur in akhat veichan nadingin Forest Department noiyah Forestry based project polanga kona fund uma konin abol in ahi ati. Aman aseiben hiche project semdoh nadinga tohgon umhochu kum 4 jen alut in ahi, hiche hi department ho pottho najeh a lolhing ahi tin aseiyin ahi.

Hiche toh kilhon a Forest Department noiya natohdan ho asemhoi ding kinep aum in ahi ati. Chuleh hichea natohna hochu division 2 hoa pat in aum in chuleh khosung mihoa kona jong panlah na aumin ahi.

Hiche kingon ah chun MH Khan, Additional Chief Secretary, Chairman Community Forestry and Water Conservation Society Manipur (CF &WCS-M); Officer holeh Forest Department hoa Staff ho, Lamkhosei Baite, PCCF, Project Director, CF& WCS-M; Aditya Joshi, PCCF & Chief Wildlife Warden; N. Sonzalian, Additional PD, (CF& WCS-M); Konthoujam Hrishikesh Singh, Assistant Chief Technical Advisor, GFA hojong ana jau uvin ahi.

Xxxxxxxx

Minister Rajen in K.P. College, Hiyangthang mun a Block-I Building and Fitness Centre hondohna nei

Imphal, Jan (ET): Fitness and Science Backup Centre and Block-I Building, B. Vic Programme, Kamakhya Pemton (K. P) College, Hiyangthang mun a umchu Education Minister S. Rajen Singh in tuni chun hondohna kin ana nei in ahi. Hichea Block-I Building leh Centre sahna hochu UGC in fund apeh ahi. Hiche kin a Chief Guest hina aman na ah Minister Rajen in tu pet a Government hin Scheme thah leh Programme ho Education lam semhoi ahina dinga agong jingin ahi ati. Chuleh National Education Policy, NEP jong National level ah hondoh in aumtan ahi.

Hiche Scheme noiyah hin simlai dropout umjat jong hatah a asuhnem ding ahi ati. Hiche Scheme hin curriculum phachom pi, Vocational, skill development, personality development courses hojong ahuop ding ahi. Hiche Scheme alolhin theina dinga task force leh sub-task force jong state level a gon ahi tin Minister in aseiyin ahi. Aman aseiben state government injong School Fagathansi Mission jong agong in ahi. Hiche School Fagathansi Mission noiya education department in government schools hojong Assembly Constituency chom chom a umho chu vilna ana nei uvin ahi. Hichea hin building luiho semphat naleh block thah semna ding jong gonin aumtan ahi.

Rajen in aseiyin work order 37 hoa work orders hojong issuing department/ authority dan semho ajuilou jeh uva cancel bol a ana um in ahi ati. Tuhin work order thah jong sodoh in aumtan ahi. Chuleh hichea contractor honjong dan umsaho ajui diuva hetsah ahiuve tin aseiyin ahi.

Aman aseiben private leh Government schools ho kikah a akikheh na umlou ding ahi, Staff holeh Authority ho akikhel louleh tin aseiyin ahi. Chuleh hichea teaching leh non-teaching Staff honjong Government in Education promote abol na kithopi dingin temna aneijin ahi.

Special  Guest of Honour hina ahoulimna ah Agriculture Minister, O. Lukhoi in college Authority holeh K. P College a Staff hojong College dangho toh kibang in aumtan ahi ati. Aman authorities hon competitive spirit nei dingin temna aneijin ahi.

Hiche kingon ah chun Dr. S. Aruna Devi, Vice President, GB, K. P. College, Prof. Th. Ratan Kumar Singh, Director, College Development Council, Manipur University hojong President leh Guest of Honour hina lapum in ana jau uvin ahi.

Xxxxxx

Yangon January 5 kihou nung kisen a Tamu Authority in India-Myanmar border  trade khading deisahna seitei nalai

Imphal, Jan 8(ET): India leh Myanmar in gamgi kah lhona trade umho thua High level a kihouna ana nei uvin ahi. Hichea kihouna chu Yangon ah January 5 a chu ana in chuleh Moreh border akona business umho chu District Administration, Tamu,Myanmar in honding aphal naipon ahi.

Hiche thu toh kisai in Office of the Deputy Commission (General Administrative Department) Tamu Myanmar in December 31 nikhoa chu DC Tengnoupal koma India-Myanmar Gate No. 1&2 chu January 31 chan geiya kikhah ding ahi tia hetsahna ana nei ahi. Hiche hi Coronavirus natna venna dinga kigong ahi.

Hichea Official letter chu Kyaw Win Oo , District Administrator Tamu Myanmar in soi ana kai ahi in chuleh hichea hin tu dinmun a border No. 1 (Iron Bridge) leh No.2 hochu January 31 chan geiya kha hiding ahi tia anasei ahi.

Alangkhat ah Border Trade and Chambers of Moreh Town in December 20 a chu India Border Trade Chambers of Commerce Tamu Myanmar koma athakhel diu ho pehlut na ana nei uvin ahi. Hichea hin amahon India leh Myanmar kikah a trade exchange aum kit nadinga Moreh town akona Namphalong leh Tamu Myanmar a ngehna ana nei uvin ahi.

Moreh border lah dunga trade ho khading tia Myanmar akona aum jinghi business community hon khoh asahnau aphongdoh un ahi.

Covid 19 natna jeh a lockdown ho ana umjeh in mipi tamtah in anatoh nahou achan uvin, lhalo kikah ahilouleh financial loses leh tamtah in jong ahinkhou ana chan uvin ahi. Hinla tuhin mipin jong viruses natna akona kivendoh dingdan ho thua pan ala tauvin ahi.

Xxxxxxxx

Nunkhal khomi hon Jiribam District a um document ho  Tamenglong district a khel dia gihna nei

Jiribam, 8(ET): Jiribam District sunga um Nunkhal kho mipi hon Jiribam District sunga documents hochu Tamenglong District a akhel diuvin gihna anei uvin ahi.

Amahon alung lhailouna hou aseinauvah, Tamenglong District akona Police team a kisei mi phabep hon akhosung u avil uvin chuleh Nunkhal kho hi Tamenglong District in ahuop ahi in hiche toh kilhon a khosung mihon voter enrolment jong Jiribam akona akhel uva Tamenglong District a alah diuvin anasei uvin ahi. Hinla khosung mihon hiche thu toh kisai a anoplou nau thu ana phongdoh uvin ahi. Hichea hin thilsoh toh kisai a hetsahna aum toh kilhon in Jiri Development Organisation team in CSO Jiribam District toh kitho in Nunkhal kho chu ana vil uvin ahi. Hichea hin Nunkhal kho solam pang ah Tamenglong mi phabep achen u mudoh ahi, hinla JDO members hotoh kihouna anei jou uvin Tamenglong District sung a chengho chun ana dalha tauvin ahi.

President, Jiri Development Organisation N. Sadananda Meetei in Imphal Times thuso koma aseina ah Jiribam leh akinaipi district kikah a boundary thua kiboina umho chu, mi phabep hon Jiribam District sunga lut uva signboard umho jong Tamenglong District min a an tahdoh u ahi. Hiche thutoh kisai in Jiribam mipi hoa dingin lunglhai umlou tah khat anasoh dohtan ahi. Hichea boina aum kahlah ah chun Tamenglong DC in Nunkhal kho ah Police team anasol a khomi hon a document hou nikho 10 sunga akhel uva, Tamenglong District akona akikhel diuvin gihna ana nei sah in ahi, tin Sanadanda in aseiyin ahi.

Aman aseibena ah Jiribam District sunga hi Community chom chom kilung toh tah a chengkhom u ahi, hinla hitobang a kiboina umho jeh a thilse aumleh koi mopo dingham tin dohna asem in ahi.

Sadananda in aseiyin Tamenglong District in ahuop ahi tia asei namun hou jong hi Jiribam Revenue District noiya Village No. 41 a um ahi ati. Hitobang a kiboina umho hi alang nia communal harmony aumthei nadinga phatah a kihouna aum angaiye tin aseiyin ahi.

Xxxxxxxx

Bird Flu: India sunga State 6 hon Avian Influenza natna aum thu phongdoh tau

New Delhi, Jan 8: Centre in Friday nikhoa thuso anei nauva India sunga States 6 hon Bird Flu natna, Avian Influenza aum thu aphongdoh tauvin ahi. Chuleh State dangho jong kiveng dingin temna jong aneiyin ahi. Hichea States 6 hochu ahileh, Kerala, Rajasthan, Madhya Pradesh, Himachal Pradesh, Haryana leh Gujarat ahiuve tin Union Animal Husbandry Ministry in aphongdoh in ahi.

Centre in hichea States Bird Flu kimudoh namunhon hiche vacha natna hi avenbit ding uvin hetsahna ana nei in ahi. Chuleh Central akona team hojong Kerala, Haryana leh Himachal Pradesh hoa epidemiological Investigation bol dingin gon ahi tin Ministry chun aseiyin ahi.

Chuleh State vacha natna umlouna munhon jong vetlhah na aneijing uva vacha thi umho ahetsah uva hichea kona gangtah a suhlhap a aumna dinga pan alah diuvin hetsah na aneijin ahi. Delhi ah vacha thijat chu DDA Park, Hatsal Village ah 16 mudoh in ana umin ahi, chuleh hiche thu toh kisai in AH Department NCT, Delhi in kiven nadingin hichea samples kiladoh hochu ICAR-NIHSAD komah pehlut ahi in chuleh tuhin a result nga ahijing in ahi.

Vacha vahho (Poultry Farmer) ho leh mipi hetthei ding in, hiche natna toh kisai a AHD Secretary in health ministry koma a hetsahna ana nei in ahi. Chuleh hichea hin State ho chu hiche vacha natna thua awareness neidingin temna aneijin chuleh hichea hin vacha holeh ahtui hochu neh dinga lhing ahinai tin hetsahna anei in ahi.

Xxxxxxxx

Senapati District a Covid 19 Vaccination Dry Run ana kibol

Senapati, Jan 8(ET): Tuni chun Senapati District sung Session 3 hoa Covid 19 Vaccine kapna dinga Dry Run District Hospital, Senapati District H. Q,; Sub District Hospital, Mao; leh Primary Health Centre, Maram hoa ana umin ahi. Hichea session ho ah chun mopohna nei Medical Officer hochun beneficiary mi 25 tobang ho Dry Run a dingin  test anabol in ahi.

Hichea Covid 19 Dry Run team ah chun CMO, DIO, DPM 2 UNDP leh Vaccination Officer 5 ana jau uvin ahi. Vaccination mun semtupna ah chun room 3 achomcheh a semin aumin ahi. Hiche hochu ahileh, Waiting room, Vaccination room leh Observation room ahiuve. Chuleh hichea waiting room ah chun, khut silna/ sanitization facility jong koiyin aumin ahi. Social distancing dan jong feet 6 kikah a um dingin vettup na aumin ahi. Vaccination room ah chun beneficiary changho chu mi khat bouva alutdiu phalpeh ahi.

Chuleh Observation room ah chun beneficiary muho chu minutes 30 tobang damdoi kapjou tengleh ngasah ahiuvin, chuleh hiche mun ah hin donding tui leh toilet facilities jong koi ahi. Hichea thil kigong jouse chu SOP dan kisemho dungjuiya kibol ahi. Hichea Covid 19 Vaccine kapna dinga hin vaccination Officer khatcheh beneficiary muho velha dinga gon ahi.

Chuleh hichea Vaccination Officer nina chun beneficiary muho chu Go-Win application noiya aadhar card ahilouleh Government photo ID manga vetlhah na ana nei ji ahi.

Vaccination Officer thumna chu Observation room a um ahi in chuleh aman hichea hi physical distancing dan ho jui ahina dinga vettup na anei ahi. Chuleh damdoi kap ahijou tengleh minutes 30 tobang vetlhah na ana nei ding, damdoi kikapna a kona side effects aum ho avetlhah ding ahi.

Hichea dry run Covid 19 Vaccine kapna dinga aumjou in Medical teams holeh District level Tasks Force hon Covid 19 Vaccination thua vetlhah na ana nei uvin ahi. Hiche kihouna ah chun Deputy Commissioner Chamber jong chairman hina la in ana jau in ahi. Hiche kihouna ah chun CMO in hiche kin a alolhin danho anasei in ahi. Hiche kihouna ah chun District Level Tasks Force for Covid 19 members holeh Medical Officer holeh Workers hojong ana jau uvin ahi.

XXXXXX

Lukhosei Zou kilhadoh jahda jeh a Nupi Samaj hon kiphinna panta

Imphal Jan 8(ET): ADC Chandel a chairman anahi Lhukhosei Zou inn a dangka crore 27 lam khamnathei kimat doh jou a hiche thilsoh toh kisai a panlah na nei NAB  Addl SP. Th. Brinda transfer kibol le Lhukhosei ZOu mona nei lou ahi tia kilhadoh na chung chang a case chu adih lou lamtah a kitan ahi ti ngohna nei pum in Nupi Samaj ho in tuni in kiphinna ana nei pan taovin ahi.

Nupi Samaj ho chun Lamphel mun a kisuh khomna an anei jou uvin Chief Minister pa toh kimuto ding a CM bungalow lam ana jot utoh lhin in Nupi Lan complex mun a kihou na anei chai uva Chief Minister pa umna ajot lai uvin police ho in ana ting tan uvin ahi. Chief Minister pa kimupi ding chun Nupi Sama lamkai mi 6 lam ana kilut sah in ahi akiti.

Xxxxxx

India-Myanmar gamgi a thil kipo le ho kimandoh

Tengnoupal, Jan 8(ET): Myammar sung lam a pot lut ding anchang bag 385 lam le Tamu lam akon hung kipo lut  Maynma r lam neh le chah chom chom matdoh na tuni in  43 Assam rifles T.Minou Post ho in ana mandoh uvin ahi. AKimandoh ho chu Moreh police station a pehlut ana hitan ahi.  Hiche thilsoh hi tuni jingkah lam nidan 3.30 am  lam a an asoh ahi akiti. Hiche thilsoh chu Haolenphai lam  a thil poh le thu an akijah toh lhon a vetlhah na ana kinei na a mudoh a ana um ahi. Tu chan in akimandoh anchang chu koi a ham ti hetdoh ahi hihlai in ahi.

xxxxxxxxxxxxxxxxxx

Governor in lekha bu thenso

Imphal, Jan 8(ET): Manipur Governor Dr. Najma Heptulla in tuni in “Making of a General – A Himalayan Echo” kiti lekha bu (Redt) Lt. Gen. Konsam Himalay Singh, PVSM, UYSM, AVSM, YSM in ajih chu virtual mode in Durbar Hall, Raj Bhavan, Imphal a  thenso na ana nei in ahi. Hiche thenso na kingon a Governor Dr. Najma Heptulla in asei na a  Lt. Gen. Himalay in Indian Army ho hiche lekha akon hin kithang at I umtah aso in ahi tin ana sei in ahi.

Governor nu in asei na a lekha hi ama jih keu hilou in ama chung thu le ama hinkho a ato ho thu ahin, lekha hin Indian Army keu hiilou a Manipur gam jong achoisang ahi tin ana sei in ahi. Himalay in akhang don lai Manipur le tu le tu Manipur kibah loud an ho jong ana jih in ahi akiti.  Manipur sung boina um na jing mu nana hijeng vang a hitabang lekha akon ahi ipi tabang ahung hithei dan le gam nom tah ahung hithei dingdan ho akisei in ahi ati.

Hiche lekha chu aki thenso masang a Pradip Phanjoubam, Senior Journalist le  Editor, Imphal Review of Arts and Politics in vetlhah na ana nei ahi akiti. Hetthei khat chu Himlay hin lekha bu Romancing the LOC kiti khat jong ana jih ahitan ahi. Hiche lekha bu thenso na kingon achun Radhabinod Koijam, Former CM, I. Hemochandra, former minister, Prof. Amar Yumnam, Vice Chancellor, MU le  Prof. Behari ho in jong panlah na ana nei uvin ahi.