64th UZO Special Assembly a UZO leh ZC, ZYO leh ZYA,...

64th UZO Special Assembly a UZO leh ZC, ZYO leh ZYA, ZSP leh ZSF hon kijop matna neita lou ding’a President UZO in phongdoh

838
0
SHARE

64th  UZO Special Assembly a UZO leh ZC, ZYO leh ZYA, ZSP leh ZSF hon kijop matna neita lou ding’a President UZO in phongdoh

B.Lalboi Gangte

Ccpur. Feb 29 (ET) : United Zou Organisation, GHQ in tunin Tuibong Community Hall mun’a 64th Special Assembly ana chelhah pi uvin ahi. Kingon achun  Chinlunthang Zou, President UZO General Headquarter in Zou ponlap kaidoh na anei in chuleh Zou Nam mite March 2019 akipat 2020 sung’a ana mollem saho geldoh naphat jong ana mang uvin ahi. Chinlunthang Zou, President UZO General Headquarter in UZO Special Assembly kibol lo na ajeh hilchetna aneina’a achesa March nisim 29, 2019 nikho’a UZO Annual Assembly 2019 in Zomi Council hi defunct a anaphon ahidan asei in ahi. Chuleh defunct a akiphondoh na ajeh chu Zomi sung kivaihom dan semthah kit ding leh semtup ding deina jeh’a ana kiphongdoh ahi. Zomi Council leh ZRO semthah na (reform) ahung umthei khah leh ti’a lungmong tah’a nga ahi lai in lam dang tah in Jan. nisim 25, 2020 nikhon Singngat Haosa Khupkhanhau inn mun’a Solar Lamp/light kihom ding ahi ti’a mi honkhat ana kaikhom uvin thu leh la kicheh tah umlou in UZO (Zomi) phudoh in ana um in ahi. Ahin hiche chung thu kholchil na akinei na’a Zomi lamkai Thanglianpau, Singngat A/c MLA Ginsuanhau Mate, ZDV faction President Kamkhanpau hon Hangkhanpau, Ex Minister UZO (Zomi) President ding’a anatep’u ahidan hetdoh ahi jeh in Zou mipi in jong demna ana kineiyin ahi ati.

Hiche toh lhon’a UZO President in aseibe na’a dei umlou tah hijong leh Zomi ho kigop khom nathei ding ahi pou leh tin United Zomi Organisation chu United Zou Organisation a khel ding anakit khel talouvin Zou Tribe Council (ZTC) joh’a khel doh ding’a lunggel nei jong ana um jeh in mipi lung anasuhling lao ahidan jong atahlang in ahi. Chu in Feb. nisim 1 leh 9, 2020 nikhon VPC Hall, Gouchinkhup veng, New Lamka mun’a UZO (Zomi) Cabinet expansion leh defunct Zomi Council delegates in Hangkhanpau, P. Tunzamang, S. Khamchinthang, Pumkhanmang, Mang David Kholon, Thongkhanlian leh H. Lalkhawm ho anagong uvin defunct Zomi Council Chairman John K. Ngaihte in pom na leh lalut na ananei in ahi. Ahin Zou sung hi Nam dang ho kichep na jeh’a UZO (Zomi) hung pengdoh ahidan hetchet be ahi jeh in ponat aum lheh in ahi ati. Chuleh UZO Block jouse, ZYO HQ leh Block ho chuleh ZSP HQ leh Block hon UZO (Zomi) lamkai a kiphong T. Hangkhanpau, Ex Minister, President Janata Dal (Manipur) chung’a themmo channa leh demna thu ana kiphong doh chu Zou nam mite jouse in jong akihe soh kei in ahi. Semthu UZO (Zomi) toh kisai tuni chan in UZO GHQ in ima cha akisei naipon chuleh semthu UZO (Zomi) lamkai self style President T. Hangkhanpau leh self style Secretary Pumkhanmang,  Zabellei Govt. grant in Aid School teacher hon athil bolthu akon kithem channa ding in Zou sung’a Hou lamkai, Pastor leh Upa ho pankhom ding’a tepna ananei’u ngaisah’a ana kou lou jeh uvin Houbung Pastor leh Upa ho jeng jong themmo anachan uvin ahi. Hitobang thilsoh anahi jeh chun UZO Assembly in hitobang natoh neiho demna nei ding hi pha hilou ham tin doh na mipi jong ananeiyin ahi.

Alangkhat’a UZO palai leh mipi ho het ding aseina’a Zomi sung semphat joh tah sang in defunct pum pum in akaitel uvin Zomi Council in asemthu UZO (Zomi) palai anapom tah jeh uvin um nading mun (room) aum tah lou jeh in UZO in hah akisa in ahin nop leh noplou thu chuleh dei-le-deilou thu hita louvin Zomi Council in UZO toh kijopna asuhlhap hi kipom chah ahitai tihi Zou nam mite hon Zou khangthu ading’a melchih thei khat ahitai ati.

Chuleh tuni apat UZO leh Zomi Council, ZYO leh Zomi Youth Association, ZSP leh Zomi Students’ Federation in kikhut jopna aneitah lou ding ahi tin phondoh na aneiyin ahi. UZO India in Zou/Zo identity, literature, custom & culture leh khangthu venbit na ding’a pan athah’a lah hi ding hiche panlah naho apoimo dungjui’a UZO (Myanmar) leh UZO (USA) toh kikithokhom ding ahi tinjong aseibei.