Sept 28, 2016 Local news

Sept 28, 2016 Local news

1755
0
SHARE

Sorkar in ILPS Bill thah sem ta; ‘cut off year’ 21/01/1972’a kisem

Imphal, Sept. 27 (ET): State sorkar in ‘Manipur Regulation of Non-Local People Bill 2016’ bill thah draft abol tauvin, ahin hiche’a base year hi JCILPS ho thum bang hilouvin January 21, 1972 kum joh hidin akikoi tai.

  State Home Department in draft bill hi Additional Chief Secretary Home official website ‘a atahdoh tan, Bill chungchang’a japi in angaidan asei diuvin kouna aneiyui. Bill thah kisem dungjuiya, gamsung mi dihtah hohi India gam-mi hi’a chule Constitution (Scheduled Castes) Order, 1950 leh Constitution (Scheduled Tribes) Order, 1950 chule state sorkar in aphat dungjuiya apeh Other Backward Classes noiya um ipi nam hijong leh Manipur gamsung’in Statehood amu jou, January 21, 1972 kum’a kon Manipur gam’a cheng ahilouleh achilhah ho ahi, tia kisei ahi.

  1972 electoral roll ‘a amin um ho kiseina ahi’in, 1972 kum’a electoral roll umlouna polling station ho’a, electoral roll anaipen’a um ho’a suhdihna kinei ding ahi. Draft kibol bill thah’a hin Article 11 a aumin, Non-Local People, owner, pass chule gamsung’a gam-pam miho achen thei nading nikho jat hilchenna kinei ahi. Central sorkar, state sorkar ahilouleh local body ‘a natong hon identity card apeh uva ahileh legislation thah kisem hin ahop tha louding ahi.


Gamsung’a koiman kaani-lei abol theilou ding ahitai: KNO

B.Lalboi Gangte
CCpur. Sept. 27 (ET): Kuki National Oraganisation (KNO) Under Secretary, Information & Publicity KNO, T. Stephen in mipi te hetding le juiding’a thuso aneina’a achesa kum phabep sung’a pu le pate a kon gou manlutah’a ihin neijing’u thinglhang gam, kihinsona’a ihin neijingu igam uva Anche louhing, mim le chang, sum le pai muna dia itu’u kaani (poppy) itu’u hi KNO 2016 Convention a chun aphatchomna le aphatchom louna lunggil tah in velvetna ana kineijin ahi ati.

  Stephen in aseina’ah, kaani lei kibol hin sum le pai lam’in insung phabep in phatchompina’n nei jeng jong leh zalhang hinkho’a khangthah te hinkho asuhset dan toh akilepton ahileh, hinkho nasatah’a asuhkhah tahjeh in phamo akisa lheh in ahi. Ahung lhung ding kum ho’a khangthah ho hinkho ahin suhsetbe ding dan ho jong vetchil ahitoh kilhon’in KNO in jong Poppy Plantation kikhah ding ahitai, tin thulhuhna akineitai.

  Chuleh ahunglhung ding 2017 kum’a Kaani-lei bol umtalouva alei bol go hon anche louhing tuna ding joh’a abol tahdiuvin hetsahna aneijin ahi.

  Aman aseibena’ah, ja-lei bolna dia gamnei haosa ho jousen jong ama ama gam huopsung cheh’a kaani-lei akha diuvin jong hetsahna aneijin ahi.

  Chuleh print media leh social media mangcha’a ahung kiso hi 2017 kum’a kipat KNO in kichepi ding ahitah jeh in koitobang ama mimal/haosa hijong le ajuilou akimandoh ahung um’a gotna akipeh le aman mo akipoh ding ahi tin T. Stephen, Under secretary, Information & Publicity, KNO a kuon thuphon kimu’n aseiye.


“Cultural for Peace, Unity and Integrity” noiya Sadar Hills in Chavang Kut mang ding, District level committee kisem

Sadar Hills, Sept. 27: Kum 5 tobang Sadar Hills, a Kut ana kibol talou chu tukum Kuki Innpi Sadar Hills tohgon nanoiya Brig. Thomas Ground Kangpokpi a, Chavang Kut Sadar Hills manna din tohgon aum’in chule hiche kin a mopo din, District level committee jong akisem dohtan ahi. Hiche golvah kiman ding tokilhonin Kangpokpi Town Committee Office a kihouna ana um’in, Committee members dingin Lunthang Haokip, Executive Member ADC Sadar Hills chu District Level Kut Committee Chairman dingin akilhengdoh in, Jampu Kipgen, Khuplet Haokip, President, Kuki Inpi Twilang Block chule Thanggin Kipgen, President TSA Sadar Hills chu General Secretary, Treasurer chuleh Information & Publicity Secretary dingin anakilhengdoh in ahi. Executive member dang 40 jong lhendoh in anaum’un, chule golvah lolhing tah le thupitah’a manthei nadingin Sub-Committee khat jong sembe din committee ho tha anakipe’n ahi. Sadar Hills Kut Committee in aseina’a chun sun le jan’a Kut kin kimang ding ahin chuleh Miss Kut kilhenna jong umding, cultural dance, social awards chuleh adangdang jong’um ding ahi tin aseiyin ahi. Committee Chairman in aseina’a chun ahunglhung ding September 29 nileh kingon toh kisaiya District Council Hall, Kangpokpi a um kit ding ahi, committee member ho jouse jao teidin ngehna aneiyin ahi.


Thadou-Kuki min’a pao le lekhabu kiminvo ding doltah ahi: Thadou Inpi

Imphal, Sept. 27 (ET): Achesa nisim 27th Sept. 2016 nikho’a Eimi Times a hung kiphong dingjuiyin themjilna munho’a Kuki paova pol-VIII chan hetpehna um ding ahitai, ti’a hung kiphong chun Kuki nampi sung’a lunggelthei jouse le khanglai tampi alungdong sah tan ahi tin tuni’n Thadou Inpi General headquarters a kuon thuphon kimu’n seiye.

  Kiloikhom thuphon in aseina’ah, Kuki Tribal Dialect/Kuki Dialect kiti jong hi ahung kuondoh na kihelou ahi. Ajehchu tuni channa Guwahati High Court thutan dungjuiya Thadou-Kuki min’a pao le lekhabu kiminvo ding doltah ahi ati. Chule lungdon umtah kit khat chu, Manipur’a cheng Kuki population 28,306, Kuki ho chenna kho 55 chule school 55 bou ahi, ti’a hung kiso jong hi Nampi ichangeiya asuhneo hitam? tin thudohna aneijin ahi. Ahilouleh Kuki hi Nomenclature hitalou’a sub-tribe khat kisodoh kigo hitam? ati.

  Chuleh Thadou-Kuki Literature Society (TKLS) natohna nuoiya lekhabu B.A. chan geiya MIL simlai chapang hon achoi’u hitalou ham? Ahilou leh Manipur State Govt. in Kukite sung’a sagu ase ngap ham? tin kiloikhom in alung opkaina thu aphongdoh in ahi.

  Hijeh chun State Sorkar leh adeh’a mopo hon hiche chungchang’a thilphalou ahung sodoh le bulhingset’a mo akipoh ding’u ahi tin Secretary General, Thadou inpi, Kamboi Kipgen in gihna jong aneiyin ahi.


OMTF le JAC AATB in gihna nei

Imphal,Sept. 27 (ET): Outer Manipur Tribals’ Forum (OMTF) le Joint Action Committee Against Anti-Tribal Bills (JACAATB) in 2016 July nisim 18 nikho’a Haokip Veng, Imphal a kihoulimna aneilhon nah’a thulhuhna aneilhon ho avel in mipi hetding in tahlangna aneilhon in ahi. OMTF le JACAATB a kon kimu thulhut in aseiyun, aboi laitah le ngaichat ahilaitah a amite (thinglhangmite) kana awcheng jalou MP le MLA ho hi thinglhang mite chen na munho’a vahle theilou ding’u ahi ati. Chuleh MLA ho le MP ho’n kiloikhomteni thupeh nahsahlouva akoilhon a , hiche a kon thilse ahungsodoh’a ahileh kiloikhom teni’n mo kipolou ding ahi. Chukit leh hitobang MLA ho le MP ho toson a pang kiloikhom ho le mimal ho jong thinglhang mite doudal’a kilading ahi tin kiloikhomteni’n July nisim 18 ni’a kihoulimna aneinalhon a chun kilolna ana neilhon in ahi.

  Anti-tribal bill pass kibol hi Congress party lhohbu a kon hungkipan ahijeh a thinglhang mite chenna mun jouse’a Congress party boycott bolding ti’a kihoulimna’a chu kilolna ana kinei ahi tin thulhut chun aseiye. Congress party hi July nisim 18, 2016 a pat na thinglhang mite chenna gamsung jouse’a ban ana kibol ahi’n, national hihen regional party hijongleh, Congress toh kitimatna nei party jouse thinglhang mite chenna gam sung’a ban kibol thading ahi tin thulhut chun aseiye.

  Thinglhang mite’n Manipur gamsung a self-determination neina ding’a na ahungkitoh patna kum khat val ahitan, hinlah tunigei hin Centre le state hin thinglhang mite kiphin na ho le ngehna ho hi nahsahlou tah in akoi nalaiye tin thulhut chun aseiye.

  Alangkhat’a, phaicham a cheng Meitei hon Manipur sorkar toh kitho’a Scheduled Tribe list a minchuong teina ding in kiphinna ahin pankit’uvin ahi. Meitei te’n Scheduled Tribe athum’u hi thinglhang gamho avatlal jeh’u le thinglhang mite’n privileges ineiho’u avatlal jeh’u ahi tin thulhut chun aseiye. Hitolhon chun Meitei te’n Scheduled Tribe athum’u doudalna vetsahna in OMTF le JAC AATB in Prime minister heng a memorandum khat akiseplut’e tin thulhut chun aseiye. Chuleh ahunglhung ding nikho ho’a jong Meitei te’n Scheduled Tribe athum’u hi kidoudal jingding ahi tin thulhut chun aseiye.


FCZ fans hon club kithopina ding’a donation box ana hong’u

Imphal, Sept. 27 (ET): Tunaicha’a Kuki football club minthang pen FC Zalen in AMFA khut’a ‘fine’ ananeh’u toh, lamchom chom’a vangsetna anatuo’u toh kilhon’in tuni’n ‘fans’ mopohna nei phabep hon donation box ana hong uvin ahi.

  Tunilhah 2pm chun Polo Ground, Imphal ah FC Zalen in 11 channa MSL a chun Tiddim Road Athletics Union (TRAU) ana kimaituopi uvin ahi. Fans a mopohna nei mi phabep hon gate thum ho’ah donation box anakoi uvin football ve’a hung FC Zalen fans hon jokham kham in sum ana henglut uvin ahi.

  Hiche donation box a vetsui thei tah khat chu, eimi ho bou hilouvin football ve’a hung jat dang hon jong sum ana lehlhauvin ahi. Tuni’a sum kidongdoh jat chu agom’a sang-ko-le-jathum-le-somli (Rs. 9,340/-) alhing’e. Alangkhat’ah kichep chu phulou helouva go hatah’a ahung juh jeh in match kim laitah in, banjom dingin kichep voh hai in anaumtai.


Govt department chom chom in tohmun alah ho thuchen apeh diuva CEO in sei

Imphal, Sept 27 (ET): Tukum April nisim 1 nikho’a kon state sorkar noiya um department chom chom in natoh alahna (recruitment) ho jouse thuchen apeh diuvin Chief Electoral Officer, Manipur in thumna aneiyin ahi.

  Political party chom chom Imphal khopi’a ahung-u September nisim 20 leh 21 nikho’a hiche thu Election Commission of India heng’a apohdoh utoh kilhon’a thuchen khol ding’a thumna anei ahi. Chule recruitment kibol hohi Employment Exchange, Roster reservation chule adang dang notification kipe dungjui hinam tijong state sorkar in kichen tah’a apeh ding’a CEO in thuhilna anei ahi.


1st Kathange Gospel Idol 2016 kipanta

idol 1 - webChandel, Sept. 27 (ET): Manipur sung a Gospel lasathem lhendohna ding a kiguong 1st Kathange Gospel Idol 2016 tuni chun Chandel District sunga um Tengnoupal Vangkho a “I will praise the LORD all my life; I will sing praise to my God as long as I live” Psalm 146:2 thupi mangcha in lolhingtah in ana chelha in ahi. Tuni kigon a chun Chandel ADC Chairman Lhukhosei Zou Jin-gun in apang in ahi.

  Tuni kingon a chun Chandel ADC Vice-Chairman Th.Joy Lamkang, Executive Member Kh.Morung Maring, ADC Member Morungson Maring chuleh 6 Sita DCC ,ADC Member S.Tongpao Mate in jong pan ala’uvin ahi.

  Kingon a chun St.Peter’s School simlai hon vetnom umtah Choreography anavetsah’uvin, chuleh contestant hon jong la ngainom umtah tah asa’uvin ahi. Tuni kitetna a chun contestant 75 in Kathange Gospel Idol 2016 title lahna ding in nasatah in kitetna ana nei’uvin ahi.

  Jin-gun a pang Chandel ADC Chairman Lhukhosei Zou in ahoulimna a aseiyin, la le music hi’n angaiho asulip in chule alungsung’uva thilphabolna ding le lungmon na lhagao akhumlutpeh’e ati. Christian te ding a la le music hi pathen houna ding a manchah phatah khat ahi. Lasathem ho hi ateh akhang in angailut ahi’n, tuni kitetna a khangdong lasathem tampi in pan alah’uva pathen vahchoina la aw bem bem a asah’u hi gamsung a cheng Christian ho ding a vangphat umtah ahi tin Lhukhosei Zou in aseiye.

  Aman aseibena a chun , India hi secular gam ahijeh a asung a cheng hon hou le bih lam a adei dei juinathei rights anei’u ahi. Ahinlah BJP vaihomna state phabep a minority Christian ho kisuh genthei jing thu hi akija jing in, hiche hi gamsung ding a vangset umtah ahi ati. Chuleh khonunggeiya mipi’n fundamental rights ho ,adeh’a right to freedom of religion, ahina ding bangtah a amutheina ding’uva ahunglhung ding State Assembly election a mipi’n Indian National Congress atosot ding’uvin Lhukhosei Zou in temna aneiyin ahi.

  Kinneipa’a pang S.Tongpao Mate, ADC Member in ahoulimna a chun, Pathen in mihem ahinsem a hi boltheina (talent) khatcheh toh eihin semtha’u ahi tin aseiyin ahi. Hitobang kingon kibolho hin khangdong ho lasah lam a atilkhou ding ahi tin jong aseiyin ahi.


MLA 2 in achunglhon a boycott kibol lahdoh ding’a YPA heng a petition seplut

imagesCCpur. Sept. 27 (ET): ILP bill toh kisaiya Paite MLA ni kumkhat val ETSAN in boycott kibolna chungthu toh kisaiyin tunin Young Paite Association (YPA) Gen. HQ in Hiangtam Lamka a um Main Office a thuso miho akimupiuvin ahi.

  Tuni Press Conference kibol chu Churachandpur A/C le Thanlon A/C MLA teni’n achung lhon a YPA in boycott abol lahdoh ahina dinga petition aselut lhon jeh a kibol ahi. Hetthei khat chu nengkum August nisim 31 ni’a chu anti-tribal bill thum ho deiloujeh a kiphinna a milham mi ko in Police ho khut’a thina anatuo’uva tunigeiya aluongdamsa’u District Hospital Morgue a um nalai ahi.

  YPA GHQ President le General Secretary in aseilhon nah’a chun,MLA teni’n anti-tribal bill ho douna thu seilouva kiloikhom heng a boycott lahdohna ding a ngehna aneilhon hi lungdon umtah ahi tin aseilhon’e.
YPA in “an answer to the plea to revoke the ETSAN (boycott) of two MLA, Mr.T.Phungzathang and Mr.Vungzagin Valte and announcement” thupi mangcha a thulhut abolna’a chun, MLA teni hin anti-Tribal Bill thum ho tosotnah’a soi akailhon jeh le amite ajohdoh lhon jeh a October nisim 8 ni a kipat a chu boycott ana kibolkhum lhon ahi ati. Kiloikhom President Khailianthang Tonsing le Gen.Secy. Lianmuanthang Valte a kon kimu thulhut chun aseiyin, 2015 August nisim 31 nikho thilsoh a chun mihangsan ko (9) in ahinkho anatohdoh’uvin , akisukha tampi jong ana um in ahi. Ahinlah MLA teni hin bill thum ho chungthu a akamcheng khat jong ana kehdoh lhon po’n ahi. Hiche phat laitah a MLA teni chun kisihna le lung’opkaina jong ana neilhonlou dan in akilang in ahi. Ahinlah tu’a kiloikhom heng a boycott revoke ahina ding’a petition ahinselut lhon hi kiloikhom ding a lungdon umtah ahi.

  MLA teni’n kisihna neilouva kiloikhom heng a achunglhon a kikoi boycott lahdohna ding petition ahinselut lhon hi kiloikhom in kidang akisan ahi. Tribal martyr mi ko (9) ho’n justice amukahseuva MLA teni chungthu hi kiseilou ding, achunglhon a boycott kiboljong kiladoh louding ahi tin kiloikhom thulhut chun aseiye.


Senapati district a World Tourism Day kinit

tourism - webImphal, Sept. 27(ET): Manipur Tourism Department in Mapao Zingsho kho, Senapati district ‘a ‘Tourism for All- Promoting Universal Accessibility’ ti thupi in kin-gon anit in ahi.

  Kin-gon’a Chief Guest Chief Minister Okram Ibobi Singh in tourism hin industry akhantou sah in chuleh sum pun (investment) lentah ngai cha lou ahi, tin aseiye. Chule khosung’a tourism industry machal sah nading’a state sorkar in angaicha ho apeh ding ahi, tin aseiyin chule gamsung’a hung kholjin ho, japi ten liemna anei din jong temna aneibe’e. Khosung in angaichat facility ho jouse hi gas agency panna hijong leh aganna thei pen’a kipe ding ahi, ati. Tukhang’a twi kiphuh hi kemsuh’a gas kimang ahitai, tin aseibe’e.
Deputy Chief Minister Gaikhangam, M Prithviraj Singh, Parliamentary Secretary (Youths Affairs and Sports/Tourism), Yamthong Haokip, Saikul A/C MLA, O Nabakishore Singh, Chief Secretary, RK Nimai, Consultant to Manipur Government, Nidi Mani Tripathi, ECO, Manipur government chule hetthei tah’a um government official dang dang jong apang uvin ahi. Kin-gon’a cultura programme, Pheichak (Tangkhul laam) chule Ptrei Khapung drama vetsahna jong aneiyui.


DESAM in faculty kilah dan doudalna’a Culture University kot khah

desamImphal, Sept. 27 (ET): Democratic Students’ Alliance, Manipur (DESAM) hon Tuesday nikhon faculty kilah dan doudalna in athah beh’a hondohna kinei Culture University kot akhah tauvin ahi.

  Tuesday sun nidan 1.30 don’a simlai volunteer tamtah kikhom uva University office gate hi phat teplouva ding’a akha-u ahi. Volunteer hon Culure University gate akha masang jep uva vice president, DESAM W Anand in thuso miho akimupi in, sorkar in University kibol na’a quality asem ding’a ngehna akinei jing vang’a faculty hi lamdih louva kila ahi, tin aseiye. September nisim 17 nikho’a phondohna kinei Culture University ‘a kila mi 19 hohi abon uva board member hotoh kinaina (relative) nei ngen ahiuve, tin aseiye. Chule Master degree ho bou lah ding’a notification akisodoh vang’a, 12 passed bou hi’a candidate jong kila ahi, tin ngohna aneiye.

  Ipijeh’a recognised akibol masang’a Sankritan hi syllabus’a kipan sah ham, tinjong DESAM vice president in thudoh aneiye. Theatre faculty kilah thu’a DESAM VP in ‘Auto Driver’ kiti film produced bol khat akila’e, tin aseiyin ahi. ‘Subject’a lhinna neilou khat, film produced bol khat chu itidan’a post faculty ‘a kila thei ham”, tin thudoh aneibe in ahi.


JCILPS volunteer hon gamdang mi 13 man be kit

ilps - webImphal, Sept 27 (ET): Gamsung’a document neilouva hunglut gam-dang mi 13 Tuesday jingkah nidan 7 don in JCILPS volunteer hon aman uvin, amaho hi West Bengal gam’a kon Dimapur chan train’a hung uva, hiche jouva Imphal khopi jon’a hung ahiuve.

  Kol hohi contractor L Baleshware in Leishang Hidden, Canchipur, Imphal West sah na ding’a atha-lah ahiuve. Tu masang’a JCILPS hon state sorkar in Inner Line Permit system chepi nading dan apohdoh kahse’a gamsung’a kol-leh-vai gamdang miho kilut sah louding ahi, tia thuso anei ahi. Committee in ILPS toh kisai bill phatsahna ding’a legislative assembly toukhomna achombeh’a September nisim 21 nikho kah’a akou ding’a thumna anei ahi.

  Akiman mi 13 hohi JCILPS hon Motbung Keithel ‘a alamtin-u ahi’in, Winger (regd no. MN 03-0566) ‘a hung ahiuve. Thuso miho heng’a Convenor JCILPS, BK Moirangcha in mi phabep in ILPS chepi nading’a thumna hi agelkhoh poi, tin alunglhai louna thu aseiyin ahi. Chule winger gari neipa Kongba Kshetri Leikai’a cheng K Subash leh contractor L Baleshwar nikhat sung’a gamdang miho kipoh thu’a hilchenna peh’a JCILPS office’a kouna jong aneiyin ahi.


KSO CCPur dissolved hita, election um ding

CCpur, Sept. 27 (ET): Ahunglhung ding October nisim 4, 2016 (Tuesday) ni leh KIC Hall,Tuibong a KSO Churachandpur election kibol ding ahi tin KSO-GHQ General Secretary Seiboi Haokip a kon kimu thulhut in aseiye. Chuleh tu’a kipat KSO Churachandpur executive body dissolved ahita’n, incumbent president in mopohna neiding athah kilhendoh kahse’a caretaker president panmun atuhding ahi tin thulhut kimu chun aseiye.

  Thulhut in aseidan in election hi executive post thupi hobou lhendohna ding a kibol ding ahi’n, post neojep ho hi phat che dungjuiya KSO General Headquarter in executive body thah ho recommendation dungjuiya kisudim ding ahi ati. Ahunglhung ding election a kilhengdoh ding post ho chu President, Vice President, General Secretary, Education Secretary chule Finance Secretary ahi.

  Intending candidate hon October nisim 2 kah a nomination file aselut ding’u , October nisim 3 nile scrutiny umding ahi tin thulhut chun aseiye.

Electoral College: Electoral college hi KSO in angaiya ana chepi bang a, KSO Churachandpur noiya um block jouse’n vote 7 aneiding’u chuleh KSO noiya um simlai kiloikhom jousen vote nga aneiding’u ahi.


Sangaikot sung’a NFSA nuoi’a anchang lha khat’a 840 qtrs kimu ta

B. Lalboi Gangte
CCpur. Sept. 27(ET): Sangaikot 21-ADC Constituency District council member Mr. Pumtulthang Lienzo in tuni jinglam nidan 11:00 in achenna D. Phailen mun’ah MDC/ADCC kum khat lhinna Pathen kom ah kipathu sei na leh Sangaikot sung’ah workers meet anei jin ahi.
Hiche kin’a chun Makhao area, Haopi Area, Sangaikot Area, Tuining Area, Songpeh Area ho’a kon ama worker ho jouse in jong hiche kin a-uop uvin ahi. Hiche kin’a chunk ho-haosa ho, KSO, KWU leh haosa kiloikhom ho jong apang uvin ahi.

  Haosa lang’a kon in Jamthang Baite, Thangboi Ngangam Haokip, Damkholal Neihsial hon houlimna abol uvin ahi.

  Hiche phatsung in B. Salvaphai Haosa Jangsei in ahoulim na’ah, MLA, MDC kilhengdoh jouse hin khotin’a koima mimal asuh lungkim joulou di ahi. Gamsung’a natoh aneiho’u chu mipi jouse in kei’a ahi tia ikilah chieh diu ahi ati. Hitobang maicham siem na leh worker ho kimupina anei hi thil hoitah ahidan aseijin ahi. Chuleh vangthumpehna Gouboi, Decon, HOY Thingkanphai in aneijin ahi.

  Alangkhat’ah Pumtulthang Lienzo, MDC/ADC in ahoulimna’ah, kum khat sung’a gamsung’a twilet jeh in vangsetna igamsung uva ahung lhung in, japi lamlhahna ho chena thei ahilou jeh in nikho 34 sung JCB mangcha’n lamlen akisem in, hiche’a chun Dk. 12 lakhs akisulut in ahi.

  Chuleh kumlui December in jong Sugnu Road lamlhah na thei ahitahlo jeh in kin-le-bong in gari lhai na thei ding in song Dk 1.44 lakh lut in ana kisung in ahi ati. Hiche na kitong jouse hi Govt’a kon sum hunglut louva mimal’a gamsung ngailutna’a ana kitong ahi.

  Chuleh Sangaikot sung’a National Food Security Act noiya anchang lha khat a 313 Qtrs ana kimu chu pan akila in tuhin 840 qtrs akimu tan ahi ati. Maban’a jong gamsung khantou machalna ding in pankhom leh kitho khom jing ding ahi tin mipi tiemna aneije.


Elite HSS, Kpi in founder geldoh na leh them kitetna nei

Winners of the competition with school authority and principals - WEBSADAR HILLS, Sept. 27: Tunin Elite Higher Secondary School, Kangpokpi anaphutdoh (L). Vumkam Kipgen 12th death anniversary geldohna in 3rd V. Kipgen Memorial Mathematics Competition, 2016 kinguon anabol’uvin ahi.

  Sadar Hills a kibol behlou hitobang competition hi Elite Hr. Sec. School campus mun’a simlai hon Mathematic subject hi khohsah naleh lahnom na aenitheina ding’uva ana kibol ahi. Kinguon’a chun Sadar Hills hop sung’a um themjilnamun chom chom’a kon simlai 400 tobangin pan analan ahi. Them kitetna hi class VII to X kikah sung’a kon in junior leh senior category in anakibol in prizes chom chom jong ana kikoiyin ahi.

  Them kitetna kichai lam chun prize hopdoh na leh school phutdoh retired IFS officer geldoh na in simlai leh jilkung ho chuleh insungmi pumpin condolence service ananei’uvin ahi. School principal injong Mathematics subject hi subject nom ahi ti’a lahthei na ding lunggel anaseiyin chuleh Sadar Hills a kon simlai hon Mathematic hi sunject hahtah a egel’u hi chena lhongpi’n dan in aumtai ati. Aseibena’a chun hiche chena lhongpi dan’a lunggel ineipa’u hi ipeilhah teng’ule Mathematics hi simlai ho ding’a su bject deisah leh deilhen pen hung hiding ahitai ati.

  hem kitetna’a chun Thangmonlal Gangte, Lighthouse School, Khohrii Issac, SFS Saili leh Paosanglen Singsit, Lighthouse in senior category a chun first, second leh third position amuvin chuleh Priya Ranjan, SFS Daili, Soraisam Malemnganba, SFS Daili chuleh Haolunthang Misao Lighthouse in junior category ah first, second leh third position amuvin abon’uvin kipathil peh jong anapedoh kit uvin ahi..

Position laho tailouvin category cheh’a kon in simlai nga ana kilhengdoh kit in kipa thilpeh jong anape kit uvin ahi.


Letzamang Haokip, Intending Candidate 57-Henglep in Public Meeting nei

7f310fae-dc25-498e-8efc-a7ac6d13f047Lien Gangte
CCpur, Sept. 27 (ET): Intending Candidate 57-Henglep, Letzamang Haokip in 26th September 2016 nikho chun Santing L mun’ah Public Meeting ana neiyin ahi.

  Hiche Public Meeting chu Khamlen Kipgen, Chief of K. Munpi Village; Thangkhomang Haokip, Ex. MDC 57-Khousabung; Seikholeun, Chief of Molphei Tampak Village leh Kh. Thenna Vaiphei, Ccpur Dist. Farmers Association ho Convenor na noiya kibol ahi. Kin-gon a chun L.C. Thangzom, President MPC, Santing Unit in Lamkai ahung kikhom ho phondohna leh houlimna aneiyin ahi. Lalkholun Vaiphei, Chief of Saihum village in Pathien a vangthumpeh na aneiyin ahi.

  Letzamang Haokip in aseina’ah, “Mipi natong ding leh, igam sung adeh’a Henglep A/C sung’a cheng mipi ho toh kitho’a Henglep A/C sung siempha ding’a kanatohna hin dalha’a hung kipedoh kahi” ati. 57-Henglep A/C sung’a Elected MLA masa ho tohban leh tohlou lai hou tong ding leh, igamsung’a khantouna leh machalna aumtheina ding’a hung kipe doh kahi ati.

  Chuleh, Khamlen Kipgen, Chief of K. Munpi Village; Thangkhomang Haokip, Ex. MDC 57-Khousabung; Seikholeun, Chief of Molphei Tampak Village leh Kh. Thenna Vaiphei, Ccpur Dist. Farmers Association hon jong houlimna anei uvin ahi.


Editorial Untitled web featured - 200pxMapithel Dam thua naoso nat kipan

  ‘Dam’ (twitin) kibolna phot hi huoilai gam hileh akibolgot a pat kiboina um ahi. Mapithel Dam kiti Maphou Dam leh Thoubal Dam tia jong kihe jong hi abul’a pat ajahda loi ana um’a tuni akisahchaidi kon geiya kiphinna um, khnung jongleh lampi chuom’a kiboina hung umnalaidi ahi. Dam ahung kisah leh hitobang bang hunglhungdi ahi tia kiphinna chu hunglhung ahi. Dam kisah got til’a chu “Dam ahung kisahleh twi kiting’in inmun loumun leh gamlah thingphung ho ahinchupdi, kho ijat ham kihinsona atohkhahdi ahi tia Dam kisahdi adakon betloi ana um ahi. Hichu tunia twi hung kitin jeh-a inmun loumun ho achup avel’a thing gam ho jong abanchupgam ahi. Tua hi ‘Mapithel Dam Affected Villages Organisation’ (MDAVO) kiti hiche Dam in atohkhah ho kiloikhomna hon Dam twi kiting hi lhadoh ahina dia kiphinna ahinnei u ahi. Tu gojuhlai tah a twi kiting ho akilhadohleh phaicham’a lou le inmun ho achup kit thei ahi. Gojuh loulai leh twi kiting chun Dam vel’a kho ho ahachuplou vang’a go ahung hajuh teng abanchuppan ahitai. Ahitidi hi hetsa anahie. Achutileh ipi dia twi lhadoh un tia kiphinna umham ti hi ahitai. ‘Compensation’ thu lut teidi tina ahi. Dam kisahchai masang’a chu ahintoh khahdi kho ho munchuom agamla jepma ana kichondoh diudol ahin ahung kisah chaiya twi ahung kitin phat a in le lou ho twi jin ahin chup hi kiphinnadi phaat ahitapoi. Dam kiti hin ‘environment’ (gam le go, muol le lhang, vadung twi londan) ho atohkhah, asuhset di ahi ti hetsa ahijeh a huoilai hileh akisah gotna hoa kiboina umtei ahi. Tunaicha’a Bangalore khopi’a Tamil Nadu govt chung’a lunghan jeh a kiboina ana um chu Cauvery vadung’a Dam twi jeh ahi. Hiche Cauvery vadung’a Dam jeh a hi Karnataka leh Tamil Nadu State teni kikah-a atonsotna kiboina umjingdi tina ahi. Kiboina chu ahileh Nisatlai, twi lhomlai leh twi kiting ho Karnataka in lhadohlouva Karnataka gam’a phailei ho twi chapna’a kinei, Tamil Nadu dia themkhat beh lhadoh dijong nomlou, adasasa’a Centre thusah a lhadoh ahiteng Karnataka ho kiphin kitji ahi. Gojuhlai leh Dam twi letset ho alhadoh jiuleh Tamil Nadu a lou ho abanchupji ahi.

  MDAVO ho ‘sei dungjuiyin twi kiting hi kilha taleh vadung nuoilang phaicham’a phailei ho ijat ham achupdi ahi. Hijeh a chu twi kiting in avel’a kho le gam achup hi ahidimong’a kibol ahi. Tua Human Rights atongkhai, inn le lou, kihinsona atongkhai tia penpen jong hi ahiloubehdi khat kibol ahibouve. Dam in atohkhah ho compensation sum alhing’a kipeh le kipehlou vang thuchuom ahitan hinlah MADVO in twi lhadoh in ti sang’a munchuom’a akichonadiu govt in angaitopeh diuva aseidiu joh ahi. Hiche jeng jong hi vaigei bon ahitai. Tua hi Dam chunglang’a cheng hon twi atamval’e tia kiphin u ahin ijoleh Dam nuoilang’a cheng hon vadung twi ibol’a achunglang’a nachuti tinden uham, twi hinlhadoh un tia hung kiphin nalai diu ahi. Twi kiting kilhadoh jong thukhat ahitan, acham’in pohkeh kha taleh piel-thaang kikam kilhopel bangdi hinalai ahi.


*For more news, articles etc. please click “ET IN PDF.”