Sept. 10, 2016 Local news

Sept. 10, 2016 Local news

1226
0
SHARE

AMMWTWA in lha lha 30 lo kipehlou jeh’a kiphinna vetsahna’a WAQF Board meiya hal; Girl’s Hostel khah-u

Imphal, Sept. 9 (ET): All Manipur Madrassa Mordernisation Teachers’ Welfare Association (AMMMTWA) kiloikhomna in Friday nikhon Muslim Girls’ ostel (Meitei Pangal) akhah uvin chule Haffiz Hatta, Minuthong, Imphal East district ‘a um WAQF Board Manipur jong sun nidan 1.30 don in meiyin ahal uvin, achesa lha 30 sung lha-lo apeh diuvin thumna anei uvin ahi.
  Md Abdul Zabar, vice president, AMMMTWA in thuso miho akimupi na’a chun, association in achesa September nisim 3 nikho’a kon lha 30 lha-lo ipehlou jeh’a kiphinna apat ahitai, tin aseiye. Teacher 150 leh Madrassa Teachers ‘a staff 21 hohi lha 30 lha-lo kipelou ahitai. Lha-lo ho teacher ho account’a thot louva Chief Minister in fund hi budget ‘a pang ahivang’a achom’a asol ahi, ati.
  AMMMTWA in WAQF Board achesa September nisim 3 nikho’a akha ahitai, tin Adbul Zabar in aseiye. Kiphinna’a jilkung hon WAQF Board ahal ahi’in chule hotel’a um ho asoldoh uva hostel akha ahi, tin aseibe’e. Association in September nisim 8 nikho’a Chief Minister heng’a memorandum pehlut ding jong agot ahi’in, ahivang’a, Muslim minority ho boina thu tamtah donlouva kikoisa aumjeh’a association in pehlut louding’a kilolna anei ahi, ati.
  Id-ul kah’a thumna sanpeh ahilou leh association in kiphinna akehlet be ding, hinkho phal ngam’a pan alah ding ahi, ati. Meikah phelmit ding’a fires service 2 in thilso namun adel lut in chule Imphal East police personnel hon dinmun avetup uvin ahi. Hostel kot kikam jong police hon hunam’a ahong uvin ahi. WAQF Board leh Girls’ Hostel building song’a ase jeh uvin window glass phabep leh building mun phabep jong ase in ahi.

Kiloikhom operational area’a Black Day kimangtheilou ding ahi: UKLF
Imphal, Sept. 9 (ET): United Kuki Liberation Front, UKLF a kuon thuphon kimu’n aseina’ah, kiloikhom operational area sung’a Black Day kiman na dia Speaker ding ho kilutsah lou ding chule mipi hon jong hiche nikho’a pan alah lou diuvin temna ahung kineiyin ahi ati.
 Kiloikhom in aseina’ah, September 13 nikho “Kuki Black Day” tia kimang hi Naga thingnoi toh kivop jeh a UKLF in ana kikhah ahipon, tua akikivop lou jeh a man ding kiphal ding jong ahideh pon ahi. Hiche nikhoa hi lentah a nam issue/level hihih jong leh insung ahilouleh houbung sunga athi ho geldoh naleh a-insungmite lunghempina nikhoa man’a athi ho lhan chunga pahvui aga koiya, taona joh’a man ding hi UKLF in akideisah in ahi. Ajeh chu chutia kimang jong chu Sahnit hilou ham? ati.
  Ahin, tu’n munchom chom’a program igot uva, Speaker ilhen uva thu isei teng’u leh jat dang nam dang ho vet ding’a hiche nikho hi gaal pat ding’a kigotna aman’u ham ti’n advantage kilah na’n hinnei khauvinte ti gelna’a UKLF in hiche nikho man ding hi ana kikhah ahi.
  UKLF Organisation in 1990’s laiya hiche nikhoa nam chankhompi ana mollem ho geldoh nale a-insung mite lunghempina akinei toh kilhon in amaho thina’a kon hin namsung’a kilungkhat, kipum khatna ding leh hitobanga vangsetna ito kitna lou diuva iti pan ilahkhom diu ham ti lunggel inei khom diu joh akideisah in ahi.
Tunin Kuki Black Day man ding itiuvin Churachandpur District a ding in Tuibong bouseh a man dia igon’u hin Kuki nam sunga Tribe dang chenna mun – Henglep, Singat, Hmar Veng, New Lamka, Thanlon leh adang dang ho chu Kuki gam ihisah lou hilou hitam? Hitobang’a inam chankhompi ho Kuki a kon’a nodohna thil kiboldoh ho jal’a Kuki Black Day kiman hi UKLF in ana kikhah ahi.
  Hijeh chun UKLF Operational area sung’a adeh a Moreh, Tengnoupal, Pallel, Sugnu leh mun dang dang’a Kuki Black Day kiman na dinga Speaker ding ho kilutsah lou ding ahi. Chuleh mipi’n jong hitobang’a nampi kitomona sodoh thei program ho’a panlah lou dinga temna ahung kineitoh kilhonin hiche nikho leh athi ho geldoh na leh a-insung mite ho lunghempi pum’a taona nikho joh a man’a nampi kilungtoh tah a panlah khom theina ding lunggel neikhom ding joh in temna ahung kineiyin ahi.
  UKLF in aseibena’ah, tulai ichennau gamsung’a Tribal leh Non Tribal a kikhenna politics bol ding ti kigo i-um uvin, Tribal issue a ichekhom diuva ahileh Tribal sung’a chu suhkhel ho jouse kingaidam phat hilou ham? Amavang Tribal issue a chelou ding itiuva ahileh Kuki Inpi, KSO lamkai hon Kuki Nam sunga Tribe dang ho pampeiya iumsah’u hi ibol tahlou diuvin deisah ahi.
  Kuki min’a Politics bol ding itiuva ahileh Kuki hi nomenclature ahitoh kilhon’a Thadou pao thoho bou kiminsah na a man tahlou ding, Kuki nampi kitona thei dinga Thadou tribe pom nomlou hon idei tribe chom khat bolmo jong ahipon ahi. Chutileh Kuki Nam sung’a kitona hung um thei ding ahi. Chuche hilouva Kuki hi tribe a kilah aum’a, apu apa gou dan’a kitum lah aum’a ahileh tribe lamkai jousen gel cheh’a Thingnoi lamkai ho leh Political lamkai jouse toh toukhom’a Kuki khel’a nomenclature chom khat sem doh a hichea chu political movement bol chu ipi asetna um em? Tuhin Kuki akiti teng alutnom lou, angainom lou tampi aumtan Kuki kitumlah hon Kuki a kon’in miho anodoh cheh cheh uvin achutia ahileh kitona pen ding leh unao dang ho kihuitup na pen ding chu ipi chu pha ding ham tihi nam kangailui ti jousen ilunggel’u sekhom phat ahitai, tin T.James, Joint Secretary, UKLF a kuon lekhathot chun aseiye.

Tribal Martyr ko chungthu seichet ahi kahse’a bill thah kisemdoh ho kipomlou ding ahi : JACATB le OMTF
Imphal, Sept. 9 (ET): Joint Action Commitee Against Anti-Tribal Bills (JACATB) le Outer Manipur Tribals’ Forum (OMTF) delegate hon tuni chun Raj Bhavan’a Governor Najma Heptulla akimupi uvin ahi.
Delegate ho chun Manipur Governor heng’a chun Manipur gamsung’a cheng thinglhang miho kisuhnemna ho leh Manipur Legislative Assembly in 2015 a anti-tribal bills thum pass anabol chungthu’a alungkimlouna’u aphongdoh uvin ahi. Chuleh state government in khantoumachalna natoh ho’a kon’a thinglhang mite apampaina ho chungthu jong Governor heng’a analhut uvin ahi. Tribal Martyr mi ko ho chungthu Union government leh state government in nahsahlouva akoina chungthu’a jong kihoulimna anei uvin ahi.
  Delegate ho chun Governor heng’a memorandum khat jong ana seplut uvin ahi. Memorandum a kisun ho chu ahileh- akhatna’a, pending a um anti-tribal bill teni nullified akibol masang’a bill thah kisemdoh ho kipomlou ding ahi. Anina’a, Tribal Martyr ko chungthu seichet ahi kahse a bill thah kisemdoh ho kipomlou ding ahi. Athumna’a, anti-tribal bill ho hi politics giltah nei’a kisemdoh ahi, ahinlah tutu’a Manipur gamsung’a chamdel’a chenkhomna ding’a apoimo pipen chu thinglhang mite boina ho suhlhapna ding’a political solution khat semdoh ding angaiye.

Numei chung’a khansetna iti suhbei ding ham ti thu’a kihouna JNIMS a um
Imphal, Sept. 9 (DIPR): Forensic Medicine Department, JN Institute of Medical Sciences, Porompat, Imphal in JNIMS Auditorium mun’a ‘Investigation of Rape: A multi-disciplinary approach’ ti thu in CME (Continuing Medical Education) programme agong uvin ahi.
  Gaikhangam, Director, JNIMS, Debendra, Professor leh Head, Forensic Medicine JNIMS, L Fimate, ex-Director, AIIMS, New Delhi Professor TD Dogra leh Associate Professor, Forensic Medicine, JNIMS, Dr Gangmei Angam kin-gon’a chief guest, president leh guest of honour ‘a apang uvin ahi. National Crime Records Bureau record Gaikhangam in hetpehna anei thu aseiyin, gamsung’a hi second 17 sung’a crime (setna thilsoh) khat lhung jing ahi’in, chule minute 3 seh’a crime against women (CAW) um’a, minute 15 dan seh’a numei kimai, adihlouva kibol na um’a, minute 27 dan’a hunam’a numei kisuhse’a chule minute 77 seh’a hi dowry jeh’a numei thina toh um ahi, tin aseiye.
  Numei chung’a khansetna thilsoh lhung jing holah’a hunam’a kisusetna hi chonvalna sangpen ahi’in, Manipur gamsung’a jong hitobang thilsoh um ahi. Forensic Medicine Department, JNIMS leh RIMS in kum seh’a hi numei hunam’a kibolna case 280-300 tobang kholna anei ahi. Hiche hin society ‘a khantou machalna atohkhah ahi. Sorkar in Pangei mun’a um Forensic Laboratory upgrade bolna ding tohgon anei ahi’in, manchah khangtou ho kikoi hin thilsoh ho gangtah’a kholtoh’a atosot ding ahi, tin chief guest in aseibe in ahi.

Sorkar in 18 Sept nikho leh recruitment exam abol lou ding’a ST Demand Committee in ngehna nei
Imphal, Sept. 9 (ET): Co-ordinating committee, ST Demand Committee and Schedule Tribe Demand Committee (STDC) in government department in post chom chom’a ding’a recruitment process agon nikho hi kiloikhom in rally bol ding agot nikho toh akito jeh’a postpone abol diuvin ngehna anei uvin ahi.
  STDC in September nisim 18 nikho leh Scheduled Tribe category ‘a Meetei/Meitei ho lahlut ahina ding’a mass rally bolding’a tohgon asem ahi. Convenor, Co-ordinating Committee STDC, Mutum Churamani in thuso miho akimupi in, civil society lamkai chom chom hotoh kihoutohna aum jouva public rally bol nading nikho kitep ahi, tin aseiye. Rally hi gamsung miho ding ahi’in, THAO lentol, Thangmeiband’a kipan ding ahi. Khuman Lampak main stadium chan kijotna aneidiu chule hiche mun’a public meeting umding ahi. Kiloikhomna in hiche nikho hile kiloikhomna chom chom hon general strike akoulou na ding uvin jong ngehna aneibe uve.

Police ho toh kinotona’a simlai 15 kitongkha
Imphal, Sept. 9(ET): Sanjenthong, Imphal khopi’a Friday sun nidan khat don’a police hon tear gas akap nauva simlai 15 vel sangtah in akitongkha in ahi.
Thulhut dungjuiya Imphal East district ‘a simlai tamtah hi lam chom chom’a kon palace compound ‘a kikhom uva CM Bungalow lam ajot-u ahi. Police hon kiphinna bol simlai hohi CC Higher Secondary School kom’a ano khen ahi.
Wangkhei MLA Y. Erabot in Congress dalha tadia kisei
Imphal, Sept. 9 (ET): Veteran Congress MLA Yumkham Erabot in ahunglhung ding nikho ni-leh-thum sung’a Congress adalhah ding’in ginmo thulhut akimu in ahi.
  Y Erabot in Friday jingkah in a-inmun’a ama ding’a tomngai tah’a natong hotoh toukhomna (confidential meeting) aneiye, ti tahsan umtah thulhut akimu in ahi. Toukhomna’a MLA Erabot in worker hotoh gamsung chule India pumpi’a tu dinmun’a politics umdan thu aseikhom uvin chule Wangkhei Assembly constituency ‘a Chief Minister in a-insung mi (asopi chapa) khat lhangphong tah’a atosot thu jong aseikhom uvin ahi.
Thulhut dungjuiya Erabot in BJP ajop maithei chule akit election hi BJP ticket ‘a atet maithei ahi, ati. Ahin, hiche thulhut hi photchenna ahi naipon chule MLA pa’n tuchan geiya BJP authority hotoh kihouna asem loulai ahi.

ACDC in khamnathei No. 4 piece 200 val mandoh
Jim Singson
Imphal, Sept. 9: Jani nilhah lang nidan 6:00 pm velchun Awang Chaokhong Development Club (A.C.D.C.) president Ramthar Keishing le secretary Bijoy lamkainan member hoto B.O.C. area drive abol un no.4 (heroine) piece 200 val amandoh un ahi.
Hiche drug hi drug addict Ason Kiti pasal khat to aloinu Awon kiti numei teni’a kon amat’u ahin ama teni hi Athem kiti drug dealer to numei phallou a kivei nu inn a hi athem a inn ngahdia akoi ahi. Athem hin cheteni hi drug supply abol sah ji a akhel’a no.4 akikap sah ji hidan ahi.
  Hiche numei nu hi maang’a jong A.C.D.C. hon warning ana peh sa’u ahin, hinla guhthima ana kivei ji ahidan hetdoh ahi.
  Nisim 8 Sept nidan 6:00 pm vel chun Athem inn akhuolna uvah no.4 piece 200 val hi amu doh un A.C.D.C. member hon mipi masang’a mei’a ahal vam tauvin ahe. A.C.D.C. president Ramthar Keishing in B.O.C. kiti mun hi heart of the capital ahijeh in agan thei lai channa akisuhtheng lou’a ahile ahung lhung ding khangthah tampi chatvai/kingolsah na mun hung hiding ahin, ahithei’a ahile mipi hon jong kiloikhom ahin tosot diuvin tiemna anei uvin ahi.

KSO Bungpi Block, Sadar Hills(E) in Free and Fair tah’a election achelhah na ding’a ngehna nei

Imphal, Sept. 9 (ET): MLA khat lhedoh kiti hi kum nga sung’a dia mipi thalheng’a gamsung khantou machalna lam hin mapuithei keo hilouva khosung vengsung boina hahsatna vesui thei natong thei khat kilhenna ahitoh lhon’a nahsah mo’a koithei ahiloujeh in ahung lhung ding nikho ho’a jong mipin adeitah candidate akitundoh diuvin KSO Bungpi Block, Sadar Hills (E) in tiemna aneijin ahi.
  Ahung lhung ding 2017-2021 sung’a hi delimitation (Block le district ho jouse boundary semtoh na) um ding ahijeh in gamsung le mipi sang’a ama mimal interest joh kikhohsah joh ikisot doh khah diu tijat umtah ahijeh in chingthei tah le lunggil tah in ithalheng diu dihtah leh thutah khat ikisot doh tei na diuvin Pathen heng’a dong jing pum’in i-vote mantam tah ilhah cheh diuvin ikitem cheh uve.
  Electoral Representation Act kalval’a mipi vote a kichem le tohgon nei, hetthei ding’a booth capturing, mi khel’a vote lhah, bribery, polling officer, agent, haosa ho le mipi ho gihna le suhgimna aumkhah leh koima themmo chenna le ki oimo to na jong ineilou diuvin hetsah ahung kinei’e.
  Chuleh election ahung lhun seh leh gamsung le mipi a ding mong mong’a lunglutna nei pum’a kigotna nei candidate khat defamation game, character assassination, blackmail, mental harassment, subjugation, vote bargain bolna ding mai mai’a election kigotna nei candidate aum jong akija jing’in, hiche ho hi mimal interest ahin, mipi interest ahiloujeh in nopmosahna thu ahungkiphong doh in ahi. Hiche ho hi gamsung khantou na ding suchavei lah’a jao’u ahitai, tijong mipi in isuhmil lou diuvin deisah ahi.
  Kiloikhom in aseibena’ah, Saikul gamsung’a Civil Organization tailou mun dang gam dang Civil Organisation’a natong koi hijong leh tukal tuma leh Sadar Hills Saikul hopsung thua agamkai Civil organization ho dohtoh na umlouva or ngehna ahung kinei ngal lou leh Saikul MLA, MDC etc chung changthu hihen, ipithu hijongleh ahung kinung kum lut kit lou diuvin hetsah na leh ngehna ahung kinei in ahi. Hiche ngehna hi mun dang gam dang Civil Organisation ho in giltah’a eina gelpeh uva, Saikul thua hung kinung kumlou ding’in tiemna ahung kineijin, iham tia ngehna kinei ho hi nahsah mo tah nei aumkhah leh koima khonung leh themmo channa leh ki-oimo to lou ding uvin hetsah na jong ahung kinei kit in ahi.
  Nopmo sah natah khat chu ahileh Sadar Hills gamsung’a gam le mipi ngailu, Social workers, social activist leh mipi’a ding’a tahsan umtah tah tampi aumna khat ahi na chunga Constituency mi hilou district dang’a pat Sadar Hills constituency hop ho sung’a MLA election candidate khat dinga kigot nanei mi khat le ni aumthu akija in gamsung mi hoa dinga jong jachat umtah ahi. Koi tobang district le constituency sung hop’a alhom pen’a kum 10 beh citizenship hilou mi candidate a ding’a kigotna nei aumkhah leh ijat in gamsung leh mipi kangai lui tijong leh ahetlou leh tahsan theilou mipi lhep na ding thu asei ahijeh in, itih chan hijong leh lhangsung leh gamsung mipi te’n kipom thei lou ding ahi, tin Lenin Haokip, Speaker cum info & Publicity Secy., KSO-Bungpi Block, Sadar Hills (E) a kuon lekhathot in aseiye.

Ccpur Public Ground phuphat na natoh che lha jing
Lalboi Gangte
Ccpur, Sept. 9 (ET): Ccpur Dist. Sports Association (CDSA) vetkol na noiya um Ccpur Public Ground phut phat na (Modernisation/Improvement) natoh ache lha jing in ahi. Lamka Public Ground phuphat na ding in work order August 2016 chun ana um jong le Contractor hon natoh na July 2016 chun ana pan uvin ahi. Lamka Public Ground phut phat (Upgradation/Modernization) natoh na ding in August, 2016 chun Manipur Tribal Development Committee (MTDC) in Work Order anabol in ahi. National H/W No. 150 in achoh khat Ccpur Public Ground phuphat (Modernisation/Improvement) natoh pat ahi toh kilhon’a VIP Gallery (West) siem’a um ding, Ground kimvel’a Brick Fencing le Ground leveling bol’a um ding ahi. Chuleh, Public toilet jong sah’a um ding ahi. Ccpur Public Ground phut phat (Modernisation/Improvement) natoh na ahung lhung ding kum 2017 a jotheng a um ding’a ginchat ahi.
  Ccpur Public Ground phut phat na (Modernisation/Improvement) toh kisai’ah, CDSA in 2011 chun amasapen’a ding in DPR 2.20 Core a ding in Application NEC, Shillong, Guwahati a ding, Planning Dept. Govt. of Manipur khut’ah ana pelut uvin, hiche kum chun NEC, Secy. U.S. Sangma in State Planing Dept. Govt. of Manipur jaona in Public Ground vetlhah na ahung neiyin ahi. State Planning Dept. Govt. of Manipur in Lamka Public Ground phutna ding DPR/Application chu State Priority list 3’na in akoiyin, hijeng jong le hiche kum chun lolhing louvin aum in ahi. Lunglha louvin CDSAin 2012 kum chun DPR thah 3.20 Crore Public Ground phuphat na ding in NEC, Shillong, Guwahati a ding, Planning Dept. Govt. of Manipur khut’ah ana pelut kit uvin ahi. State Priority list ah a 3-na in apang kit in, hijeng jong leh NEC, Secy. U.S. Sangma munchom’a anatoh na akichon (Transfer) jeh in, Manipur Govt. in State Priority list umsa cancel a bol in, chuleh NEC, Secy. leh Additional Chief Secy. Govt. of Manipur in State Priority dang agon uvin ahi. CDSA in Public Ground phuphat na ding’a ngeh na abol u lolhing louvin aum kit in ahi. CDSA in kum 2014 chun DPR 5 Crore ading in application NEC, Shillong, Guwahati a ding, Planning Dept. Govt. of Manipur khut’ah ana pelut kit uvin, hiche kum chun State Priorit list 2-na ah apang in ahi. NEC in kum 2015 chun Lamka Public Ground, Ccpur phutphat na (Modernisation/Improvement) ding in phatsah na (Approved) ahin nei tauvin ahi.
  Ccpur Dist. Sports Association (CDSA) in Lamka Public Ground, Ccpur phutphat na ding a Kum 4 NEC ah ana del jou nung uvin, 2015 kum chun NEC in CDSA DPR/Application approved ana bol uvin, chuleh Manipur Tribal Development Corporation (MTDC) in August 2016 chun natoh pat na ding in Work Order anasuo in, hijong le CDSA in Pubic Ground phuphat na ding gelkhoh najal in Contractor ho natoh na July 2016 chun ana pat sah uvin ahi. Chuleh, CDSA in Public Ground phutna (Modernisation/Improvement) natoh kivesui ding, Quality aum thei na ding’a contractor ho natoh na kivelha jing ding ahi ti’n CH. Lhunchon, Gen.Secy., CDSA chun aseiyin ahi.

57-Henglep Assembly Constituency sung’a Haosa 115 in Letzamang Haokip kipapina kin neipeh
B.Lalboi Gangte
CCpur. Sept. 9 (ET): Henglep gamsung’a kikhelna leh khantou machalna hinpo lut ding ti’a ahunglhung ding 2017 MLA Election, 57-Henglep AC a tetding Mr. Letzamang Haokip, vailhunna leh kipapina kin to kop in BJP Political Conference Cum Reception Programme kingonna tunin B. Vengnom Community Hall, Ccpur ah ana um’e. Hiche kin a chun Henglep Constituency a kon Haosa 115 anapang’e.
Hiche kin’a Henglep gamkai sung’a kho Haosa mi-115 hon Letzamang Haokip Reception kingon aneipeh naova, Kho haosa hon gamsung ding leh mipi dinga kipehdoh na anei nachung’ah akipapi nau vetsah nan Kho haosa chom chom hon ponsil pehna jong anei’un ahi.
  Henglep gamkai sung’a kho haosa hon Letzamang Haokip Election tetdia kigotna aneina chung’a akipapi nau aphong doh’un ahi. Kulbung Haosa pun, aqseina ah gamsung semdia Letzamang ahung kipedoh hi gam ngailu ahin Govt. natoh aneilai injong gamsung khantouna leh machalna ding nasatah in akhohsah in gamsung jong asem naban’ah thudih’a na atoh bangin tuni’a Haosa hungkhom jouse honjong thudih le thutah’a pan alah uva, gamsung semkhom din temna aneiye.
Letzamang Haokip in ahoulimna, ah “hitobang kin thupi tah Henglep haosa hon neibol peh uhi pathen vangboh kachan nakhat ahin, aban’a ahungkhom haosa leh gamsung milip chung’a kaki pana kaphongdoh e” ati, Haosa mi-155 kilungtoh tah’a hitobang kin abolpeh nao ah Letzamang in pachatna thu jong aseiye. Henglep Constituency sung hi kum 20 muthim noija genthei hesoh thoh a kikhelna umlou ahin, hiche hojouse kikhelna podoh ding’a hung kipedoh kahin gamsung ngailutna leh pohnatna neihon bou Politics abol diu, sum le pai nei, aching athem hon politics abol pouve atie, DRDA Staff kapan a kon’a thinglhang gam Henglep sunga mipi inchen hahsat dan leh gamsung khantoulou, machal na alosam dan kahesoh keijin ahi tin jong Letzamang in aseibe-e. State BJP akon’a lamkai luboh holeh district a kon BJP lamkai ho jong hiche kin gon na ah agajau un ahi, Hiche kin’a chun Rev & Dr. Nguljathang, Pastor CFC in pathen heng’a vangthum pehna aneijin ahi.
  Kum 42 mi Letzamang Haokip hi themjilna lam’a M.A. History ahin, 2001-2003 sung’a Thadou Kuki Students Union, Manipur’a Education Secretary anatuh’in, 2003 kum’a kipat 2005 chan TKS President anatuh’in, 2005 a kipat 2007 chan KSO CCpur President atuhkit in, 2002-2005 kum sung’in jong KKL General Secretary atuh in, 1996 a kipat 2000 sungin HM High School Tuilaphai, Principal in anapang’e. KBC N0 9 ah, 1997 -2000 sungin Youth Secretary, 1993-2000 sungin Baptish Youth Fellowship ah Chairman atuh in, 2006-2015 sungin CFC Dist. HQ ah Auditor apangin ahi, 2013 a kipat tunichn hin Church Building Construction Committee Chairman in apangjing’e.

ASI promotion mu
Ccpur, Sept. 9 (ET): Women Head Constable (W/HC) apat Assistant Sub-Inspector (ASI) ading in promotion numei mi 3 in amu uvin ahi. Promotion mu ho, Ginsuanching, Chingzaman leh Lhingbawi Gante ho ahi. Ama ho kipahpina kingon 9th Sept., 2016 nikho chun SP/CCpur Office Chamber ah aum in ahi.
  SP/CCpur thupeh na bang in David Piaklian, MPS, Addl. SP/CCpur (Law & Order) in ASI ding a promotion mu W/HC mi 3 ho Badge abel peh in in, Badging kin-gon kichai in SP/CCpur in Police Department thalheng in promotion muthah mi 3 ho kipahpi na aphong in ahi. Aman aseibe na ah, promotion kiti hi power leh responsiblility kibelap ti’na ahi in, hiche toh kilhon’a gin um leh thutah ding ahi ti’n tepna leh hetsah na aneiyin ahi.

Samsung Galaxy Note 7 phone Huikong sunga switch-on bol phallou: DGCA
Sept. 9: Sorkar in vanleng sunga check-in bag a Samsung Galaxy Note 7 choilut lou dingin thu apen ahi. Directorate General of Civil Aviation chief BS Bhullar in aseina a Galaxy Note 7 phone hi khut bag (Hand Bag) a hiet’a chuleh huikong sunga switch on bollou ding ahi tin thupehna aneiyin ahi. Hetdia lom chu Galaxy Note 7 battery mei kah complaint tamtah akimu jouva, hiche phone sem Company Samsung ten Note 7 phone jouse chu athah a vetphatna aneidiu vin ale nung kou (recall) un ahi. Bhullar in aseina a chun hiche order hi Huikong venbitna dinga apetpet a jui din thu akipen ahi ati. US Federal Aviation Administration (FAA) in jong hiche phone meikah ho chungchang’a thu anaso sau ahi. FAA in aseina’a Huikong a touho komin asunga phone charge bollou ding chuleh switched ON jong bollou dingin thu apen ahi, chuleh baggage sunga koi lou hel dingin aseiyun ahi. India sunga Huikong neihon hiche thu hi phate a ajuilou jeh a, DGCA in avel a kiseipeh kit ahi tin thulhut akimui.