2020 teng Standard Robarth School kikhah ding ahitai, tia Maoist thingnoi hon...

2020 teng Standard Robarth School kikhah ding ahitai, tia Maoist thingnoi hon sei

277
0
SHARE

2020 teng Standard Robarth School kikhah ding ahitai, tia Maoist thingnoi hon sei; School kha nadinga Private School Association leh Guardian Association in mopohna alah dinga seiyu

Imphal, Aug 3(ET): Standard Robarth Higher Secondary School, Canchipur a simlai Ningthoujam Babysana athi jouva thilsoh hi school themmo chan ding ham, chan louding ham tia kinelkalna umjing ahi’in, hiche chungchang thu a Maoist Communist Party Manipur thingnoi hon thulhuhna anei tauvin ahi.

Babysana thi dan ginmona aumjeh a thutah kholdoh nadinga achesa July 22 nikho a kon organization in thukholna apat ahi’in, Babysana thu a gamsunga um thingnoi thuso nei masapen jong amaho hiu ahi. Thukholna anei nading uva kal khat lhing school kikhah ahi’in, kal khat alhin jouva organization in August nisim 4 chan ‘Ban’ bol be dinga thuso aneikit ahi.

Thukholna anei nauva hahsatna phabep aumin, police official luboh nehguh bol hon pan alahjeh hidinga ginmona um ahi. Chule insung miten kigotna anei masanga kinotah a post mortem kibol dan jong ginmona um ahi. Athumchanna a mipin kiphinna anei jouva bou case CBI khut a kipelut a, SIT kisemdoh a chule mi kiman ahi’in, hiche ho jouse jeh a thilsoh hi tohgon kisemtoh hidinga ginmona um ahi, ati. Babysana thi thu a akihelou um ahi.

Thutah hetdoh nathei photchenna (evidence) hohi school authority, post mortem bol a doctor ho, thukholna a pang police officer hon asuhmang ahilouleh state sorkar in nahsahna aneipoi, tia mipi tamtah in ginmona anei ahi. Achesa kum phabep sunga mun chom chom a simlai tamtah thina toh ho thua thutah akikholdoh loujeh a mipin tahsanna anei tahlou ahi’in, hijongle Maoist in ‘evidence’ muna dinga pan alah jomding ahi, ati. Chule Standard Robarth School a kai simlai ho nu le pa tehon achate ho hiche school a asol kit sang uva school danga admit abol diuvin temna jong anei uvin ahi.

Mopohna neiya ZEO chule Board of Secondary School Manipur in 2019 kum a school chom a kichon ding simlai ho phalna apeh diuvin temna anei uvin chule adeh’a Babysana toh hostel a umkhom ho school a anungsol lou diuvin ngehna sangtah anei uvin ahi. Class 12 chan simlai phabep manbeiya themjilna peh dinga temna hi mipi awgin suhthipna ding ahi’in, kilhep lhahsah hih uvin, ati. Standard Robarth School a kai simlai leh nu-le-pa ten ngehna angaiya, achate ho school dang a kal khat sunga achon diuvin aseiyun, chule 2019 kum a sim jom nom a simlai chule minu mipa auma ahi jong leh thulhuhna neina dinga ‘guardian’ jouse toh kihouna anei diuvin temna aneibe uvin ahi.

2019 kum a asimjom nom uva ahileh vangsetna ato teng ule mipin atosot louding ahi. Ahivang a Maoist Communist Party Manipur thingnoi kiloikhomna in 2020 kum a kon school hi kha den dinga thulhuhna anei ahitan, themjilna mun ‘Free Zone’ hisah uvin tia hiche thu a koiman hehna asem theilou ding ahi, tin thuso chun aseibe in ahi. Alangkhat a All Manipur Recognised Private School’s Welfare Association leh All Manipur Students Guardians’ Association in kal khat sunga Maoist thusei ajui louva ahileh organization teni kikhah ding louding ahi, tina thu jong aumpoi, ati.

Standard Robarth Higher Secondary School lolhingtah a akikha thei nadinga organization teni in ‘government recognised’ ahina suhmang nadinga mopohna alah ding ahi. Kichih sah a organization teni gotna kipehna ahi’in, Babysana thi thu a hin mi haosa hon anop nop abol theiyu ahipoi, ti vetsah uhite, ati. Maoist thulhuhna thu a gamsung mi in kipunkhomna anei dinga temna jong aneibe uvin ahi.

C Aisan kho a Anglo-Kuki War Centenary kimang ding

Imphal, Aug 3(ET): Anglo-Kuki War 1917-1919 centenary ahunglhung ding October nisim 17, 2019 teng leh C Aisan kho, Saikul, Kangpokpi district a kimang ding ahi.

Hetthei khat chu C Aisan kho, Saikul hi Minister anahi C Doungel chenna kho ahi. Achesa August nisim 2 nikho a Kuki Inpi Manipur, Kuki Inpi Saikul, Kuki Women Union, KSO chule Anglo-Kuki War Commemoration Committee team hon C Aisan kho avil uva Centenary man nadinga amun photchenna aneiyu ahi. Team hohi C Doungel in akilhonpi ahi.

Jangmang Haokip, member, Standing Committee, KSO-GHQ in Anglo-Kuki Gal, 1917-1919 a Anglo Kuki lamkai Chengjapao Doungel statue feet 11-feet 18 sang a C Aisan kho a kisa ding ahi, tin aseiyin ahi. Chule C Doungel in Recreation Park jong asah ding ahi, tin Jangmang Haokip in aseibe in ahi.

 

Babysana thina toh kisaiya Student Union in toumun kiphin bol

Imphal, Aug 3(ET): Babysana thitoh kisaiya thu akipohdoh ding ngehnan Standard Robarth Higher Secondary School, Canchipur a student Union hon toumun kiphin abol uvin ahi.

Toumun kiphinna a chun thucheng jatchom chom ho atahlang uvin ahi. Babysana kithana chungchang Government in thudih ahin pohdoh ding’in Students Union, Standard Robarth Higher Secondary School a Advisor Sheikh Wahida ngehna aneiyin ahi. Chuleh school phate’a akikai banjomna ding’in mipite panpina jong athum kit in ahi.

Phat chomkhat jouchun simlai chapang hon thudih kadei uve tin kholhang sapna anei uvin ahi.

Ningthoujam  Babysana ginmo umtah a kitha deilou vetsahnan Thongju part 1, 2, Pheijaleitong maning, mamang, makha leh awang a um Meira Paibi hon Pheijaleitong community hall ah toumun kiphin abol uvin ahi. Babysana kithana sangtah in demna kanei uvin, Government thudih hinkholdoh loihen tin Meira paibi khatchun aseiyin ahi.

Wangkhei Keithel Asangbi ah jong Babysana kithana chungchang thudih ahung kipohdoh ding ngehnan toumun kiphin abol uvin ahi. Hiche a chun Model High School a simlai holeh Wangkhei Keithel Asangbi Nupi Marup a member hojong apang uvin ahi. Government in thudih hin podoh hen tia aseitoh kilhon chun Nupi Marup a general secretary  Sulekhana in JAC kiphinna bol jouse kitosot ding ahi ati.

Nel lo nadinga dan sem ngai ahi: P Vaiphei

Imphal, August 3 (ET): Department of Textiles, Commerce & Industry, Manipur government in Forest & Environment Department chule Water Resources department toh Saturday nikhon DIC complex, Porompat, Imphal East a ‘Mining of Minor Minerals in Manipur’ thupi a awareness program abol uvin ahi.

Principal Secretary (Textiles, Commerce & Industry) P. Vaiphei, Director, Trade, Commerce & Industries, C. Arthur Worchuiyo, Conservator of Forest, Joykumar Singh leh Geologist, Directorate of Trade, Commerce & Industries, W. Inaocha Singh in houlimna anei uvin ahi. Principal Secretary (Textiles, Commerce & Industry) P Vaiphei in ahoulimna a ‘mineral’ hohi ‘major mineral’ leh ‘minor mineral’ a kikhen ahi’in, ‘minor mineral’ hi nel, insahna song, chule clay (ordinary) ho kiseina ahi, tin aseiyin ahi. Achesa kum phabep sunga nel hol a atam cheh cheh toh kilhon a nel tamtah aval a akikhot jeh a twi boh (water pollution) a, hiche hin biodiversity atohkhah ahi, tin aseiyin ahi.

Gam le go suhkhah louna dinga vadung to a kon nel kilahna a dan sem ngaiya ahitai, tin aseiyin chule ‘quarry licence permit’ hi ‘mining plan’ pehlut a kilahthei ahi, ati. Thinglhang gam a ‘environmental clearance’ leh ‘forest clearance’ lah ngai ding ahi, tin aseiyin chule permit hi Directorate of Trade, Commerce & Industries in apehding ahi, ati. Song leh nel lo dinga lunglutna nei hon Director (Trade, Commerce & Industries) ahilouleh General Manager (GM), District Industries Centre (DIC) henga asei theiding ahi, ati.

Sorkar in Director imalam jouse a kithopi dinga GM (DICs) tha apeh ahi’in, Deputy Commissioner phabep in Mining permit/quarry permit a dinga application form lahna dinga pan alah’a chule ahopdohna jong apat ahitai, ati. DC jouse hiche chungchang thu kihil a district sunga um SDO, SDC chule officer jouse athu ahil diuva thupeh um ahi, tin aseiyin chule Water Resources Department in pan lentah alah thu aseiyin ahi.

Thinglhang gam a vadung a kon bou hilou mol a kon song kilahna a dinga permit ngai ding ahi’in, thuchen hetnom hon W Inaocha Singh, Geologist pa ama mobile number 9862036742 a adoh theiyu ahi, tin P Vaiphei in aseiyin chule achesa 2013 kum a Sekmai vadung a kon nel lo thei louna dinga National Green Tribunal in akha hi tuchan a kichepi ahi, ati.

C Arthur Worchuiyo, Director, Trade, Commerce & Industries injong houlimna aneiyin, patta gam hijong leh ‘mineral’ ho khot nadinga permit ngai ahi, ati. Lunglutna nei hon ‘mining plan’ toh form Director henga apehlut thei ahi, tin aseiyin, chule Directorate in application akholtoh a State Level Committee henga athot kit ding ahi, ati. Conservator of Forest Joykumar Singh in ‘Forest Clearance’ hi Forest Conservation Act noiya ‘online’ a kilah thei ahi, tin aseiyin ahi.

W Inaocha, Geologist, Directorate of Trade, Commerce & Industries in ‘The Manipur Minor Minerals Consensus Rules, 2012’ thu ahil in, power point presentation jong ape in ahi. Gamsung pumpi a dinga dan hi March 7, 2013 kum a kon Gazette notification kisodoh a kichepi pan ahitai, ati. ‘Quarrying licence’ lahna dinga rule 34 noiya dangka 1,000 peh ngaiding ahi’in, security deposit 3,000 (rule 35) leh financial assurance dangka 15,000 (hectare khat a ahilouleh alhompen hectare 4 val a dangka 5000) peh dinga dan um ahi, ati. Mining plan, Forest Clearance (gammang lah ahileh), Environmental clearance (ngaitei), Surface rent Royalty jong ngai ahi. Hiche ho dan bulhit ahi jouteng leh ‘Quarry deed’ soi kaina umding ahi, tin hilna aneiyin ahi.

Kingon a lunglutna nei ho, association chule adang dang jong apang uvin ahi.

SSUM leh Lamlai Hr Sec School simlai hon pan alah nau aga mutau

Imphal, Aug 3(ET): Socialist Students’ Union Manipur (SSUM) le Lamlai Higher Secondary School simlai hon kiphinna leh thumna anei thu a Manipur Education department in order asodoh uvin, jilkung 8 school a sol dinga thupeh anei uvin ahi.

Jilkung hon apet pet a school ajop pai diuvin jong asei uvin ahi. SSUM chule Lamlai Higher Secondary school a simlai hon Manipur Human Rights Commission (MHRC) a kiphinna abol uva, school a jilkung alhahsam thu a hehna asem u ahi. SSUM lamkaina a kiphinna abol u ahi’in, achesa July 25 nikho a jong MHRC henga petition apeh uva, school a kai simlai ho dinga Right to Education abulhit diuva temna thumna aneiyu ahi.

Achesa kum khat leh keh sunga jilkung alhahsam jeh a simlai hon phatah a lekha asim theilou ahi, tia aseiyu ahi. SSUM in hiche school a dinga private teacher jong alah ahi. Mopohna nei authority hon school dinmun adeh a facility umlouva a simlai hon lekha asim nau government school dinmun ho avetlhah diu kinepna anei nau thu asei uvin ahi.

SSUM in MRHC, Education Minsiter, Director, Education Department leh akisaipi authority ho akipapina le apachat nau thu asei uvin ahi. Chule society lhasam a kon simlai ho dinga pan lahjom dinga jong SSUM in kitepna aneiyin ahi.

Manipur hi Kum 10 joule India sung’a akhangtou pen State khat hi ding ahi: BJP National Vice-President Shivraj Singh Chouhan

Imphal, Aug. 3 (ET) : Tuni MSFDS mun’a State Level Membership Drive kingon kinei phatsung in BJP National Vice-President tuh leh National Membership In-Charge jong hi Shivaraj Singh Chouhan in Congress hin North East gam ho khohsah na aneipon ahi ati. Chuleh Chief Minister N. Biren lamkai nanoi in Manipur gamsung’a khantou machal natoh tampi jong akibol tan ahi. Kum 10 jou teng Manipur hi India State lah a akhangtou pen khat hung hi vah ding ahitai ati. Prime Minister Narendra Modi in lamkai atuh sung in Tribal ho ding in Ministry khat asemdoh in ahin Congress in kum sottah vai anahop sung in hiti ho tobang khat jong ana boldoh pon ahi. Manipur panna in India pumpi khantou machal na ding in mipi jouse thakhat tah’a pan alahkhom ngai ahi in hiche na ding’a mitakip in BJP sung’a min akikhum cheeh ding uvin temna jong anei in ahi.

Hetthei khat chu Madhya Pradesh Chief Minister thumvei anatuh sa Chouhan chu Imphal Interntional Airport mun’a Chief Minister N. Biren leh Minister hon thupi tah in analam to uvin chu jouvin Shree Shree Govindaji Temple vilna aganei pai’u chuleh Kangla mun’a thingnou phabep jong anaphut uvin ahi.

Hiche toh lhon’a Chief Minister N. Biren in houlimna aneina’a ahung lhung ding Aug. nisim 11 nikho leh kichai ding BJP min khum hi Manipur akon mi Lakh 1.5 lahlut ding bidoi na kinei ahi toh lhon’a lolhing tei ding injong kinepna anei in ahi. Member hon jong tomngai tah’a pan alah uva mi Lakh 2 beh alahlut jou nading uvin temna anei in ahi. Chuleh thilpha jeng bou petchah pum’a khantou machal nading lunggel leh tohgon bolkhom ding in mipite temna jong anei in ahi.

MCPCR Chairperson leh vangsetna toh nu insung mi khat in police henga hehna asemlou jeh a ngohna kisem khum

Senapati, Aug 3(ET): Senapati Women Police in Jawahar Navodaya Vidyalaya (JNV) ‘sexual assault case’ a MCPCR chairperson Sumatibala Ningthoujam leh vangsetna toh insung mi-Irish kiti khat chunga special court POCSO Senapati a ‘charge sheet’ asemkhum uvin ahi.

Section 21, POCSO Act noiya themmona nei lah a pang a kiminphah ahi’in, thilsoh umchan ahet vang uva aphatcha police henga report abol loujeh u ahi. Ngohna kisemkhum teni hi August nisim 7 teng court anga ding lhonding ahi. Chargesheet kisem dungjuiya MCPCR chairperson in achesa February nisim 14 nikho a Principal pa khansetna thu ahet ahi.

Ahivanga thilsoh umchan police ho henga seidoh louva mopohna nei district a Child Welfare Committee (CWC) in thukholna anei a, report NCPCR henga apehlut diuva thuhilna anei ahi. Chairperson in Section 21, POCSO Act noiya amopohna atoh lou ahi, tin chargesheet a asei uvin ahi. Vangsetna toh nu anu insungmi hi a kum 55 a upa Irish injong thilsoh umchan January 15 nikho a vangsetna toh nu in phone a aseipeh jouva ahet ahitan, ahivang a police henga hehna asemlou ahi, ati.

Section 21, POCSO Act dungjuiya setna thilsoh ho hehna akisem (report) louleh jail a umthei ahilouleh leu thei ahi. Achesa January nisim 18 nikho a JNV Mao a class X simlai numei khat principal pa in school campus sunga dihlou tah a ana chonpi ahi. Principal pa hi Sanjay Kumar Yadav, Kutbapuri Barkoda, Haryana gammi ahi.

National Commission for Protection of Child Rights (NCPCR) a kon Superintendent of Police in thilsoh umchan email a athot u amu jou, February nisim 21 jingkah a police hon FIR ajihlut ahi. Hiche nilhah ma ma nidan 5 don a police hon JNV Khumbong a kon Yadav amat u ahi. Police hon JNV Regional office, Shillong a office bearer luboh 13 douna a jong POCSO noiya chargesheet asemkhum ahi. Hearing teni hi ani a August nisim 8 teng POCSO, Senapati special court a umding ahi.

Panglien Kho mun’a gamkai MDC/ADCC in Krsnaa Diagnostic Private Limited, District Hospital kithopi nanoi’a “Free Blood Sample Collection”chelhahpi

B.Lalboi Gangte

CCpur. Aug. 3 (ET) : Grace Zamnu Zou MDC/ADCC tohgon na leh Haosa leh ZYA Tunkhopum Block kithopi nan tunin Panglian kho mun’a Free Blood Sample Collection ananei uvin a hi. Hiche achun Sample lakhom ding in Krsnaa Diagnostic Private Limited, District Hospital, Churachandpur akon Phlebotomist 6 in thisan test bol nom ho thisan ala uvin ahi. Test result asodoh teng Free Medical Camp chung chon’a  test result ho Doctor ho vetsah na kinei ding ti ahi. Kingon achun Thyroid, Liver Function Test (LFT), Kidney Function Test (KFT), Blood Sugar, Complete Blood Count (CBC), Complete Blood Cell Count (CBCC), Full Blood Count (FBC) leh test chi chom chom ho vetna ding in thisan anala uvin ahi. Panglian leh akimvel kho akon thisan test bol mi 150 ana lhing jou in ahi.

Hiche phatsung in jong Pradhan Mantri Ujjwala Yojana (PMUY) chung chon’a meithai ho a ding gas connection bol nading’a min pehlut na jong ananei uvin ahi. Hiche Free Blood Sample Collection hi gamkai MDC Grace Zamnu in  Muallum Area, Panglian Polling Station hopsung’a um mipi ho tahsa damthei na ding gelkhoh na leh gamkai MDC khat hina dol’a Panglian Village Authority, ZYA Tunkhopum Block leh Krsnaa Diagnostic toh kithokhom’a hiche kingon hi anei ahi. Test bol na’a sum tamtah suh mang na ding hijong leh manbei’a bol thei ahi nachung’a mipi ading’a hamphat na khat jong ahi dan atahlang in ahi. Mihem kiti hi tahsa damsel dan in kimujong leh tahsa sung kimkhat hoi lou jong um thei ahi jeh’a test bol ding hi poimo tah ahi ati. Test result jong agan nathei pen’a muthei nading kingaito ding chuleh medical camp kinei kit phat leh doctor ho vetsah najong kinei ding ahi tinjong aseibei.

Cabinet in monsoon session assembly ahung lhungding August 26 akon pat dinga kinoptona nei

Imphal, Aug 3(UNA): State Cabinet in tuni in meeting ana nein a uva Monsoon session assembly ahunglhungding August 26 akon pat dingin kinoptona ana nei uvin ahi.Tuni cabinet meeting acun cabinet jouse in panlah na ana nei uvin ahi.  Sitting umding jat vang Assembly Business Advisory committee in kihou lhah na anei jou teng hetsah dingin phondoh na ananei uvin ahi.

Hiche cabinet meeting chu   Chief minister Durbar hall mun a ana kibol ahi. Meeting chu jingkah lam nidan 8 in ana kipan in, pung khat lam ana um in ahi akiti. Hetthei khat chu Chief Minister N Biren deilou MLA ho in kiphinna ana nei utoh lhon a assembly ana kibol thei lou ahin, Chief Minister pa akikhel louding le monsoon session assembly jao lou dinga gihna ana nei vang uvin, central BJP lamkai ho in khoutah a assembly jao dinga thupeh ana nei utoh lhon in kiphinna nei MLA hoin Delhi ahin dalhah uva assembly a jao dinga kalson na ahin nei u ahi. Thuso kimu dungjui in kiphinna nei MLA ho hin assembly jaona ding nopna ahin nei uhi central lamkai ho in Biren lamkai na government assembly session kichai teng kikhel na umding ahi tia hetsah na ahin nei dungjui uva assembly a panlah dinga  kigot na ahin nei u ahi akiti.

Mikhat in ajinu that, along lupna noiya sel

Khliehriat, Aug 3: East Jaintia Hills police in Karimganj Police toh kitho in aji that a alupna noi a sel khat  Khliehriat mun a ana mandoh uvin ahi. Hiche ajinu that pa chu amin Komolendu Bushan Das akum 24 a upa ahi akiti. Police akon thuso kimu dungjui in Das chun ajinu achesa July nisim 29 nikho a ajinu ana tha a alupna noi a ana sel ahi akiti. Das chun ajinu atha jou chun Meghalaya mun a ana jam lut in, ana jam lut toh lhon a Assam Police in ahin dal lut a ahung mat doh u ahi.