2001 Census data dungjuiya Delimitation exercise chelha ding; July 7 kah a...

2001 Census data dungjuiya Delimitation exercise chelha ding; July 7 kah a ‘revenue village’ ho thuchen pehlut dinga Commission in DC jouse thuhilna nei

57
0
SHARE

2001 Census data dungjuiya Delimitation exercise chelha ding; July 7 kah a ‘revenue village’ ho thuchen pehlut dinga Commission in DC jouse thuhilna nei

Imphal, July 4(ET): Civil society organization le political party chom chom hon census data athah dungjuiya delimitation process bol dinga thumna anei Delimitation Commission of India in ajah peh pon ahi.

Manipur a um revenue district 16 a Deputy Commissioner jouse henga ‘urgent communication’ akipeh na a, Joint Election Officer, Manipur, Ramananda Nongmeikapam in 2001 census data dungjuiya parliamentary le assembly constituency ani a delimitation jo dinga lekhathot apeh ahi.

“Delimitation Commission in 2001 census data dungjuiya Delimitation Act 2002 noiya Parliamentary le Assembly constituency a delimitation natoh ho aganna thei pen a ajo dinga proposed abol ahi”, tin Joint CEO Manipur in Manipur gam a um revenue district 16 a Deputy Commissioner ho jouse henga lekhathot apehna aseiyin, Delimitation Commission thupeh dungjui ahi, ati.

Lekhathot hi July nisim 2 nikho a Bishnupur, Chandel, Churachandpur, Imphal West , Imphal East, Jiribam, Kakching, Kamjong, Kangpokpi, Noney, Pherzwal, Senapati Tamenglong, Tengnoupal, Thoubal, leh Ukhrul district a Deputy Commissioner ho henga apeh ahi in, district, sub-division Blocks, Gram Panchayat, Municipal Corporation/Council, khosung le adang dang ho position hi 2001 census dungjuiya June 15 chan a adjust bol dinga asei ahi.

Deputy Commissioner hon ama ama jurisdiction noiya um recognized revenue village ho jong agei pen a July 7, 2020 kah a apehlut diuva jong thuhilna um ahi.

Jiribam Police holah a Covid-19 case kisei hi ‘Community Transmission’ ahipoi: Health Service Directorate

Imphal, July 4(ET): Directorate of Health Services, Manipur in Saturday nikho a Covid 19 nat douna dinga health department policy chungchang a avel a thuso miho akimupi kit uvin ahi.

Health Director K Rajo in, Jiribam a police personnel mi 28 Covid 19 positive ahi hi ‘community transmission’ tia kisei theilou ahi in, hiche hi ‘cluster transmission’ ahiloule ‘local transmission’ kiti jo ahi, tin suhthengna le hilchenna aneiyin ahi. Jiribam a natna aklah son na case hi chomjep chule boi jep ahi, hijong le WHO sei dungjuiya, case hi Community transmission’ kiti theilou ahi, ati.

SOP guidelines dungjuiya, positive ahi kihe hon akitohkhah pi (contact tracing) akibol na a mi 160 hi ‘containment zone’ a kikoi ahi, ati. Deputy Director, Health Services, Dr. Meena in, tuchan geiya RT-PCR technology le Truenat machine a Covid 19 test kibol hi man beiya kibol nalai ahi, ati.

Tu naicha SOP guidelines athah kisodoh na a anei jou, tourist ahiloule state sunga va le hon test kibol man dangka 2400 vel hi rolling fund a apeh diu, BPL noiya um, frontline worker ho manbeiya test bol ding thu jong pang ahi. Thinglhang le phaicham district a Truenat machine 9 um ahi, tin Dr. Meena in aseibe in ahi.

State Covid care center in branch akehlet a, lupna 350 umna Unacco school, lupna 64 umna RD Wing Lamphel, lupna 100 umna Thoubal GNM school kiti institutional quarantine center ho le Churachandpur, Senapati, Ukhrul district a jong branch akehlet be ahi. Gamsung mihon Health Department in kivenna dinga asodoh dan hohi phatah a ajuiya amopoh nau abol uva ahile gamsung in Covid 19 natna adou khom a, ajo theiding ahi, tin aseibe in ahi.

Manipur a tu le tua Covid 19 case 1325 um ahi in, hiche lah a mi 667 kijen dam a discharged kibol a chule active case 658 um ahi.

Jiribam district complete lockdown kibol ta

Imphal,  Jul 4(ET): Jiribam train station a duty Police mi 28 tobang Covid-19 natna vei mudoh ahi utoh lhon in State Health Authority in total lockdown ding in ana phongdoh tan ahi. Police holeh frontline a panla hon hiche natna ahin nei uhi mipi ho lungsung a kichatna adimtan ahi. Complete lockdown kibol sung in koima vahle muding aumpon ahi. Jiribam Ima Keithel Chaokhat Thourang Lup Joint Secretary Th Jamini in aseina achun tuhin covid-19 natna kithejah ding vetna jeh in kailhang jong phat chomkhat ading in akikhah tan chule frontline a natong hon hiche natna hi ahin vei ule mipi ho aki kicha gamtan chule Jiribam district Hospital ajong PPE ki ninglhing tah in jong aumpon ati in ahi. Jiribam district sung ah July 15 chan a ding in complete lockdown akiphong tan ahi.

Hetthei khat chu Jiribam PS a akon police 28 aveiho lah achun ASI khat, Head Constable 4, Driver 1, Lady police constable 5, VDF Personnel 8, SDPO Jiribam a Reader 1, Police constable 2, Jiribam Foreigner check post a duty VDF 1, Jiribam Reserve line a posting constable 1, RK Sanatombi School Community Quarantine centre a duty numei constable 2 ahiuve.

Manipur a Covid-19 positive sanga natna a kon kijen dam tamjo ta

Imphal, July 4(ET): Saturday nikho a Manipur a natna athah a kihedoh jat sanga natna a kon kijen dam jat atamjo in ahi. RT PCR Test akibol jouva Covid 19 negative hi a mi 28 akijen nau mun a kon a discharged abol uvin, alangkhat a VRDL, JNIMS a covid 19 case athah 9 bou akimu be e, tin COVID 19 Common Control Room in thuso aneiyin ahi.

Covid 19 positive ahi kihedoh mi 9 holah a Senapati district mi 6, Imphal East district mi 2 chule Bishnupur district mikhat pang ahi. Abon uva Covid Care facility a achon diu chule angaicha ‘containment’ le ‘contact tracing’ hojong achelha e, tin asei uvin ahi.

Gamsunga positive case hi tua 1325 lhing ahitan, hiche lah a active case 658 hi a chule natna a kon kijen dam 667 ahi. Gamsunga recovery rate hi tua 50.33 percent lhing ahitai, tin thuso chun aseibe in ahi.

MTFD in delimitation 2001 census toh kisai a kibol aphatcha akichai na ding a PM henga ngehna nei

Imphal, July 4(ET): Manipur Tribals’ Forum for Delimitation (MTFD) in Prime Minister Narendra Modi ang a delimitation natoh 2001 census toh kisai a kibol aphatcha a akichai thei na ding in memorandum khat pehlut na ana nei uvin ahi.

Hiche natoh na hi Parliament le Indian daanpi noi a kibolahi toh lhon a koima in ama dei bangtah a suhboi na le natoh na jat chom chom ho anei na louding in kiloikhomna chun Prime Minister pa hetsah na ana nei uvin ahi. Hiche delimitation natoh noi ahi state usng a chengho in ahiding bangtah a chanvou channa anei uva, gamgi le adang dang hop hate cha a suhtoh ahi na ding in jong hetsah na ana nei uvin ahi. Manipur state achesa 1972 a ana kismedoh akon a tu channa thinglhang mi ho kisuhnem dan le achan ding uva lo mho kichan sah lou chuleh thanei na lhin set kipehloudan thu jong kiloikhomna chun prime Minister pa hetsah na ananei uvin ahi.  Thinglhang mi population hi state sung a 40& vaal ahin hinlah house a seat 19 bou akipe in, hiche hin Indian daanpi Article 332 doudal na anei ahi tin hetsah na ana nei uvin ahi.

Hiche delimitation natoh ahi politics kijelut na um louhel a thengsel a natoh na akinei na ding in jong kiloikhomna in memorandum achun tahlang na ana nei uvin ahi. Achesa  2008 kum  a delimitation programme kikah lhah na chu census dih loud an ana kingoh dan jong hetsah na ahin nei uvin ahi. Kum 18 lam thinglhang mi ho hi achan ding uva lom hung kichan sah lou ahiuvin, state sung nam khat le ni in thinglhang mi ho chan ding engset na jeh a hitabang natoh na ana nei ho uhi central government in ana het phah ji loutoh lhon a lheplhah a ana um ji u ahi tin jong tahlang na ahin nei uvin ahi. Achesa 2001 census hi muntin a kijang ahin, hiche chung chang a lungboi na ding le adih loud an thu kholchil na idng ima aumpon, phat hitih chan a koima in ima ana seilou a tu delimitation natoh hung um toh lhon a boinading hung kisem ahi dan jong hetsah na ana kinei in ahi.

ATSUM in TA&HD kivaipoh dan adeilou na thu sangtah sei; kiphinna bol dinga gihna neiyu

Imphal, July 4(ET):  All Tribal Students’ Union Manipur (ATSUM) in achesa kum phabep sunga Tribal Affairs & Hills Department, Manipur government kivaipoh dan agelkhoh nau thu asei uvin ahi.

Tribal simlai kiloikhom hon Ministry of Tribal Affairs, Government of India noiya tribal mi hi a genthei hahsa ho dinga agon fund ho achom a aheidoh lou diuva avel vel a ngehna anei ahi in, vangset umtah a ngehna ho ngaipeh a umlou ahi, tin asei uvin ahi.

Angaicha chule akhang toulou tribal ho khantou machalna dinga kigong fund Manipur government in fund atuhden ahiloule achom a aman ahiloule Ministry of Tribal Affairs & Hills in sanction abol fund ho Finance Department in asodoh louna umjing ahi. Family oriented scheme le developmental project hohi aphat cha beneficiary ho kipe ngailou ahi. ST scholarship kihopna jong boi jing a chule College le University hon simlai ho post-matric scholarship thumna a TA& Hills Directorate a kiphinna anei jing ahi in, tukum jong akikhelna umlou ahi.

Hiche jouse hi state sorkar in fund divert abol jeh chule Ministry henga department in Utilization Certificate apehlut loujeh ahi. Tribal Affairs Ministry, India government in June 5, 2020 ni a notice asodoh nauva state sorkar in akipe loulai Utilization Certificate (UC) chule Physical Progress Report (PPR) ministry henga vaigei louva Special Central Assistance (SCA) to Tribal Sub-Scheme (TSS) grant noiya apeh dinga ngehna anei thu akihe in ahi. State sorkar in Ministry lekhathot ajuilou na um hidinga simlai kiloikhom hon ginmona anei ahi. Tribal phatchomna ding douna a thilsoh auma ahile SCA to TSS noiya state in grants proposal apeh hi mangthah ding ahi. UC akipehlut loujeh a state Tribal Affairs and Hills department hi July 14, 2020 ni a umding Project Appraisal Committee (PAC) meeting 2020-21 a he na sa sa a kipansah lou hidinga ginmo na thei lampi um ahi, tin aseibe uvin ahi.

State sorkar chule Tribal Affairs & Hills Department in avat nalai Utilization Certificate hohi akipe phat sung aganna thei pen a apeh uva, boina umthei ho avendoh diuvin ATSUM in temna aneibe in ahi. State sorkar in akipe loulai UC ho apehlut louva ahile Tribal simlai kiloikhom chule tribal miho lunghanna le kiphinna soh ding ahi, tin thuso anei nauva gihna aneibe uvin ahi.

 

MPKFCT in Meritorious Award Distribution program bol; lungtup lentah nei dinga MPKFCT Chairman in simlai ho tilkhouna nei

Kangpokpi, Jul 4(UNA): Sadar Hills, Kangpokpi district in 22nd Maj. S Kipgen (Pagin) SM Foundation a Charitable Trust (MPKFCT) ni a lolhinna nei simlai ho Meritorious Award distribution ceremony anei nauva Trust Chairman le NPP Manipur Unit President Thangminlen Kipgen khangthah lolhinna nei ho pachatna thu aseiyin ahi.

Meritorious award hi kum seh a Maj. Pagin Kipgen Foundation, A Charitable Trust in achesa 1999 kum a kon agon jing ahi in, simlai khangthah hon themjilna pha amu nadinga tilkhouna neina a abol ahi. Tukum agom a simlai 429 award ape uvin ahi.

Haokholal Hangshing, Chairman, ADC Sadar Hills kin gon a Chief guest a apang in, Thangminlen Kipgen, Chairman, MPKFCT le Chunglenmang Kipgen, MCS Functional president le Guest of Honour a apang in ahi. Jampu Kipgen in awardee ho phondohna anei masanga Dr. Ngamkhohao Haokip in aum talou Maj. Pagin Kipgen hinkho thusim chomcha aseiyin, chule Rev Paogoulen Sitlhou, Pastor TBA(I) in taopehna aneiyin ahi.

Tukum award mu ho lah a Satmunchon Kipgen, EMRS, Gamnom Sapormeina (93.50); Lengunlal Kipgen,  Diamond Eng. H/S, Kpi (84.50); Sumit Gupta, Motbung, ETS Motbung (84.50); Thangminchon Singsit, Diamond Eng. H/S, Kpi (84.33); Letkhongam Khongsai, Diamond Eng. H/S, Kpi (83.57); Surbhi Pandey, Lighthouse School, Kpi (82.83); Kamgoulen Lhouvum, Diamond Eng.H/S, Kpi(82.33); Ngamlenlal Kipgen, EMRS, Gamnom Sapormeina (82.33); Thangginlenlal Kipgen, Elite Hr.Sec.School,Kpi(80.50); Lalginhao Misao, Diamond Eng.H/S Kpi (80.17); L.Manggou Haokip, Mt.Calvary Eng. School, Leimakhong (80.17); Nehgougin Singsit, EMRS, Gamnom Sapormeina (80.00);  Ngamminhao Haokip, EMRS, Gamnom Sapormeina (80.00) leh Satminhao Kipgen, EMRS, Gamnom Sapormeina (79.83) jong apang in ahi.

Awardee jouse memento, citation chule dangka 5,000 cheh ape uvin, hiche tilouva state level a position holder dangka 5,000 apeh be uvin chule subject topper ho dangka 1,000 cheh toh ape uvin ahi. MPKFCT record dungjuiya, achesa 1999 kum a kon HSLC exam a pass percentage asan na pen hi 2020 exam ahi in, 93.50 pc lhing ahi.

“HSLC exam hi akipat na bou ahi nalaiyin, khonung a hiche sanga na bolhoi joh diu hi kakinepna ahi”, tin Thangminlen Kipgen in lolhinna nei simlai ho apachatna thu aseiyin ahi. Mun chom chom a kon thuhilna namu diu ahi, hijong le lungtup lentah nanei jom diuva tilkhouna kanei nom ahi, ati. Kum 10-15 jouva ipi nahi diu ham tihi gel uvin lang kitilkhou na a neiyun chule Pathen henga thum ding sumil hih uvin, tin aseibe in ahi.

Koiman eimu lou na a jong thilpha bol a kitahna neiding ahi, tin aseiyin chule society, gamsung nam kikhelna podoh nahi diu ahi, ati. Charitable trust hi lhang sunga themjilna a thepna sangtah aumding tilkhou nadinga ana kipan ahi, tin aseiyin chule simlai hon lungtup phatah a akisem uva, lungtup molso nadinga pontho tah a na atoh uva chule koi ahi kikhol jing ding a simlai ho thuhilna aneibe in ahi.

Haokholal Hangshing, Chairman ADC Sadar Hills injong simlai ho tilkhouna thu aseiyin chule Chunglenmang Kipgen, MCS injong MCS amu dan, ama thil to thusim ho aseiyin, simlai ho tilkhouna aneiyin ahi.

Kin gon a Thangjakam Misao, Vice chairman ADC Sadar Hills, James Doujapao Haokip, MCS, Chief Executive Officer, SHADC Kangpokpi, Lalminlen Misao, MPS, Addl.SP (Ops), Kangpokpi, S. Singsit, Hony. Secretary, MPKFCT, lolhinna nei simlai ho nu le pa chule insung mite jong apang uvin ahi.

 

COHSEM in avat nalai exam ho July 6 le 7 a bol dinga sei; simlai hon exam centre naipen a exam abol theidiuva jong sei

Imphal, July 4(ET): Council of Higher Secondary Education Manipur in avat nalai exam ho July nisim 6 le 7 nikho teng abol ding, ajing nikho le answer script kive (evaluation) pan ding ahi, tin Council Secretary Biren Singh in aseiyin chule aganna thei pen a result phon dinga aseiyin ahi.

Exam hi centre 51 a kibol ding, July nisim 6 teng simlai 3618 in exam apeh ding chule July nisim 7 nikho teng simlai 547 in exam apeh ding ahi, ati. Hetthei khat chu exam hi achesa February nisim 14 a kon 24 sunga exam um dinga ana kigong ahi in, ahivanga Covid 19 Pandemic jeh a exam kivochon ahi. Examination centre 51 lah a school 19 hi Quarantine Centre a akiman jeh a Council in school adang 19 agon kit ahi.

Council Secretary in hetsahna anei dungjuiya, lockdown jeh a kholjin nading neilou simlai hon admit card chule identity card dang dang ho avetsah uva examination centre anaipen a abol theidiu ahi. Nu le pa chule simlai hon SOP ajui diuvin Council in temna aneiyin chule simlai hon mask akibol tei ding ahi, ati.

Chule dammona nei simlai hon authority ho ahetsah masat uva, examination centre a ache lou diuvin jong temna anei uvin ahi. Kivenna thei jouse a kivenna kinei ahijeh a simlai chule nu le pa teho amoh lungkham lou diuvin Council Secretary in temna aneibe in ahi.

 

Chapang puimang go teni Police hon thudoh nei jing; Koi khutnung ahi photchet na um nailou

B.Lalboi Gangte

CCpur, July 4 (ET): Achesa July nisim 2 nikho’a Bridge Street, Rengkai aum chapang khat hunam’a anakipui mang got na chung thu’a tuni thil umdan seikhom ding’a Hmar Inpui lamkai na’a HYA leh HSA in Police station agaphah got nao’a thil umdan hetnom mipi in jong ana jui jeh uvin tulai gamsung lockdown leh curfew um ahi nalai jeh chun Police hon mipi kipunkhom ho ana nocheh uvin ahin Police hon jong thagum mangcha louvin tear gas mangcha in ananocheh uvin ahi. Hiche thilsoh jeh chun Amrita Sinha, IPS, Superintendent of Police, Churachandpur leh CCpur District Police a officer jouse in Police Station anadellut uvin thilsoh sangtah alhun masang in boina ho anasuthip uvin ahi.

Alangkhat’a hunam’a Eric kipuimang nachung’a Police in aphat cha pan alah naochung’a District mipi ten akipapi in chuleh ginmo jeh’a kiman teni jong photchet na nei nading in Eric jong ana vetsah uvin ahi. Hiche achun Eric in hiche mi ni lah’a mikhat in pan ala in ahi ati vang in Police lam’a kon kichen tah’a phondoh thei ahi nading in ginmo teni statement apat thudoh anei jing in chuleh technical data hung lhung kim kahse’a photchet ahi lou lai dan aphongdoh uvin ahi. Chuleh hiche thilsoh nachung’a mona nei dih tah matdoh ahi natei ding’a pan nasatah’a kilajom jing ding ahi tinjong Police hon aphongdoh uvin ahi.

Covid-19 veiho thu kholna ding websit khat CM Biren in  hongdoh

Imphal, July 4(ET):  Chief Minister N. Biren Singh in tuni chun Manipur a covid-19 natvei ho thu kholna ding a manchah a apang ding in web portal manipurcovidstories.org kiti chu ama Secretariat ah hondohna anei in ahi. Hiche web achun covid-19 vei ho, Volunteers ho, NGO ho CSO ho Medical professional holeh adamdoh hon athusim u shared abol nading u plateform khat ahi in thusim chu text, photo ahiloule video a jong shared bolthei ahi.

Video message mangcha a CM pa’n aseina achun hiche web portal hi mitam tah in aphatchompi akinem in chule hiche mun a thusim kikoi khom ho hi phatkhat nikho teng leh Covid-19 aki doudal dan ho nungvet thah theikit ahi in chule koi hijong le mi tilkhouthei ahilou le hiche natna douna chungthu a mi tosot a pangthei thule la ho ahin upload thei thei in upload bolding in jong kouna anei in ahi. Tuni a web portal hondohna kin achun IPR Minister Th. Biswajit Singh, CAF&PD Minister Karam Shaym, PHED Minister Losii Dikho, Forest and Environment Minister Awangbow Newmai, Chief Secretary Dr. J. Suresh Babu, DGP L.M. Khaute, Principal Secretary (Health) Shri V. Vumlunmang, Director (RIMS & JNIMS) chule official phabep in pan ala uvin ahi.

Kum 12 a Class X exam lolhing Isaac in manbei’a themjilna mu ding

Imphal, July 4(ET): Tu naicha Board of Secondary Education, Manipur (BOSEM) in class X exam abol na a lolhinna nei simlai khangdong pen hi a kum 12 a upa Isaac Paulallungmuan in Saturday nikhon Shishu Nistha Niketan School, Imphal a admission amu tan ahi. Managing Board chairman Suranjan Lairenjam le Director Amrita Naorem in Churachandpur district a um Kangvai kho a cheng pasal chapang pa hi manbeiya CBSE-affiliated school a themjilna anei ding’a  anasei ahi. Admission le tuition fee chule lekhabu man beiya apeh nau chungchon a school in hostel facility jong man beiya peh dinga asei ahi, tin Isaac apa (uncle) Pauchungnung Vaiphei in aseiyin ahi.

“Isaac in lunglutna aneijeh a hiche school kajot u ahi in, ginchat louhel a school in themjilna man beiya peh dinga asei ahi. School administration chunga kipana sangtah kanei uve”, tin Churachandpur College a associate professor hi a Pauchungnung in aseiyin ahi. Isaac in Class XI science asim ding ahi. Mount Olive School a kai Isaac hin class 10 exam a 72% marks amu ahi. Dan dungjuiya class X exam pe ding hohi April 1 kah a alhompen a kum 15 alhin ngai ahi in, ahivanga BOSEM in Isaac hi psychological test abol uva, RIMS a clinical psychological test abol nauva IQ 141 anei jeh a HSLC exam apeh thei dinga phalna apeh u ahi.

JEE Main/ Advanced/ NEET 2020 examination ki postponed

New Delhi, July 4: Union HRD minister Ramesh Pokhriyal Nishank in aseina achun Covid-19 jeh in JEE Main 2020, JEE Advanced chule NEET 2020  exam ho ki postponed ahitan tukum September lha a exam ding ahidan asei in Joint Entrance Examination (JEE) Main 2020 examination chu September 1 apat 6 Sept. chan kibol ding ahi in, National Eligibility cum Entrance Test (NEET) exam chu 13 September leh kibol ding chule JEE Advanced exam chu September 27 nikho a kibol ding ahithu asei in ahi.

Kumseh leh JEE Main exam ahin simlai million khat nai tobang in India pumpi sung a exam abol ji uvin hinlah tukum in simlai 9,35,000 hon Main exam bolding in registered akibol uvin IIT seat 12,000 lah kichu ding uh ahi. NEET exam ahin simlai 1,5 million tobang in kum masa ho chun abol ji uvin hinlah odd seat 50,000 bou aum in ahi.

Minister Nemcha Kipgen in Kangpokpi DC office a Review meeting bol

Kangpokpi, Jul 4(UNA): Social Welfare and Cooperation Minister Nemcha Kipgen in tuni chun Kangpokpi DC office a Conference hall a review meeting anei uvin hiche kin achun . DC Kangpokpi, Somorjit Salam, IAS, SP Kangpokpi, Hemant Pandey, IPS, CMO Kangpokpi, Dr. Nilakanta Singh, Addl.SP (Ops), Kangpokpi, Lalminlen Misao, MPS, AC to DC Kangpokpi, Kaigoulal Kipgen, MCS, SDO ho,  PHED, PWD, MSPDCL, DSO akon DLO ho leh health official hon pan ala uvin ahi. Dr. Nilakanta Singh, CMO Kangpokpi makaina noiya health department hon pan alahna chung uva Minister nu in akipathu aphong in ahi. Institutional Quarantine Centres a dan le muol kikoi ho thahvetna aneikit uvin ahi. Meeting na achun Motbung lhangsung a IQC a um ho atamjo result akihet jouva chule discharge akibol jeh uvin Motbung a IQC a umho nehding semna mun chu ngah ding in thulhutna anabol uvin ahi.

Minister nu’n Chief Medical Officer leh Concerned authority ho heng ah Leikop a  DIET Centre a Covid care centre chu hapta kit sung a hondoh ahitheina ding a panla ding in aseipeh in chule hiche DIET Centre ahi lupna 60 tobang umding ahi. CMO Kangpokpi, Dr. Nilakanta Singh in aseina achun state authority hon hiche mun a duty bolding ho khatvei thahvetna neikit ding in asei in ahi. Aseibe na achun Kpi DHQ sung a IQC ho a manding twi kininglhing sel a koiding in asei in chule asung aumho heng a guideline ho briefing boljing ding ahithu asei in ahi. Minister Nemcha in District Administration, medical department, police leh frontline worker ho manchah ding in PPE 300, Mask 5000 chule gloves 5000 leh mai tuomna ho pehna anei in ahi.

Ccpur District sung’a chapang khat kipuimang got nachung thu’a Joint Student Body in thuso nei

B.Lalboi Gangte

CCpur. July 4 (ET):  Churachandpur District sung’a Student Organisation chom chom Kuki Students’ Organisation (KSO) CCpur, Zomi Students Federation (ZSF) Ghq,  Hmar Students Association (HSA) Joint Hqtr leh Mizo Zirlai Pawl (MZP) Hq Manipur kikhaikhom na Joint Student Bodies, Churachandpur in tuni Press release abolnao’a achesa July nisim 2 nikho’a Bridge Street Rengkai acheng Eric Zohmathuoi (13) S/o Stephan Vanlalrum chungthu’a  CCpur Police in hunam’a mi puimang hi ding’a ginmo mi 2 amatdoh pai nao chung’a aphachat nao thu atahlang in ahi.

Hiche toh lhon’a Joint Student Bodies in Police Department panlah na apachat nao chungchon’a mi puimang hon ipi ngaito nanei’a abol’u ham ti mipi hetding’a atahlang ding in ngehna anei uvin ahi. Ajeh chu adoi leh atup uva kon maban’a hitobang thil hung soh thei ding  ho akon mipi kivengdoh thei ding ahi ati. Chuleh mopoh nanei hon mi puimang ho ata-toh’a gotna apeh ding in jong ngehna anei in ahi.

Alangkhat’a CCpur khopi sung’a gamsung mi hilou mi tamtah District ahunglut naoban’a khen-tum leh eng-bolna ima um louvin Business leh neh holna  chom chom’a zalen tah in alha uvin ahi. Ahin gamsung mi hilou hon chapang hunam’a puimang ding chan’a natohna anei tah jeh uvin Joint Student Bodies in gamsung mi hilou ho phatah’a avetsui ngai ding ahinaban’a achaloh dan uleh akibelap dan ho kholchil poimo asahdan thu atahlang in ahi. Hijeh chun Joint Student Bodies in gamsung mi hilou ho hung pundan leh hunglut dan ho vetlhahna aneipan ding ahitai tinjong aseibei. Hiche toh lhon’a CCpur District sung’a chamna leh lungmonna suse thei ding ho kimoh vetlou ding ahi tin K. Vanlallian, President, ZSF GHQ, NJ Haoneo Baite, President, KSO Churachandpur, Jeffrey Joute, President, HSA Joint Headquarter leh GF Lalniropuia, President, MZP Headquarter, Manipur hon thuso aneinao’a atahlang uvin ahi.