15th January, 2021 News

15th January, 2021 News

92
0
SHARE

Education Minister in “School Fagathansi Mission” noi’a Singngat Govt. High School leh ZEO CCpur office hondohna nei

B.Lalboi Gangte

CCpur. Jan 14 (ET) : Churachandpur District ding’a khantouna khat hi ding in tunin (Jan. 14) S. Rajen Singh, Minister Education, Fishery & CADA, Manipur in CCpur hopsung Singngat kho mun’a School fagathansi mission 2019 tohgon nanoi’a kisa Singngat Govt. High School Building leh Hill Town, Tipaimukha mun’a Zonal Education Office (ZEO Office) hondohna ananei in chuleh Rev. Kappsuanthang, ZPCS in Pathen heng’a lhandohna ananei in ahi. Kingon ahcun Jin-gun in S. Rajen Singh, Minister Education Fishery & CADA, Manipur, Kin- deichom in Vungzagin Valte, Minister Tribal Affairs and Hill, Transport GAD, Manipur, Kin-neipa in Ginsuanhau Chiarman, MANIREDA & MLA Singngat chuleh Jin-ja um in S . Khaikhopau Ngaihte, MCS, AC to DC, CCpur ana pang uvin ahi.
Hiche kingon phatusng’a Jin-gun in  S. Rajen in houlimna aneina’a achesa 2017 kum’a N. Biren Singh lamkai na BJP Government in 2019 kum’a ahin patdoh “School Fagathansi” hin nu-le-pa tamtah ding’a apohgih’u dom jangkhai in apang in ahi. Tuhin ama Govt. noi’a martyrs park, water supply chuleh thinglhang gam’a development work tamtah pohlut in aum doh thei tan ahi. Chuleh maban’a School kai chapang ho Mid-Day Meal leh National Diary Board noi’a bongnoi hop ding ahidan atahlang in ahi. Pre-Primary Policy kiti patdoh ahi dungjui’a khosung khat’a jilkung 2 in chapang vetkolna mopohna anei ding chuleh Covid-19 jeh’a School jouse kikhah jong leh Jan. lha kichai lam leh SOPs hoitah’a jui pum’a Morning Shift leh Evening Shift ah kikhen’a School kaipat  ahi na ding lampi akingai to jing lai ahi tin jong asei in ahi. Aman aseibena’a State sung mun chom chom akon School Building toh kisai’a report mu ahi dungjui’a phat sotlouva School semthah ding ho leh jilkung kining lhin louna mun ho vetsuina kinei ding ahi. Chuleh Singngat Government High School hi Higher Secondary a dopsang ahi nading in Chief Minister heng’a thulhutna akinei tan Cabinet Meeting masapen’a approval bolthei ahidan aginchat na aphongdoh in ahi. Chuleh School campus hi aken jeh in lhang lampang fencing bol ding in kitepna jong anei in ahi.

Alangkhat’a tuni nilhah lam nidan 1:30 in ZEO CCpur lamkai nan Hill Town, Tipaimukh road a ZEO Office thah kisa jotheng ahitoh lhon’a Education Minister in hondohna anei in chuleh Rev.  S. Ginmalsawm, Director of Social Development, EBC HQ in Pathen heng’a lhandohna anei in ahi.

Kingon phatsung’a Ginsuanhau in houlimna aneina’a ZEO building thah hondoh ahitoh lhon’a koiman hallhah ding lung anei tah lou ding in ngehna anei in ahi. Chuleh Vungzagin Valte Minister houlimna aneina’a Building thah kisa hi Dk. Lakh 34 bou sanction hi jong leh hiche building kihongdoh hi themjil na ding’a  khom poimo tah hung hi ding in adeisah nathu aphongdoh in ahi.

Hiche toh lhon’a V.Hangkhanlian in houlimna aneina’a Bill 3 jeh’a mipi lunghang hon ahallhah hi jong leh mipi palai ding’a lhendoh’a um Minister chanvou peh ahi petna proposal kibol na akon Dk. Lakh 50 sanction kibol hijong leh Cut chom chom kibol nung’a Dk. Lakh 34 vel bouva hiche building kisa hi jong leh kilomtah in sah jou in aum in ahi. Office building hi hondoh hi jong leh Staff jouse building in adol lou ding jeh in staff jouse beh phatah’a building sung’a natoh na anei theina ding uvin building sahbe ding in Education Minister heng’a ngehna akinei in ahi. Churachandpur College jong Principal in nasatah’a pan alah jeh in kilomtah chelha ahin chuleh Post Graduate chan simthei na ahi na ding in panlah hu cheh ding in in ngehna anei in ahi. Hetthei khat chu Churachandpur Assembly Constituency sung’a High School 7, Upper Primary leh Lower Primary School panna’a School 16 sah thah ahi na ding’a proposal kibol ho jong gangtah’a toh molso ahung hi ding akinepna aphongdoh in ahi.

Education Minister S.Rajen in houlimna aneina’a Manipur a BJP Govt. noi’a thinglhang leh phaitol khenchom umlouva Community hall, Nute Bazaar leh a dang dang tamtah sahdoh hi jong leh staff quarter ding kining lhing aum lou jeh in jilkung leh office staff hon dei bang in School vetsui na anei thei pouvin ahi. School building tamtah semphat na natoh achelhah jing lai’a tuition fee peh ding hahsat jeh’a School chapang tamtah in athemjil na angah hetdoh ahitoh lhon’a School Fagathansi Mission kiti hung kipan doh ahi. Manipur State sung’a themjil na semhoi na ding leh jilkung kining lhing lou vekol na ding’a Graduate Teacher 923, Hindi Teacher 550, Meetei Mayek (Manipuri Teacher) 18 leh Sanskrit Teacher 18 phat sotlouva lahbe hi ding ahi dan atahlang in ahi. Hiche na ding’a B.Ed. chai leh Graduate simlai hon jong jilkung ding’a apply abolthei ding’u ahi dan aphongdoh in ahi. State sung’a Government School ho’a pao chom chom 18 manthei ahi na ding’a panlah na achelhah jinglai ahi tinjong aseibei.

Kingon achun N. Chingkei Singh, MES, Zonal Education Officer, Ccpur leh Tungzamuan, Convenor, School Fagathansi Mission Management Committee, Singngat Government High School chuleh Singngat Assembly Constituency sung’a kho haosa, khosung mipi, Singngat CHC a Doctor, Nurse chuleh Staff ho pan anala uvin ahi.

Xxxxxxx

KSO Sadar Hills lamkai thah kilhenna um

Imphal, Jan 14(ET): Kuki  Students’ Organization Sadar Hills 2021-2024 sung’a lamkai thah ding kilhenna tunin KSO Sadar Hills Administrative Office building, Kangpokpi a ana um in ahi.

Hiche Election chu KSO Constitution’s Article No. 14(C) leh 15(A) dungjui a Paotinthang Lupheng, President KSO General Headquarters Returning Officer leh Thanglenmang Simte, General Secretary KSO General Headquarters, Presiding Officer hina noiya chelha ahi.

Tuni kilhengdoh KSO executive member ho chu Satminthang Kipgen (President), Ngamkhohao Haokip (Vice President), Thangtinlen Haokip (General Secretary), Romen Lalginsei Lhouvum (Asst. General Secretary), Shongrengsong Karong (Education Secretary), Letginthang Haokip (Finance Secretary), Lamlunmang Gangte (Information & Publicity Secretary), Lamkhohao Vaiphei (Social and Culture Secretary), Mangminlal Kipgen (Asst. Social and Culture Secretary), Paokhojang Kipgen (Relief and Rehabilitation Secretary) chule Paogoulam Kipgen (Youth Affairs and Sports Secretary) ahiuve.

Lamkai thah ding’a kilhengdoh ho Paotinthang Lupheng, President KSO General Headquarters in kihahselna (oath taking) aneisah in chujouvin Rev. Chungkholet Chongloi, Retd. Pastor in Pathen heng’a taona in lhandohna aneijin ahi.

Executive expansion hi lamkai thah kilhengdoh hon amaho deiphat leh kiman dungjui a akibol diu ahitai.

Lamkai thah kilhenna a chun district sung’a kiloikhomna Zillai, Gangte Students Organisation, Komrem, TSA/TYA hon jong pan analan chule Kuki Inpi Kangpokpi Dst., Kuki Women Union Kpi Dst., leh Kanggui Youth Union (KYU) thalheng hon jong pan alauvin ahi.

Xxxxxx

Kuki Research Forum Convention cum General Assembly leh lamkai thah kilhenna um

Imphal, Jan 14(ET): Achesa January 8 leh 9, 2021 nikho chun KIC Complex, Churachandpur a Kuki Research Forum (KuRF) Convention cum General Assembly 2021 chu KSO Churachandpur in host bolna in ana chelha in ahi.

Kingon a chun delegates 100 in pan ana lan chule Technical Session 5- i) History, Culture and Traditional: Ancestrality and Beyond; ii) Education, Language and Literature: NEP and the Kukis; iii) Land, Economy & Ecology: Livelihood, Security & Sustainability; iv) Population, Migration & Settlement Pattern: A Transitional view chule v) Politics, Identity & Democracy: A Long  View topic ho in kihoukhomna jong ana chelha in ahi.

Hiche a chun Kum 2021-23 sung’a lamkai ding Executive kilhenna jong ana um in hiche a kilhengdoh lamkai ho chu, President: Prof. Hemkhothang Lhungdim, International Institute for Population Sciences, Mumbai; Vice- President: Hoipi Haokip, Assistant Professor, YK College, Manipur; General Secretary: Dr. D.L. Haokip, Assistant Professor, Gauhati University; Joint Secretary: Mr Thanggoulen Kipgen, Assistant Professor, St. Edmund’s College, Shillong; Finance Secretary : Nehjamang Haokip, Assistant Professor, Churachandpur College chule  Treasurer : Mercy Baite, PhD Scholar, Manipur University ahiuve.

Xxxx

Covid-19 Vaccine kikapna dinga Manipur in kigotna chelhahpi jing

Imphal, Jan 14(ET): Manipur Additional Chief Secretary Paulunthang Vaiphei in Thursday nikho chun State in ana kimu COVID Vaccine chu Oxford University leh lou le ai semna langa poimotah leh lentah  AstraZeneca hon ahin gondoh uleh Serum Institute of India, Pune hon ahin sem Covishield ahi tin aseiyin ahi. State in hitobang Vaccine amuthei hi vangphat umtah ahi tinjong aseiyin ahi.

Thulakhom ho masanga ahoulimna ah, Vaiphei in Wednesday nikho chun Covishield kap 54,000 ana kimu in Vaccination umna ding mun 10 ho – JNIMS, RIMS, Shija Hospital, Thoubal, Chandel, Ukhrul, Senapati, Tamenglong, Churachandpur leh Bishnupur District Hospital ho ah ana kithahlut in ahi.

Kigotna jouse Friday nikho leh kichai ding chuleh leiset chung pumpi a dinga lenpen COVID Vaccination Programme chu Saturday (January 16) leh kipan ding ahitai tinjong aseibei.

Aseibe na a chun, RIMS mun a mihem 3700 kikap diu, JNIMS a mi 1800, Shija Hospital a 1200  leh District Hospital jouse a mihem 200 apat 470 gei kikap diu ahi. Hiche Vaccination kibolna mun ho a nikhat sunga mi 100 cheh kikap ding chuleh RIMS a mi 200 cheh kikap ding ahi tinjong aseibei. Nikho 28 jou leh avelni channa a kikap kit ding, Covishield Vaccine mama a kikap kit ding ahi. Vaccine kikap jousen, anivei channa akikap jou nung uva jong nikho 14 sung phatah a COVID Appropriate Behaviour phatah a ajui diuvin jong temna aneiyin ahi.

A khatvei na a COVID lou kikap ding hohi alhangpi a State sunga um Health Worker ho hidiu, anivei na a hi Frontline Worker ho hidiu ahi.

Athumvei channa a kikap ding ho hi kum 50 chunglam mi hidiu chuleh kum 50 noilang mi  midamthei jeplou ho hi a 4th channa a kikap diu ahi tinjong aseibei.

Director FW Dr Shyamsundar, State Immunization Officer Dr Nandakishor leh Mission Director NHM Dr Shyamjai honjong thulakhom ho henga houlimna kineina ah pan alauvin ahi.

XXXXXXXXXX

Assam Rilfe hon kuwa chang Dk. Lakh 33.16 anamandoh

CCpur, Jan. 14 (ET) : Assam Rifle hon tunin Churachandpur District hopsung Baulijang kho kom’a kuwa chang a kivei mi 2 akon in bag 270 anamandoh uvin ahi. Chuleh akimandoh kuwa chang hi market value a sei ding in Dk. Lakh 33.16 vel man hi ding in akisei in ahi. Matdoh’a um teni leh thil ho jouse District Forest Office, Singngat khut’a kholchilbe ahi nading in anapelut tauvin ahi.

xxxxxxx

Assam Rifle hon Dk. Lakh 8 man ding bim kipodohgo anamandoh

Chandel, Jan. 14 (ET) : Assam Rifle hon Chandel District hopsung Larong kho komvel janni (Jan. 13) kholchilna ananei nao’a daan in aphallou bim (timber) tamtah anamandoh uvin ahi. Chuleh hiche bim hi legal document jaolouva akipohdoh got’a amatdoh’u ahi. Hiche thil kimandoh hi asum a sei ding in Dk. Lakh 8 man ahi. Akimandoh bim ho jouse Forest Department, Chandel ho khut’a kholchilbe ahi nading in anapelut tauvin ahi.

xxxxxxx

Assam Rifle hon road safety toh kisai’a awareness drive ananei

Imphal, Jan. 14 (ET): 32nd National Road Safety Week het jing nading in tunin Assam Rifles hon Imphal West District hopsung Shekmaijin mun’a awareness drive on Road Safety ananei uvin ahi. Hiche kingon kibol lona ajeh hi gamsung’a cheng mipi hon road safety kiti ahetthem thei nading uva agon’u ahi. Road safety ading’a apoimo pen chu safe driving etiquettes, helmet khuh ding, traffic rule jui ding, seal belt manchah ding chuleh khamnathei bol pum’a gari tol lou ding ti ahi.

Hiche toh lhon’a awareness drive toh kisai in gari tolpet’a bol ding leh bol lou ding kisut na poster leh pamphlets ho kho sung miho heng’a hopdoh na anei in ahi.

xxxxxxxx

Jiri District Cricket Association kiphutdoh

Jiribam, Jan. 14: Jiribam District sung’a khangthah ho Cricket lam’a tilkhou nading’a khangtousah ahi nading in janni (Jan. 13) nikoh chun Jiri District Cricket Association chu Jiribam sung’a ding in ana kiphutdoh tan ahi. Hiche Association a executive member ding in Jiribam District sung vengsung mun chom chom akon 13 alhengdoh uvin ahi. Chuleh officer bearer ding’a lhendoh’a um hochu President : Nameirakpam Budhachandra Singh; General Secretary : Sagolsem Priyokumar Singh chuleh Treasurer : Kharibam Gopeshwor Singh ahi.

XXXXXX

Manipur a Covid-19 +ve case thah 18 kimudoh; nikho 5 kijom’a Covid natna jeh’a thina toh um lou

Imphal, Jan 14(ET): Manipur gamsung’a Covid-19 +ve case mudoh ahi jing toh lhon’a tuni case thah kimudoh ho 20 noilam in akhesuh tan ahi. Chuleh Covid natna jeh’a thina toh tuni pum’a kijom’a nikho 5 channa gei in thina toh aumpon ahi tin State Health Department chun atahlang in ahi. Tuni case thah 18 ( pasal 8 leh numei 10) akimudohbe toh lhon’a agom’a case 28,787 alhing tan ahi. Chuleh Covid natna jeh’a thina toh aum belou toh lhon’a 365 in aum jing in ahi tin State Covid-19 Common Control Room chun aphongdoh in ahi.

Hiche toh lhon’a tuni case thah kimudoh 18 lah’a Imphal East akon 7, Imphal West akon 6, Churachandpur akon 3 chuleh Senapati leh Tamenglong akon 1 cheh ahi. Alangkhat’a Covid natna akon damdoh tuni mi 41 aumbe toh lhon’a gamsung’a agom’a adamdoh jat 27,976 alhing toh lhon in active case 446 aum tan chuleh state recovery rate 97.18% alhing tan ahi. Chuleh koi tobang Covid-19 +ve khat toh kitongkha aum leh mun chom khat’a agannathei pen’a um ding chuleh Covid Control room ahilou leh District CMO ho heng’a testing bol nading’a contact abol ding uvin jong hetsah na anei uvin ahi.

XXXXXX

Moreh a um Veterinary Sub-division hospital vetsui na ding a ngehna um

Tengnoupal, Jan 14(ET): Moreh a   Deputy director touna   Veterinary Sub-Divisional Hospital hi govt in vetsui na anei lou na asot tah toh lhon in apu nei lou abah tah dan chung a Moreh khopi sung a mi pho in govt ang a vetsui na ahin nei ding uvin temna anei uvin ahi.

Hiche office a natong staff ho jong umnathei ahi tah loutoh lhon a hotel ho a age ji tahdan u jong hetsah na anei uvin ahi. Manipur govt in agan na thei penna staff ho umnading quarter jong ahin sah loi ding uvin hetsah na anei uvin ahi.

Moreh sunga department dang a natong ho in quarter anei jing utoh lhon a anei lou hi veterinary a natong ho bou ahitah dan jong tahlang na anei uvin ahi. Hiche vet hospital le staff ho umnaidng quarter phate a vetsui le sah ahi na ding in mipi ho in govt ang a temna anei uvin ahi.

Xxxxxx

AMWJU le MPC in lunghempi na thuphon nei

Imphal, Jan 14(et): All Manipur Working Journalist Union le Manipur Press Club kisemdoh na a panlah na ana nei le Eastern Standard Daily Newspaper a editor jong hi Shorokhaibam Nailendra chu jania aleiset hikho ana bei toh lhon in AMWJU in lunghempina thuphon ahin nei uvin ahi. AMWJU lamkai ho in Nailendra geldoh na kingon ana man utoh lhon in jana jong ana pe uvin ahi.

Xxxxxxxx

Manipur sung Court jousea Regular Sitting um ding hi Covid 19 guideline dungjuiya chelha ding ahi

Imphal, Jan 14(ET): Manipur High Court in thuso anei nauva Manipur sunga Court jousea Regular Sitting, High Court, District Court leh state sunga Tribunal noiya umding hochu Covid 19 guidelines dungjuiya um ding ahi tin aseiyin ahi. Chuleh hichea hin physical Court sitting jong umding ahi.

Hiche thuso anei nauva Manipur sunga Court jousea dinga motion cases ahin, urgent regular leh pending cases hochu video conference akona nikho chom chom a um ding ahi. Hichea Court che dingdan, adeh a Special Ordered cases hochu video conferencing akona umding ahi. Chuleh hichea High Court a dinga physical Court jong mopohna nei Judges hon avettup diu ahi. Hiche hi case umdan dungjuiya umding ahi chuleh hichea hi Chief Justice koma phalna jong amu u ngai ahi. Chuleh hichea hin Covid 19 protocol leh Social distancing jong jui hiding ahi tin Court in aphongdoh in ahi.

Hiche hetsahna anei na ah District Court leh Tribunal hochun limited tah a Physical Court jong presiding officer ho jauna anei diu ahi. Hichea hin cases thah hochu soft copy format a email akona thotdoh hiding ahi.  Chuleh hichea Hard copies hochu email a kona concerned court cheh in restriction kilah doh jouva ana pehlut ahitai. High Court adinga cases thah holeh application chom chom hoa documents hochu hcmefilling@gmail.com akona e-mail a athot diu ahi.

Hichea Court phat sungchu 10:30 AM akona 4 PM ahilouleh discharge kibol kah a dinga gon ahi.  Advocate koi hijongleh Court sunga hung lut jouse chun Social distancing phatah a ajui diu chuleh atohkhom pi hotoh jong Thermal Scanning leh Covid screening jong kibol diu ahi.

Manipur Judicial Academy in hichea online training programme hochu COVID 19 natna um sunga agon jiu ahi. Covid 19 natna jeh a mipi hon hahsatna ato nau thu toh kisai a, Manipur State Legal Services Authority hon urgent legal services noiya natohna jong level jousea umding ahi chuleh hichea hin Covid 19 dan kisemho jong jui hiding ahi. .

Chuleh hiche pending cases leh listed cases hochu niseh a February 16 chan geiya chelha ding ahi in, chuleh hiche jouleh hin High Court leh District Court hoa chejom ding ahi. Hinla hichea hin Special Court leh Trial chejing lai hoa dinga kigong louding ahi, hinla hiche hi Supreme Court leh High Court thupeh dungjuiya umding ahi. Hiche thutoh kisai a information hochu District Court website a uploaded kibol ding ahi chuleh notice board ajong tahdoh hiding ahi.

High Court thu toh kisai a Officer jouse leh Staff hochun working days jousea Office kai diu ahi. Hinla Officer holeh Staff ho containment zones a umhoa vang Office akai tei diuvin thupeh aumpoi, hinla amahon Registrar General koma jihthoa phalna alah diu ngai ahi.

Digitisation leh Scanning work hojong chejom ding ahi. Hinla containment zones a umho chu ngaithem hidiu ahi.

District Court leh Tribunal noiya umhoa dinga presiding judges leh Staff ho attendance jong avettup diu ahi. Chuleh Bank leh Post Office, High Court sunga umhoa lutding jong phal hilou ding chuleh hichea hin Covid 19 danjong khoutah a jui hiding ahi.

Xxxxxxx

Loubol miho kiphinna tuni vel 9 channa kihouna seithei lou dinmun lhung dia um

New Delhi, Jan 14: Avel 8 na kihouna Centre leh Farmers Union ho kikah a aumna a alangni a kinopto na dungjuiya January 15 leh kihouna umding ahi. Hinla Supreme Court in stay order asodoh toh kilhon a jing nikhoa kihouna umding jong seithei dinmun in aum tapon ahi.

Hichea hin Government lam leh Farmers Union hoa kona jing nikhoa kihouna umna dingah Official thuso aum naipon ahi. Alang nia kona kihouna anei nauva kona ima seilhah ana hithei lou toh kisai a Court in Committee asemdoh a chuleh loubol mihoa kona ahahsat nahou jong angailhah ding ahi. Hiche thutoh kisai a Minister of State for Agriculture, Kailash Choudhary in PTI koma hetsah na anei na ah, party teni kikah a kihouna umding jong seithei dinmun ahitapoi ati.

Hinla Government in hiche thu toh kisai a kihouna chejom ding in agong in ahi tin Agriculture Minister of State Parshottam Rupala in aseiyin ahi. Chuleh aman aseiben hiche tobang thu hohi kihouna akona solution umding bou ahi ati. Alangkhat ah loubol mihon jong jing nikhoa kihouna umna dingleh Supreme Court maiya adinleh adinlou diu thu aseichen thei pouvin ahi. Hiche Farm bill 3 ho toh kisai a Supreme Court in stay order asodoh hi Government leh Farmers Union hoa dinga boina khat in aumdoh tan ahi. Kailash Choudhary in aseina ah Government in hiche dan hohi stay order kiso hi adei pon chuleh Farmers union honjong kadeipouve ati. Parliament a Bill ki passed ho stay order kisodoh hi akideipoi, hinla hichea Supreme Court order hi ‘sarva-manya’ ahi in Supreme Court order hi ka sang uve tin aseiyin ahi.

Xxxxx

PM Modi in COVID 19 damdoi kapna ding phongdoh ta, nikho masa a Health Workers lakh 3 ho kap hiding

New Delhi, Jan 14: Prime Minister Narendra Modi in India pumpi huop a Covid 19 Vaccine kapna ding chu Saturday nikhoa kona apat ding ahi tin top officials hon CNBC komah Thursday nichun hetsahna anei in ahi. Hichea hin nikho masapen a dinga mihem lakh 3 tobang hochu Vaccine kap masat hidiu ahi, amaho chu Health Workers leh Frontline Workers chuleh mihem million 270 kum 50 chunglang miho jong aban a kap hidiu ahi. Government in atohgon dungjuiya high risks lah a um mihem million 300 val Vaccine kap dinga tohgon anei ahi.

Hiche Vaccination Programme chu Modi in apat ding ahi in chuleh hichea hin details vang akigong naipoi tin VK Paul, NITI Aayog Member in NDTV komah aseiyin ahi. Hichea damdoi kapna dinga amun (sites) chu 3000 tobang Saturday nikhoa kona umding ahi in chuleh hiche hi site 5000 a suhsang hiding ahi ati.

Health Care Workers lakh 3 tobang hochu sites 2,934 gamsunga umhoa kona nikho masapen nileh Covid 19 damdoi kikap diu ahi, chuleh hichea damdoi kikap nading chu January 16 leh kipan ding ahi tin official thuso khat in CNBC komah hetsahna anei in ahi.

Chuleh hiche Vaccination session khat in beneficiary 100 tobang ahuop jouding ahi. Hiche thutoh kisai in Union Health Ministry chun State hon nikho khat sunga dinga damdoi tamtah kapding a agonlou diuvin hetsah na anei in ahi. Chuleh State hochu Vaccination session ho 10 per cent tobang Reserved a koi din ngehna jong anei in chuleh nikho khat sunga mihem 100 val kaplou dinjong ngehna anei in ahi. Chuleh hichea hin PM Modi in virtual a kona Health Workers hotoh jong kihet tona anei ding ahi.

Thuso khat in aseina ah Prime Minister Narendra Modi in Co-WIN (Covid Vaccine Intelligence Network) Apps digital platform Covid 19 natna vetsui na dinga asem jong hondoh na anei ding ahi tin aseiyin ahi. Chuleh hichea India in damdoi kapna ding tohgon anei hi leiset chunga dinga immunization lenpen khat ahitai ati. Hiche toh kilhon a Ministry of Health in President of India toh akihet to dungjuiya Polio vaccine kapna ding nikho jong achon dingin aumin ahi. Polio hi, “National Immunization Day” (NID) tia kihe ahi in chuleh January 31 nikhoa ana umjing khat ahi.  Chuleh Covishield damdoi leh Oxford vaccine, Serum Institute of India in asemho leh Bharat Biotech in asem Covaxin damdoi hochu City 12 hoa first phase a dingin pohlut anahitan ahi.

Xxxxxxx

Nepal Foreign Minister in ni 3 sunga dinga India vil, Covid 19 Assistance leh Border thu seikhom ding

New Delhi, Jan 14: Nepal Foreign Minister Pradeep Kumar Gyawali in Thursday nichun ni 3 sunga um dingin India ah ahung kholjin in ahi. Hiche nikho 3 sunga hi aman Nepal-India Joint Commission a gupna a jauding chuleh hiche phat sunga hi Covid 19 cooperation leh border thua kiboina umho jong India a atoh kibah pi S Jaishankar toh aseikhom lhonding ahi. Gyawali hi Prime Minister K P Sharma Oli in gamgi toh kisai a Political map thah asodoh jouva Nepal akona hung kholjin holah a senior most Political leader masapen ahi.  Hiche map kisodoh ah chun India gam mun thumho, Limpiyadhura, Kalapani leh Lipulekh hochu Nepal gamsung in ahuop a kisodoh ahi.

Nepal leh India kikah a dinga hiche Joint Commission hi asangpen ahitai. Hiche meeting um sunga hi gam teni hin bilateral trade, energy, border disputes leh Covid 19 Assistance thujong aseikhom lhonding ahi tin Ministry of Foreign Affairs in aseiyin ahi.

Minister Gyawali in hichea India avil sunga hi High level dangho jong akimupi ding ahi tin Ministry chun aseiyin ahi. Hichea hin Gyawali hi Foreign Secretary Bharat Raj Poudyal leh Secretary at the Ministry of Health and Population Laxmi Aryal in akilhonpi in ahi tin Official thuso chun aseiyin ahi. Nepal in kum masa a map asodoh thua India in hiche hi, unilateral act ahi in chuleh Kathmandu jong hitobang a Artificial hijongleh gam kisulen hi kipom louding ahi tia donbutna ana peh ahi.

India in hichea Nepal natoh hin gam teni kikah a kihetthem na aumthei nadinga kihouna nei dinga ngehna anei sa jong anahie. Hiti hojeh hin gam teni kikah a bilateral exchange hojong ana umthei tapon ahi.

Foreign Secretary Harsh Vardhan Shringla in November lha a Nepal agavil jongchu bilateral relations hoina dinga tohgon khat jong ahi. Shringla in Prime Minister Oli leh top Political leader hojong ana kimupi in ahi. Ama kholjin jouhin Indian Army Chief General MM Naravane jong Research and Analysis Wing (RAW)  Chief Samant Kumar Goel toh Kathmandu ah ana kholjin lhonin ahi. Chuleh senior BJP leader leh Foreign Affairs Department Vijay Chauthaiwale honjong December lha sunga Nepal ana vil un ahi.

Xxxxxxxxxxx

Aming Shyla in ngohna anei na chungah JDO President in thudih ahiloudan phongdoh

Jiribam, Jan 14(ET): Khedagar Khasi Village akona Chairman Aming Shyla in President Jiri Development Organisation (JDO) N. Sadananda Meetei in ama chunga physical harassment anei e tia ngohna anei na chungah, hiche hi thudihlou ahi tin Meetei in aseiyin ahi.

Aman Jiribam a JDO office a thuso miho koma aseina ah JDO team leh CSO akona volunteer phabep hon Nunkhal village agavil uvin chuleh hitobang a thilsoh leh Physical harrassment leh Aming Shyla chunga thilsoh ima amudoh pouvin ahi ati.

Aman aseibena ah JDO in Nunkhal kho mipi hoa kona illegal land encroachment thua complaint amutoh kilhon  January 7 nikhoa chu JDO leh CSO volunteer phabep hon Salan Khasia, Kamaramga Khashi village a Chairman pa injong vetlhah na ana nei uvin ahi ati.

Chuleh Kamaramga Khashi village a Chairman injong Aming Shyla akouvin, chuleh land dispute thutoh kisai a kihouna akinei jouvin Nunkhal kho ah jong akiche khomin ahi tin Sadananda in aseiyin ahi.

Aman aseiben hiche thuhi Aming Shyla leh Nunkhal kho mipi ho jauna kihouna umsa ahitan ahi. Chuleh hichea hin dantoh kitoh louva natoh na ima thilsoh aumpoi ati.

Hinla Khedagar Khasi Village Chairman Aming Shyla in khonung in ama chunga physical harassment leh gihna aume tin aseiyin ahi chuleh hiche hochu Manipur sunga newspaper hoa ana kisodoh in ahi. Aman aseibena ah hitobang a bul leh bal neilou a thuso umhohin district teni kikah a kihethem naho jong asuhset ding ahi ati.

Hiche toh kilhon in Sadananda in Aming Shyla komah hitobang a dihlou tah a ngohna anei hochu ladoh dingin ngehna anei in, chuleh Jiribam leh Tamenglong District hoa vaipo honjong boundary thua kiboina umho chu agangthei pena vetup dingin ngehna anei in ahi.

Xxxxxxxx

Armed Forces Veterans Day: Rajnath in China gihna nei

New Delhi, Jan 14: Defence minister Rajnath Singh in, gal akideipoi, ahin, koi superpower hileh India tongkha kigo jouse India sepaihon lomtah a lethuh theina tha anei ahi, tin Thursday ni a Bengaluru a um Indian Air Force HQ Training Command muna Armed Forces Veterans Day kimanna achun China min panlouvin indirect tah in China gihna ana neiyin ahi.

Wednesday ni a centre in Dk. 48,000 crore man lutding indigenous defence procurement deal lenpen analah chungchangin Singh in, HAL a kon indigenous LCA Tejas Mark1A fighter jets 83 chohna dingin Prime Minister Narendra Modi makaina noiyin Cabinet Committee on Security (CCS) in phalna ana petan, hiche gellhuhna hin gamsunga job opportunity 50,000 val ahin umsah ding ahi, tin ana seiyin ahi. Hiche deal hin Air Force  a homegrown fighter jet fleet hatah a asuhhat ding ahi. Singh in hiche deal hi “game-changer for self-reliance” ahi, tin ana seiyin ahi.

India leh China kikah a gamgi boina chungchanga gam teni’n military talk vel 8 ananei ahitan, aban’a avel 9 channa a dinga corps commander-level a kihouna umkit ding ahi.

Chief of Defence Staff (CDS) General Bipin Rawat leh Air Force chief Air Chief Marshal RKS Bhadauria injong security review dingin Monday nichun eastern Ladakh vilna ananei lhonin ahi.

Xxxxxxxx

India in ni 7 kijoma niseh a Covid-19 Case thah 20,000 noilam ngen mujom jing

New Delhi, Jan 14: India gamsunga COVID-19 case thah nikhat sunga 16,946 mube ahikit toh lhonin tuni chana India pumpi a case kimudoh jat agomin 1,05,12,093 ana phatan ahi.

Chuleh covid natna a kon damdoh jat agomin mi 1,01,46,763 alhingtai, tihi Thursday nikho a Union health ministry data a kon mutheiyin aumin ahi. National COVID-19 recovery rate jong 96.52 percent chan ageitan ahi.

Alangkhat a Thursday ni mama a mi 198 in thina anatobe kit toh lhonin tuni chana India gamsunga covid natna jeh a thina tohjat agomin mi 1,51,727 ana lhingtan, national fatality rate 1.44 percent ahijing nalaiyin ahi.

Tutun India gamsung pumpi a din Covid-19 active case 2,13,603 active aum nalaiyin, hichu total case a kon 2.03 percent tobang ahi.

Xxxxxxxxxxx

Covid-19 jeh a Republic Day nileh foreign chief guest koima hung talou ding

New Delhi, Jan 14: India in 1947 kuma chamlhatna anamu kal a-vel 4 channa kum a dinga tukum Covid-19 dinmun jeh a Republic day kimanna a foreign chief guest koima hunglou ding ahitai, tin centre thaljhengin external affairs ministry spokesperson Anurag Srivastava in Thursday nichun photchetna thu ana phongdoh in ahi.

Tukum Republic day a chief guest a dinga ana kikou UK Prime Minister Boris Johnson in Britain gama Covid-19 dinmun ahung hakhohset behseh jeh a hung talou dinga ahin vohhai apat, India in tukum hi chief guest beiya Republic day aman ding hitam? tihi mijousen anagel ahi.

India in 1947 kuma chamlhatna anamu apat foreign chief guest pang louva Republic ana kimanna hi 1952, 1953 leh 1966 kum bou anahi. Tukum hi a 4vei channa kum hung hiding ahi. Tukum hi Covid-19 jeh’a Republic day parade jong chomcha bou kibol ding, panla jong kilhom sahding, chuleh ave dinga kikhom mi jat jong kum danga toh tekah dinga hop4 a hopkhat bou Rajpath sunga kilutsah ding ahitai.

Tukum Republic Day parade a hi India in 1947 kuma chamlhatna anamu apat anivei channa a dinga foreign troops 122 panlahna tri-services contingent, Bangladesh a kon parade showcase khat umding ahi. Hitobang a hi, 2016 kuma chu French contingent khat in parade a pan analah u ahi.

Tukum hi India leh Bangladesh in diplomatic ties anei kal kum 50 alhin kum ahitoh lhona Republic day parade a panla dinga Bangladesh gam kikou ahi. Bangladeshi tri-services contingent hochu Indian Air Force te C-17 heavy-lift aircraft khat in New Delhi ahin polut tauvin ahi.

December lha sunga gamteni a prime minister tenin virtual summit ananei na lhon achun New Delhi leh Dhaka in diplomatic ties anie lhon kal kum 50 lhinna jabolna vetsahna a activity phabep bolkhom dingin kinoptona ananei lhonin ahi.

xxxxxxxxxxx

Underprivileged chapang hoa dinga Chess Coaching manbeiya peh hiding

Imphal, Jan 14: Wide Angle Social Development Organisation, Sagolband Moirang Hanuba Leirak leh CRY Child Rights & You Have kiti hon Free Chess Coaching programme tuni chun adeh a underprivileged chapang ho, Imphal West leh Kangpokpi District hoa dingin ahongdoh tan ahi.

Manipur Commission of Protection of Child Rights (MCPCR) a Chairperson lui S. Saratkumar in hiche kingon ah chun Chief Guest hina alah toh kilhon in programme hondoh najong anei in ahi.

Wide Angle a Secretary, Montu Ahanthem in ahoulimna ah Special online coaching jong India a dinga Grandmaster Dibyendu Barua toh kitho khoma kisemdoh ahi ati. Barua hin akhatvei na a dinga batches 2 noiya chapang 25 tobang training peh dingin agongin ahi. Coaching a jauho chu Coach Tamal Chakrabarty in alamkai ding ahi.

Montu Ahanthem, Wide Angle Secretary in aseina ah hichea online a Chess Coaching chapang hoa dinga kigon nahi Covid 19 natna jeh a positive coping skills leh mental leh emotional well-being ho semphat ahina dinga kigong ahi ati. Chapang ho hitobang game hoa lunglut sah ding tohgon ahi, ajeh chu hitobang game hohin mental capacity jong ahatsah a chuleh thil phalou agel nathei hoa kona jong avendoh ding ahi ati.  Chuleh hiche hin unhealthy outlet tichu, smartphone addiction, substance abuse, cybercrime a victim jong hithei u chuleh child trafficking leh thil phalou tamtah hoa kona jong avendoh ding ahi tin Montu in aseiyin ahi.

Eastern Region, CRY Regional Director, Trina Chakrabarti in hichea chapang jau hohi chess akona mental skills aneihou jong apohdoh ding ahi ati. Hiche hin khonung leh amahoa dinga lolhinna lampi hiding ahi.

Hiche kingon ah chun Keisham Pradipkumar MCPCR a member lui, Yurembam Indramani, District Child Protection Officer, DCPU Imphal West, Thiyam Rajkishore, WCW Chairperson, Imphal West, Laishram Helenchandra Singh, Secretary, Youth Development Club, Yurembam Awang Leikai, Imphal West hojong ana jau uvin ahi.

Xxxxxxxxxxx

Gari accident jeh’a numei chapang 2 in thina toh

Imphal,  Jan. 14(ET): Singjamei Police Station hopsung Kwakeithel Traffic Point mun’a tuni gari toset na’a numei chapang mi 2 in thina atoh lhon in ahi tin thulhut chun aseiyin ahi. Hiche numei chapang teni chu Singjamei Chongtham Leikai akon Yurembam Brajamani Singh chanu Yurembam Silvia Devi (22) leh Kakwa Lamdaibung akon Thoudam Nilachandra Singh chanu Thoudam Chinglembi Devi (18) ahi akiti.

Thulhut kimu dungjui’a hiche thilsoh hi tuni jingkah nidan 11:30 vel’a Ariport lam akon hung water tanker truck Kwakeithel traffic point mun’a gari neo ( Honda Dio) registration no. um louva hin tol numei chapang teni chu anaphut khah’a apet pet’a amun’a thina ato lhon ahi. Hiche numei chapang teni longdamsa chu post mortem bol ding in RIMS Hospital mortuary a anapolut tauvin ahi. Hiche toh lhon’a Singjamei Police hon water tanker tolpa anamandoh uvin chuleh water tanker truck jong anaman tauvin ahi.

xxxxxxxxxx

DMC a Jilkung chonna kinei kinung lahdoh

Imphal, Jan 14(ET): Associate Prof. Shantikumar, Kha Manipur College Kakching a ding a chondoh a ana um chu DM College of Art a ding in nung chonlut in ana umkit in, chuleh Moirang College a ding a chondoh a ana um Asst. Prof. Dr. Noni chu DM College of Arts a ding in nung chonlut in aum kit tan ahi. Hiche jilkung teni hi January 12 chun chondoh in ana um lhon in, tuni chun nung chonlut in aum kit lhon in ahi.

Tuni chun Commissioner of the Higher and Technical Education Manipur, Govt. of Manipur akon in achom chom in nung chonlutna Order ana sohdoh in, nilhah lang chun thulakhom ho henga thulhut ana kimupan in ahi.

xxxxxxxx

State Government in Senior Citizen ho Helpline semdohna dingA MoU soikaina nei

Imphal, Jan 14(ET): Memorandum of Understanding (MoU) chu Social Welfare Department, Government of Manipur, National Institute of Social Defense, Government of India leh Alankit Assignments Limited, New Delhi ho kikah ah Minster for Social Welfare Henry Okram masang’ah tuni chun ama chenna mun Babupara, Imphal   mun a kin-gon kineina ah ana kai un ahi.

Thulakhom ho henga ahoulimna ah, Minister for Social Welfare Henry Okram in State a dinga atumbeh a Prime Minister Narendra Modi leh Chief Minister N. Biren Singh lamkaina Senior Citizen(tehse ho) ho dinga athon a National Helpline kisemdoh ding ahi. Hiche Helpline in aatup leh adoi thupi pen chu Senior Citizen ho dinga Government akon a Scheme holeh tohgon chom chom um ho hetsah jing theina leh kithopi jingna ding, alhaset lou nadiu leh akipa jing thei nadiuva  kithopi jing ding tihi ahi. Henry Okram in hiche Toll Free Helpline Number hi February 2021 sung ngeiya patdoh hitei ding ahi tinjong kitepna aneiyin ahi.

Director (Social Welfare) Ng. Uttam Singh in MoU a chun Government of Manipur thalheng in ana kaiyin, Sanjay Bhat, Assistant Vice President, Alankit Assingments Limited, New Delhi in Service Provider ho min in akaiyin ahi.

Commissioner (Social Welfare) H. Gyan Prakash, Social Welfare Department akon Official holeh adang dang honjong kin kimanna a chun pan ana lauvin ahi.

XXXXXXXXXX

NAB leh Police hon munchom chom a kon amatdoh Khamnathei Dk. crore 34 man Chief Minister in halvam

Imphal, Jan 14(ET): Narcotics and Affairs of Border (NAB) leh Manipur Police in gamsung munchom chom a Khamnathei ana matdoh International market a Dk. 34,12,09,910 man vel chu tunin Imphal East District, Pungdongbam Chingmang mun a Chief Minister N Biren in Minister, MLA, high ranking police offiders, Media chule kiloikhomna lamkai ho jaonan mei in ana hallha/halvam tan ahi.

Tuni halvam a um Khamnathei chom chom hochu ahileh Heroin Powder (2 kg 271 gm 535 mg), Ganja (273 kg 87 gm), 5,80,853 WY Tablets, 1,22,696 SP Capsules leh 530 N-10 Tablets ahi. Hiche hohi NAB, Thoubal, Bishnupur, Noney, Senapati, Imphal West leh Imphal East District Police hon ana matdoh’u ahi.

Hiche kin kimanna a chun N. Biren Singh in Manipur Police Department akon a koi tobang Drugs leh khamnathei ho a kisunat a athemmona hetdoh ahileh insungmi hihen, kinaipi hijong leh Government in achunga gotna sangtah kipe ding, atohmun a kon a kihaisah ding ahi. Tule tuhin Police Personnel ho chung’ah Drugs leh khamnathei toh kisaiyin  Departmental Enquiry 40 tobang achelha jingin ahi tin aseiyin ahi. Chuleh ‘War on Drugs’ hi ama a dinga tuthah a hung kigeldoh hilouvin, achesa 1990’s laiya eima pao a nitin thusoh a Editor a apan lai apat a khamna thei toh kisaiya pan ana lah jing ahidan N. Biren Singh in aseiyin ahi.

Manipur Chief Minister ahung hi akon in N. Biren Singh in 2018 chun International Day Against Drug Abuse and Illicit Trafficking nikho June 26 a akiman na ah ‘War in Drugs’ kiti phondohna ananei ahidan jong aseiyin ahi. Chief Minister in hiche hi kipumpehna neitah a Government in tohgon a anei ahi in, koimachan ama nopna leh Politics bolna a amanchah thei louding ahi tinjong aseiyin ahi.

Hiche tohgon toh kisaiya kiloikhomna chom chom honjong lungtheng tah a pan ahinlah uleh Government injong lunggel leh ahung kipodoh ho kisang jing ding ahi tinjong aseiyin ahi.

Hiche Mission chunga totnopna a manjing sanga Government in tohgon anei holeh pan alahna hohi hetthem cheh ding angaidan jong aseiyin ahi.

Chief Minister in aseibe na ah, gam hel tah tah leh muol le lhang a kaldoh a Kaani lei kisumang holeh gamsung miho Kaani leilho khel a sum le pai munathei thil ho tu thei nading lou alho nadiuva jollha na kinei hi thilbai ahipon ahi tinjong aseiyin ahi. Hiche tohgon a hin kipehdoh na angaiyin ahi tin Chief Minister in aseiyin, chuleh NAB, Manipur Police, Paramilitary Force holeh ‘War on Drugs’ a pan lajouse chung’ah pachatna sangtah ape in chuleh hiche Kaani lei suhmanga tohgon hi gamsung miten Kaani leibol angah tokah uva kichepi jing ding ahi tinjong aseiyin ahi.

Chukit leh sun chang laitah a achesa nikho phabep masanga Bir Tikendrajit International Airport koma um Ningombam Lamkhai mun a Sum leh kijepna San kiguhdohna chung’ah Chief Minister in hiche a kigolna nei miphalou ho matdoh a um ahidan aseiyin, chuleh kholchilna achelhah jing laitah ahi tinjong aseiyin ahi.

Deputy Chief Minister Y. Joykumar Singh, CAF and PD Minister  Th. Satyabrata, State Planning Board Deputy Chairman L. Rameshwor, Manipur Building leh Other Construction Workers’ Welfare Board Chairman H. Dingo, Kshetrigao AC MLA L. Indrajit, Imphal West Adhakshya RK Taruni, Imphal East Adhakshya P. Bimola, DGP LM Khaute leh Manipur Police akon a Official phabep injong kin-gon kimanna a chun pan ana lauvin ahi.

Xxxxxxx

Ram Mandir sah na dinga inson a kithopina kidong pan tading, CM leh Cabinet hon kithopina anape

Imphal,  Jan 14(ET): Shri Ram Mandir Nirman Nidhi Samarpan Samiti, Manipur in Ram penna Ayodhya mun a Ram Mandir lehtah sahdohna dinga Samiti ho tosotna leh kithopina pecheh ding in mipi ho temna aneiyun ahi.

Manipur Chief Minister N. Biren Singh leh Cabinet Minister phabep in Ayodhya mun a Ram Mandir sahdohna ding in tuni chun kithopina thilpeh ana peuvin ahi. Chuleh kithopina thilpeh penailou Minister ho, MP holeh MLA honjong ni 2 ni 3 jouleh ahinpeh diu dan injong akiseiyin ahi.

Shri Ram Mandir Nirman Nidhi Samarpan Samiti, Manipur a Convener Rajkumar Dayanand Singh in thusodoh a aseina ah, Samiti in January 14, 2021 apat February 27, 2021 gei Nidhi Samarpan Campaign aboldiu ahidan aseiyin ahi. Samiti akon a Volunteer hon January 15 apat inson chotna jong aneidiu, hiche Campaign hi National Service ahi tia ngaito pum a tosotna leh kithopina pecheh dingin jong temna aneiyin ahi.

Thusodoh in aseibe na ah, Ayodhya mun a Ram Temple lentah kisahna ding hi gamsung pumpi a mipi hon ana ngalel jing khat ahi in, hiche a nading a hin mihem Lakh 4 val in kum 500 sunga kiphinna chom chom ho in a hinna’u ana chaan tauvin ahi. Hiche Movement hin 1984 kum chun Hindu Society  chom chom hon ham le pao, chi le nam khentum umlouva kithokhom a pan ahinlah uva kon in ana machal lheh in ahi.

Hiche Ram Mandir thutoh kisaiyin Court ah kum 70 sung tobang seilhah louvin ana tangden in ahi. Thusimlui ki Record dungjui leh photchetna, amun kilaina a kon a photchetna ho, Photograph ho akon in Supreme Court in November 9, 2019 nikho chun Ayodhya gam 14,000 Sq. ft. (70 Acres) a len chu Ramala gam ahidan ana phongdoh un ahi. Court in photchetna ahin neitoh kilhon in Ram Temple sahdoh na ding in Shri Ram Janabhumi Tirth Kshetra Trust semdoh in ana um in ahi. Government of India in gam pheng chu February 5, 2020 nikho chun Shri Ram Janabhumi Tirth Kshetra Trust ho heng’ah pehdohna ana neiyin ahi.

Temple sahpat ahitoh kilhon in Prime Minister  Narendra Modi, RSS Chief Dr. Mohan Bhagawat leh Trust Pujya Mahanta Nritya Gopal Das akon Adhyaksha hon Bhumi Puja jong August 5, 2020 chun ana neiyun ahi tinjong aseiyin ahi.

Xxxxxx

Dr. Lorho S. Pfoze in AIIMS dinmun tobang’a RIMS suhpilhing hiding ahi tia kitepna nei

Imphal,  Jan 14(ET): MP Outer Manipur Lok Sabha Dr. Lorho S. Pfoze in mipi a dinga palai leh MP ahina toh kilhon a All India Institution of Medical Science (AIIMS) dinmun chan a dingthei dinga RIMS suhpilhing ahitei nading’a ahunglhung ding COVID-19 natna hilen jeh a innpi toukhomna ahung boilou nah leh Parliament Budget Session, 2021 a theitop so’a pan alahding ahidan kitepna aneiyin ahi.

Hiche kitepna hi Thursday nikho a OPD leh Day Care Ward of Department of Radiation Oncology, RIMS semhoibe a um thensona kin kineina a thulakhom ho heng’ah ana phongdoh in ahi.

Dr. Lorho in aseibe na ah, hiche themjilna mun suhpilhing na ding in Parliament akon in boltheina ding tantah aum in, angaikhoh ho kimu dungjuiya tohgon kichelhahpi ding ahi tinjong aseiyin ahi. Masang chun khantouna ana lhasam lheh in, tuhin themjilna mun a kon in khantouna tantah mutheiyin aum tan ahi. State Government leh mopohna neiho, chuleh State sunga palai chom chom honjong hiche Regional Institution  suhpilhing nading in aboltheina cheh un pan alauvin ahi. Hiche duthusam lhunthei nading in, Doctor ho, Nurse holeh Madical Staff dang dangho mopohna alenlheh in ahi. Lamkaihon ahin chepi ding ho’u hi Public Staff ho, Medical Team ho, Health Worker hon hatah a tosotna aneijing diuvin jong temna aneiyin ahi.

Aman aseibe na a chun, Medical Staff, Health Worker hon ana adamlou ho aboipi diuhi anatoh’u thupipen a alah diu angaiyin, chuleh mipi ho kithopina leh tosotna jong apoimo khat ahi. Phat khat khat leh adamlou ho akon leh Medical Team ho kikah ah kilungnopmo na ho jeh a damlou inn(Hospital) ho a thil-le-luo kisuhset jing ho hin imacha asuhlhap lou ding ahi. Hitobang dinmun ho a hi chingthei tah a umjoh ding ahi tinjong Dr. Lorho in aseiyin ahi.

Lou le ai toh kisaiya themjilna mun ahoi ding hi Doctor, Nurse, Health Worker holeh adang dang ho phatchomna ding keuseh ahipon, State pumpi ading jong ahi. Hijeh chu ibonchauva pan ilahdiu angaiyin ahi. Amun mun a ibolthei kham kham iboldoh jong chu apoimo lheh in ahi.

COVID-19 Vaccine hunglhun toh kisaiya thudoh donbutna aneina a chun, Vaccine kap 54, 000 hunglhun leh gamsung pumpi a First Phase a akipanthei hi lolhinna khat ahi atin ahi. Hiche Vaccine kisemdohna ding in boina leh kinil baotam na tamtah ana sohdoh jong leh Scientist leh Doctors ho chunga tahsanna ineidiu ahi tinjong aseiyin ahi. Hiche hin State a dinga khonung chan geiya dinga phatchomna ahin lhut ding ahi. Kiging jing uhitin, Government in ahin sodoh juiding dan holeh SOP ho phatah a ijui cheh diu ahi tinjong aseibei.

Head of Department of Radiation Oncology Dr. T. Dhaneshor Sharma in aseina ah, hiche damlou ho kivet namun OPD hi kum 20-30 masang peh a ana kisa ahitan Chemotherapy natna nei leh CMHT Health Card nei apunbe jing toh kilhon a OPD a kivetsahna mun jong lupna 14 a kikeh lenjep ahi tin aseiyin ahi. Masang chun lupna 5-6 bou ana um in, khatvei vet a mi 3-4 vet theina ding in kehletbe na akineiyin, chuleh damlou hin kilhonpi holeh kivetsah dinga hung ho kicholngah nading mun jong akisembe in ahi tinjong Dr. Dhaneshor in aseiyin ahi.

Building sungah natna thohgim jep ho ding in jong Intensive Care Unit (ICU) jong akikoiyin ahi. Ajeh chu natna kijen dinga hungho Asthma leh Heart natna neijong ahung jao ji in ahi. Chuleh Cancer natna nei aniseh a akibelap jing jeh in aphat dungjuiya semhoi leh sahbe hinalai ding ahi tinjong Dhaneshor in aseiyin ahi.

Hondohna kin kinei jou chun Director of RIMS Professor A. Santa Singh in MP pa,  Faculty Member ho leh Radiation Oncology Department a Staff ho masangah RIMS mun a khantouna ana um ho thua vetsahna jong aneiyin ahi.

Hiche hondohna kin-gon kiman na achun Doctor, Nurse leh Medical Staff tamtah injong pan ana lauvin ahi. Kin-gon hi Head of Department of Radiation Oncology, RIMS ho vaisaina noiyah ana kimang in ahi.

Xxxxxx

Sana chom a pang NAB Manipur a Constable 4 Police Custody a Jan 19 chan hentang hidiu

Imphal, Jan 14(ET): Narcotics and Affairs of Border (NAB) Manipur a um Police Constable 4 hochu Moreh to Imphal lampi a insung khat a kon a kijepna Sana ana chulhah peh jeh uvin January 19 chan gei Police Custody a hentang ding in sollut in aum uvin ahi.

Imphal West a Chief Judicial Magistrate in Thursday nikho chun Police Custody a ni 6 sung hentang ding in thupeh ana neiyin ahi.

Hiche Constable 4 hochu ahileh Govindagram Nambol a um Tongbram Dhanabir; Yumnam Huidrom Makha Leikai a um Sapam Thansuwang; Kiyamgei Mamang Leikai a um Nameirakpam Sanjoy leh Wangoi Bazar a um Sagolsem Sandhyarani Devi ahiuvin ahi.

Moreh Ward No 4 a um Nahendra Chinnaiya in ama leh a insung mite kijepna sana phabep Imphal Airport ahin jot jing lai tah uva melhetlou hon achulhah peh’u ahidan Singjamei OC henga hehna anei toh kilhon in hiche Constable 4 ho hi Singjamei police hon January 13, 2021 nikho chun ana mandoh uvin ahi.

Hiche hehna a chun, thilsoh hi January 10, 2021 nikho a ana soh ahi in, a insung mite Cennai a kichenna kin khat a cheding ho Moreh akon a Imphal Airport a ahung thah ahidan aseiyin ahi. Aman aseina, a chun, Maruti Alto Silver Colour khat in amaho hungna Maruti Van nung chu Canchipur a MU Gate koma pat a ahin jui dan aseiyin ahi. Tiddim Road huop a um Sangaiprou Mamang Leikai aphah laitah un, Alto Car Driver pan akhamtan in, lampi hetlouna mun a ana puiyun ahi

Melhetlou Driver pa leh atoukhompi aloi numei jaona in mi 3 ho chun amaho akon in Sana khi 2, sana chau 4 leh khutchong a kibut 1 chu agoma Dangka 9,60,000 vel man ding chu ana salhah peh un ahi. Hiche kijepna sana ho a salhah peh jou uchun amun dalha in a jammang pai tauvin ahi tin jong aseiyin ahi. Hitoh kisaiyin Singjamei Police hon Section 384/34-IPC leh 392/397-IPC and 25 (1-c) Arms Act dungjuiyin Case jihlutna ana neiyun ahi.

Alangkhat ah, themmo jeh a kiman Constable 4 ho lah ah, Constable 2 chu Superintendant of Police NAB in atohmun a kon in haisah na ana neiyin ahi. Haisah a um Constable teni ahi leh Tongbram Dhanabir Singh leh Nameirakpam Sanjoy Singh ahilhon in ahi.