14th January, 2021 News

14th January, 2021 News

98
0
SHARE

Manipur a Covid-19 toh kisai a thi umlouna nili hita; Active case 469 hita

Imphal, Jan 13(ET): Manipur a Covid-19 toh kisai a thi umlouna tuni nili (4) channa ahitan chule Wednesday ni mi 44 positive case thah mudohbe ahitoh kilhon in state sung’a Covid-19 natna veikhat mi 28,769 alhing tan chule thina toh mi 365 ahi tai tin state health department thuso chun aseiyin ahi.

Tuni case thah kimuho lah’a 41 chu milham ahin chule 3 chu Central Armed Police Force (CAPF) personnel ho ahi. Case thah holah’a 13 chu Churachandpur, Imphal West-10, Imphal East-6, Thoubal-4, Kakching leh Senapati akon 2 cheh chule Chandel, Kamjong, Tengnoupal leh Noney akon khat cheh ahi.

Alangkhat a Covid-19 akon damdoh tunin mi 56 aum in tuchan a natna akon kijendam 27,935 alhing tan ahi. Natna nei akijendam akibe jingtoh lhon in tuhin active case 469 alhingtan chule recovery rate jong 97.10 per cent in akal in ahi.

COVID-19 natna nei hotoh tahsa kisuhkhahna nei jouse akinthei pen a chom umdoh diu, Covid Control room ahi louleh District CMO ho Testing bol nadia akijahmatpi diuva hetsah ahi. Thukin leh boina neihon akinthei pen a phatseh a Covid Common Control Room Number-1800-345-3818 Call abol jing thei diu chuleh Home Isolation toh kisai jouse Home Isolation Helpline Numbers- 0385-2414009 (State head quarter) leh – 8415944151 (Thoubal) Call abol jing theiyu ahi tinjong State Health Services in atahlahbe in ahi.

Chuleh koi hijong leh Government Doctor ho Online a doh le sah neinom jousen Sunday nikho tailou nikho dang ho a jingkah lang nidan 10:00 apat nilhah lam nidan 3:00 gei Google Play Store a eSanjeevaniOPD app Download ahilou leh www.esanjeevaniopd.in akon a bol jing thei ahi.

Lungthim boina nei hon Number 104 Manipur Mental Health Helpline (9 am to 9 pm) sung Call abolthei diu ahidan jong State Health Department in atahlang in ahi.

Xxxxxxxxxx

Manipur a ding Covid-19 Vaccine “Covishield” kap 54,000 Bir Tikendrajit International Airport hunglhung ta

Imphal, Jan 13(ET): Chief Minister N. Biren Singh in tuni chun COVID-19 Vaccine “Covishield” chu Bir Tikendrajit International Airport ah ana lamdot in ahi. Serum Institute of India ten Coronavirus Vaccine asemdoh  Covishield chu kap 54,000 Imphal mun ah ahung kipolhung in, hiche Vaccination (lou kikapna) hi tulha nisim 16 a kipan ding ahi.

Airport mun a thulakhom ho henga ahoulimna a chun N. Biren Singh in First Batch ho ading Vaccination chu Prime Minister Narendra Modi in ahin gon dungjuiya tulha 16 a kipan ding ahitai atin ahi. Hiche lou kikapna a amasapen a chanvou chang ding mi 8,476 chu munchom chom 10 a Jawaharlal Nehru Institute of Medical Sciences (JNIMS), Regional Institute of Medical Sciences (RIMS), Churachandpur, Senapati, Ukhrul, Chandel, Bishnupur, Thoubal leh Tamenglong Headquarters holeh  Shija Hospital and Research Institute jaona a anikho mama leh kikap diu ahi tinjong aseiyin ahi.

Chief Minister in aseibe na ah Prime Minister Shri Narendra Modi leh Union Health Minister Dr. Harsh Vardhan in pan hatah a ahinlah lhon a gamsung pumpi a Vaccine homjalna anei lhon a chuleh State gelkhona ahin nei na chunga kipathu jong aseiyin ahi.

Tunia hunglhung Vaccine ho Vaccination a manchah dinga homjalna jong District jouse a kinei ding ahi tinjong aseiyin ahi.

Hiche Vaccination hi Prime Minister in dan le thupeh asem banga chanvou chang dinga gontupsa a um ho leh min kikhum ho chunga kichelhahpi ding ahi. Hiche chungchang a hi deisah tum leh kichom huina umlouva kikap ding ahi. State sungah Health Worker 39,991 tah aum in, First Batch a hi Government Centres 138 leh Private Centre 108 panna a Vaccination Centre mun 246 a kikap diu ahi tinjong aseibei.

Hiche Vaccine ahung kipohlut toh kilhon a State Government in COVID-19 natna a kon a  gamsung mipi ho huhdohna dinga pan alahna ahin lolhinsah ding ahi. Hitoh kilhon a gamsung miten jong State sunga um mipi jouse henga Vaccination chai ahi tokahse a Standard Operating Procedures (SOP) phatah a juicheh a chuleh ahithei channa kikhop khomna bollouva, abolnom honjong mopohna neiho henga phalna akilah diuvin jong temna aneiyin ahi.

Education Minister Sorokhaibam Rajen, CAF & PD Minister Thokchom Satyabrata, Advisor to Chief Minister (Health) Dr. Sapam Ranjan, Chief Secretary Dr. Rajesh Kumar, Additional Chief Secretary P. Vaphei leh Director, Health Services Dr. K. Rajo honjong Airport mun s Vaccine hung kipolut lamdotna kin ah Chief Minister ana kilhonpiuvin ahi.

Prime Minister Narendra Modi in January 16 nikho leh Vaccination kipatna dinga hondohna anei ding ahi.

India in January 3 nikho chun COVID-19 Vaccines – Covishield leh Covaxin chu alou theilouva kinkhoh a manchah ding in Approved ana bol uvin ahi. Covishield hi Serum Institute of India in ASraZeneca toh kithokhom a ahin sem’u ahi in, chuleh Covaxin hi Bharat Biotech in Indian Council of Medical Research (ICMR) toh kithokhom a asem’u ahi.

Drugs Controller General of India (DCGI) in Central Drugs Standard Control Organisation (CDSCO) noiya um COVID-19 Subject Expert Committee ho phatsahna apeh utoh kilhon in aloutheilouva kinkhoh a manchah ding in hetpehna ana pe’n ahi. India in Vaccination Programme First Phase a mihem 30 Crore lou kapdoh tei ahina ding atup in ahi.

Hiche COVID-19 Vaccination Programme hi Health Worker Crore 1, Frontline Worker Crore 2, kum 50 changlam mi leh kum 50 noilangmi tahsa hatmo na nei Crore 27 tobang hiche lou kikap diu ahi.

Xxxxxx

Manipur a Bird Flu mudoh ahi naipoi tia Minister O Lukhoi in sei

Imphal, January 13(ET): Veterinary Minister, Oinam Lukhoi Singh in tuni chun Manipur sungah Bird Flu Case mudoh aum naipon, hinla Department of Veterinary and Animal Husbandry, Government of Manipur panlahna noi’ah kivendoh thei nading leh gancha natna toh kisaiya kholchilna anei jingu ahidan ana phongdoh in ahi.

Minister Lukhoi in aseina ah kivenbit nading in Government in State toh kikommat tona National Highway leh Airport mun hoa India gamsung mun chom chom a Pathogenic Avian Influenza natna ho akon kivendoh na ding in gancha chuleh ahtui, sa hing, chuleh lhanei ganhing ho ponlut ding chomkhat ading in akikhah tai tinjong aseiyin ahi.

Minister pan aseibe na a Veterinary Department, Manipur in jong District jouse ah Rapid Response Team (RRT) jong District mun cheh a  Deputy Commissioners, District Superintendents of Police leh gamgi chin a um District ho a District Veterinary Officers hotoh kithokhom in alhanei gancha holeh atui hung kipolut ho kholchilna nei dingin asemdoh tauvin ahi tinjong aseiyin ahi. Veterinary Minister in aseibe na a chun African SwineFever (ASF) kiti Vohcha natna jong Manipur Thoubal District sunga um Salungpham kimvel lah leh Imphal East a um Nongmaiching Chingkhong (Wakha) Area a kimudoh ahidan aseiyin ahi. Gamsung dinmun hatah a venbit ahidan jong aphongdoh in, hitoh kilhon chun District Administration, Thoubal in achesa January 2, nikho chun Prevention  and   Control  of  Infectious   Contagious  Diseases  in   Animals   Act   2009 dungjuiyi  Kangyambem, Lokchao, Salungpham Mamang Leikai mun ho chu “controlled areas” in ana phongdoh in ahi. Chuleh “controlled area” leh “infectedzones” akon in Vohcha leh asa joh leh pohdoh phal ahipon ahi. Government in State Veterinary Department ho mangcha a gamsung venbitna ding hatah a gelkhohna aneijing ahitoh kilhon in Minister in koimacha lung linglao lou dingin jong temna aneiyin ahi.

Xxxxxxxx

DESAM in BOSEM Office a Secretary leh Exam Controller Room chabi khapeh

Imphal, Jan 13(ET):  Secretary leh Controller of Examination panmun ong huhdim ahi nailou toh kilhon in Democratic Students’ Alliance of Manipur (DESAM) Volunteer hon

 Board of Secondary Education Manipur (BOSEM) Office mun a amani Room kot chabi ana khapeh un ahi.

Hiche panmun hi amani dinga Office Term December 27 leh December 28 , 2020 a ana kichai toh kilhon a ana ong ahitan ahi.

DESAM a General Secretary, Leishangthem Lamyanba in thusodoh aneina a chun hiche post ong teni hi BOSEM a dinga panmun len cheh ahi in, simlai hon lekha poimo ho kilahna ding in hahsatna tamtah atoh in ahi. Hiche panmun ong huhdim na ding in DESAM in mopohna neiho hengah ngehna ana kineiyin, chuleh phat tep peh na jong ana kineitan ahi. Hinla, Government aki jahmo sah jing in, hijeh a DESAM Volunteer hon BOSEM a Secretary leh Examination Controller Room kot chabi kikhapeh ahi tin aseiyin ahi.

Lamyanba in aseibe na ah, Government akon a mopohna neihon hiche panmun ong huhdim na ahin nei masangse a simlai kiloikhomna in kiphinna chom chom kipan ding ahi tinjong aseibei.

DESAM General Secretary in aseibe na ah, COVID-19 natna hilen jeh a phat sottah themjilna mun ho kha in ana um in, tun Government in themjilna mun ho hondoh ding tohgon aneitan ahi. Hinla, simlai hon ipiti lamdol a Revised Syllabus aguong kisem ho akilah uva, chuleh themvetna iti um ding ham tin jong dohna aneiyin, BOSEM a dinga panmun len cheh Secretary leh Controller of Exam panmun ong a aum hin simlai tamtah hesohna ape’n ahi tinjong Lamyanba in aseiyin ahi.

Xxxxxxxxx

Dzukou Valley a gam meikah sodohsah hidinga ginmo lhangkal ho chunga Case jihlut a um

Kohima, Jan 13: Southern Angami Youth Organisation (SAYO) kiti Dzükou Valley venbitna ding hatah a gelkhoh kiloikhomna hon Dzuko Valley a gam meikah hin sodohsah hidinga ginmo a um lhangkal phabep ho chungah hehna (Case) ana pelut uvin ahi. Dzukou Valley ah gam meikah chu December 29 nikho chun ana kipan in ahi.

Kohima District hopsunga um Khuzama Police Station a SAYO in Case pehlutna leh lhangkal mihon phabep in Dzuko Valley ajotnau Video Clip pehnau dungjui chun hiche lhangkal ho chun Valley sunga Manipur huop langkai a hung jamdoh’u aginchat dan aseiyun ahi.

National Disaster Response Force (NDRF), Nagaland Police leh Army personnel hon Tuesday nikho chun Dzükou mun a apansat nau  mun chu lolhingtah a ni 13 sung Dzuko Valley a gam meikah phelmit ahitah toh kilhon in ana dalha tauvin ahi. Hinla, SAYO leh Kohima Forest Division (KFD) akon a Volunteer hochu vetlhihna neiding ding amun ah apansa den nalai un ahi.

Thusodoh in asei dungjuiyin, Dzuko Valley mun a ana pansa den NDRF leh State Disaster Response Force hochu mei phelmit na dinga manchah phabep hotoh Air Force hon Jakhama Huikong ngahmun a athahlut tan ahi.

IAF Spokesperson Wing Commander Ratnakar Singh in aseina ah Mi-17V5 Helicopters in tuipohna ho mangcha in mei phelmit nading in tui ana chap in ahi tin aseiyin ahi.

xxxxxxxxxxx

DM College a kiphinna nei Jilkung 2 transfer kibol; Simlai hon kiphinna bol

Imphal, Jan 13(ET): DM University noiya um College bahkai ho a Jilkung ho kiphinna toh kisaiya lungthim thuhtah a suhthip ding ngaituona in Government in DM University noiya abahkai College ho a Ad-hoc Committee a Convenor leh Executive Member khat ana chondoh un ahi.

Adhoc Committee hon DM University noiya um College chom chom hoa achesa kum 2 sung ana tong jingsa Jilkungho Government of Manipur in DMU a dinga Jilkung 88 lahna dinga Advertise anabol toh kisaiya lahlut ahina diuvin phutna ana neiyun ahi.

Adhoc Committee a Convenor Dr. A. Noni , Assistant Professor hi D.M. College of Arts a Political Science jilkung ahi in, Moirang College a ding in chondoh ahi in, chuleh Committee a Member B. Shantikumar Sarma, Associate Professor hi hiche College mama a English Jilkung ahi in, Kha Manipur College Kakching ading in chondoh ahikit in ahi.

Dr. A  Noni leh B Shantikumar chondoh na ding in Order chom cheh in Commissioner of Higher and Technical Education, Government of Manipur M Harekrishna in janhi chun ana sodoh in ahi.

Hetthei khat chu DM University noiya um College bahkai; D.M. College of Arts, Science, Commerce, G.P. College leh LMS Law College a um jilkung hon kiphinna hatah in ana neiyun ahi. November 2020 a ana kisemdoh DMU Internal Structure Committee akon kihe dungjuiyin, tua um jilkung ho chuleh Utilised ho panna in Dhanamajuri University nooya um College hoa Undergraduate leh Post-graduate ho themjilna a hatah a pan alahjing dan uvin akiseiyin ahi. Dhanamanjuri University noiya um College chom chom a kon Adhoc Committee hon Online leh Offline Class ho Boycott najong ana neiyun ahi.

Chuleh toumun kiphinna jong Committee ho lamkaina in January 6 apat chun ana neiyun ahi. Committee in Memorandum jong V.C. in-Charge heng’ah December 9, 2020 nikho chun 88 Assistant Professors kilah masang ngeiya Dhanamanjuri University noiya College bahkai ho a jilkung umsa ho lahlut ahina ding pehlutna jong ana neiyun ahi.

Alangkhat ah, Dhanamanjuri College of Arts a kon a Associate Professor ni tah chondoh a aum deilou vetsahna leh demna in DM College of Arts akon in PG Students holeh Undergraduate Students ho jaona in DM College of Arts Gate mai’ah toumun kiphinna ana neiyun ahi.

Hiche Associate Professor teni chondoh na ding Order chu Commissioner of Higher & Technical Education M. Harekrishna in Tuesday nikho chun ana sodoh in ahi.

Chondoh a um Associate Professor teni chu Political Science jilkung Dr. A Noni leh English jilkung B. Shantikumar Sharma ahilhon in ahi. Simlai hon jilkung ni ki chondoh deilou vetsahna a lekha phenga kisun ho kichoi pum in kholhang sapna jong ana neiyun, chuleh chondohna dia Order kibol nunglahdoh na ding in kiphinna ana neiyun ahi. Kiphinna kinei sung chun Imphal West Police hon simlai mi 3 ana hentang uvin, nilhah lam nidan 6:30 vel chun ana lhadoh un ahi.

Cultural Secretary Yumnam Papendra in thusomiho henga aseina a chun College ah jilkung kiphasam tah a aum laitah in jilkung 2 chondoh in ahung um in ahi. Kiphinna vetsahna in simlai hon a Bag jouseu lampi ah ana koi uvin ahi. Chuleh kiphinna vetsahna a chun DM University noiya Gate chom chom DM College of Arts, Administrative Block, Principal Offices ho kikhah ding ahi. Government akon a mopohna neihon hiche chondohna thupeh abol anung lahdoh lou uleh kiphinna kichejompi ding ahi tinjong aseiyin ahi.

Xxxxxxxxxxx

Phaicham kiloikhomna hon Lhukhosei Zou thu’a kiphinna angahdiuva KCA Tengnoupal in thuso nei

Imphal, Jan 13(ET): Kuki Chief’s Association Tengnoupal District in tuchan a phaicham a um CSO chom chom hon Court in themmona neilou ahi tia alhadoh Lhukhosei Zou chungthu a kiphinna aneijingu lamdang asah dan’u ana phongdoh un ahi.

Lhukhosei Zou suhminsetna dinga tohgon koiman abol tahlou diuva temna kinei nunga kiphinna aum jing thu a KCA in lamdang asah dan aphongdoh un, phaicham a um CSO phabep in thinglhang mite tupna in athu kitan chaisa ahinung a avel a matsah a kholchilna thahbeh neiding in kiphinna anei jingun ahi.

Kholchilna ana chejing 2018-2019 laiyin hiche Civil kiloikhom hon kholchilna phatah a chelha dinga ana ngehna bang un, boina umlou hel leh Case dang toh kibang louvin man gang tah in achaina geiyin thutanlhahna ana um thei tan ahi. Thutan na kinei dungjuiyin  Court (ND & PS) in Tungkhanmung Zou leh Thangminlun Zou chunga themmo channa leh kum 15 sung Songkul tang ding in thutankhum na aneiyin, chuleh Lhukhosei Zou leh midang 5 ho themmona neilou ahitoh kilhon in ana lhadoh in ahi. Hinla, hiche thutanna chelhah thei nadinga ana kiphin CSO ho mama in lhangphong tah in Court thutanna chouna in kiphinna leh Dharna anei jing un ahi. Hiche tohgon anei uhin Lhukhosei Zou tupna aneiyu kichehtah in akimu theiyin ahi tinjong thusodoh chun aseiyin ahi.

KCA Tengnoupal in Court in hitobang a dihtah leh lolhing tah a thutanna aneina chunga phachatna apeuvin ahi. Government in War Against Drug achepi hi miphabep in phat gomkom in a kilah uvin, N. Biren makaina Government phulhuhna ding tupna in CSO ho atosot uvin thutanna kinei chaisa chunga avela kholchilna nei ding in phutna anei uve tinjong aseiyun ahi.

KCA Tengnoupal in Lhukhosei Zou chunga engbolna leh kiphinna nei CSO hon angah tah diuvin ngehna aneiyun chuleh Government injong Lhukhosei Zou chungchang thu avel a kholchilna nei dinga pehlutna anei loudiuvin jong ngehna sangtah aneiyun ahi.

Government in mipi atamjo lungthim sunathei ding gellouva miphabep in phutna kilomloutah aneina chunga kingainemna ahin nei uleh KCA Tengnoupal in thinglhang miho kiloikhomna chom chom hotoh kithokhom a kiphinna sangtah kinei ding ahi tinjong gihna aneiyun ahi.

Xxxxxxxxxxx

Lhukhosei Zou thu’a koiman ahilou lamtah natoh bolda hen tia Moreh kiloikhomna lamkai hon sei; Court sangjep a pehlut lou ding’a CM heng’a ngehna nei

Tengnoupal, Jan 13: Tuni nilhah lam nidan 3 vel chun Hill Tribal Council office munna thuso miho toh kihou limna a Moreh sung mipi kiloikhomna lamkai ho in Lhukhosei Zou chung chang a hilchetna ana nei utoh lhon in Manipur mipi ho in achung chang thu ahilou lamtah a asei le u angah ding uvin temna anei uvin ahi.

Tuni thuso miho toh kihou na kingon achun Hill Tribal concil Moreh, Tamil Sangam Moreh, Gorkha Samaj samiti Moreh le Manipuri Muslim council moreh lamkai ho in panlah na ana nei uvin ahi. Thuso miho toh kihou na a Joseph Ginkhosei Lhungdim, President Hill Tribal council Moreh in asei na a Lhukhosei Zou hi Court in mona nei lou ahi tia lhadoh na ahin nei u ahin, hiche chung chang a phaicham a um kiloikhomna phabep in amona ahol jing nalai le maban a athuthah tan ding tohgon anei hi chena lhongpi toh jong kitoh lou ahilou beh thil khat ahi tin ana sei in ahi.

Lhukhosei hi BJP member hina jong anakilah peh ahin, mona nei lou a thutan na kinei ahitah toh lhon a a member hina jong athah pehding uvin jong temna ahin nei in ahi.

Moreh kiloikhomna Tamil Sanggam, Muslim Council, Gorkha Samaj, HTC le KWU & HR hon Manipur Chief Minister N Biren Singh ang a Lhukhosei Zuu case phaicham kiloikhomna phabep in ano jing jeh a maban a thahpat ding a natoh anei na lou ding in ngehna anei uvin ahi.

Court in mona nei lou ahi tia kilhadoh na chung chang a phaicham kiloikhomna phabep in muntin a hitabang tah a deilou na vetsah na anei na uva kiphinna anei jing u chung a jong demna sangtah kiloikhomna ho chun anei uvin ahi.

Khamnathei ahilou le corruption case jat chom chom monanei ho kilhadoh na jong ana um jing ahin, ND&PS Court Thoubal in Th. Brinda ASP/NAB le  Rishikesh Sharma OC, NAB jong corruption case a ana lhadoh sa u ahidan jong hetsah na ahin nei uvin ahi. Hiche chung chang thu a Lhokhosei Zou chung chang a kiphinna nei ho in ima asei loudan ule Moreh kiloikhomna ho in imacha asei poh lou ho uhi akihet ding uvin jong tahlangna anei uvin ahi.

Phaicham kiloikhomna phabep in hiche thu chung chang a court sangjep a case thah pat ding atiu hi jaa chat umtah ahin, agamsung alhang sung uva daan toh kitoh lou a chat mi dim a hilai khopi sung lamkai khat chung a haa hem na anei uhi thildih ahilou dan jong tahlang na ahin nei uvin ahi. Lhokhosei Zou minset na chung chang bouseh hilou a Th. Brinda ASP/NAB in lock up a aum lai a dangka crore 4 lam ana thum thu jong hetsah na ahin nei uvin ahi. Hiche thu ho hethem a Chief Minister pa in kiloikhomna themkhat ahilou lamtah a panlah na nei ho thu hi ngaisah lou a akoi ding in jong temna ahin nei uvin ahi.

xxxxxxxxxx

IRB Riflemen Viva Voce

Imphal, Jan 13(ET): 10th & 11th IRB Riflemen Written test a lolhinna ana nei ho ahung lhung ding 29th January, 2021 apat 25th March, 2021 sung’a 1st MR, Banquet Hall a Viva Voce um ding ahi tai.

Viva Voce hi jingkah lam nidan 9:00 leh kipan ding ahijeh in Candidate hon jingkah nidan 8:00 le report abol cheh diu chule angaicha document original akipohcheh diu ahi.

District dungjui a Viva voce ding nikho chu, Bishnupur-29th January akon 2nd February, Churachandpur-4th leh 5th February, Chandel-6th akon 8th February, Imphal East-9th akon 20th February, Imphal West-22nd February akon 4th March, KCG and KCG(S)-5th & 6th March, Kangpokpi-8th & 9th March, Senapati-11th March, Thoubal-12th akon 18th March, Tamenglong-19th March, Tengnoupal-20th March, Ukhrul-22nd March, Pherzawl, Jiribam, Noney leh N/State-23rd March hiding ahi. Chule Hill district akon candidate nikho kipe laplou ho a ding 24th March phat kipe kit ding, Valley ho 25th March leh phat kipe kit diu ahi.

Xxxxx

Ajinu vohlih jeh’a kum 10 songkul tang dinga mikhat Court in thutankhum

Ukhrul, Jan 13(ET): Ukhrul a um mipa khat in ajinu ana vohlih jeh in kum 10 sung songkul tang ding in thu tankhum in ana um in chuleh Dangka 20,000 leusah in ana um in ahi.

Session Court, Ukhrul judge W Tonen Meitei in Wednesday nikho chun themmo chansah a umpa chung’ah kum 10 sung songkul tang ding leh Dangka 20,000 leusah ding in Section 304-part-II IPC noiyah thutankhum na ana neitan ahi.

Ukhrul District hopsunga um Langdang kho a kon kum 42 a upa Themmithan Phungchamnao chu January 6 ni chun ajinu Jessy Zingkhai chu achennau mun Narep Meizailung, Ukhrul mun a nisim May 2, 2015 nikho a ana vohlih toh kisaiyin themmo chansah in ana um in ahi.

Court thutanna in aseina a chun, themmo chansah a umpa hin January 13 apat kum 2 sunga Dangka 20,000 a leusahna hi apeh ding, ahin peh lou leh achombeh a lha 6 sung songkul tang kit ding ahi.

Court in thutanna na aneina a chun, themmo chansah a umpa hi loulhoumi ahi in, kinehhol na dang aneipon ahi. Hijeh chun Court in vangsetna toh te chunga themmo changpa akon a leusahna a kon a vangse te kithopina apeh lou ding ahi. Hinla, National Legal Services Authority leh State Legal Services Authority noiya Section 357A CrPC dungjuiya vangsetna toh Jessy Zingkhai chate chunga kithopina pehthei ahidan Court in aseiyin atahlangin ahi.

Court in aseina a chun, Victim Compensation Scheme noiya State Government in District Legal Service Authority, Ukhrul khut a kon a  Manipur State Legal Services Authority toh kijahmatna aneiya vangsetna tohte henga kithopina apehdiu ahi tinjong aseiyin ahi. Hiche kithopina kipe ding hi DLSA, Ukhrul in asemtoh ding ahidan jong aseiyin ahi.

Court in aseina ah, themmo chansah a um pa hi May 2, 2015 apat Judicial Custody a um ahi tinjong aseiyin ahi.

Vangsetna toh numei nu hin ajipan May 1, 2015 nikho a avohna maha thohjou louvin May 2, 2015 chun ana muolliem in chuleh toltha ding lunggel neipum a khut kilha ahilou dan Court in aseiyin ahi.

Xxx

SSPP in kum 74th lhinna Foundation Day leh Presidential election 2021-24 ananei

B.Lalboi Gangte

CCpur. Jan 13 (ET) :Siamsinpawlpi SSPP kiphudoh kal kum 74th lhinna Foundation day leh Presidential election 2021-24 chu tunin Tuithapi Ground mun’a ananei uvin ahi. Kingon achun Jin-gun in L. Thangmawia, Life member SSPP, M.Sc Mathematics Gold medalist NEHU, Chairman SRDC Government of Manipur, Kin-dei chom in Vungzagin Valte, Minister ana pang lhon in ahi. Thanglalmuan Hauzel, President SSPP GHQ in SSPP flag kaidohna anei in chuleh Jin-gun Thangmawia in SSPP magazine hondoh na anei in ahi.

Hiche toh lhon’a Central election commission, SSPP GHQ in Presidential leh Foundation Trust election result phondohna anei toh lhon’a R.Sanga in President thah Thanglalmuan kitepna aneisah in chuleh Rev. Thiankhanmuan, co-ordinator institution PCI-R in taopeh na anei in ahi. Hiche phatsung in Lalthanghlun Guite, Chairman, Platinum Jubilee Celebration committee in Siamsin platinum jubilee ding toh kisai tahlang na jong anei in ahi.

Hetthei khat chu 2021-24 sung’a SSPP Foundation Trust ding’a lhendoh hochu Langkhanpau Guite, Gouzamang Guite, R. Sanga, Dr. N. Lalzagou, John K. Ngaihte, Pumshong Hangsing, Dr. Vumchinpau Tonsing, Pauzagin Tonsing, Dr. Chawmvung Hauzel, Khamhenthang Ngaihte, K. Vungzamawi, Lianchinkhup Tombing, Dr. Siamkhum Thomte, Dr. Thangchinkhup, Vungkhuam Guite, Dr. Rev. Luaichinthang leh Thiankholian Guite ahi.

 xxxxxxxxxxxxxx

Cloth Box Foundation leh Ropiang Foudation Trust in Children Home a um chapang ho kithopina anape

B.Lalboi Gangte

CCpur. Jan 13 (ET) : Cloth Box Foundation leh Ropiang Foundation Trust kithokhom nanoi’a Children Home dung’a sil leh chen hopdohna ananei jing utoh lhon’a tunin jong Lamka kho sung kimvel’a Children Home a um numei leh pasal ho ding in Brand New Toka/pant hopdohna ananei uvin ahi. Hetthei khat chu Cloth Box Foundation leh Ropiang Foundation Trust in achesa Dec. 2020 lha sung’a Home chom chom’a Brand New toka/pant anahop nao mun hochu Covenant Children Home, Happiness Home, Only Grace Home, Tunnu Limbel, Hebron Children Home, Lainat Ministry leh Vondei Saulim ahi.

Hiche toh lhon’a tunin (Jan. 13) Covenant Children Home mun’a chapang 150 ding in toka ahom uvin ahi. Achesa phat masa lam in jong Cloth Box Foundation leh Ropiang Foundation Trust  in L. Thomjang Village of Kangpokpi District, Santing Village, Henglep Sub-Division, Sialbu Village, Suangdoh Sub-Division ho’a Brand New toka/pant 500 val anahomdoh uvin ahi.

xxxxxxxxxxxx

District Administration, Ccpur tohgon nanoi’a 2 vei channa DLO meeting anachelha

B.Lalboi Gangte

CCpur. Jan 13 (ET) : District Administration, Churachandpur tohgon nanoi in tunin Martyrs Hall, Singngat ah District Level Officer (DLO) Meeting ananei uvin ahi. Meeting kipat masang in District Administration lamkai nan Guite Road semthah’a um National Highway Infrastructure Development Corporation Limited (NHIDCL) akon Contractor, kho sung Haosa leh Singngat gamkai sung’a Civil Society Organization (CSO) chom chom akon lamkai hotoh kihoukhomna ananei masa uvin ahi.

Hiche toh lhon’a DLO Meeting chu Pawan Yadav, IAS, Deputy Commissioner, Churachandpur lamkai nan achelhan chuleh hiche phatsung in MGNREGS natoh dan toh kisai, Guite Road natoh chelha jing lai toh kisai, compensation thu, Ration Card nei hon Aadhaar Card apeh lut ding thu, Medical College din mun, Covid-19 lou kikap ding dan toh kisai leh Beti Bachao Beti Padhao (BBBP) Scheme toh kisai’a CCpur District sung’a numei themjil ho kholdoh ding dan toh kisai, Republic Day 2021 kiman ding dan leh mopoh na kihop ding dan seikhom na anei uvin ahi.

Hetthei khat chu achesa lha sung’a District Headquarter, CCpur tilouva DLO meeting mun dang’a ding’a a 2-vei channa ahi. Hiche phatsung in BBBP Scheme noi’a numei themjil ho ding’a Award bol ding, MGNREGS natoh natoh kisai phatchom joh na ding’a scheme toh molso ding leh Jan. 26, 2021, Republic Day hi Peace Ground, Tuibong mun’a man ding in seikhomna anei uvin ahi. Chuleh Jan. nisim 23 nikho leh Republic Day kiman na ding toh kisai’a rehearsal nei hi ding in thulhuh na jong anala uvin ahi.

xxxxxxxxxxxxxxxx

Kiloikhom na chom chom in Jimmy kitha nachung’a demna nei; nikho 3 sung’a mona neiho matdoh ahi nading’a ngehna nei

B.Lalboi Gangte

CCpur. Jan 13 (ET): Churachandpur District hopsung Trinity Road, Kanaan Veng, New Lamka a kitha natoh kisai in kiloikhom na chom chom in demna thuso anei uvin chuleh tolthat ho matdoh ding leh daan toh kitoh’a gotna apeh ding in tahlang na anei uvin ahi. Chuleh hiche kitha na inn mun chu Police ho hetpeh na jao louva koima lutsah ahi tapon ahi. Hetthei khat chu janni (Jan. 12) nikho’a insung khat’a melse tah’a thal’a ana kikap lih pa hi Bungmual akon JK Suan chapa Jimmy Thangsonlal ahi. Hiche nikho chun Jimmy leh aloipa hi Trinity Road aum Thangzamuan inn a alut lhon phat chom khat jouva aloipan akap lih ahi. Ahin hiche thilsoh hi kitup mong’a kikap ham ahilou leh suhkhel jeh ham ti hetdoh ahi naipon ahi. Jimmy longdamsa chu forensic bol ding in Imphal kipo chu tuni lhah lam in Laiveng, Bungmual aum Nanglianthang (apa len) inn mun pohlut ahitan jing (Jan. 14) nikho leh YPA Bungmual Unit lamkai na’a vuilem hi ding ahi.

Hiche toh lhon’a Jimmy kitha na chung thu’a YPA GHQ, YPA New Lamka Block, YPA Bungmual Unit, Bungmual Village Authority leh YPA Bungmual Unit in demna nasatah anei uvin ahi. Bungmual Village Authority in Deputy Commissioner, Churachandpur heng’a nikho 3 sung’a Jimmy kitha na ajeh leh tolthat matdoh ahi na ding in ngehna anei in ahi. Chuleh hiche thilsoh chung’a CCpur District sung’a lungmon naleh chamna din mun asuset dan atahlang in ahi. Hiche naban’a nikho 3 sung’a mopoh nanei hon ima amudoh lou uleh amaho deisah bang’a pan alah ding’a kigong ding’u ahidan jong atahlang in ahi.

Alangkhat a Zomi Revolutionary Army (ZRA) in jong Jimmy Thangsonlal kikaplih na chunga demna sangtah anei uvin ahi. Hitobang tah a ZRA operational area sunga daan umlou banga natoh kinei hi kiloikhomna in kimoh vetlou ding chule thilsoh hi volunteer mai mai SoO noi a umlou hon thal ahin choipan uva kon hung soh jing ahidan jong tahlang na anei uvin ahi. Hiche thilsoh a panlah ho mabana  kholchil na hung kinei a kimandoh ding ahidan jong tahlang na ahin nei uvin ahi.

xxxxxxxxxxxxxxxxx

District Nasha Mukt Bharat campaign Committee, CCpur tohgon nanoi’a Haosa ho heng’a tu ding elaichi ana kihomdoh

B.Lalboi Gangte

CCpur. Jan 13 (ET): District Nasha Mukt Bharat Campaign Committee, Churachandpur tohgon nanoi in tunin Martyrs Hall, Singngat mun’a Cardamom Seedling hopdoh na kingon ananei uvin ahi. Kingon achun Jin-gun in MLA Ginsuanhau, Chairman, MANIREDA apang in chuleh kingon ho Jameson Hangshing, MCS, SDO Singngat in alamkai in ahi. Pawan Yadav, IAS, Deputy Commissioner, Churachandpur in DLO meeting kibol lo na ajeh leh CCpur District sung’a Covid-19 lou kap ding dan toh kisai tahlang na anein in ahi. Chuleh Lawrence K. Munluo, Additional SP (Ops.) Churachandpur kingon kibol lona ajeh tahlang na anei in ahi.

Hiche phatsung in Esther Serto, IFS, Divisional Forest Officer, Churachandpur Forest Division, K. Subachandra Meitei, District Horticulture & Soil Conservation Officer leh 2 Assam Rifle akon Major. Ramesh Chandra Suyal hon houlim na anei uvin ahi. Chuleh Jin-gun Ginsuanhau in Singngat Constituency sung Suangdoh, Sangaikot leh Singngat Sub-Division hopsung aum kho Haosa ho heng’a tu ding Cardamom (Elaichi) pehdohna anei in ahi.

Hetthei khat chu Manipur Chief Minister N. Biren Singh panlah nanoi’a gam sung’a Kaani (Poppy) leibol suhmang ahi na ding leh Kaani leibol hon muchi phalou atu khel’a Elaichi joh abol ding deisah na jal’a Haosa ho khut’a pehdoh na anei ahi. Chuleh hiche phatsung in Singngat kho sung’a um Singngat Standard Aided High School akon simlai numei 10 leh Singngat Government High School akon simlai numei 10 lhendoh’a um ho BBBP Scheme noi’a Award pehdohna jong ananei uvin ahi.

Hiche toh lhon’a DC Pawan Yadav IAS in houlimna aneina’a Covid-19 dalna lou CCpur District sung’a District Hospital mun’a ahung lhung ding Jan. nisim 16 akon akikap pan ding toh lhon in achesa Jan. nisim 8 nikho chun Chief Ministers’ Advisor in akikap na ding mun phabep vetlhah na jong ananei in ahi ati. Lawrence MPS in houlimna aneina’a khamnathei hi aki selguh thei thil ahi lou jeh in khangdong numei panan khamnathei bol mi tamtah ahon ahon in akinah na ahung um doh tan ahi. Chuleh khangdong ho kinah leh kibou hi beithei hi lou hiche hin thil saotah ahin kahmat thei din mun in aum in ahi. Khang che dol’a khangthah hon nu le-pa avui ding dol ahi in ahin tulai hin khangthah tamtah khamnathei’a akingol sah jeh uvin nu le pa vui tah sang in nu le pa jong achate ale vui joh tauvin ahi. Khamnathei hi Police leh Department bou in akham jou thei thil ahi tah lou nachung’a Village Authority, Haosa chuleh kiloikhomna chom chom in pan nasatah ahin lah ding hi poimo tah ahi. Chuleh Narcotic Drugs and Psychotropic Substances (ND & PS) Act. noi’a inn hon sung’a Kaani keh aum jong leh matthei ding ahi dan jong aphongdoh in ahi.

Ginsuanhau in houlimna aneina’a Singngat Area a “Zou Kon” kiti thu cheng kimang hi Kaani Lei a kon ding tina ahi dungjui’a Zou Kon kiti kampao ngah phat ahi tan ahi ati. Constituency dang’a Kaani lei lhou um jong leh Singngat Assambly Constituency sung’a vang tu le-cha chuleh khangson ho ding gelna’a Kaani leilho ngah ding in aphongdoh in ahi. Kaani leilho nga nom leh Kaani khel’a tu ding lunglut na nei hon Chief Minister heng’a lhut ding proposal peh lut ding thei ahin hiche na ding’a kei matah jong pan kalah ding ahi ati.

Xxxxxxxxxx

Khamnathei kiman

Thoubal, Jan 13(ET): NAB PS in tuni in  Md. Zaher Ali, 33 yrs S/o Md. Rajaodddin, R/o Phundrei Awang Leikai, Thoubal District, Manipur le Md. Ali Amzad, 26 Yrs, S/o Md. Azad, R/o Phundrei Awang Leikai, Thoubal District, Manipur chu Samurou Oil Pump  a ana mandoh uvin ahi. Amani chu Heorin powder savon khum 34 lam a kikhum toh ana mat tha u ahi.

XXXXXXXXX

AR in Litan a Security Meet bol

Ukhrul, Jan 13: AHunglhungding Republic Day toh kisai a alhangsung a chamna le lungmonan umding deisah na in Assam Rifle sho in tuni in Ukhrul districtsung a Litan le Bishnupur District sung a Nambol a security meet ana bol uvin ahi. Litan a security meet kibl na achun haosa 35 lam in panlah na ana nei uvin ahi. Hiche kihoukhomna chu tu le tua gamsung venbit na a natoh an kinei hotoh kisai a kibol ahi. Kingon kibol an chung a mi pho in Assam Rifles ang a kipa thuseina ana nei uvin ahi.

Xxxxxxxxxxxxxxxxxxxxxxxxxxx

UNLF cadre khat kiman

Bishnupur, Jan 13(ET): Tuni nilhah lam nidan 4:30 PM vel in UNLF galguh bol a pang mi Bishnupur lhangsung a ahunglhungdng Republic Day toh kisai a bomb kam ding aum thuguh ana kimu toh lhon in Bishnupur police Commando makai na noi a search operation aan kibol na a UNLF cadre khat ana kimandoh in ahi. Akimandoh pa chu Khundongbam Lanjingba Singh (40) S/o Kh. Brojendro Singh, Wangkhei Ningthem Pukhri Mapal,Imphal East District akon ahi.

Thudoh kinei dungjui in akimandoh pa chun tu le tua UNLF Chairman a pang Pambei Khudongbam chu apalen ahidan jong ana sei in ahi. Akimandoh pa akon chu 0.32 mm Pistol khat, 0.32 mm Pistol magazine, M20 pistol magazine, 0.32 chang 8, IED gelatin pack 415 gm a gih, detonator ni, exide battery (12V) power source khat, electronic safety fuse khat,  Cordless remote control initiator, Duracell (9V)battery khat le Black Hyundai Tucson  gari no. umlou ana kimandoh in ahi. AKimandoh pa chun UNLF  a apan dan le  S/S Major Nongdon akon a thupeh alah ji dan ho tahlang na ana nei in ahi. Akimandohthil ho chu Wangkhei Keithel Ashangbi akon a Bobo kiti khat akon alah ahidan le Khwairakpam kiti pasal khat koma apehding ahidan jong tahlang na ana nei in ahi. Hiche bomb chu Tiddim road a Republic Day masnag a kam ding ahidan jong ana sei in ahi.

XXXXXXXXXXX

Vetrinary Minister O. Lukhoi in Field Assistant ding’a lhendoh candidate 10 appointment order pedoh

Imphal, January 13(ET): Veterinary Minister Oinam Lukhoi Singh in tunin Secretariat, South Block Minister office chamber mun’a Department of Veterinary and Animal Husbandry, Government of Manipur noi’a Field Assistant post 10 ding’a candidate lhendoh’a um ho appointment order pehdohna ananei in ahi. Hiche phatsung’a Minister in aseina’a Cabinet in phatsah (approval) na anapeh dungjui’a Fiedl Assistant post ding’a lhendoh’a um candidate 10 ho appointment order pehdohna anei ahidan atahlang in ahi. Chuleh hiche post hi achesa 2016 direct recruitment post a ding ahi ati. Kingon achun Commissioner, Veterinary, H. Gyan Prakash, Director, Veterinary, Dr. H. Chaoba Singh chuleh official hon jong pan anala uvin ahi.

Xxxxxx

MP Leishemba Sanajaoba in Veteran Politician leh former Minister RV. Mingthing achenna mun a vilna nei

Imphal, Jan 13(UNA): MP Rajya Sabha cum Maharaj of Manipur Leishemba Sanajaoba in phat sottah Politician anahi Minister lui Ruivah Mingthing chu adamthei na akemsuh jing toh kilhon in achenna Lamphel quarter ah Wednesday nichun agavil in ahi.

Aman thuso miho koma aseina ah, amahi lamkai leh Minister ahi in chuleh amahi hills leh valley hoa dinga natongmi ahi in chuleh ama hi state sunga veteran Politician khat jong ahi ati. Chuleh hichea avilna jeh chu adamthei na toh kisai ahi in chuleh amahi tuhin Kum 91 alhingtan ahi ati.

Aman anasei leh agel thupi penchu hills leh valley mipi kah a kikhena umlou ding ahi ati. Politician lui RV Mingthing in aseina ah unity in diversity hin thinglhang mipi leh phaicham miho kikah a kihetthem najong asemhoi ding ahi, chuleh mipin jong hiche toh kilhon a lunggel nei dingin temna aneijin ahi. Aman aseibena ah hills leh valley kikah a relationship ho ahoi tengleh, achamlou a Manipur sunga khantouna alhut ding ahi ati. Hiche ho toh doh ahina dinga state sunga chengho jousen tua kipat a tohkhom angaiye ati. Chuleh lamkaiho, youth politicians leh adang dang hon jong Manipur sunga lungkhat ahina dinga lunggel nei dingin temna aneijin ahi. Hichea avilna ah chun MP Rajya Sabha akona members poimo tah tah hojong ana jau uvin ahi.