13th January 2021 NEWS

13th January 2021 NEWS

56
0
SHARE

COVID-19 Vaccine Box 20 Guwahati Airport hunglhungta; Northeast gamkai a dinga Guwahati Vaccine kihopdohna munpi hita

Guwahati, Jan 12: Assam in anasapen a dinga hung kithotdoh COVID-19 Vaccine Covishield kiti chu mihem Lakh 2 kap thei nading chu Guwahati Airport ah ana mutauvin ahi. Guwahati hi Northeast gamkai sunga State 7 ho dingin Vaccine kihopdoh munpi khat jong ahung hitan ahi.

Assam leh Meghalaya adinga COVID-19 Vaccine First Batch a dingin Guwahati Airport ah Tuesday ni nilhahlang chun ana kipolut tan ahi. Akipolut abon a 20 Boxes chu  Doses 2,40,000 apha in, Guwahati Airport mun a pohlhung in ana um in ahi. Hiche lah a chun Boxes 17 chu Assam ading ahi in, 3 chu Meghalaya a ding ahi. Box khat sungah kap 12,000 cheh aum in ahi. Hiche Vaccine hi SpiceJet flight no. SG 7715 in Pune apat Kolkata chuleh Hyderabad ahin jotpa a ahin pohlhung ahi.

Hiche Vaccine hung kipolut hochu ama ama State a Health Department ho khut ah homjal ding in pehlut ana hiuvin ahi.

NorthEast States hon Covishield leh Covaxin Vaccine anigel a amudiu ahi tinjong Government thulhut chun aseiyin ahi.

Nikho phabep jou leh Vaccine Box phabep jong Arunachal Pradesh, Nagaland, Manipur, Mizoram leh Tripura a hopdoh dinga Guwahati mun a huikong, leh Cargo Plane ho a Guwahati mun a hung kipolut ding ahi.

Gam ningchong lah a homjal ahitheina dinga akoitup ding dan hatah in gelkhoh in aum in ahi. Hiche na dinga hi Guwahati Airport mun a Vaccine lahlut leh thahdoh nading hihen kepbit nading hijong leh mopohna hoitah a alahdiu ahi.

Guwahati Airport mun a Vaccine ho kepbit nading Clod Storage 10,000-tonne dol cheh ding 3 tah akikoi in, hiche a kon a State chom chom hon adei phat phat a akilah theidiu ahi.

Phase masapen a ding in Assam in chanvou chang ding Health leh Frontline Worker ho jaona in mi Lakh 2 lhendohna aneiyun ahi. Ahunglhung ding January 16 leh Medical Staff 8,000 val in Assam sung mun chom chom 74 ho a lou kikapna aneidiu ahi.

Tuesday nikho chun huikong 9 tah in Pune akon in Delhi, Chennai, Kolkata, Guwahati, Ahmedabad, Hyderabad, Vijayawada, Bhubaneswar, Patna, Bengaluru, Lucknow leh Chandigarh  a ding in Covishield kap 56.5 Lakh ana podoh un ahi.

Phase 1 noiya India in Health Worker 1 Crore, Frontline 2 Crore leh kum 50 chunglam Crore 27 ho henga Vaccine kapna ana neidiu ahi.

Government in COVID-19 Vaccine kap 1.01 Crore ana Ordered uvin, April lha sunga kap 5.60 Crore chu kap khat a dangka 200 a achoh be diu ahi. Hindustan Lifecare Limited Agency min a Serum Institute of India leh Bharat Biotech akon a Vaccine kicho ding ahi.

Xxxxxx

Khamnathei akon a kiven ding dan toh kisaiya Awareness ana um

Thoubal, Jan. 12(UNA): Khamtheina chom chom hoa kon a kivendohna ding toh kisai adeh a Police Personnel ho ding in Nasha Mukt Bharat Campaign Committee, Thoubal ho gonna noiyah SP Office Conference Hall Thoubal mun ah ana neiyun ahi.

Hiche kin-gon kimanna a chun SP/Thoubal Dr. S. Ibomcha Singh; Padmashree, Director State Level Co-ordinating Agency, Manipur Dr. A. Jayentakumar leh DSWO, Thoubal A. Kameshwar chu Jin-gun, Kin-nei leh Jin-jaum in ana pangun ahi.

District Level Nasha Mukt Bharat Campaign Committee Member Yumnam Laxman in ahoulimna a chun Nasha Mukt Bharat Campaign ho tup le doi chuleh akiphudoh jou  August 2020 apat a Thoubal District a  kimanchahna chom chom ana kineiho phondohna jong aneiyin ahi.

School leh College ho a simlai ho hatah a gelkhoh ding angaidan jong aseiyin, themjilna mun ho ahung kihon doh teng leh amaho dinga jong Awareness kigonpwh ding ahi tinjong aseiyin ahi.

Nasha Mukt Bharat Campaign toh kisaiya District level leh Sub-District Level Committees ho Constitution thu a ahoulimna ah Yumnam Laxman in District sunga pankhom a Drugs a kivei ho leh kingolsah ho suhbeina dinga pan lahding ahidan jong aseiyin ahi.

Additional SP (LO) Lakshya Sharma in kin-gon kimanna a Resource Person hina a ahoulimna a chun Narcotic Drugs and Psychotropic Substances Act, 1985 thua houlimna Police Personnel ho hengah ana neiyin ahi.

DSWO, Thoubal A. Kameshwar in Drugs a kingolsah ho leh ane ho suhbei nading in lamchom chom a kithokhom angaiyin ahi tinjong aseiyin ahi.

Police Department in mipilhing ho koikhomna thei ding ahin semdoh uva, amaho henga thuhilna neithei ji nading leh Society a dinga thilphalou ho abol nalou diuva thuhilna kinei jing thei ding ahi.

Padmashree, Dr. A. Jayanta Kumar in aphatcha a kivendoh hi Drugs a lutthuh theina a kon a eihoidoh thei khat ahi atin ahi.

Xxxxxxx

Nithum kijomna ding’a Tuesday ni Manipur a COVID-19 toh kisaiya thi um lou; case thah 32 kimube toh kilhon a agoma 28,725 lhing ta

Imphal, Jan 12: Manipir a COVID-19 natna nei athahbeh a mi 32 ana kimudph kit toh kilhon in tuni chan a natna nei kimudoh agomin 28,725 alhingtan, chuleh COVID-19 natna jeh a athahbeh a thina toh aum lou toh kilhon in thina toh agomin 365 ahi nalaiyin ahi tin State Health Department thusodoh chun aseiyin ahi.

COVID-19 Common Control Room, akon thusodoh in aseina a chun milham 30 leh Central Armed Police Force (CAPF) Personnel 2 natna nei ahiu athahbeh inmudoh in aum in ahi.

Milham lah a kon a athahbeh natna kimudoh ho lah a mi 4 hi Imphal West akon ahiuvin, Imphal East leh Thoubal akon mi 7 cheh, 3 hi  Bishnupur, 5 hi Tamenglong, Kakching, Chandel, Kamjong leh Churachandpur akon mi khat cheh ahiuve tinjong thusodoh chun aseiyin ahi.

Chuleh mi 28 in damdohna anei toh kilhon in damdohna nei agomin 27,879 alhingtan ahi.

Hitoh kilhon in COVID-19 Active Cases 481 alhingtan chuleh Recovery Rate 97.05 per cent ahitan ahi.

Covid Common Control Room Number-1800-345-3818. Home Isolation Helpline Number- 0385-2414009 (State Head Quarter) and – 8415944151 (Thoubal).

COVID-19 natna nei hotoh tahsa kisuhkhahna nei jouse akinthei pen a chom umdoh diu, Covid Control room ahi louleh District CMO ho Testing bol nadia akijahmatpi diuva hetsah ahi. Thukin leh boina neihon akinthei pen a phatseh a Covid Common Control Room Number-1800-345-3818 Call abol jing thei diu ahi. Chuleh Home Isolation toh kisai jouse Home Isolation Helpline Numbers- 0385-2414009 (State head quarter) leh – 8415944151 (Thoubal) Call abol jing theiyu ahi tinjong State Health Services in atahlahbe in ahi.

Chuleh koi hijong leh Government Doctor ho Online a doh le sah neinom jousen Sunday nikho tailouva (10am – 3 pm) gei Google Play Store a eSanjeevaniOPD app Download ahilou leh www.esanjeevaniopd.in akon a bol jing thei ahi.

Lungthim boina nei hon Number 104 Manipur Mental Health Helpline (9 am to 9 pm) sung Call abolthei diu ahidan jong State Health Department in atahlang in ahi.

Xxxxxx

Ccpur district a Insung khat’a pasal khat kaplih sa’a kimudoh

B.Lalboi Gangte

CCpur. Jan 12 (ET):  Churachandpur District hopsung Kanaan Veng, New Lamka mun’a tuni nilhah lam nidan 2:00 vel in insung’a pasal khat ki thal’a kikap lih sa in anakimudoh in ahi tin thulhut chun asieyin ahi. Thulhut kimu dungjui’a Kanaan Veng, New Lamka mun Trinity Road aum Thangzamuan chenna inn mun’a pasal 2 alut lhon in inn chabi kikam jeh chun inn kom’a um chapang ho heng’a inn kot hon ding in asei lhon jeh chun inn ngah ding’a um chapang (kum 7) khat in inn kot ahong peh jou phat chom khat jou in insung akon thal ana ging pai in ahi. Hiche thal gin jou chun pasal khat inn nunglam’a lhaidoh amu uvin ahin koi ahi vang anahedoh pouvin ahi akiti. Thilsoh thu CCpur Police in ahetdoh doh in amun anadellut pai uvin ahi.

Hiche toh lhon’a thilsoh toh kisai’a Lawrence K. Munluo, MPS, Additional SP (Operation) leh Inspector MA Salaam, OC Churachandpur Police Station lamkai nan Police hon Imphal akon forensic team ho toh kithokhom in kholchilna anei uvin ahi. Chuleh postmortem bol ding in thilong chu Police hon anapodoh tauvin ahi. Hiche kisut chan in koi khut nung ahi ding hetdoh ahi naipon ahi.

xxxxxxxxxxxx

“Grace Dental Care” hondohna anakinei

B.Lalboi Gangte

CCpur, Jan 12 (ET):  Ha (Dental) lang toh kisai vetsah thei na ding leh treatment bol thei na mun ding in tunin New Lamka, Ebenezer Home mun’a “Grace Dental Care” hondoh naleh lhandoh Pastor. G. Sanglian, Local Pastor NLBC in ananei tan ahi. Hiche Grace Dental Care hi Grace Chinmuan Dental Surgeon in abol ahi. Hetthei khat chu Grace hi Dental lam toh kisai’a RIMS mun’a 2013-18 (kum 5) sung ana jil in, hiche phatsung’a Pediatric and Preventive Dentistry ah topper Award asang in chuleh ajil jou toh lhon’a Private ah kum 2 sung anatong jou nung’a tuni “Grace Dental Care” hi ama vetsui na noi’a um ding’a hondohna anei ahi.

Hiche toh lhon’a Grace Dental Care hondoh ahitoh lhon’a tu hapta sung consultation fee leh Treatment bol ngai jouse 20% nem’a abolpeh ding ahi. Chuleh January lha sung hi nilhah nidan 2:00 apat 5:00 chan kihong ding ahin Feb. lha akon jingkah nidan 9:00 akipat nilhah nidan 5:00 sung chan kihong ding ahi.

xxxxxxxxxxxxx

ESWA Ccpur in 3rd Annual meet 2021 anamang

B.Lalboi Gangte

CCpur. Jan 12 (ET): Fourth Battalion, The Assam Regiment Ex-servicemen and on Service Welfare Association,(ESWA) CCpur in tunin Simte Inn, Sim veng mun’a “The 3rd Annual meet 2021” ananei uvin ahi. Kingon achun Jin-gun in Gouzamang Guite, Ex MDC, New Lamka East, Jin-ja-um in Khanlian Tonsing, Kin-neipa in  Thang Richard chuleh VVIP in Romeo Thangkhanlian, Laldhuama, Neneo, Subedar Letkhopao, Thangjaluai leh Subedar Mangcha ho anapang uvin ahi.

Hiche toh lhon’a Goujamang Guite in houlimna aneina’a  CCpur District sung’a Ex-servicemen leh kiloikhomna chom chom um jong leh On-service leh pension ho kiloikhom’a  Fourth Battalion , the Assam Regiment Ex-servicemen and on Service Welfare Association, ESWA CCpur phudoh ahi nachung’a lamkai ho lungpilhin naleh kingailut naho thupi asah dan aphongdoh in ahi.

 xxxxxxxxxxx

TCP Ccpur in traffic daan juilou mi 74 akon agom’a Dk. 38,000 leudoh sah

B.Lalboi Gangte

CCpur. Jan 12 (ET): Traffic Control Police (TCP) CCpur in CCpur khopi sung mun chom chom’a Traffic daan vetsui na anei’u achelhah pi jing utoh lhon’a  tunin Traffic daan palkeh mi tamtah anamandoh uvin ahi. Traffic Rule vetsuina chu Inspector James Lianzagou, OC Traffic lamkai na in CCpur District Police, VDF leh TCP akon personnel hon anavesui uvin ahi. Hiche phatsung in gari neo tol helmet khuhlou, mi 2 val kipo, parking mun dihlouva kham ho ana vesui uvin ahi.  Chuleh nilhah nidan 3:00 chan in Traffic daan palkeh/ juilou mi 74 amandoh uvin amaho chu TR-5 challan cut nao akon in Dk. 38,000/- aleudoh sah uvin ahi.

XXXXX

Women Helpline no. khel

Imphal, Jan. 12 (ET): Women Helpline toll free number “181” chu technical problem aumjeh in phat chomkhat a dinga ngaichatna neihon temporary alternate helpline number #7005776144# mangcha a kihoumatpi thei ahi.

 xxxxxxxxxxxx

CCpur employment exchange

B.Lalboi Gangte

CCpur. Jan 12 (ET): Manipur State Government noi’a natohna kilah na ding toh kisai’a tulai District Employment Exchange mun’a khangthah natoh ding hol mi tamtah in exchange analha uvin ahi. State Government noi’a Department of Taxes leh Directorate of Veterinary and Animal Husbandry noi’a post agom’a 202 kila ding ahi. Department of Taxes ahi Lower Divisional Clerks (LDC) post 29, Data Operator-cum-Office Assistant post 3, Peon post 7 leh Chowkidar post khat ahin Directorate of Veterinary and Animal Husbandry ahi Veterinary Field Assistant post 60 (ST-18), Primary Investigator post 2 leh Veterinary Attendent post 100 (ST-31) hi ding ahi.

Hiche toh lhon’a tuni chan’a Directorate of Veterinary & Animal Husbandry noi’a post 162 kilah na ding’a District employment exchange a sponsor bol mi 1,700 alhing tan chuleh Department of Taxes a mi 250 aphatan ahi.

Xxxxx

India sung’a state 4 channa ding’a Manipur a Urban Local Body ho Reform chaitheng hita

Imphal, Jan 12(ET): Manipur sung a “Urban Local Bodies (ULB)” ho kithahsemna Department of Expenditure hetsah na dungjui a ana kinei chai toh lhon in India sung a hiche chai theng state 4 channa ahung hitan ahi tin Union Finance Ministry akon thuso kimu chun asei in ahi.

Hiche kibol chai toh lhon a Manipur in sum le pai Open Market a sum vai le lah na a dangka 75 crore lam alah be thei ding ahi tan ahi akiti. ULB thahsemna chai theng state dang ho chu Andhra Pradesh, Madhya Pradesh le Telangana ahi akiti.

Hiche state 4 ho ahi sum vaina dangka crore 7,481 channa phal peh an kinei thei ding ahi akiti. Andhra Pradesh chu sum vaina dangka 2,525 crore lam chan hithei be ding, Madhya Pradesh chu dangka 2,373 crore chuleh Telangana chu dangka 2,508 crore chan hithei be ding ahi tin ministry akon thuso kimu chun asei in ahi. Urban Local Body hole urban a kivaipoh na natoh naho chung chang a natoh le kivaipoh velvet na hi mipi ding a natoh na jat chom chom kinei ho suh hoi be na ding toh kisai a kibol ji ahi akiti.

Hiche akisemthah ho chu state in ULB a property kai le don ho avetlhah a ahiding doltah a hetsah na anei ding, twineh ahilou le nullah ho a suhtheng naho a sum lut ding ho ajang ho kai le don toh vet tup na kinei jing ding, thil man hung khantoh lhon a kai le don ho man khangding, achesa May 17, 2020 a centre in covid toh kisai a Gross States Domestic Product (GSDP) 2 percent cheh hop peh ding a hetsah na anei chepi ding tiho ahi. Finance Ministry akon thuso kimu dungjui in tu chan in state 10 lam in ration card khat chepi ding daan ajui pan taovin ahi akiti.

xxxxxxxxxxxxxxxx

2 Assam Rifle hon khamnathei a kivei mi khat anamandoh

B.Lalboi Gangte

CCpur. Jan 12 (ET): 27 Sector Assam Rifle noi’a um 2 Assam Rifle in janni (Jan. 11) nilhah nidan  2:30 vel in Bualkot Check Post mun’a passenger bus khat kholchilna ananei nao’a khamnathei anamudoh uvin chuleh anei hi ding’a ginmo mi khat aman uvin ahi tin thulhut chun aseiyin ahi. Thilsoh thu’a thulhut kimu dungjui’a Bualkot aum 2 Assam Rifle hon gari lhai leho kholchilna anei nao’a passenger bus khat akon Heroin (No. 4) hi ding’a ginmo bom neo 22 akikoi leh “Horn” kiti Energy Drink box 24 anamudoh uvin ahin thilkeu ho chu koipen’a ahi apet achun anamandoh pouvin ahi. Kholchilna anei nao’a check post phat masang’a passenger khat kum lha ahi dan leh hiche akon bike khat’a kisel doh ahidan anahedoh uvin ahi. Khochilna’a kon in Khupzalam (62) S/o (L) Pauzasuan of Gouchinkhup Veng ahi dan anahetdoh utoh lhon’a anaman tauvin ahi.

Hiche toh lhon’a khamnathei Heroin (No. 4) hi ding’a ginmo gram 330 amudoh nao chung’a Singngat Police Station mun’a FIR No. 01 (1) 2021 Singngat Police Station Under Section 21 (c) Narcotic Drugs and Psychotropic Substances Act. noi’a anajih lut tauvin ahi.

xxxxxxxxxxxx

Mizoram a Covid +ve case thah 6 kimudoh

Aizawl (PTI): Mizoram a tuni Covid-19 +ve case thah 6 mudohbe ahitoh lhon’a agom’a case 4,299 alhing tan ahi tin official akon thulhut kimu chun atahlang in ahi. Tuni case thah kimudoh ho chu Aizawl District akon 3, Kolasib District akon 2 chuleh Lunglei District akon 1 ahi. Chuleh case kimudoh 6 lah’a Assam Rifle khat, BSF khat chuleh North Eastern Electric Power Corporation Limited (NEEPCO) akon natong mi 2 ahi.

Hiche toh lhon’a Mizoram gamsung’a tuni chan in active case 96 leh adamdoh agom’a 4,194 alhing toh lhon’a recovery rate 97.56% ahi. Chuleh gamsung’a Covid natna jeh’a thina agom’a 9 alhing tan ahi. Mizoram gamsung’a tuni chan’a sample 1,88,100 test jong akiboldoh tan ahi.

xxxxxxxxxxx

Supreme Court in Agriculture laws kiman pan nadinga stay order asodoh thu’a Farmers lamkai hon alemnau thuphon nei, hinla akiphinnau jom dinga phongdoh

New Delhi, Jan 12: Farmers Union lamkai hon Supreme Court in Farm bill 3 ho manthei ahi nading a stay order asodoh thua Tuesday nichun aphatsah nau aphongdoh un ahi, hinla government in alahdoh tokah sea kiphinna aneijom diu in aphongdoh un ahi. Loubol miho kiloikhom na lah a alenpen Sanyukt Kisan Morcha, Farmers Union 40 tobang kiloikhom ho chun maban a panlah dingdan thu seikhom na dingin kihouna anei uvin ahi.

Farmers Union lamkai hochun Supreme Court in Committee asemdoh masanga pan alah loudiu ahi ati. Supreme court in stay order asodoh thua lemna kanei uve, hinla hiche Farm bill 3 hohi abona lahdoh hihen tin, Morcha Senior lamkai Abhimanyu Kohar in PTI koma hetsah na ana nei in ahi. Supreme Court in Tuesday nia asodoh dungjuiya Centre leh Farmers Union ho kikah a committee semdoh ding tohgon anei in ahi, chuleh ima seilhah aum masanga stay order jong ana sodoh in ahi. Hiche  bench ah chun Chief Justice S A Bobde lamkaina noiya um ahi in chuleh hichea committee kisemdoh chun Farm bill 3 ho toh kisai a hahsatna umho avetsui diu ahi ati.

Hiche Farm bill 3 ho deilou najeh a kiphinna neiho chu adeh a Haryana leh Punjab akona umho ahiuvin chuleh amaho hin Delhi border lah dunga kiphinna hi achesa November 28 nikhoa kona chu ana nei u ahi.

Xxxxxxx

Myanmar gamsunga India mi mat doh a um pa ji chu Myanmar mi ahi – Report

Imphal, Jan 12(ET): Achesa August 2020 a Chindwin River Bridge, Monya, Zewar Extension Ward, Myanmar a kiman India mipa chun Myanmar mi numei ji in anei e tin Voice of Mynamar  in asodoh in ahi. Amahi No. 5 Street of Monywa, Zeyar Extension Ward a khosa anahi e. Myanmar akona thuso kimu chun aseina ah Immigration and Population Department, Sagaing Township in ama chungah Sagaing City Police Station ah January 9 nikhoa Burmese national numei jia anei jeh in case anabol uvin ahi.

Hichea ginmo kai India-Kachin mipa hi Kakching Tokpaching, Manipur, India a cheng ahi.

Hichea thuso in aseina ah amahi People’s Liberation Army (PLA) a captain jong ahi ati. Hinla amahin Burmese national registration card jong aneiyin ahi, card no. Mana (Naing) 129698 ahi in chuleh amahin Burmese numei , Sagaing Ywadaung ward a numei khat ji in anei in chuleh chanu khatjong anei in ahi. Hichea kiman pa minchu Nora (b) Devanl, kum 33 mi ahi in chuleh amahi Kachin National Armed Forces noiya captain jong ahi. Chuleh ama hi 2014 kuma chu Hopin, Mohnyin Township, Kachin State, Myawaddy Ward, Myanmar a kimandoh anahie. Amahi Citizenship Card jong ana mu in ahi.

Hichea thuso in aseibena ah Ministry of Foreign Affairs, Major Nora (Devi) Devanl hi India mi ahi in chuleh Head of Irrigation Department, Sagaing Township, Lay Maung in amahi India mi ahileh ahilou thu seichen dingin ngehna anei in ahi. Hiche thu toh kisai a Lay Maung, Commander, Irrigation Department Sagaing Township in Nora (b) Devan India mi Myanmar a Burmese ID card nei chu ana man in ahi. Hiche thutoh kisai a Sagaing City’ Police Station ah Section 13 (1), 1947 Myanmar Immigration Law noiya case ana pelut un ahi. Amahi tuchan a Monywa Prison ah koi ahinalaiyin ahi.

Xxxxxx

Nagaland gama themjilna munho February lhasunga kihongpan tading

Kohima, Jan. 12: Nagaland Government, Education Department advisor, K Tokugha Sukhalu in Tuesday nichun a state sunga themjilna munho February 2021 apat honpat dingin hetsahna ana neiyin ahi. Sukhalu in hiche thuphon hi Kohima a um District Local ground muna kal khat sunga umding kichep golseh kitetna leh golnop hondohna ana neina achu thuso bol miho masanga ahoulimna a ana phondoh ahi.

Covid-19 vaccine ahung lhun anilou jeh in, themjilna akipat theina dinga education department in jui ding dan phabep asem ho chuleh COVID-19 SOPs jouse hemjilna mun jousen ajuicheh dingin jong ngehna aneiyin ahi.

Xxxxxxx

Manipur a um university leh college ho a boina umjing hohi Government in khohsahna aneilou jeh ahi: NSUI

Imphal, Jan 12(IFP): Manipur gamsunga um university leh college ho a boina umjing hohi Biren Singh lamkaina Government education sector in nahsahna ahilouleh khohsahna aneilou jeh ahi, tin National Students Union of India (NSUI) Manipur president, Bankimchandra Meitei in Tuesday nichun ana seiyin ahi.

Tuesday nikho a Imphal khopi a kiphinna a, thuso miho masanga ahoulimna achun, NSUI Manipur unit president, Bankimchandra Meitei in state sunga jilkung holeh simlai hon hahsatna ato uho phabep ana seiyin, state government education policy hi apumin alosame, tin aseiyin ahi. Education sector a jilkung holeh simlai hon hahsatna ato hohi state government in thipbeh a amohvet jomjing leh, simlaiho macho se ding ahi, tinjong aseiyin ahi. Chuleh society phatna dingleh khantouna dinga government in nasatah a education sector akhohsah dingin ngehna aneiyin ahi.

State government in khamnathei, thilman kal, chuleh tohmun chungchanga government losamna phabep tahlang pumin, NSUI lamkai Bankimchandra in khangthah tampin athemjilna achai nunga gamsunga tohmun ong umlou jeh a khamnathei a kingolsah lo mi tampi aum dan jong ana seiyin ahi.

Alangkhat a, National Youth Day toh kisaiya Imphal khopi sunga kiphinna kibolna a pan anala Manipur Pradesh Congress Committee vice-president, T Mangiubabu injong khamna thei in khangthah tampi hinkho leh masang asuhset ding dan jong ana seiyin ahi.

Manipur state sunga khamnathei tamtah tah state ahilouleh central force hon amandoh jing uvin ahi. Ahin, drug haul case ho a kiman mi tamtah lah a phabep bou gotna akipen ahi. State sunga khangthah ho makho semtupna dinga a pan nasatah a lahphat chu tuhi ahitai, tin vice-president in aseibe in ahi.

NSUI Manipur unit in masanga pat education sector khohsahna neilou dan a state government chunga ngohna ana neijing ahitai. State government in phat sot thim pi education sector ana khohsah tahlou jeh in Manipur a simlai tampin state pam ahilouleh state danga athemjilna jomding alheng jo tauve, tin December 3, 2020 nichun NSUI Manipur unit in ana seiyin shi.

Chuin, Bangkimchandra in tu government vaihomna noiya education budget kumseh a akemsuh chehcheh dan ana tahlangin ahi. Educational institution ho a simlai tampin Bengali jem akona Meitei Mayek manchah theina dinga akihabol laitah uvin, state government in state sunga Sanskrit pao jilding ahin som kit uve, tin jong aseibe in ahi.

xxxxxxxx

India in nikhat sunga Coronavirus Case thah 12.5k anamube kit, lha 7 sunga dinga alhompen ni hita

New Delhi, Jan 12: Tuesday ni a Union Health Ministry data in ana tahlang dungjuiyin India in nikhat sunga Coronavirus Case thah  12,584 ana mubekit toh lhonin tuni chana case kimudoh jouse jat agomin 1,04,79,179 ana lhingtan ahi. lha 7 sunga dinga alhompen ni ana hitan ahi. Chuleh hiche covid-19 natna a kona dandoh jat India sunga agomin 1,01,11,294 ana lhingtan, national recovery rate 96.49 percent chan ageitan ahi.

Chuche nikho ma a mi 167 in covid-19 natna jeh a thina ana otbe kit toh lhonin tuni chana India sunga covid-19 natna jeh a thina tohjat agomin mi 1,51,327 ana lhingtan ahi. Chuleh national fatality rate 1.44 percent in agei nalaiyin ahi. Tutua India pumpia coronavirus active case 2,16,558 aum nalaiyin, hichu total case a kona 2.07 percent tobang ahi, tin Tuesday ni jingkah a Union Health Ministry data chun avetsah in ahi.

ICMR thulhut dungjuiyin January 11 ni chanin covid-19 test mi 18,26,52,887 tobang ana kiboldoh tan, chulah a kon sample 8,97,056 hi Monday ni a test kibol ahi.

Xxxxx

UNLF in suhthengna nei

Imphal, Jan 12: Monday (Jan. 12) nikho a Nongren Maning Leikai muna pat Assam Rifles holeh Manipur police joint team in ana mat Nongren Maning Leikai a cheng mi, Yumlembam Bocha alias Milan Singh alias Kangleishemba (42) chu UNLF toh kisamkaina neilou ahi dan UNLF in suhthengna anei uvin ahi.

Director Department of publicity, UNLF, M Sak Hen in thuso abolna achun Yumlembam Bocha (42) alias Milan Singh alias Kangleishemba chu UNLF a kona 2018 kuma ana hai ahi dan ana tahlangin ahi.

xxxxxxxxxx

Maban Election umna ding’a Assam in Illegal Migrants Committee semdoh

Guwahati, Jan 12: Assam Police hon Monday nikhoa thuso anei nauva, “illegal migrants” toh kisai a Special Committee semdoh dingin ngehna anei uvin ahi. Hichea thuso hi April ahilouleh May lha a Assembly Elections umding toh kisai a tohgon ahi.

Hichea thuso hi Special Director General of Police (Border) , Mukesh Agrawal in asodoh ahi. Aman aseiben hichea committee kisemdoh hin, intermediaries, facilitators, collaborators, ho illegal immigrants International border akona Assam sunga hunglut ho thua avettup diu ahi chuleh legal action jong alah diu ahi ati.

Hiche Committee ah chun Commandant, 7th Assam Police Battalion, S Borah lamkai na noiya um ahi in chuleh ama noiyah hin Assam Police Officials li jong ajau uvin ahi, amaho chu ahileh, Partha Protim Das, Kakoli Banya Baruah, Sukanya Das leh Rukma Buragohain ahiuve.

Border Police Officials holeh Railway Police hon amaho vetsui na munho committee phatsah na dungjuiya legal action jong alah diu ahi tin order kisodoh chun aseiyin ahi.

Chuleh amahon committee akithopi diu ahi. Chuleh hichea committee natoh dingdan chu DIG Range, Commissioner of Police, Guwahati leh IGP of BTAD in avetsui dingu ahi.

Assam a BJP government in Citizenship Amendment Act passed abolnau thua demna jong ana mutauvin ahi. Pressure groups a lamkai 2 , All Assam Students Union (AAMSU) leh Krishak Mukti Sangram Samiti hohin Citizenship Amendment Act deilou holah a alamkai ahi, chuleh amahohin political parties jong asem diuvin aphongdoh un ahi. Hichea candidate ding ah chun Assam Jatiya Parishad leh Raijor Dal akona um ding ahi.

Hichea anti-infiltration committee semdoh nadinga tohgon chu December lha a Amit Shah in Guwahati avilna a kona hung um ahi. East Mojo in thuso anei dungjuiya, mihem 134,810 tobang hochu foreigners ahiuvin ahi, hiche hi July 31, 2020 chan a Assam sunga dinga kiphongdoh ahi. Chuleh December 6, 2020 ah chun, mi 386 leh chapang 22 jauna amaho chu detention centres hoa jail adim jeh in koi ahiuvin ahi.

State co-ordinator of exercise, Hitesh Dev Sharma in hichea thil kibol danho chungah thudoh anei in chuleh hichea hin illegal immigrants tampi hochu 2019 a NRC noiya um dungjuiya mudoh ahi. Chuleh hichea hin million 1.9 tobang hochu NRC reject ahiuvin ahi.

Xxxxx

Tripura a mipa khat in aji le anu that, achate masanga atahsa chengoi

Agartala, Jan 12: Thilsoh dei umlou tah Tripura ah anasoh in ahi. Hiche hin mipa khat in ajinu leh anu (ajinu nu) chu ana that in chuleh achate masanga atahsa lhonchu chem in anasat chandeh in ahi, hichea hin chapangho chu kichatah in ana peng uvin ahi. Hiche thusoh jouhin mipa chun ajinu te insungah chun poison ana nekit in ahi tin Police hon asei uvin ahi.

Hiche thilsoh hi Monday nikhoa chu Dhalai District, Tripura gamsunga thilsoh ahi. Hiche hi local mihon amudoh jou uva Police ho koma hetsah na ana nei u ahi.

Hichea mipa hi Hapania, West Tripura, Tripura capital akona km 7 a gamlha mun ah room chomkhat a khothei louva aum mudoh ahi tin Police hon asei uvin ahi.

Sub divisional Police Officer, Ashish Dasgupta in aphondoh dungjuiya hichea mipa chu Medical examination nei ahi in chuleh ama tahsa chungah poison aum mudoh ahi, hinla tijat um dinmun in aumpoi ati. Hichea atolthana jeh hi het ahipon, chuleh amajong thudoh thei ahinaipon, tuhin amapa hi GBP Hospital, Agartala ah jen in aumin ahi, chuleh amahi local court a kidinsah ding ahi tin Police hon asei uvin ahi.

Hiche chapang hochu Dhalai Child Welfare Officer khut ah pehlut ahitauvin ahi. Police in akholdoh dungjuiya hichea mipa leh aji chu achate toh ajinu nukoma chu achesa lha 4 sungah ana um u ahi. Police in aseina ah hichea mipa leh aji chu kikhen (divorce) ahina dinga tohgon anei lhon laitah ahi ati, chuleh hichea kithana gimnei tah umjong hi hiche hojeh hidinga ginchat ahi.

Hinla thuchen ima het ahinaipon, hinla kholchil na akinei jou tengleh bou het hiding ahi tin Dasgupta in aseiyin ahi. Hiche thusoh toh kisai in local mihon hiche mipa chu amaho khut a pehdoh ahina dinga kiphinna anei un ahi. Hichea hin mipi sousang ho vetup dingin Tripura State Rifles ho pansah ahiuvin ahi.

Xxxxxx

Covid 19 Vaccine Doses lakh 54.72 Tuesday nilhah chan geiya mu ahitai: Centre

New Delhi, Jan 12: Centre in Tuesday nia aphondoh na ah tuchan a Covid 19 Vaccine National leh State level stores a kikoi theijat chu Doses lakh 54.72 alhingtan ahi tin aseiyin ahi. Chuleh maban a Serum Institute of India akona crores 1.1 leh Bharat Biotech akona dose lakh 55 jong January 14 tengleh lahlut kit hiding ahi. India pumpi huop a hiche Covid 19 damdoi kap ahithei nading a tohgon achelhah laitah ahi. Chuleh hiche hin Covishield damdoi jong Pune akonin city 13 hoa dinga damdoi pohdoh sah anahitan ahi. Hetthei khat chu Covid 19 damdoi kapna hi January 16 akona kipan ding ahi. Doses lakh 38.5 hohi khat cheh a Dk. 295 man ahi. Chuleh hichea hin Bharat Biotech in doses lakh 16.5 tobang manbeiya apehdoh toh kilhon a dose khat man chu Dk. 206 in akhesuh tan ahi ati. Bhushan in aseina ah Central Government Medical Stores Depot 4 , Chennai, Karnal, Kolkata leh Mumbai ah aume ati. Hiche ho jaulouva state jousen jong Regional Vaccine Store aneicheh uve tin aseiyin ahi. Chuleh state lenhon store khat sanga tamjo anei uvin ahi, hiche toh kilhon a Uttar Pradesh in store 9 anei in, Madhya Pradesh leh Gujarat hoa 4 cheh aumin chuleh Kerala in 3 aneiyin ahi chuleh Jammu and Kashmir, Karnataka leh Rajasthan hoa 2 cheh aumin ahi ati.

Hichea Vaccine hochu emergency a manthei ahina dinga Drug Controller in avettup diu ahi. Chuleh hichea hin frontline workers holeh lhendoh a um mi phabep ho chunga peh masat hidiu ahi. Chuleh hichea Health care leh frontline workers hoa dinga damdoi kikap dingho chu Central Government in apohdoh ding ahi tin Union Health Secretary in aseiyin ahi. Gam dang hoa Vaccine kisemdoh hochu amanjat India a sangin asang jon ahi tin Bhushan chun aseiyin ahi. Hichea hin Pfizer BioNTech sem chu DK. 1,431 man ahi, Moderna chu Dk. 2348 leh 2715 kikah, Sinovac chu Dk. 1027 , Novavax chu DK. 1114, Sputnik V chu Dk. 734 chuleh Johnson and Johnson semchu Dk. 734 man ahi.

Damdoi natohdan thu ah Bhushan chun aseiyin, hichea damdoi kikap hochu nikho 14 jouleh bou hetthei hiding ahi ati. Hiti ahijeh a mipi hon Covid appropriate behaviour jui dinga ngehna kinei ahi tin Health Secretary chun aseiyin ahi.

Tu dinmun a India a Covid 19 positive rate chu 5.7 per cent tobang ahi, hinla hapta masa a chu 2 per cent ahi. Chuleh tuhin Covid 19 natna nei 43.96 per cent tobang hochu Healthcare munhoa koi ahiuvin chuleh 56.04 per cent tobang hochu home isolation ah koi ahiuvin ahi.

Xxxxx

Northern State ho nikho 4 sunga dinga Weather Department in Orange Alert sodoh

New Delhi, Jan 12: India Meteorological Department (IMD) in Northern States hoa dingin Temperatures akhehsuh toh kilhon in Orange Alert asodoh tan ahi. Hiche hi ahung lhung ding nikho 4 sunga dinga aphondoh u ahi in chuleh Tamil Nadu leh Puducherry ah jong go hatah a juding in aphongdoh in ahi.

IMD in aseina ah Northern States hoa temperature chu normal noiya umding ahi ati. Chuleh North/ North West akona hui ahat jeh a nikho 4-5 sunga hi adeh a Punjab, Haryana, Chandigarh leh Delhi, Uttar Pradesh leh Uttarakhand ho daplheh ding ahi tin aseiyin ahi.

IMD in aseina ah mei (fog) jong Northwest India sunga nikho 4-5 sunga umding ahi ati. Hiche toh kilhon a Punjab, Haryana, Uttar Pradesh hoa January 13 leh 16 kikah sunga dingin Orange Alert asodoh tan ahi. Chuleh Rajasthan a dingin January 13 chu Orange Alert ahi.

IMD hin kho umdan (weather) vetsah na dinga Colour Code li aneiyin ahi. Orange Alert chu extreme conditions a dinga man ahi in chuleh, Red chu weather hoilou jeh a in leh louho geiya kiven na nei nading a man ahi.

Green hin normal weather ahinai ti avetsah ahi, chuleh yellow hin weather hoilou jeh a thilsoh ho avetsah ahi. Chuleh adeh a Tamil Nadu, Puducherry, Karaikal, Kerala, Mahe leh Lakhshadweep hoa kumseh leh cyclonic circulation Comorin area sunga aumjing toh kisai a gojuh leh moderate thunderstorms leh lightning ho umthei dinga ginchat ahi. Hinla nikho 2-3 jouleh hiche munhoa hi gojuh jong olding ahi tin IMD in aseiyin ahi.

Tamil Nadu, Puducherry leh Karaikal  hoa  hin January 12 leh 13 hoa go hatah a juding in IMD chun aphongdoh in ahi.

Xxxxxxx

Lhukhosei ZOu kilhadoh na deilou natoh kisai a Pangaltabi a toumun kiphinna um

Imphal Jan,12: Kakching District sung a um Pangaltabi Chingkha a Pangaltabi Chingkha Meira Paibi le CADA Unit in kithokhom in Lhukhosei Zou kilhadoh na chung chang in deilou na vetsah na in tunin toumun kiphinna leh kihoukhomna ana nei uvin ahi.

Kingon achun Sorokhaibam Nena  – President, CADA Kakching District Committee in ahoulimna a aum na official quarter a khamnathei tamtah kimandoh mi khat court in mona neilou ahi tia phondoh na anei hi ginmo na lentah kinei toh lhon a hitabang tah a muntin kihoukhomna hi hung kibol ahi tin ana sei in ahi. Manipur sung a khamnathei ani ni a akhan jing toh lhon a khamnathei a kivei punbe jing lai a hitabang tah a khamnathei toh kimat tha ho mona nei lou ahi tia kilhadoh hi vangset umtah ahi tin jong Nena chun ana sei in ahi.

Tuni kihoukhomna achun panlah na hung nei jouse in Lhukhosei Zou kilhadoh ajah da daan ule achung chang thu phate a kholchil na akinei kit ding adei dan u tahlang na ana nei uvin ahi.

Xxxxxxxxxxxxxxxxxxxxxxxxxxxxxxxxxxx

Gamsa toh kimat tha

Kpi, Jan 12(ET): Motbung Police Outpost team in tuni in gamsa kipo khat ana mandoh uvin ahi. SI Lenminthang Misao makai na noi le Thangkhochon Haokip, Addl SP (L/O)/Kpi vetsui na noi a che le vah le vetchil na ana kinei na a Greater Adjutant kiti gamsa Wildlife Protection Act 1972 noi a gotna pehthei kum 3 lam songkul tanna thei chuleh dangka  25,000 lam leuna thei gancha chu nilhah lam nidan 6  vel in Motbung a ana kiman doh in ahi. Hiche gancha toh ana kimat tha pa chu Taher Hussein Lashkar (27) S/o Riyazuddin Lashkar, Cachar district, Assam akon ahi akiti. Akiman doh pa le gancha chu Forest Range Office, Motbung a pehlut na ana kinei tan ahi.

xxxxxxxxxxxxxxxxxxxxxxxxxxxxxxxxxxxxxxxxxxxxxxx

Motbung Assam Rifles  in mipi kithopina nei

Kpi, Jan 12: Ahunglhungding Republic Day toh kisai in COB Motbung, 38AR  in Motbung khomi ho kithopina kingon ana nei uvin ahi. Tuni achun Assam Rifles ho in Motbung football  ground semphat na ana nei uvin,  nullah ho suh theng na ahilou le thil dang semna ho ana nei uvin ahi. Tuni Assam Rifles natoh na ho chung chang a Motbung khomite le khosunng kiloikhomna ho in kipa thuseina ana nei uvin ahi.

xxxxxxxxxxxxxxxxxxxxxxxxxxxxxxxxxxxxx

Mizoram a healthcare natong 14,000 lam vaccine kap ding a min jih lut na kinei

Aizawl, Jan 12: Mizoram in healthcare natong 14,000 lam covid vaccine kap ding in min jihlut na ana nei taovin ahi. Hetthei khatchu India sung a  vaccine kap na hi ahunglhungding nisim 16 akon kipan ding ahi. Vaccine kikap ding toh lhon a muntin a min lah na kipan jing ahitan ahi. Vaccination ding toh kisai a muntin a district le block level a avesui ding phate a um ding in jong tohgon akinei in ahi.  Hiche vaccine kap na ding chung chang ahin state govt in Aizawl civil hospital, Kulikan Sub-District hospital, Aizawl, Urban Public Health Centre le Aizawl ITI, Lunglei Civil hospital ho chu lhendoh na ana nei uvin ahi. Hiche toh lhon a vaccination programme toh kisai a training kibol na jat chom chom ana kibol jing ahi. Thuso kimu dungjui in January 16 akon a healthcare natong crore khat lam le frontline natong crore 1 lam agoma crore 2 lam vaccine kap ding a tohgon kinei ahi. Hiche healthcare ho vaccination kikap chai teng mi kum 50 chung lam chuleh dammo na jat chom chom nei ho hung kikao ding ahi akiti, Aalngkhat a jani in Prime Minister pa in vaccine kap ding toh kisai in Chief Minister hotoh kihou na virtual a ana nei kit in ahi.

XXXXXXX

Nasha Mukh Abhiyaan noi a awareness programme ana kibol

Imphal, Jan. 12(UNA): Khamnathei suhmang ding tohgon hi alhang sung muntin a kiloikhomna hotoh kithokhom pum a akibol jing le state sung akon khamnathei kisumang jou ding ahi tin Singjamei Police Station OC P. Sanjoy Singh  chun Nasha Mukta Bharat Abhiyaan (MoSJE) oi a sensitization le awareness programme kibol na achun ana sei in ahi.  Hiche kingon chu District Administration, Imphal West le District Social Welfare Office, Imphal west in Sopo Kakwa toh kitho a Youth Initiative Forum Manipur (YIFM) makai na noi a Sopo Office, Kakwa a ana bol u ahi. Tuni kingon toh kisai chun signature campaign jong ana kibol in ahi. Tuni kingon achun police ho le simlai ho le mipi ahung khom ho kikah a kihoukhomna jong ana um in ahi. Secretary,  YIFM Nongthombam Nutan Devi in asei na a police in khamnathei kijoh le kipoh le ho mat na ding vetsui na ding ahi panlah na ding lentah anei in, school ho le college ho kom vel lah a khamnathei kijoh le kijoh lou chung chang a jong hi vetsui na lentah anei u ngai ahi tin jong ana sei in ahi.

Xxxxxxxxxxx

ISIS anajop Doctor khat chung thu kiseiding

New Delhi, Jan 12: National Investigation Agency in tuni in doctor khat chung a ISIS ana jop a India sung a natoh na ana nei jeh in chargesheet file ana bol uvin ahi. Hiche charge sheet chu special NIA court ang a Indian Penal Code (IPC) le Unlawful Activities (Prevention) Act (UAPA) toh anakimeh bet ahi. Ngohna kinei a achung thu seiding pa chu kum 28 a upa Abdur Rahman, Bengaluru akon ahi akiti. Hetthei khat chu Rahman in ISIS/Islamic State Khorasan Province (ISKP) hot up le doi chung chang a natoh na anei a midang ho lheplhah na ahilou le midang jolding natoh na anei chunga kiman ahi dan jong tahlang na ana kinei in ahi. Hetthei khat chu hitabang tohgon noi ahi Wani le Hina Bashir Beigh, Srinagar, Abdullah Basith, Hyderabad chuleh Sadiya Anwar Shaikh  le Nabeel Siddick Khatri, Pune ho jong anakiman ahitan ahi. Thuso kimu dungjui in Rahman chu MBBS imlai ahi akon a Bangalore Medical College a an akijoldoh ahidan jong tahlang na akinei in ahi. Ama pa hin a college kai lai akon a Islamic movement chepi ho thusei angai a ama le ama hung kitil khou a panlah na ahin nei pan ahi akiti. Phat chom khat jou a Syria mu nana jot a khangthah atilfoh hotoh ISIS a panlah na nei ding a tohgon anei khom dan u jong hetsah na ana kinei in ahi. Ama pa hin medical lam a hetna sang ana nei toh lhon a ISIS sung a medical lam a kithopina jat chom chom ana nei jing dan jong tahlang na anakinei in ahi.

xxxxxxxx

Indian Army chief in China toh gamgi boina suhlhap ding tohgon nei

New Delhi, Jan 12:  Indian Army Chief in China toh gamgi thu a boina jat chom chom ho ahung ki seilhah ding akinep dan tahlang na ana nei in ahi. Army chief pa chun asei na a China in muntamtah dalhah na anei uvin, Chinese ho jong alhom cheh cheh tahdan u tahlang na ana nei in ahi. Indian Army chief General Manoj Mukund Naravane in thudo miho toh akihoulimna a China toh boina chung chang a kihou na kinei jing toh lhon a kihou lhah na ahung um vah tahding dan akinep dan jong tahlang na ana nei in ahi. Eastern Ladakh lam mun phabep a jong PLA ho in mun phabep a sepai tamtah alahdoh tahdan jong tahlang na ana nei in ahi.

Xxxxxxxxxxxxxxxxxxxxxxxxxxxx

National Education Policy hi Swami Vivekananda Philosophy akon kiladoh ahi: PM

New Delhi, Jan 12: Prime Minister Narendra Modi in tuni in National Education Policy thah hi Bharatiya Janata Party (BJP) in Swami Vivekananda philosophy akon ahin pohdoh u ahidan tahlang na ana nei in ahi.  Anivei channa National Youth Parliament Festival a ahoulimna a Prime Minister pa in govt in khangthah ho ading a thil pha tamtah ahin bol jing u ahin abol jing nalaiding ahi tin ana sei in ahi. Tuni hi Swami Vivekananda penkal kum 157th channa ahin, hiche toh lhon a ama penni kho hi National Youth Day tia hung kihe ahi tin Prime Minister pa chun ana sei in ahi. Swami Vivekananda hin lungthim le tahsa khantou khom ding hi ana gel sang in, hiche toh lhon a fit India movement le National Education policy hi hung kibol ahi tin Modi chun asei in ahi. Prime Minister pa chun Parliament central hall chung chang thu jong ana sei in,  hiche hi constitution kisemdoh namun ahi toh lhon a thil phatah ahi tin ana sei in ahi.

Xxxxxxxxxxxxxxxxxxxxxxxxx

Meghalaya govt khahdoh phat ahitan ahi: Congress

Shillong, Jan 12:  Meghalaya govt in khah doh na anei a state sung a ILP chesah na ding panlah na athah beh a anei phat ahitan ahi tin opposition Congress in tuni in ana sei uvin ahi. Govt ang a hetsah na kinei nom chu Indian govt ang a ILP thumna anei chung chang uva hi thuhtah a kheh lut na anei uva athil thum u kisuhmit kigot kit hi phate a ahet them uva pan nasatah a alah jom ding uvin hetsah na an anei uvin ahi. Hice thu chu tuni a Opposition lamkai Mukul Sangma in thuso miho toh akihou na a ana sei ahi.  MMeghalaya sung a ILP chesah ding kiti hi state usng mipi ho ang a kitepna ana kinei khat chu ahin, hiche toh lhon a phate a state govt in akitepna suh bulhit ding a panlah na anei ding uvin jong hetsah na ana nei in ahi. Gamsung a CAA um toh lhon a hitabang tohgon umding hi state mite in angaichat thupi pen ahin, phate a election lai a mi pang a kitepna kinei ahi toh lhon a govt in asuh bulhit u angai dan jong hetsah na ana nei in ahi.

Xxxxxxxxxxxxxxxxxxxxxxx

NBSU in kiphinna nei ding a gihna nei

Imphal, Jan. 12(UNA): Naorem Birahari Students’ Union (NBSU) in tunin state govt ang a college a kiloikhomna phate a um ding sempeh na akinei lou le kiphinna apat ding in thuphon anei uvin ahi.

Kiloikhomna in college principal chung chang a boina um jong agan n athei pen a akisuh lhap na ding in hetsah na ahin nei uvin ahi. NBSU,  general secretary N.C Javelin in asei na a tule tua Chairman cum Caretaker Joint Director of Higher & Technical Education Th. Ojit Singh in simlai kiloikhomna lamkai hotoh kihou na ana neina achun college a kiloikhomna lhingset khat semdoh ding in kinoptona ana nei pi in hinlah tu chan in don in ima akoipon ahi tin ana sei in ahi.

Akisiapi vaipo ho le govt in agan nathei pen a natoh na ahin nei lou uva kinoptona kinei ho suh bulhit na ahin nei lou ule kiphinna hung kinei pan ding ahidan jong ana sei uvin ahi. Hiche kiphinna kinei na a boina aso le vaipo ho in mo akipoh diu dan jong tahlang na ananei uvin ahi.

Xxxxxxxxxxxxxxxxxxxxxxxxxxxxx

Assam Tribes chungchanga Congress in BJP President JP Nadda demna nei

Guwahati, Jan. 12: Election hunglhun koncha ahitoh lhonin, Assam gama Congress BJP national president JP Nadda in stakeholder hotoh kihouna achelhah jing laiya centre Assam state sunga community 6 ho Scheduled Tribe (ST) status apetai, tia asei jeh in demna ananei uvin ahi.

Nadda thusei jeh hin ruling party in jou leh hetsahna dihlou puma vaihom danin ngohna Congress lamkai hon anei uvin ahi.

BJP hon April lhasunga umding Assam Assembly election hunglhun masang Cachar district, Silchar town a campaign abolnau leh Vijay Mahasabha (victory rally) masapen aman nauva JP Nadda in ahoulimna achun, BJP in community 6 ho dinmun hahsat dan ana hetpeh uvin, state sunga tribe dangho tongkha louvin ST status ana petai. Congress in hitobang hi ana boldoh ngam pouve, tin Chief Minister Sarbananda Sonowal, senior minister Himanta Biswa Sarma, state BJP president Ranjeet Kumar Dass, chuleh adang dang ho umpet in ana seiyin ahi.

Community 6 – Koch Rajbongshi, Tai Ahom, Chutia, Matak, Moran and Tea Tribe – ho ST status  pehna ding chungchanga thulhut nunungpen kimu dungjuiyin hiche ST status thu hi pending in aum nalai in ahi. Assam government in state sunga ST status pehthei pehmo ahi vetsuina neidinga aphudoh Group of Ministers (GoM) amudoh u thudol central government henga report athot diu chu thulhut kimu dungjuiyin athot naipouvin ahi.

Xxxxxxxxxxxx

Assam Rifles hon Security Meet anabol

Imphal, Jan. 12: Assam Rifles troop hon January 12 nichun Imphal West district a um Lamdeng kho a Security meet khat ana bol uvin ahi. Security forum achun khosunga aluboh ho, Youth Clubho, Meira Paibi ho, chuleh akho vel dunga kon local mihon pan anala uvin ahi.

Meeting achun, local miho chu tutua security dinmun leh adeh a ahung lhung ding Republic Day nikho a thil umding dan ho hilthemna ananei uvin ahi. Ahung kikhom mipi holeh Assam Rifles hon alhang sunga dan toh kitoh louva hunama sum demand kibol chuleh thil kipo ho chung changa lim-gehcha a kign ding dan leh bol dinga pha ho seikhomna jong ana umin ahi. Chuleh Covid-19 doudal ding dan jong ana kihil uvin ahi.

Local mihon Assam Rifles ho panlahna leh alhang sunga chamna aumsah jeh uvin kipathu anasei uvin ahi.

xxxxxxxxx

Assam Rifles hon Awareness Campaign anabol

Ccpur, Jan. 12: Assam Rifles troop hon Ayushman Bharat Pradhan Mantri Jan Arogya Yojana toh kisaiyin Churachandpur district Liematak area a, January 12 nin Awareness Campaign anabol uvin ahi. Hiche kingon chu economy lama lhasam society ho a dinga government in basic healthcare facility ho lhunsah ding agelkhohdan tahlang ding tupna leh India Government tohgon Ayushman Bharat Pradhan Mantri Jan Arogya Yojana scheme noiya healthcare system akhantou danleh aphatchomna ho tahlang ding doina a ana kibol ahi.

Alhang sunga local mihon hiche kigon a chun pan anala uvin, Assam Rifles ho chunga pachatna sangtah ana peuvin ahi.