12th January, 2021 News

12th January, 2021 News

73
0
SHARE

Lhukhosei Zou Case Court sangjo cheh a peh dinga kiphinna chungchanga thu’a Churachandpur District Civil kiloikhom hon thuso nei

Imphal, Jan 11(ET): Churachandpur District a um Civil kiloilhomna kithokhom hon thusodoh anei nauva chun kum 2 leh akeh sunga ND &PS Court, Manipur in athu kholna ana nei Chandel ADC Chairman lui Lhukhosei Zou chunga suhgentheina aum jing toh kisaiyin lamdang asahnau thu aphondoh un ahi. Lhukhosei Zou hi Court in athemmona aumlou photchetna aneitoh kilhon in 17th December, 2020 nikho chun ana lhadoh un ahi.

Thusodoh in aseina a chun Political Party phabep in mi phabep tosotna anei uva Government suhminsetna dinga kiphinna chom chom leh Dharna aneijing uhi lungdon umtah ahi. Hiche Case 2018-19 sunga sei ahi laitah chun hiche kiloikhomna ho in Case chungchang a thutan lhah na akinthei pen a achelhah na dinga phutna ana nei utoh kilhon in Case dang toh kibang louvin kintah in seichai leh achaina a thutanna ana chelha theiyin ahi tinjong thusodoh chun aseiyin ahi.  Trial Court (ND & PS) thutan dungjuiyin, Tungkhanmung Zou leh Thangminlun Zou chu themmo chan ahitoh kilhon in kum 15 sung songkul tangding in thutanlhah na aneiyin chuleh Lhukhosei Zou leh midang 5 hochu themmona anei pouve tin lhadohna jong aneiyin ahi.

Kiloikhomna hon Court in thengtah leh atoh dingdol phatah a atoh a thutanlhah na aneina chungah pachatna jong apeuvin ahi. Government henga nona leh Case Court sangjo cheh a pehlut ahina dinga phutna kineijing hin State sunga Judiciary, Legislature leh Executive kikah a boina asodoh thei ahi tinjong Civil kiloikhomna ho kithokhom a thusodoh kineina achun aseiyin ahi.

Churachandpur District sunga Civil kiloikhomna ho kithokhomna thusodoh in aseibe na a chun, Political Party chom chom hon tosotna anei Civil kiloikhomna phabep hon Government in Lhukhosei Zou Case hi Court sangjo cheh a pehlut dinga phutna anei alimsah lou dingin jong temna aneiyun ahi. Akhuti lou leh Churachandpur District sunga Civil kiloikhomna chom chom hon kimohvet lou ding ahi tinjong aseiyin ahi.

Gah hetthei chu, Chandel ADC Chairman lui Lhukhosei Zou chu adang mi 7 toh Narcotics and Affairs of Border (NAB) Team hon June 20, 2018 chun Drugs Dangka 27 Crore vel manding toh ana matkhom tha uvin ahi. Hinla, Special Court (ND&PS) in Lhukhosei Zou leh adang mi 6 toh themmo chansah nadinga photchetna alhahsam jeh chun ana lhadoh un ahi.

Xxxxxxxxx

Manipur a COVID-19 active case 477 noi a kemsuh, Recovery rate 97.06% hita

Imphal, Jan 11(ET): Manipir a COVID-19 Active Case um chu Monday nikho chun natna nei kimudohbe sanga natna a kon a damdoh na nei apumbe jing toh kilhon in 477 nuoi in akemsuh tan ahi tin State Health Department in aseiyin ahi.

COVID-19 Common Control Room akon a thulhut nunungpen a kimu dungjuiyin, natna nei athahbeh in milham 26 leh Central Armed Police Force (CAPF), Personnel 7 jaona in mi 33 mudohbe in aum in, chuleh COVID-19 natna a kon in mi 46 in damdohna anei kit un ahi.

Monday nikho a natna nei athahbeh a kimudohbe hotoh kigom in State sunga natna akon a damdoh mi 27,851 leh thina toh  mi 365 toh kigom khom in 28,693 alhing tan ahi tin COVID-19 Common Control Room in atahlang in ahi.

Milham lah a athahbeh a natna kimudoh ho lah a mi 7 hi Imphal East akon ahiuvin, Imphal West leh Tamenglong akon mi 6 cheh, 4 hi Kakching, chuleh Thoubal, Bishnupur leh Ukhrul akon mi 1 cheh ahi. Monday nikho chun natna jeh a thina toh ana umpon chuleh Recovery Rate jong 97.06 per cent ahitai tinjong atahlang in ahi.

Xxxxx

CSO chom chom hon Lhunkhosei Zou Case toh kisaiya Opposition Party ho henga Memorandum pehlutna nei

Imphal, Jan. 11(UNA): Civil Society Organizations (CSOs) chom chom leh Club ho, Meira Paibi holeh adang dang hon achesa nikho phabep chun Chandel ADC Chairman lui Lhunkhosei  Zou Drugs asum a Dangka 27 Crore toh ana kimattha a Special Court ND&PS, Lamphelpat in ama leh midang phabep toh December 17, 2020 nikho a lhadohna anei deilouna leh Court sangjo cheh a pehlutna neiding in kiphinna ana nei tauvin ahi.

Civil kiloikhomna chom chom holeh Club ho, Meira Paibi holeh adang dang hon State Government hengah kiphinna leh State Government in a Case athah hondoh kit a, Court sangjo cheh a pehlut ahina ding in ngehna aneiyun ahi.

Alangkhat ah, kiloikhomna chom chom hon Moreh mun ah Lhukhosei Zou Case avel a kholchilna nei dinga phutna kinei ho deilou vetsahna in toumun kiphinna leh lekhapeh a kisun UFM leh CADA in thutan vaihom ho jana apeh uva, Lhukhosei Zou chunga engbolna aneilou diuvin kholhang sapna leh Court thutanna jabolna anei diuvin phutna ana neiyun ahi.

Hiche Case thu toh kisaiyin All Manipur Women Social Reformation and Development Samaj (AMWSRDS), Thoubal Ima, AMKIL, Tammi Chingmi, THANIL, Khwairamband Nupi, Keithel Semgat Sagatpa Lup, Nongpok Leinagk Apunba Nupi Lup, Apunba Nupi Lup (ANUL) Bishnupur, Nongchup Imphal Palem Ima Apunba Lup (NIMPAL), Ireipak Enaat Chanura Loinasillon (ECHAL) leh Meira Paibi hon Nupi Samaj a President Th. Ramani lamkaina in Opposition a lamkai leh Congress President Govindas Konthoujam leh K. Ranjit hengah Chandel ADC Chairman lui Lhukhosie Zou Case toh kisaiyin Memorandum pehlutna jong aneiyun ahi.

Xxxxxx

COHSEM in Exam ding toh kisaiya toukhomna nei

IMPHAL, Jan. 11(UNA): Council of Higher secondary Education (COHSEM) in nikhat chelha ding Higher Secondary Examination 2021 ding toh kisaiyin kihoukhomna chu State sunga themjilna mun ho a Principal hotoh ama ama School mun a kon a thil umdan leh dinmun ho lahkhomna leh 2021 Higher Secondary Exam nadinga anikho leh aphat kah ahithei nading in seikhomna ana neiyun ahi.

Kihoukhomna kinei sunga chun COHSEM Chairman Dr.L. Mahendra Singh in themjilna mun hoa Principal hotoh kihoukhomna kinei hi adeh a ama ama School akon a hetlouva khoh leh thil umdan dinmun ho hettheina ding leh Exam bol le bollou ding hetthei nadia kigong ahidan aseiyin ahi.

Ahunglhung ding Examination hi amun mun a School Principal hoa kon a thil umdan dinmun ho lahkhomna kinei dungjuiya COHSEM Examination 2021 hi SOP juipum a hung kigong ding ahi. Chuleh simlai 50-60 percent tobang in Online Class alahpeh u ahidan jong mopohna neiho akon in thulhut akimun ahi tinjong aseibei.

Aseibe na ah, Government leh nu le pa te akon a Exam ding toh kisaiya dohna umjing thei khat chu simlai ho Online Class kineina a kihilna phatah a um hinam ti ahung umthei ding jeh a natna hilen umlai hijong leh Exam hi kinei tgei ding hinam tia mopohna nei Principal hoa kon a thil umdan leh dinmun ho hetdoh thei nadia nikhat sunga dinga toukhomna kinei ahi tinjong aseiyin ahi.

Chukit leh hiche toukhomna phat sunga hi Exam kinei masanga kihilna a umbe theina dinga lha 2-3 ngabe thei hinalai ding ham tia seikhomna neina ding a kigon ahi. Gamsung pumpi a State chom chom hon Higher Examination ding April leh May lha a nei dinga phondohna nei jong aum tan ahi tinjong aseiyin ahi.

Themjilna mun hoa kon in Control Room ah Report chu themjilna mun 188 umho lah ah 135 hoa kon in donbutna leh leh Higher Examination 2021 neiding anop nau akimu in adang hoa kon a donbutna nga ahi jing nalaiyin ahi.

State sunga themjilna mun um mong mong agomin 206 apha in, hinla tuhin 188 ahung hisuh tan ahi.

NEET Examination jong kumseh a khatvei bou ana umji ahi in, hinla Central Education Minister dei dungjuiya natna hilen um kum sunga kumkhat leh NEET Exam nivei kinei ding ahi.

Mopohna nei Government in tukum Higher Secondary Examination 2021 nei dinga phatsahna ahin neikhah leh themjilna mun a Principal hon jui dinga dan leh thupeh ho, Social Distancing hihen School mun ho Sanitize bolna ding hijong leh thil-le-luo lhahsamna neihon leh boina umna thei ding hon hetsahna ahin neidiuvin jong aseibei.

Hiche kihoukhomna a chun COHSEM Chairman Dr.L. Mahendra Singh, COHSEM Secretary Ch.Biren Singh, Principal Johnstone Hr.Secondary School Ph. Mantri Singh leh Controller of Examination COHSEM A.Sukumar Singh chu Speaker hina in pan ana lauvin ahi.

Xxxxxx

DM University Jilkung hon Class boycott bol ding atiu phatchom khat a dia ladoh tao

Imphal, Jan 11(ET): Dhanamanjuri University sunga College 5 hoa Jilkung hon Adhoc Committee noiya University Authorities hon tu dinmun a thil chedan ho ve masa louva Jilkung thah lahbe ding tohgon thua adeilou nau thuphon anei uvin chuleh kiphinna jong anei uvin ahi.

Hichea chun online leh offline class hojong kha ahina dinga kiphinna anei un ahi. Chief Minister, Commissioner leh Education Minister jong CM Office Chamber ah ana kimupi un ahi. Hiche thu toh kisai a Chief Minister in avetlhah a chuleh apoimo dungjuiya natohna anei dingin thuphon anei in ahi, hiche thu toh kisai in Adhoc Committee in akiphinna hou chu phat chomkhat a dingin asuhai tauvin ahi. Adhoc Committee in tuni chun Nidan 10am velin Commissioner jong ana kimupi un ahi. Chuleh Adhoc Committee in CM chungah akipana thuphon aneijin chuleh, CM, Education Minister leh Vice Chancellor injong phatah a avetsui diu ahi tin aphongdoh un ahi.

Xxxxx

Meetei hohi amaho Historical sacred munho vengtup dia athunei u angaiye: IMF

Imphal, Jan 11(ET): The International Meetei Forum (IMF) in thuphon anei na ah Meetei hobou hi amaho historical ritual  leh sacred munho vetup dingleh vengtup dinga thunei na anei u ngai ahi ati. Hiche mun phabep hochu ahileh, Koubru, Langol leh adang dang ho ahi.

IMF President RK Rajendro Singh in aseina ah Meetei mihoa dinga sacred place phabep umho chu ‘immigrant’ Community phabep hon amaho gamsung in ahop danin asei uvin ahi ati. Aman aseibena a hiche Meetei mihoa dinga mun theng (sacred place) hoa thusim a kimu dungjuiyin Meitei Deity ho phat sottah a konin Polo ana kichem uvin ahi, chuleh Polo jonghi Manipur akona hung umdoh ahi ati.

Tu dinmun hin Meetei mi hohin Manipur State sunghi 4 per cent tobang bou alo ahi in, chuleh hichea chenna munlah hohi slums area lah toh abangtai tin President chun aseiyin ahi.

Hiche thutoh kisai a Meetei miho akhahdoh uva Meetei nampi hi ahuhdoh angaiye tin jong aseiyin ahi. Chuleh Meetei miho identity huhdoh ahina dinga chenna munho vettup a chuleh Pathen houna (ritual place) hojong suhtup angaiye tin Rajendro chun aseiyin ahi.

President in aseibena ah hiche Forum in Meetei nampi huhdoh a chuleh Manipur State sung pumpi a right ho kibanga a um angaiye tin aseiyin ahi.

Xxxxxxxx

Dzukou Valley a hapta 2 sung gammeikah phelmit hita; akahset ho kholchilna umvah ding

Imphal, Jan 11: Hapta ni sung Dzuko Valley a  Nagaland-Manipur gamgi chin a gammeikah ana um chu phelmit a ana umtoh kilhon in Monday nikho chun meikong ahilou leh meikhu athahbeh a muding ana umpon ahi tin Official in aseiyin ahi.

Kohima District Deputy Commissioner Mohammed Ali Shihad A in aseina ah, Dzuko Valley a gam meikah toh kisaiyin toukhomna akineiyin, gam meikah toh kilhon a tohgon ana kinei jouse leh kimanchah naho velvetna jong akineiyin ahi.

Nagaland State Disaster Management Authority (NSDMA) in Dzuko Valley a gam meikah jeh a suhset leh kahset a um gammang leh akimvel ho leh thingna louna leh pahcha ho kholchetna nei dinga mopohna peh ahiuve tinjong aseiyin ahi.

Aman aseina ah, kihoukhomna chu Nagaland Home Commissioner Abhijit Sinha makaina in akineiyin, gammeikah phelmit ahithei nadinga pan hinla mopohna nei Agency jouse chunga pachatna jong ana pe’n ahi.

Kihoukhomna a chun, chung leh noiya kholchilna kinei dungjuiyin athahbeh a meikong mudoh ahilou dan jong aseikhom un, meikong phelmitna dinga kimangcha IAF ho Helicopter hojong kiladoh ding ahitai tinjong DC in aseiyin ahi.

Official thusodoh in aseina ah, mopohna neihon gam meikah phelmit nadinga Base Camp a um den National Disaster Response Force (NDRF) Team hojong Tuesday nikho leh puidoh hidiu ahitai.

Chuleh Forest Department akon a Official holeh Personnel ho chuleh Southern Angami Youth Organisation (SAYO) Volunteer ho thil umdan vetsuina nei jing dinga nikho phabep sung amun a um Base Camp a pansa diuvin jong thulhuhna akineiyin ahi tinjong thusodoh chun aseiyin ahi.

Chuleh tule tua Dzuko Valley Base Camp mun a pansa den Kohima Sub-Divisional Officer Daniel Angami akon thulhut kimu dungjuiyin Monday nikho chun Ground Duty ho nunglahdoh na tohgon achelhah dan het in aum in ahi.

Thusodoh in aseibe na ah, mei phelmit nadinga manchah hojong Indian Air Force (IAF) hon Dzuko Valley Base Camp mun a um NDRF leh State Disaster Response Force hoa kon in ahin podoh in Jakhama Military Helipad ah athahlut tan ahi. Mei phelmit nadinga manchah hochu NDRF ho gebuh(Tent), meiphelmit na a kimangcha kivonna, Battery ho leh adang dang ho ahi.

IAF spokesperson Wing Commander Ratnakar Singh in aseina ah, IAF Mi-17V5 Helicopter 4 tah in tuipohna(Bambi Buckets) ho mangcha in gam meikah phelmit nading in tui ana chap uvin ahi. Nagaland Government akon a ngehna aum dungjuiyin IAF in January 1 akon chun kinga lou beh in pan ana kila in ahi tinjong aseiyin ahi.

Volunteer phabep leh tolsung mipi honjong gam meikah phelmit na ding in NDRF, IAF holeh Army ho hatah in ana kithopiuvin ahi.

Southern Nagaland a Kohima District hopsunga um Dzuko Valley a chun December 29 apat chun gam meikah ana kipan in, Northern Manipur gei ahin kakha in, hitoh kilhon chun State teni in alou theilou vin gam meikah phelmit ahina ding in NDRF leh Army ho hengah ngehna ana neiyun ahi.

Official akon thulhut kimu dungjuiyin, gam meikah in adeh in gammang lah leh pahcha ho, anche louhing, gancha holeh adang dang ho hatah in ana suse in ahi.

NorthEast thinglhang dinga Dzuko Valley, Koihima apat a 30km a gamla hi mun hoi 10 holah a pang ahina ban a Nagaland State Bird Blyth’s Tragopan umna leh ju le va chuleh ganhing chi chom chom umna mun ahi.

Hiche Valley hi Sea Level akon a 2,452 Metres a sang a um ahi in, Tourist Spot khat leh a phat binei a pah pahcha hojeh leh ganhing leh thingna louna chom chom um na mun poimo tahkhat ahi.

Southern Angami Youth Organisation (SAYO) hojong gam meikah ijatvei hamkhat ana phelmit tauvin ahi. Achesa 2006 kum chun gam meikah jeh in 20km a sao jong hiche Valley Southern langah hatah in ana suboi kha in ahi.

Xxxxxxxxxx

Election Commission in mun 5 a State Election aum ding toh kilhon a anatong ho 100 Percent Attendance dinga thupeh nei

New Delhi, Jan 11: Ahunglhung ding April-May a State Election mun 5 a umding ahitoh kilhon in Election Commission of India (ECI) in anatong ho January 11 apat a 100 Percent Attendance nei tei ding in thupeh abol in ahi.

Containment Zone ahilou leh Quarantine/Home Isolation a umkha Employee hovang a inmun a kon a atohthei diuvin phalpeh ahiuvin ahi.

Tule tuhin ECI hi Government Office dang bang in anatong 50 Percent lah a 33 Percent tobang toh na atong in ahi.

State 5 ho a Legislative Assembly adinga General Election umding toh kisaiyin Commission in ama noiya natong Official jouse Regular a tongho hihen Contract a tong ho hijong leh Office mun a kon a tuni 11.01.2021 akon a na atoh pan tah diuva hetsahna kinei ahidan Official thuphondoh chun atahlang in ahi.

Containment Zone ahilou leh Quarantine/Home Isolation a umho vang a inmun a kon a kihettona aum dungjuiya na atohthei diu ahi tinjong thuphondoh chun aseiyin ahi.

Official jousen SOP leh kivendohna ding a Ministry of Health and Family Welfare in aphat dungjuiya asodoh jing toh kilhon a maitom kitom jing, kisuhtheng jing leh Social Distancing leh adang dang ho phatah a ajui cheh diuvin jong hetsahna aneiyin ahi.

State 5 dinga General Assembly Election umna ding ho ahileh -Tamilnadu, Kerala, West Bengal, Assam leh Puducherry ahiuvin, ahunglhung ding April-May lhasunga umding ahi. Election dingtoh kisaiya mopohna neihon State 5 ho a Election nei nadinga kigotna May 24 kah a achaitheng diu ahi.

xxxxxxxxxx

TA & Hills Minister makaina a Income Tax chungchang kihouna chelha

Imphal, Jan 11(ET): Income Tax Deduction thua kihouna chu Tribal Affairs and Hills Minister Vungzagin Valte makaina in tuni chun ama Office Chamber ah ana um in ahi. Chuleh hichea hin Letkhogin Haokip, ACS (TA &H), Link  Commissioner of GAD, leh Income Tax leh TA & H noiya Official ho jong ana jau uvin ahi.

Hiche kihouna (meeting) ah chun tax peh apoimo danleh tax exemption certificate mu ahahdan ho seikhom na ana nei uvin ahi.

Chuleh hichea tax exemption certificate muding adeh a thinglhang munhoa cheng hoa dinga ahah danho seikhom ahi, hiche thu toh kisai a Principal Commissioner of Income Tax koma lekhathot pehlut dingin phatsah na ana nei uvin ahi.

Hiche hin DDOs leh Department of Government of Manipur leh PSUs hochun employees tax pelou dia umho (exempted) chun a service book hou chu Income Tax Office, Imphal koma assessment kum sunga apehlut diu ahi.

Employees exemption certificate thil chom chom a dinga ngaicha hochun Section 197(1) noiya Income Tax Department koma apply abol thei nahlai diu ahi tin Minister chun aseiyin ahi.

Hichea hin Schedule Tribe Government employees mun phabep huopsunga cheng hoa dinga tax pelou (exemption) dinga Section 10(26) of Income Tax Act, 1961 noiya aum uvin ahi. Hinla Section 197 , IT Act noiya certificate kipe hochu asodoh u angaiyin ahi, hiche hi ST employees hoa dinga boina asosah ahi.

Xxxxxx

COVID-19 vaccination toh kisaiya CM in meeting a pan anala

Imphal, Jan. 11(ET): Chief Minister N. Biren Singh in Video conferencing mangchan Covid -19 vaccination toh kisaiya Prime Minister Narendra Modi chair panna meeting khat achun Chief Minister N. Biren Singh in pan anal an ahi. Hiche meeting achun Union Home Minister Amit Shah, state chom chom leh Union Territory (UT) chom choma Chief Minister holeh Lt. Governor leh Administrator honjong pan anala uvin ahi..

Gah phahpoh thei khat chu India in January 16 a pat gamsunga covid-19 vaccination drive pat dinga kigonna anei ahitai. Hiche drive ahung kiapat teng, covid-19 vaccine hi amasa pena mi crore 3 val healthcare worker holeh frontline worker ho hung kikap masa phot ding,chujou tengleh kum 50 chunglam miho leh kum 50 noilam natna tamtah neikop mi 27 crore vel ho hung kikap ding ahi.

XXXXXX

Bird flu ahung chal jing jeh’a PM in state ho lim-gehcha a umdinga sei

New Delhi, Jan 11: India gamsung mun phabep bird flu ahung soudoh toh lhonin Monday nichun Prime Minister Narendra Modi in state government jouse lim-gehcha a aum uva local administration hon twi umna, zoo ho, chuleh gancha kivahna vel holeh adang dang ho hoitah a vetup dingin ana hetsah in ahi.

Ministry of Fisheries, Animal Husbandry and Dairying in hiche bird flu toh kimai tona nading tohgon anei ahitan, hiche a dinga chu district magistrate ho panlahna nasatah a ngai ding ahi, tin PM Modi in ana seiyin ahi.

State Chief Minister ho toh Covid-19 vaccination chungchanga virtual meeting aneina achun bird flu in natohkhah state jousen chief secretary level chanpha a, district magistrate ho lampi ako mupeh dingleh bird flu in atohkhah loulai state ho jong lim-gehcha a kiginsa dema aumna diuvin temna ana neiyin ahi. Aphatcha a laboratory ho a bird flu test bol hin local administration chaloh agansah choma bird flu dinmun hi kimaitopi asuh bailam ding ahi, tinjong ana seiyin ahi. Forest, Health chuleh Animal Husbandry Department ho panlah khomna jala gangtah a bird flu boina galkai dinga akinepna jong ana seiyin ahi.

Kerala, Rajasthan, Madhya Pradesh, Himachal Pradesh, Haryana, Gujarat, Uttar Pradesh, Delhi chuleh Maharashtra state hicheng ho a hin bird flu hung soudoh mong ahi photchet ahitai.

xxxxxxxxxxxx

Assam Rifles hon Chandel District a Medical Camp anabol

Chandel, Jan. 11: Mitinin navah tah a basic healthcare aso phah theina ding gelkhohna a Assam Rifles hon medical drive anabol jing utoh lhonin 11 Jan. Monday nichun Gamphazol, Chandel a medical camp khat anabol kit uvin ahi.

Basic healthcare facility, qualified health worker, socio-economic condition kitiho ho lhahsam jeh leh amun agam aga gam ningchin jeh a khosung mihon genthei hahsatna ato uho gelkhohna jalla khosung mihon angaichat u loule aiho hoppeh theina dinga Assam Rifles hon hiche medical camp hi ana gon ahi. Khosunga Primary Health Centre aumlou toh lampi dinmun hahsat jeh in hiche medical camp hi bollou akhoh deh in ahi. Medical Camp achun loule aiho manbeiyin khosung miho ana hoppeh uvin, basic healthcare treatment jong mipi ngaichat dungjuiyin ana peuvin ahi.

AR in hitobang medical camp hohi mitinin navah tah a basic healthcare facility ho aso phah theina ding gelkhohna a aboljom jing ding ahi. Kho chomchom kho 120 lam in medical checkup leh loule aiho manbeiyin ana kisan tauvin ahi.

Assam Rifles hon Camp a pan hungla hochu muhtom ana hoppeh uvin, COVID-19 guideline ho phatah a juicheh dingin jong ngehna anei uvin ahi.

Gamphazol khosung miho leh avel a kho hon Medical Camp hung bolpeh u, Assam Rifles ho chung kipa thu ana phong uvin ahi. Gamphazol kho inpipu in appreciation letter khat Assam Rifles ho khut a ana pelut in ahi.

Xxxxxxxxx

Assam Rifles hon Ex-Servicemen holeh kho haosa hotoh Sugnu a kihoukhomna ananei

Sugnu, Jan. 11: Republic Day ahung nai toh lhonin, Assam Rifles hon 11 Jan. Monday nichun Ex-Servicemen holeh kho haosa hotoh Sugnu a kihoukhomna ananeipi uvin ahi.

Meeting kigon lona jeh pen chu ahileh security lampang toh kisaiya tutua gamsung dinmun umdan leh alhang sunga chamna leh lungmona suboi kigo aumleh kimaitopi dingdan ho seikhom ding hi ahipenin ahi.

Hiche kingon achun Ex-servicemen 21 leh kho haosa mi 8 in pan anala uvin, tutua security dinmun umdan leh khamnathei lou leh aiho AR in ana matjing ho chung changa kihou khomna ana nei uvin ahi. Kihouna a pan la jousen gamsunga kona khamna theiho suhmangna dinga pan lacheh dingin anopnau apecheh uvin ahi.

XXXXXXXXXX

TCP Ccpur in Traffic daan juilou mi 81 mandoh; amaho akon Dk. 42,500/- leuman mu

B.Lalboi Gangte

CCpur. Jan 11 (ET): Superintendent of  Police, Churachandpur thupeh dungjui’a CCpur District sung’a Traffic Rule phatah’a vetkol ahi na ding in tunin (Jan. 11) Traffic Control Police (TCP) lamkai nan CCpur khopi sung mun chom chom’a Traffic Rule khoutah in vetlhah na ana nei uvin ahi. Traffic Rule vetlhah na chu Inspector James Lianzagou, OC Traffic in lamkai na in CCpur District Police, VDF leh TCP akon personnel hon ananei uvin ahi. Hiche phatsung in gari neo tol helmet khuh lou, mi 2 val kipo, parking dih louva kham ho vetlhah na anei uvin phat chom khat sung in Traffic daan juilou mi tamtah anamatdoh uvin ahi. Matdoh’a um ho chu TR-5 Receipt mangcha in sum analeusah uvin ahi.

Hettehi khat chu Sept. nisim 1, 2019 nikho akon Motor Vehicles (Amendment) Act, 2019 chepi ahitah toh lhon’a phat dang’a sang in Traffic daan juilou jeh’a sum liusah jong nasatah in akal tan ahi. Hiche daan dungjui’a Helmet khuh lou ho jouse Motor Vehicles (Amendment) Act, 2019, Section 194D dungjui’a Dk. 1,000/- leh Driving License lha thum sung hentang ding; gari neo a mi 2 val kipo ho Motor Vehicles (Amendment) Act, 2019 Section 194C dungjui’a Dk. 1,000 leh Driving License lha thum sung hentang ding; mun dihlou’a parking bol ham/double parking jouse Motor Vehicles (Amendment) Act, 2019, Section 177A dungjui’a Dk. 500/- akipat Dk.1,000; midang ding’a lungling laotah gari tol ho Motor Vehicles (Amendment) Act, 2019 Section 184 noi’a Dk. 1,000 akipat Dk. 5,000 leh lha 6 val (kum 1 lhing lou) songkul’a koi thei ding; khamnathei bol pum’a gari tol ho Motor Vehicles (Amendment) Act, 2019 Section 185 noi’a Dk.10,000 leh lha 3 sung songkul khumthei hi ding ahi.

Alangkhat’a tuni Traffic daan juilou vetlhah naphat sung in gari neo tol helmet khuh lou leh gari ah helmet kipoh ahivang’a khuhlou jong tamtah matdoh lah in ajao in ahi. Helmet po’a khuhlou ho jong a khuhlou ho bang in aleusah uvin ahi. Hiche phatsung in Traffic Control Police (TCP) in traffic daan palkeh helmet khuhlou mi 81 aman uvin TR-5 challan cut achun Dk. 42,500/- amudoh uvin ahi.

Xxxxx

United Khulmi Export Private Limited office Window glass kisuse

B.Lalboi Gangte

CCpur. Jan 11 (ET): Churachandpur District hopsung K. Muollum mun’a um United Khulmi Export Private Limited office mun’a melhet lou kiloikhom nakhat in window glass ho anasuhset peh uvin ahi tin thulhut chun aseiyin ahi. Hetthei khat chu United Khulmi Export Private Limited office hi Mission New India in Temporary office ding’a aman ahi naban’a hihe building mun’a hi L.Paul Haokip, Mission New India President Manipur State & CEO, Founder and Managing Director, United Khulmi Export Private Limited jong cheng ahi.

Hiche toh lhon’a office ahin staff 5 in na atoh uvin chuleh adang ni hi office ngah ahi. Achesa  Jan. nisim 9 jingkah nidan 2:00 vel in office ngah’a pang mi 2 lah’a khat hin K. Muollun Local Church mai’a Duster car (White) khat kinga amu in chuleh hitobang Duster car hi Kho sung mi koima anei kha um lou ahi naban’a khosung’a jong muthei ding’a lhai lut khah jong aum pon ahi.Ahin aman khohsah na ima anei lou jeh chun kholchilna ima nei louvin insung lam’a alut in ahin jingkah nidan 3:00 vel’a electric poh ging dan toh kibang thil gin khat aja lho in thilgin ajah lhon ngaikhoh lou in ana um lhon in ahi. Ajing sun in window glass kikap keh ahi dan anahedoh pan lhon in ahi. Hiche thu toh kisai’a anikho mama in CCpur Police station mun’a report jong anabol uvin ahi. L. Paul Haokip in thilsoh jeh chun office ngah teni phat chom khat office anga tah lhon lou ding in hetsah na ananei in ahi.

Alangkhat’a a nilhah kit in melhet lou hon office window ana hong uvin analut uvin ahin office  thilkeu amang imacha vang anaum pon ahi. Chuleh Jan. nisim10 sun in koima umlou kah in hiche building a L.Paul Haokip te common room window kihong sa in anaum kit in ahin thil keu imacha guhmang ana um kitpon ahi. Hitobang’a nikho 2 sung’a thilsoh thum-vei aum nachung’a Office staff leh inn neihon nommo asah naoban’a koi khutnung ahi ding ahi jong ginchat thei anei pouvin ahi. Chuleh lungkim louna anei aum jong leh athu’a seitho ding in ngehna anei uvin ahi.

Xxxxxxxxxxx

GNM School of Nursing phatsot tah anakikhah chu suhjom’a um ta

B.Lalboi Gangte

CCpur. Jan 11 (ET) : Gamsung’a Covid-19 natna jeh’a GNM School of Nursing phatsot tah anakikha nung in simlai hon themjil na suhjom kit ding in tunin (Jan. 11) School mun’a alut tauvin ahi. Covid-19 natna um jing nalai ahi jeh in School lut ding simlai ho jouse tuni jingkah in School mun’a Medical team hon Covid-19 test anabol uvin ahi. Hiche phatsung in medical team hon simlai Covid-19 test leh SPO2 test anabol uvin ahi.

Hiche toh lhon’a test kibol phatsung in positive mudoh koima ana umpon chuleh simlai ho jong lungmong tah in themjil nao sunjom ding in School analut thei tauvin ahi. GNM School of Nursing mun’a tukum academic session in first year a simlai 30, Second year a simlai 30 leh Thrid year a simlai 30 agom’a simlai 90 aum in ahi.

xxxxxxxxxx

MLA V. Hangkhanlian in jotheng’a um culvert hondohna nei

B.Lalboi Gangte

CCpur. Jan 11 (ET) : Churachandur District hopsung Rengkai Sah veng mun’a Culvert kisem jotheng ahitoh lhon in tunin MLA V. Hangkhanlian in mipi manthei ding in hondohna ananei tan ahi. Kingon achun T. Paukhanlian, Ex-Chairman, V. Khaikhanmung, Ex-MDC, V. Vungjapau, intending MDC candidate, N.Thangzachin, Chairman, New lamka Area Village Authority Council (NAVAC), New Lamka Youth Club leh Rengkai Village Authority akon lamkai leh member hon pan anala uvin ahi.

Hiche toh lhon’a kingon phatsung’a MLA V. Hangkhanlian in houlimna aneina’a Constituency sung khantou na ding leh adeh’a kijot matto na ding gelkhoh na kanei jeh’a keima sum mangcha’a hiche hi kasem ahi naban’a maban’a toh ding tamtah jong aum nalai in ahi tin aphongdoh in ahi. Rengkai hi veng dang toh tekah ding in ahampha uvin ahi ajeh chu veng dang’a lamlen, twi neh leh thil dang dang kibol lou lai hi jong leh Rengkai a khantou na ding chom chom tohmol in aum thei tan ahi.Chuleh maban’a gamsung khantou na ding’a bol ding chom chom umho proposal bol chai in aum toh hiche ho toh molso ahithei na ding’a mipi toh pangkhom’a panla ding poimo ahidan atahlang in ahi. Hiche naban’a themjil nalam khantou na ding’a pan lah jing ahitoh lhon’a Rengkai Government Higher Secondary School jong sem hoi ahi na ding in plan leh progress jong achelhah jing lai ahi ati.

xxxxxxxxxxxxxx

  1. Kahute, IPS, DGP Manipur in “The 19th Biennial Sports Meet-cum-Conference 2021’ hondoh na neita

B.Lalboi Gangte

CCpur. Jan 11 (ET) : Zillai Leilon Block in Leilon Khunou mun’a tuni (Jan. 11) akipat ahung lhung ding Jan. nisim 20 chan chelha ding The 19th Biennial Sports Meet-cum-Conference 2021 chu tuni jinglam nidan 10:30 in hondohna ananei tauvin ahi. Hiche Biennial Sports Meet-cum-Conference 2021 hondoh na kingon’a Jin-gun in LM. Khaute, IPS, Director General of Police (DGP) Manipur, Jinja-um in AK Ibomcha Singh, Businessmen, Kinnei-pa in Jangmang Vaiphei, Social Worker  chuleh Inn-neipa in Jangchon Vaiphei, Chief of Leilon Khunou anapang uvin ahi. Hiche phatsung’a LM Khaute in Zillai Flag kaidohna leh The 19thZillai Leilon Block Biennial Sports Meet-cum-Conference 2021 hondohna anei in chuleh Rev. Lienthienmang in Pathen heng’a lhandoh na anei in ahi.

Hiche toh lhon’a LM Khaute in houlimna aneina’a Leilon kho hi kakho bang’a kagel leh ka khanglet na kho ahi naban’a keima ding’a kapute langho Haosat na ahi. Kichep golseh leh sappao mandan toh kisai’a Phaitol acheng ho sang in jong Leilon kichep dan leh sappao man dan naljo kasah dungjui’a khantou na lentah um ahi dan mudoh thei in aum in ahi. Chuleh khopi sung’a khosah kiti thil hithei jing ahilou naban’a gam leiset jong kining lhing lou ahina’a phat hung che jom intin khopi’a khosa tamtah thinglhang gam ahinbel ding ahi jeh uvin thinglhang’a khosa kiti hi kiletsah pi ding ahi ati. Aman aseibe na’a khopi akon hung kichou ho jong nikhat leh Haosa thunoi’a hung khosa ding ahi dan mitakip ahetcheh poimo ahi. Gam khangtou hon thinglhang  leh khopi’a khosah ding dan kikim tan’a anei thei utoh lhon’a eiho lah ajong hitobang din mun ho ahung kimano tan ahi.

xxxxxxxxxxxx

PM Modi in Frontline Workers Crore 3 ho dinga Vaccine kapna ding Centre in apohdoh dinga phongdoh

New Delhi, Jan 11: Prime Minister Narendra Modi in Monday nikhoa aphondoh dungjuiya Centre in Vaccine kapna dinga Health care leh frontline a natong mi crores 3 tobang ho chunga alut jat apohdoh ding ahi tin aseiyin ahi. Chuleh States honjong Vaccine ho Union Government koma cho dingin hetsahna anei in ahi. Chief Minister hotoh akihounauva Modi chun aseiyin public representatives (politicians) hon citizen dangho sanga chan masat ding agotlou diuvin ngehna anei in ahi.

Leiset chunga Vaccination Programme lenpen chu January 16 akona kipan ding ahi. Chuleh hichea Vaccine chohna dinga Centre hi single agency hiding ahi tin PM in aseiyin ahi. Thuso khat chun aseina ah government thakhel a HLL Lifecare Limited in damdoi chohna dinga pan alah ding ahi ati. Hichea Vaccine choh dia kigong hochu ahileh, Oxford sem Covishield ahi in chuleh hiche hi Serum Institute, a kisemdoh ahi, chuleh India a Bharat Biotech in asem Covaxin ahiuve.

Serum Institute of India in aseina ah Centre akonin Oxford AstraZeneca COVID 19 damdoi chohna dinga order amudan u aphongdoh un ahi. Thuso khat in aseina ah hiche damdoi teni hi Rs 220 tax jau pumleh GST 14 per cent puma manding ahi. Chuleh hichea hin damdoi pohdoh ahina dinga natoh kipan vahding ahitai ati. Health Ministry chun companies hon ijat ham khat chu manbeiya apeh diuvin ngehna ana nei in ahi. Modi in aseiyin hiche damdoi teni hi leiset chunga damdoi dangho sanga manlhom jo ahi in chuleh agam in angaichat dungjuiya kisemdoh ahi ati. India ah hin Vaccine kisemdoh chu 7 alhingin ahi. Chuleh hichea damdoi kisemdoh teni hi ‘made in India’ ahi ati.

Vaccine kapna dinga amasapen dingho chu Health care leh frontline workers ho hidiu ahi. Hiche hi keima personal a ka phondoh ahi in koiman ahilou lama alahlou ding ahi ati.

Modi in gamsunga Covid 19 natna dinmun jong aphalam amano jing ahitai ati. Modi in aseibena ah State hon hiche Vaccine kapna dinga thuchom chom asodoh nalou dinga kiveng dingin ngehna anei in ahi. Chuleh hapta masa a Saturday nikhoa chu High level meeting jong ana kouva hichea chu COVID 19 damdoi kapna dinga kigotdan thuho jong seikhom na ana nei uvin ahi. Hichea hin State phabep hon ngaidan hoitah tah ahin pelut un ahi.

Health Care leh frontline workers ho agoma crores 3 aphah nathua, adeh a kum 50 chunglang miho masa ding chuleh natna dang dang neiho jong peh masat hidiu ahi.

India a tu dinmun a active case umjat chu 2 lakh 2.25 in akhesuh tan ahi, hiche hi population dungjuiya 2.13 per cent tobang alhingin ahi. Health Ministry data akona kimudoh dungjuiya India a COVID 19 natna umjat chu crores 1.04 alhingin ahi chuleh hichea thina anatoh jat chu abona lakh 1.5 alhingin ahi. Hinla virus kithejah danchu niseh a case thah umjat alhomsuh toh kilhon a 98,000 akonin September lha chun 16,000 in akhesuh tai ati.

Xxxxx

Minister Biswajit in RD Scheme kimanchah dan velvetna nei

Imphal, Jan 11(ET): Rural Development and Panchayatti Raj Minister Thongam Biswajit Singh makaina in tuni chun Rural Development and Panchayati Raj noiya Development Scheme chom chom ho kimanchah dan velvetna dinga toukhomna chu New Secretariat, Imphal mun a ama Office Chamber ah ana neiyin ahi.

Kihoukhomna a chun adeh in State sunga Mahatma Gandhi National Rural Employment Guarantee Scheme (MGNREGS), Pradhan Mantri Gram Sadak Yojana (PMGSY), National Rural Livelihood Mission (NRLM) leh Pradhan Mantri Awas Yojana-Grameen (PMAY-G) ho kimanchah dan seikhomna ana um in ahi. Kihoukhomna kinei sung chun RD&PR Commissioner Smt. Nidhi Kesharwani State sunga Scheme ho kimanchahdan thua machalna aumdan ana seiyin ahi.

Hiche kihoukhomna a chun District Commissioners/District Programme Coordinator ho leh RD&PR a Official honjong pan ana lauvin ahi.

xxxxxxxxxx

Farm laws ho sodoh ahina dinga phat kivohchon hi solution ahipoi, kiphinna chejom ding ahi: SC thuphon thu’a Farmers lamkai hon donbut

New Delhi, Jan 11: Farmers Union lamkai hon Monday nikhoa aphondoh nauvah akiphin nau chu ajom diuvin aphongdoh un ahi. Hiche hi Supreme Court in Agricultural laws hochu manthei ahi nading phat avohchon ahi toh kisai ahi.

Supreme Court thutan chu ka sang uve, hinla ka kiphin nau ngah ding thuvang keiho deilhen ahipoi tin asei uvin ahi. Chuleh Supreme Court akona “stay order” kisodoh hi phat chomkhat a ding bou ahi tin Haryana Bharatiya Kisan Union President, Gurnam Singh Chaduni in aseiyin ahi.

Loubol miho chun hiche Bill 3 hochu abona lahdoh ahina dinga ngehna anei u ahi. Government leh Supreme Court in stay order sodoh jongleh kiphinna chu chejom ding ahi tin Indian Farmers Union (Mansa) a president Bhog Singh in aseiyin ahi.

Loubol miho kiphinna thua Centre in apanlah dan thua apex court ah Monday nichun aseiyin, hiche thua hin Chief Justice of India in thutan na anei dingin apelut uvin ahi. Hinla bench chun thudoh anei uvin, keiho hi economy thua thepna nei kahi pouvin ahi, government in hiche Farm bill hohi avohchon diuham ahilouleh keihon kabol diuham tin aseiyin ahi. Chuleh hiche thu toh kisai a Government in asuhlhap theilou na chungah phamo kasauve tin aseiyin ahi.

Government leh Loubol miho kikah a kihouna jong avel 8 nachu January 7 nikhoa chu ana um ahi, hinla government in hiche Farm bill ho lahdoh ding anoplou nau aphongdoh un ahi. Apex Court injong hiche thua hi Centre akona donbutna ana nga ahi. Hiche Bill 3 hochu ahileh, the Farmers (Empowerment and Protection) Agreement on Price Assurance and Farm Services Act, the Farmers Produce Trade and Commerce (promotion and facilitation) Act, leh the Essential Commodities (Amendment) Act ahiuve.

XXXXXX

Bird Flu hi mihem toh kipehson tona Scientific Report aumpon, State hon Poultry kijoh ho akham lou diu ahi tia Giriraj Singh in sei

New Delhi, Jan 11: Centre in Monday nikho chun State chom chom ho hengah Poulty(Ahcha) kijoh ho kham leh suhtangna aneilou diuvin hetsahna aneiyin, Bird Flu(Ahcha nat) hi mihem toh kipehson theina Scientific Report aum pon ahi tin jong aseiyin ahi. Bird Flu ahilou leh Avian Influenza (AI) hi State 10 a um ahidan photchet ahitan ahi.

Minister of Fisheries, Animal Husbandry and Dairying Giriraj Singh in aseina ah, Scientific dungjuiyin Bird Flu hi mihem tahsa chunga kipeson thei ahidan photchetna aumpon chuleh acho hon jong tijatna imacha aneilou diu ahi. Delhi jaona a State Government ho henga hetsahna aneina a chun Poultry Priduct ho johdoh na hi asuhtang lou diu ahi tin aseiyin ahi. Hiche hetsahna hi adeh a Delhi Government in kivendohna dinga khopi pamlanga pat hung kipolut Ahcha ho joh leh choh kham dinga thulhuhna asemtoh kilhon a hetsahna ahin nei ahi. Tu masang jep chun Ministry in Official thusodoh aneina a chun State 10 a hiche Ahcha natna um ahidan ana phongdoh in ahi.

January 11, 2021 chan chun Avian Influenza hi State 10 a um ahidan photchet ahitai tin  Department of Animal Husbandry and Dairying in thusodoh aneina a chun ana tahlangin ahi. Hiche natna chu State 7 — Kerala, Rajasthan, Madhya Pradesh, Himachal Pradesh, Haryana, Gujarat leh Uttar Pradesh ah Sunday (January 10) chan chun ana kihedoh in ahi.

Monday nikho chun Delhi, Uttarakhand leh Maharashtra State a Bird Flu um ahidan hetdoh in a um kit in ahi.

Xxxxx

Gari Hijack  kigotna chung chang a  NSCN-IM in suh theng na nei

Dimapur, Jan 11: National Socialist Council of Nagalim- NSCN (l-M) in tuni in achesa January nisim 10 nikho a nitin thuso phabep a NSCN-IM mi 4 lam in New Medziphema lhangsung a gari khat hijact bolding ana kigo uvin hi tia thuso kinei na chung a suh theng na ahin nei uvin ahi. Hiche thilsoh chung chang a hilchet na ahin neina uva thilsoh chung chang chu gari hijack nading toh akimat loudan hetsah na ahin nei uvin ahi. Hiche gari a hung kitol ho chu kahmnathei ahilou le hem le thal a kivai ho hiding a ginmo ahi toh lhon a ana kiman ahidan jong tahlang na ana nei uvin ahi. Hitabang thilsoh an chung chana Nagaland police in thil ahilou lam beh a ahin sei na u chung a nop mo asah dan u jong tahlang na ahin nei uvin ahi. Police in SUV kimat na chung chang sumang a NSCN-IM cadre hoc hung chang thu bou ahin sei uhi vangset umtah ahi tin jong kiloikhomna in tahlang na ahin nei uvin ahi.

XXXXXXXX

UNLF cadre kiman

Imphal, Jan 11: Assam Rifles le Manipur Police  in phaicham galguh bol UNLF Self Styled Private khat ana mandoh uvin ahi. AKimandoh pa chu Nongreng, Imphal East District akon a ana kimandoh ahi. Thuguh kimu dungjui a Assam Rifles le Imphal East Commando ho in joint operation ana bol na uva YumlembamBocha @ Milan Singh @ Kangleishemba, akum 42 a upa, Nongren Maning Leikai chu phai sung a sum dong a apan jing hetdoh ahi toh lhon a ana kiman ahi. Akimandoh pa chu Lamlai police station a pehlut na ana kinei in ahi.

xxxxxxxx

RIMS in Dr. Pratita lunghempi

Imphal, Jan. 11: Regional Institute of Medical Sciences(RIMS) staff ho in Dr. Pratita Devi Pukhrambam, Professor, Department of Microbiology thina chung chang a lenghempi na ana nei uvin ahi. Dr. Pratita geldoh an in minute 2 ama geldoh na in jana pehna jong ana nei uvin ahi. Tuni jana pehna kingon achun  Dr. A Santa, Director, RIMS in jong panlah na ana nei uvin ahi. Hetthei khat chu Dr. Pratita Devi  chu jani a Kakching lam a lampi toset na khat akon a thina ana to ahi. Amanu chu Moirangthem Hemanta, former Minister le Vice-President, Manipur Congress Committee inn nei pi hi ahi.

xxxxxxx

Coffee phatchom na chung chang a training ana kibol

Senapati, Jan. 11: Coffee phatchom na chung chang in tuni in  ‘One day farm training about the benefits of Coffee plantation in Manipur’ kiti kingon khat Senapati HQ  a ana kibol in ahi. Hiche kingon chu Coffee Board of India in Khadi & Village Industry Board vetsui na noi a abol u ahi. Miranda Sanjenbam, Extension Inspector, Coffee Board of India,N-E region in training program achun resource person in panlah na ana nei in ahi. Tuni program achun coffee lei bol mi 50 lam in panlah na ana nei uvin ahi.

xxxxxxxxxxxxxxxxxxxxxxxxxxxxxxx

Assam sung a 2020 kum sung in SC le ST hochung a khanset na aum pon ahi: Union Minister Ramdas Athawale

Guwahati, Jan 11: Union Minister of State for Social Justice and Empowerment Ramdas Athawale in Assam sung a achesa 2020 kum a SC le ST hoc hung a khanset na thu ima akimu loud an tahlang na an anei in ahi. State govt in pan halah na jal a hitabang khhanset naho hi umlou ahi tin minister pa chun asei in ahi. Minister pa chun asei na a ministry scholarship scheme noi in dangka 59,000 crore lam jong ana kihomdoh in ahi tin ana sei in ahi. Athawale in asei na a Assam sung ahi a population jat lah akona 7 percent ahilou le 3.11 crore lam ahin chuleh tribal ho 15 per cent lam ahin hin jong le schorlarship ho mu na ding a hatah a panpi na kinei jing ding ahi ati.  Tibukimlou ho sheme cung chang a ahoulimna a ministry in amaho ading a jong bol ding le tohging ahilou le aphatchom an ding ho ahin gon peh ding dan ujong tahlang na an anei in ahi.  Assam sung a mitoh bang lou 1,62,000 lam aum dan le amaho in ministry akon a lha she a dangka 1000 cheh amu jing dan u jong tahlang na an anei in ahi.