128th Manipur Police Raising Day kimang; Sorkar in gamsung kipunkhom ding le...

128th Manipur Police Raising Day kimang; Sorkar in gamsung kipunkhom ding le ake louding hi akhohsah pen ahi, tia CM in sei

243
0
SHARE

128th Manipur Police Raising Day kimang; Sorkar in gamsung kipunkhom ding le ake louding hi akhohsah pen ahi, tia CM in sei

Imphal, October 19(ET): Chief Minister N. Biren Singh in gamsung kisuhkeh louding hi state sorkar in agelkhoh ahi, tin 1st Manipur Rifles Battalion Parade Ground mun a Saturday nikho a 128th Manipur Police Raising Day aman nauva aseiyin ahi.

Chief guest a pang Chief Minister in ahoulimna a State sorkar henga Centre in gamsung kipunkhomna hi Indo-Naga peace talk jeh a keh louding ahi, tia kitepna anei ahi, tin aseiyin chule Centre leh lamkai hon state sorkar lunggel jana apeh diu hi atahsan ahi, ati. Gamsung in Peace Talk chungchang a thil umchan ho avet jing leh akhol jing ahi, tin jong aseiyin ahi. Gamsunga nam kah thu um ho a CM in nam atamjo in agomkhom a dinga sanga amachang ding agel hi vangset umtah ahi, tin aseiyin ahi.

Mijouse phatna ding igel uva eima chang ahilouleh nam khat phatchomna ding lunggel idalhah teng ule chamna umding ahi, ati. Chule mipi a dinga kipan doh welfare scheme chom chom umho CM in aseiyin, achesa kum ni le keh sunga mipi ngailutna leh tosotna umjing ahi’in, boina thu jouse suhlhap nadinga sorkar in kihouna neiding agot jing ahi, ati. Manipur police hon gamsunga ‘law and order’ akitup nadinga pan alah u apachatna thu aseiyin, sorkar in City Police station thah asah ding chule tua aumsa Imphal West Commando Barrack jong asemphat ding ahi, ati.

Women Police ho panlahna apachatna thu jong aseiyin, Special Women Commando Unit kisemdoh ding ahi, ati. Chule hiche thu toh kisaiya numei police 100 vel training achombeh a kipe ding ahi, tin aseiyin ahi. Home Ministry scheme noiya Police Memorial Park leh Police Museum kisa vahding ahi’in, gamsung phattou nadinga amachang kikhohsah louva pan la a police ho jana vetsahna ding ahi, ati.

DGP LM Khaute injong ahoulimna a kum khat sunga Manipur Police tohdoh ho aseiyin ahi. Kum khat sunga thingnoimi 527 kiman a, galmanchah meithal 102 chule meichang 8908 toh kiman ahi, ati. Manipur Police hon case 925 a charge sheet asem a chule khamnathei douna gal police hon abol nauva khamnathei dangka crore 1336 amat ahi’in, case 226 kijihlut a chule mi 413 kiman ahi, ati. Child Friendly police station jong Police station chom chom a hondohna um ahi, ati.

Chief Minister in field chom chom a anatoh phat jeh a police officer phabep Commendation Certificate pehdohna aneiyin ahi. Moreh Police station in Best Police Station 2019 amu in, 5th Bn Manipur Rifles in Best Battalion 2019 amu in chule Best Police Officer 2019 award hi Md Wakibuddin, Sub-Inspector, Lilong Police Station in asang in ahi. HSLC Exam a top a pang Bhumika Shamurailatpam jong Chief Minister in dangka 5000 kipaman ape in ahi.

Chief Minister in march past contingent 15 a konin ‘salute’ asang in, contingent chom chom holah a hi police commando, civil police (numei leh pasal), Manipur Rifles, India Reserve Battalion, Home Guards, VDF personnel leh Manipur Police Dog Squad ho apang uvin ahi. CM in Manipur Police Department tohdoh chom chom kipehna souvenir hondohna aneiyin chule 1st Manipur Rifles Battalion, Banquet Hall mun a Blood Donation Camp jong hondohna aneiyin ahi. Kin gon a Deputy Chief Minister, Cabinet Minister ho leh MLA ho, Chief Secretary, civil chule police officer luboh hojong apang uvin ahi.

Pallel-Moreh lamlen a UTPO in phat teplou bandh akou ATLAM in tosot dinga

Imphal, Oct 19(ET): All Tribal Labour’s Association Moreh in Pallel-Moreh lamkai, Asian highway a phat teplou bandh bol dinga tohgon um chepi dinga phondohna anei uvin ahi.

United Tribal People’s Organisation (UTPO) in thuso anei nauva Pallel-Moreh lamkai a phat teplou general strike bol dinga ana kisei athah a bol dinga thuphon anei ahi’in, October nisim 20 jankim a kon Highway kisahna natoh jong Ban bol dinga thuphon anei ahi, ajeh chu state sorkar in UTPO thumna ho tuchan geiya asan peh loulai ahi.

LS Kuki, General Secretary, ATLAM in soi akaina thuso a chun state sorkar in thumna ho chungchang a thulhuhna tu chan a anei loulai ahi, tin aseiyin ahi. Kiloikhomna in Yangngoupokpi Lokchao Wildlife Sanctuary lahdoh ding, Tengnoupal district noiya um kho phabep reserve forest a akiseina lahdoh ding chule Asian Highway chom chom mun 9 a Police Outpost  sah nadinga kisei lahdoh ding a thumna aneiyu ahi.

 Thamlapokpi OP, Lulun Lamkhai OP, Tarao Lamkhai leh Senam OP kikah, Khongkang OP, Leingangtabi OP, Kwatha Lamkhai OP, T. Zoumunnaum Village OP, ADC Office Moreh OP) a police Outpost sah dinga tohgon um ahi. UTPO in thumna anei hohi he na sa sa a khohsahna kipelou ahi, tin ATLAM in sorkar demna aneiyin chule Bandh sunga Pallel-Moreh kah a gari lhai khoutah a kingahtup ding ahi, tin aseiyin ahi. Transport/Vehicle Association Union chule mipin ATLAM in bandh akou atosot diuvin temna anei uvin, Bandh sunga vangsetna toh aumle ATLAM themmo kichan louding ahi, tin thuso chun aseibe in ahi.

October sunga FOS fund akisodoh louleh ATRPFM in kiphinna bol dinga gihna nei

Imphal, Oct 19(ET): BJP lamkaina sorkar in simlai ho dinga scholarship panna a TA&Hills fund achom a akiheidoh in chule aphatcha akipe poi tin All Tribal Righs Protection Forum Manipur (ATRPFM) in aseiyin chule October lha sunga tribal ho dinga kigong fund ho asodoh lou ule kiphinna bol dinga gihna anei uvin ahi.

ATRPFM in thuso aneina a, Family Oriented scheme (FOS) fund asodoh nading uva avel vel a kiseiya ngehna kinei ahi’in, ahivanga state sorkar in tuni chan a asodoh loulai ahi’in, hiche hi dan dihlou chule kivaipohna lhasam vetsahna ahi, ati. Beneficiary hon Centre sorkar in fund sot a asodoh ahitah vanga anga jing nahlaiyu ahi, ati.

“State sorkar in October lha sunga fund asodoh louva ahileh ATRPFM thipbeh a um talou ding, Manipur High Court a PIL apehlut ding ahi”, tin James Haokip, ATRPFM in soi akaina thuso chun aseiyin ahi. ATRPFM in August nisim 24 nikho a ATPRFM leh ATCFM (All Tribal Chief Forum, Manipur) chule Tribal lamkai chom chom toh Mini-Conference Hall, TRI Chingmeirong, Imphal khopi a Joint Meeting abol nauva kilolna aneiho thu a ‘Charter of Demand’ apehlut ahi, ati.

State sorkar in gamsunga kho thah kisemna ahilouleh khosung gamgi kikhenna thu toh kisai ho dan toh kitoh a apehdoh nading uva hatah a seidinga meeting a kilolna aneiyu ahi. Chairman, Vice-Chairman, Executive member leh ADC member ho honorarium (revised) panna a Direct funding hi grant-in-aid khel a ADC a kehlet ding, Inter-district boundary ho asuhdih uva, tua kila ding Census 2021 a thinglhang leh phaicham a um kho mun ni a amin kikoi ho suhdihna anei diu, 2021 Census leh 7th Socio-Economic & Caste Census 2019 a kho jouse ahoptha diu, Village Chief/Ex-Officio Chairman leh Village Authority member jouse ‘Warrant of Precedence’ a pansah ding, tribal miho achenna kho, inmun a kon nodoh louding, mun jouse a reservation hi mihem jat toh kitoh a peh ding ho thumna dinga meeting a kilolna aneiyu ahi.

Ahivanga state sorkar in tuchan geiya donbutna anei loulai ahi.  ATRPFM thuso chun ama hetna lampi bol a action lah dinga jong gihna anei be uvin ahi.

Shirui Lily golnop khumkha hita; Gamsat le dap in Shirui Lily hintheina asuhset pehding thu a Governor Dr Heptulla lungkham lheh jeng

Imphal, Oct 19(ET): State Tourism department gonna noi a nithum chelha thumvei channa Shirui Lily golnop kingon chu thanopna dimset pum in tunichun khumkha ahitai.

Governor in gamsat le dap kikhel jing a kon May a pat June lhabul gei a pah ji Shirui Lily suhset a umthei dia hetgilna nei hon amudoh hi vangset um thilkhoh khat chu ahi in, hiche pahcha mang lou a apahjing thei nadia bolthei chan bol angai in, hiche nading a ICAR in pan alahgot hi kipa umtah ahi e, ati. Jingun a pang Governor Dr. Najma Heptulla in aseibe na ah Manipur hi jat le nam chule chonchan khanchan kihalpolna gam ahin, hiche hin Shirui Lily hoina abelap ahi ati. Sat kibe jing jeh’in gamsung’ah sa, nga leh ahingthei namkim dang dang jong mangthah ding dinmun a um ahitauve tin jong aseiben ahi.

Kingon kimantoh kilhon chun ‘Child Protection Rights Slogan’ khat thensona aneiyuvin, Governor nu lamkainan milen milal hon Ukhrul District a ding’in 24/7 Child Helpline number 1089 hondohna aneiyuvin ahi.

Phat chomkhat jouchun jat le nam chom chom a kon cultural troupe hon laa le lam vetsana aneiyuve. Government in Ukhrul District, Harva Khangai a War Memorial Spot ahiloule Tourist Spot khat asemding ahi tin Art & Culture Minister L Jayantakumar in aphongdoh in ahi.

Gam le go huhbit lou apoimo dan aseitoh kilhon in Minister L Jayantakumar in gam le go suhset hi chonset khat ahi ati. Shirui Lily hi gamsung’a dia goulu khat ahin, mipiten thakhat a avenbit jing diuvin temna aneikit’e. Hiche festival hi jat le nam chom chom ho kinaibe chehna hiding ahi tin Art & Culture Minister L Jayantakumar chun aseibei.

Kingon a panla het thei ho chu Health Minister L Jayantakumar, YAS Minister Letpao Haokip, Education Minister Th Radheshyam, Tourism Corporation Chairman Dr Sapam Ranjan le MLA Khasim Ruivah ahiuve.

Assam a inmun khat a LPG cylinder pokeh jeh a insung khat akon mi 5 thi

Guwahati, Oct 19: Dibrugarh, Upper Assam a Saturday nikhon LPG gas cylinder khat apokeh jeh in inmun meiyin aka in, thilsoh a insung mi 4 panna a mi 5 athi e, tin police thulhut in aseiyin ahi.

“Friday jan nidan 1 don a LPG cylinder apohkeh in ahi. Thilsoh a inmun thum meiyin aka in, atamjo asuse in ahi. LPG pokeh pet a insung a imu a mi 5 athi uve”, tin Dibrugarh Superintendent of Police Gautam Borah in aseiyin ahi. Thermal Railway Gate kiti venga a Krishna Sunar inmun a gas pohkeh ahi. Thilso pet a Sunar hi inmun a umlou ahi, tin official hon asei uvin ahi. Athi mi 5 holah a kum 50 a upa Maya Sunar, achapa neojo Vishal Sunar, atupa pasal ni- kum 3 bou hinalai upa Sankar Sunar leh kum 5 bou hinalai Sibu Sunar chule kum 50 a upa Nunu ahi. Nunu hi insung natohna a akithopi u ahi.

Thukholna masa dungjuiya go a kisa inmun a meikah hi candle a kipan hiding ahi, tin Bhrubajyoti Borah, Additional Superintendent of Police in aseiyin ahi. “Meikah jeh a LPG cylinder hi pohkeh hiding dinmun a um ahi”, tin Borah in aseiyin ahi. Assam Fire and Emergency Services, Guwahati a senior official khat in meikah phelmit na gari thum in thilso namun athu akihet het gangtah a adel lut ahi, ati.

Assam Chief Minister Sarbananda Sonowal in apohnatna thu aseiyin chule district administration in thukholna anei dinga thuhilna aneiyin ahi. Vangsetna toh ho dangka lakh 4 ex-gratia peh dinga jong asei ahi, tin office thulhut in aseiyin ahi.

KKL Tuibong Block in “The 1st KKL Blood Donors Club Meet 2019” nei; Lha 7 sung’a thisan unit 56 Blood bank a pedoh

B. Lalboi Gangte

CCpur, Oct. 19 (ET) : Kuki Khanglai Lawmpi (KKL) Tuibong Block tohgon nanoi in tunin KKL Complex, mun’a  akhatvei channa ding in KKL Blood Donors Club Meet 2019 ana um in ahi. Kingon achun Jin-gun in Paokholal Haokip, Vice Chairman, ADC CCpur ; Kin-neipa in Dr. Paulunmang Vaiphei, In-charge Blood Bank, District Hospital anapan in chuleh Gracy L. Haokip, Spokesperson KKL Tuibong leh Minlun Vice President Relied and Rehabilitation KKL Tuibong tenin kimanchah na kingon ana lamkai lhon in ahi.

Kingon phatsung’a Mangcha, Secretary, Social and Culture, KKL Tuibong Block & founder KKL Blood donors Club in Donors club chungchang chomcha in ahung kikhom mipi ho het ding in atahlang in chuleh T. Manglal Haokip, Secretary, KKL tuibong block lamkai nan Donors ho heng’a kipapina certificate pehdoh ahi. Paolal Haokip, Vice Chairman ADCC in houlimna aneina’a CCpur District sung’a donors club kiti aum khah lou toh lhon’a panpi ngaichate panpi thei nading’a KKL blood donors club semdoh ahi nachung’a akipanathu aphongdoh in ahi. Pathen nung jui hi athu bouva jui hilouva anatoh ajong toh molso ngai ahi nachung’a hitobang natoh pha tong ding’a kipumpeh KKL blood donor ho chung’a akipana aphongdoh in ahi. Donors club meet tomngai na jeh leh amaho jeh’a CCpur District hospital in thisan lang toh kisai’a kitoudel thei ding’u ahi naban’a member tusang ah tamjo nei ahi nading’a Awareness atam thei lam’a bol ding in jong tilkhou na aneiyin ahi.

Hetthei khat chu KKL Blood Donors Club Meet a tu hin  member 50 val aum in chuleh tukum April 2019 akipat tuni chan hin member hon CCpur district hospital ah damlou thisan ngaicha ho manding in unit 56 atohdoh taovin ahi.  District hospital ah blood bank hin kum khat sung in thisan unit 2,000 val tobang poimo ahi in lha khat’a 250 vel angaichat jing nao lah’a voluntary blood donation chungchon’a unit 100 tobang amu uvin ahi. Akivat unit-150 ho chu replacement ho ahi in voluntary blood donation um lou phat leh CCpur district hospital blood bank hin thisan lam’a lhahsam na lentah atoh ji uvin ahi.