11th Manipur Legislative Assembly kipan ta CM Biren in ‘Deficit Budget’...

11th Manipur Legislative Assembly kipan ta CM Biren in ‘Deficit Budget’ pehna nei; thinglhang leh phaicham miho kiloikhomna dinga pan lentah alah ahi, tia sei Okram Joy in Assembly suhboi dinga gihna bol Sorkar in gamsung miho dinga pan alahjinga, khantou machalna hin mijouse ahop nadinga na atoh ahi tia Governor Dr Najma Heptulla in sei Zo Re-Unification Organization Northern Zone in ZoRO Charter of 1988 avel a tuhdetna nei Exam sunga simlai hon dihlou tah a exam abol lou nadiuva jilkung hon pan nasatah la Ccpur district a Class XII exam bol mi 2280 lhing JAC in Imphal-Moreh lamlen bandh bol dinga aphon vohai ta Manipur High Court in ‘quarrying license’ peh ding phal talou YFPHR in lampi a mejoh ho tosotna nei

340
0
SHARE

M Biren in ‘Deficit Budget’ pehna nei; thinglhang leh phaicham miho kiloikhomna dinga pan lentah alah ahi, tia sei

Imphal, Feb 14(ET): Budget Session kipat ni a Chief Minister Nongthombam Biren Singh in state Assembly a 2020-21 kum a dinga deficit budget 21,224 crore ape in, dangka crore 1,363 lhing kilhasam (deficit) ahi avetsah ahi.

Finance portfolio jong tuh a Chief Minister in House a budget apehna’a, government policy hohi mipi phatchomna ding ahi’in chule mipin ngaidan asei dungjuiya thulhuhna kinei ahi, ati. Sorkar in themjilna, tourism, environment, forest leh wildlife huhdih ding gelkhohna sangpen ahi, tin aseiyin chule don ding twi theng leh thenna ding jong hi sorkar in agelkhoh adang ho ahi, ati.

Sorkar in thinglhang leh phaicham kah a kikhenna um suhnem nadinga pan sangtah alah ahi, tin aseiyin chule tukum a pohdoh dinga tahsan um akingah jing Imphal-Madalay flight service hi ‘medical tourism’ machal nading hiding ahi, tin aseibe in ahi.

Hiche budget hi lou kidan state sung economy le boina ho sulham jouding ahipon hinlah gamsung a avat apai ho asuh bukim na ding ahi tin Chief Minister pan ana sei in ahi. Hiche budget lah a hi charge expenditure dangka  21,224 crore ahin, voted expenditure dangka  19,159 crore ahi. Budget ahin total receipt dangka  20,146 crore ding in ginchat ahin, revenue receipt dangka 18,083 crore ding a ginchat ahin chuleh capital receipt dangka  2,063 crore ding a ginchat ahi. Ahunglhungding 2020-21 sung a state tax le tax hilou ho receipt hi dangaka  1,325 crore  le dangka 257 crore dingin aki gingcha in ahi. Central Taxes & Duties ho  a state share ding hi dangka  5,630 crore hiding in aki gingcha in ahi. Hiche ginchat thu phon kinei hi 2019-20 a sang a 39% a tam ding a kisei ahi.  Hethei khat chu achesa 2019-20 budget achu education a hi budget dangka 1748 ana kikoi ahin hinlah tu chung in dangka 2252 crore akikoi doh in ahi.

Manipur government  in themjil na toh kisai a natoh ana bol ‘School Phagathansi’ ahi lou le ‘Go to school’ ho a budget danka 25 crore ana kikoi chu tu in dangka 45 rore akikoi doh tan ahi. Tahsa damthei nalam a dangka 71 crore chu Chief Ministergi Hakshelgi Tengbang (CMHT) ading in phondoh na ana kinei in ahi. Jawaharlal Nehru Institute of Medical Sciences vetsui na ding in dangka 116.4 crore ana kikoi doh in chuleh nen ho pei na ding in achom in dangka 2 crore akikoidoh in ahi. Medical le Health dang dang le Family Welfare Services ading in dangka 846 crore ana kikoi doh in ahi.Twi theng don ding le sanitation a budget kikoidoh chu achesa kum asang in hatah in akal in ahi.

Achesa kum achu donding twi le sanitation ahi dangka 261 crore ana kikoi doh a velvetna kinei na adangka 426 crore ana kikoidoh ahin hinlah tu chung in dangka 1017 crore phondoh na an akinei in ahi.  ADC  anatog ho pension pehna ding toh kisai in govt in dangka 35.2 crore ana koidoh uvin ahi. Agriculture ading budget kisem vang achesa kum asang in ana kiha kheh pon ahin, achesa kum a agriculture ading a dangka 316 crore ana kikoidoh ahin hinlah tu chung in dangka 388 crore akikoidoh in ahi.

Govt in kani lei bol ho ho ading in anga aum le kithopina le thil dang bolsah na ding tohgon noi in dangka lakh 50 akoidoh uvin ahi. Rural development ading in dangka 2714 crore akikoidoh in ahi. Boipi ding a lhendoh na ana kinei lah a Nabul vadung sem phat na ding le huh na ding in dangka 97.72 crore Ministry of Environment and Forest in ahin pehdan u jjong phondoh na ana kinei in ahi. Thuso miho pension scheme ding in dangka lakh 20 an akikoi doh in ahi.  GST phate a chesah ding le hatah a daan gah tah  a kisem toh lhon a kai don na kinei hop hate cha akidon doh thei dan phondoh na ana kinei toh lhon in kai le don a dangka crore 95 ana kimudoh in ahunglhungding kum sung a dangka 862 crore don doh dingin tup le doi akikoi in ahi.

Okram Joy in Assembly suhboi dinga gihna bol

Imphal, Feb 14(ET): Yelhou Mee Thoupei ho kiphinna tosotna in Politician lui chule MLA masa Okram Joy Singh in tuni a Manipur Press club a thuso miho mai a aseina achun Assembly achelha jinglai ahitoh lhon a ‘Sanamahi’ houthu hi minority ding a phatsahna anei lou ule Assembly suboi a kiphinna a makai ding ahi thu asei in ahi. Governor nu in athuseina a Sanamahi thu aseitha tei ding in jong adeisah thu asei in chule South East Asia gamsung a ding a hou lampang a aluipen Sanamahi chu Manipur Govt. in 2021 census kibolkah a Minority religion ding a aphondoh tei ding in jong asei in ahi.

Sorkar in gamsung miho dinga pan alahjinga, khantou machalna hin mijouse ahop nadinga na atoh ahi tia Governor Dr Najma Heptulla in sei

Imphal, Feb 14(ET): 11th Manipur Legislative Assembly 10th session tunin akipan in, Governor’s Address a kihouna akipat toh kilhon a Governor Dr Najma Heptulla in 2020 kum a department tohdoh ho leh machalna ho aseiyin ahi.

Governor nu in ahoulimna a Law and Order and Justice, Finance and Planning, Tribal affairs, Minorities leh SC & OBC Welfare, Food Security, Education, Power sector, Agriculture leh akisaipi ho leh natural resources, Pisciculture, veterinary and animal husbandary, water resources and management, water supply, health care, connectivity, urban planning and development, rural development, social welfare, labour welfare employment generation leh enterpreneuship, textiles commerce and industry, tourism, information technology, science and technology, sports, art and culture, Revenue chule adang adang thu aseikhoh in ahi.

Sorkar in gamsung miho dinga pan alahjinga, khantou machalna hin mijouse ahop nadinga na atoh ahi, tin Governor nu in aseiyin chule kum thah hi kinepna leh gamsung tupna thah ahi, ati. Gamsung mi dihtah ho huhding sorkar in agelkhoh jeh a mipin phat sottah thumna anei Inner Line Permit System (ILP) tukum January nisim 1 nikho a kon kichepi pan ahitan, hiche hi thusim a seithei thulhuhna ahi, ati. Chule ILP a dinga online portal sorkar in ahondoh ahitai, tin aseiyin ahi.

Security chungchang thu aseiyin, thingnoi kiloikhomna chom chom toh Memorandum of Understanding soi kaina aumtoh kilhon a thingnoimi 644 in thingnoi natoh adalhah ahitai, ati. Khamnathei douna dinga pan sangtah kila a chule sorkar in kani lei kibolna gam leiset acre 3000 lhing asuhset a chule kani kisemna factory phabep jong amat ahi, ati.

Gamsung numei leh chapang ho gelkhohna sorkar in aneiya, district jouse a women police station kihong doh a chule sorkar in POCSO case ho thu seina ding special Fast Track court ni semdoh dinga sorkar in tohgon anei ahi, ati. Chule jail a um numei ho dinga sorkar in Creche and Nursery school sem ding lunggel anei ahi, ati. Finance and Planning thu a Gross Domestic Product (GSDP) hi 2019-20 kum a dangka crore 30,131 ahi’in, hiche hi 2018-19 kum a sanga 11% a kal ahi. State Revenue collection jong 2017-18 kum a 34.8% a kal a chule 2018-19 a 33.7% a kal ahi. National Food Security Act noiya beneficiary 24,31,448 lhing register kibol ahitai, tin aseiyin chule Center sorkar in Sangaiprou a godown ni sah nadinga grant in aid peh dinga nopna anei ahitai. Kakching, Senapati, Noney leh Ukhrul district a jong storage capacity sah be nadinga proposal kipelut ahi, ati.

Sorkar in Pradhan Mantri Ujjwala Yojana lolhing tah a achepi a insung 1,55,246 lhing LPG gas connection apeh’a, atamjo hi Go to Village Program sunga connection kihomdoh ahi. Themjilna lang sorkar in agelkhoh a ‘School Fagathansi  Mission’ apat ahi’in,  mission toh kitoh a school a min kikhum simlai kal ahi. Themjilna dihtah akipeh thei nadinga mission in tupna anei ahi.

Sorkar in ‘No School Bag Day’ jong Saturday nikho seh ‘a chepi dinga apohdoh ahi’in, class 1 a kon 8 kikah simlai hon extra-curricular activity abol diu tosotna ahi. Hiche hi lekhasim thanop aumna ding jong ahi. Chule class simlai simlai exam a pachanna neiya 74.69% ahi’in, gamsung in statehood amu a kon asan napen ahitai.

Sorkar in civil service tup ho 100% free scholarship apehding ahi’in, exam a dinga coaching alah nadiu ahi. Power sector a gamsung in Silchar-Imphal transmission line 400KV apat ahitan, hiche hi mijouse meivah peh nading ahi. State in D/C tower, Kakching a kon Churachandpur chan 132 KC/SC Line asah a chule Imphal (PG)- Imphal (State) 132 KV line re-conductor kibolna jong ajo ahitan, North Eastern Region System Strengthening (NERSS) Scheme noi ahi.

Tu le tua 33/11 KV sub-station athah 31 leh 132/33 KV sub-station athah 2 hi agency chom chom noiya kichepi ahi’in, Thoubal a 400/132 KV sub-station jong kijou ahitai, ati. Governor nu in Manipur in 2017-18 kum a Category III noiya chang atam lah pen jeh a Krishi Karman Award asana hi, tin aseiyin chule hiche chungchang gamsung mi loubol ni injong Krishi Karman Award asan ahi, ati.

Water Resource noiya Major & Medium Irrigation Project 8 lah a 5 kijouva chule 3 kijou tobang ahitai. Loktak Lift Irrigation hi Extension Renovation and Modernisation (ERM) program noiya dangka crore 139 lut a kisempha ding ahi. Dam Rehabilitation and Improvement Project (DRIP-II) noiya Singda Multipurpose Project leh Imphal Barrahe project hi dangka crore 86 leh 119 lut a kisempha ding ahi.

Imphal a twi kipe akitup nadinga ‘Integrated Water Supply for Imphal Planning Area’ hi dangka crore 1256 lut a kipan ahi’in, phase dungjuiya kichepi ding ahi. Phase 1 hi dangka crore 90 lut a Jawaharlal Nehru National Urban Renewal Mission (JNNURM) noi hiding chule March 2020 kah a ‘water treatment plant’ 9 kijou ding ahi. Phase II hi AMRUT noiya dangka crore 176 lut a pipeline network kisem ding ahi. March 2020 kah a prepaid water meter kikoi ding ahitai, tin aseiyin chule Phase II hi dangka crore 990 lut a Externational Aided Project through New Development Bank noiya kichepi ding ahi.

Sorkar in North East leh Hill State holah a Good Governance Index a rank sangpen amu ahi, tin Governor nu in healthcare lampang a akipana thu aseiyin chule Health & Wellness Centre leh 30+ Population Based Screening for Cervical Cancer in Delivering of Home bases Palliative Care a practice phapen bol jeh a award apeh ahi, ati.

CMHT noiya sorkar in kum khat a lakh ni chan insung hahsa ho hospital a akijenna man apohdoh ahi’in, tuchan a CMHT noiya mi 6.8 lakh enroll kibol a chule beneficiary 22,684 in phatchomna amu ahitai. Gamsunga um hospital 24 leh Guwahati a hospital khat hiche scheme noiya ‘empannelled’ kibol ahi. Ayushman Bharat- Pradhan Mantri Jan Arogya Yojana noiya tuchan a beneficiary lakh 2.10 in min akhum a chule 11,360 in hospital a man beiya kijenna anei ahi. Scheme noiya gamsunga empanelled hospital 24 um ahi.

MHA Subsidy Scheme noiya Manipur Heli Service athah a hondohna um’a, Tamenglong, Jiribam, Moreh, Thanlon leh Parbung hi UDAN scheme noiya Heli Service patna dinga kilheng ahitai. Dangka crore 107 budget a lamlen 420 semphatna natoh umding chule 2017 kum a crore 61 lhing a lamlen 7 sem nading sum Central Road Fund (CRF) noiya sanction kibol ahitai.

State Rural Development Department in Northeast a dinga Best Performing State Institute of Rural Development (SIRD) award asan kipa umtah ahi, tin Governor in aseiyin chule Waiton leh Phayeng Gram Panchayat in Deen Dayal Upadhyay Panchayat Sashaktikaran Puraskar, 2019 amu’a, Imphal West Zilla Parishad injong ‘performance’ hoi jeh a kipaman asana hi. Waiton Gram Panchayat in Nanaji Deshmukh Rashtriya Gram Sabha Purashkar, 2019 asan a chule Thongju Part II Gram Panchayat in Gram Panchayat Award, 2019 asan ahi. Gamsung in Deec Dayal Upadhyaya Grameen Kaushalya Yojna noiya ‘Best overall performance amongst small States in India’ a Rank sangpen jong amu ahi.

Mahatma Gandhi National Rural Employment Generation Scheme hi January 2020 chan a insung lakh 5.69 in aphatchompi ahi, ati. MLA P Sarachandra in Governor’s Address ‘motion of thanks’ aseiyin, MLA Awangbow Newmai in seconded abol in ahi. Governor’s Adress hi February 17, 2020 teng Assembly a aseikhom diu ahi.

Zo Re-Unification Organization Northern Zone in ZoRO Charter of 1988 avel a tuhdetna nei

Imphal, Feb 14(ET): Kawnpui, Churachandpur, Manipur a Zo Kutpui 2020 kiman thu a ZoRO-GHQ leh ZoRO-Northern Zone kah a kihetkhelna aumhi kihoutohna alhahsam jeh chule kihetsahna aumlou jeh ahi, tin ZoRO Northern Zone in thuso aneiyin ahi.

Mopohna neiya kehon boina hohi achesa February nisim 12 nikho a Churachandpur a party tenin meeting abol na a asulham tai ti thu hi kipahtah a kaseiyu ahi’in, kihouna a stakeholder hon pan alah a chule member apang jousen ZoRO Charter of 1988 tuhchah a tahsanna nei dinga kitepna anei ahi, ati. ZoRO Charter of 1988 a hi India, Bangladesh leh Myanmar gam a gam lokhum hojeh a kikhen thang a Kuki, Chin leh Mizo hi Zo ahi, tia kilolna um ahi.

ZoRO hi apolitical body/forum hijom ding, Zo mite (Kuki, Chin, Mizo) chule Kachi, Shingpo (Kachin) leh Karbi) kiti nam ho kipunkhomna dinga pan alah jom ding ahi. ZoRO in political party ho a pan ala louding chule political party khatcha in ama phatchomna ding bou gelna a organization apui louding ahi, ati.

ZoRO in be na politics aneilou hi a itih a ventup jing ding ahi, tin thuso chun asei uvin chule langneina nei louva kiloikhomna ahiin, office bearer, ZoRO hon aphat tin a ahuh ding ahi, ati. ZoRO Charter of 1988 tahsanna kaneiyu tihi avel a February nisim 12, 2020 ni a soi kaina kineiya suhdetna kinei kit ahi, tin thuso chun aseibe in ahi.

Exam sunga simlai hon dihlou tah a exam abol lou nadiuva jilkung hon pan nasatah la

Imphal, Feb 14(ET): Tuni Council of Higher Secondary Education Manipur (COHSEM) noiya exam akipat toh lhon in exam centre mun jouse a simlai hon dihlou tah a exam abollou nadiu vin jilkung hon pan nasatah in ala uvin, simlai ho class room alut masang uvin chelcking abol uvin dan kipie ho phatechan ajui uvin ahi.

Janhi chun Education dept. a Chairman leh Director hi Th. Kirankumar Singh in aseina achun board hon jong exam centre hon routine kisiem dungjui a vilna kinei ding ahi ati. Jilkung ho kiphinna neipum a exam chelha ahitoh lhon in janhi chun Tamenglong leh Noney district sung a um Government school teacher hon toumun kiphinna anei uvin jilkung ho kiphinna govt. in akintheipen a asuhbulhit ding in ngehna anei uvin ahi.

Feb 8 ni chun COHSEM in gamsung a government school teacher ho heng ah Class X leh XII hon exam apat ding utoh lhon a kiphinna bollou ding a jong ngehna anei uh ahitai. COHSEM chairman L Mahendra  in thuso miho heng a seina achun akisaipi authority hon jilkung ho kiphinna ahin suhlhap pih ding uha hi thu jong asei in ahi. Tuchung Class XII exam na ahin simlai 29,144 hon exam ape uvin hiche lah ahin simlai 20,369 hon science stream ah exam abol uvin, 8,065 hon Arts stream ah exam abol uvin chule 710 hon commerce stream ah exam abol uvin ahi.

COHSEM in district 14 sung a exam centre 101 a hiche themvetna hi conduct abol ahi in exam sung a suhboina imacha aum louna ding a vengtup ding in Education Minister Th Radheshyam in district jouse a Administrator, Law enforcing agencies ho heng ah thupeh anei in ahi.

Ccpur district a Class XII exam bol mi 2280 lhing

Ccpur, Feb 14(ET): Council Of Higher Secondary Education Manipur COSHEM noi a Class XII themvetna tunin ana kipan tan ahi. Hiche themvetna hi tuni a kipan a ahunglhungding March nisim 23 chan um ding ahi.

Hiche tehmvetna a panlak chu   CCpur district ah tukum in candidate 2280 in Exam Centre 5 pansan in exam  apeuvin, Don Bosco Hr. Sec. School Centre ah Bethany Christian Hr. Sec. School leh Rayburn College apan Arts, Science leh Commerce simlai kigom in 474 thmevetna anei uvin, V.K. Tawna College Centre ah Don Bosco Hr. Sec. School, Ebenezer Academy leh Parbung Hr.Sec. School, Parbung apan candidate 391 in themvetna aanei uvin, Rayburn College Centre ah V.K. Tawna College, Vision Academy (Rengkai), Vungzagen Hr. Sec. School leh Young Pillars College akon candidate 501 in themvetna anei uvin, Rengkai Govt. Hr.Sec. School Centre ah Happy Heart Junior College (Bethel), Legacy Faith Academy (Bethel) leh ST. Mary’s Hr. Sec. School (Tuibong) akon candidate 496 in themvetna ana nei uvin chuleh  Young Pillars College Centre ah Rengkai Govt. Hr. Sec. School leh Sielmat Christian Hr. Sec. School akon candidate 418 in themvetna ana nei uvin ahi.Ol 12 exam kibol na achun Kuki Student Organization KSO CCpur leh Thadou Student Association TSA CCpur teni in  exam centre ho vetlhah na an anei uvin ahi.  Vetlhah na an anei utoh lhon in simlai kiloikhomna teni in themvetna kinei adih tah le thengsel a akibol dan tahlang na an anei uvin ahi. Tuni exam kibol na a Don Booscor center a candidate 3 an aabsent in, Rengkai Govt. Hr.Sec. School ah candidate khat ana absent in, Rayburn College Centre ah candidate 6 ana absent in chuleh Young Pillars College Centre ah candidate khat ana absent in ahi.

JAC in Imphal-Moreh lamlen bandh bol dinga aphon vohai ta

Imphal, Feb 14(ET): Achesa Feb. nisim 12 nikho’a numei chapang khat that’a kingoh Md Sheih Waris Sajiwa Jail sung’a kikhailih’a ana kimudoh nachung’a hiche thilsoh deilou na jeh’a Joint Action Committe (JAC) in Highway 102 bandh anakou tunin Government toh kihouna ananei utoh lhon’a phatchom khat’a ding in analadoh tauvin ahi. Chuleh hiche thilsoh chung’a JAC representative leh Govrnment lam akon Chief Minister, SP Thubal leh SP Imphal West pannan kihoukhom na ananei uvin ahi. Kihoukhom na sung’a chun hiche nikho’a Sajiwal Jail sung Sector 9 a duty po personnel 3 suspend bol ding chuleh hiche thilsoh nachung’a magistrate inquirey bol ding in kinop tona anei uvin ahi. Chuleh hiche inquiry committee hon nikho 30 sung’a report ho apehlut ding uvin jong asei in ahi. Hiche na chun chon’a Govt. in Dk. Lakh 5 ex-gratia leh Government natoh peh insung mite peh ding jong kinoptona ananei uvin ahi.

Hiche chung thu’a Govt. in JAC heng’a kinoptona kinei ho agan nathei pen’a suhlhit ding’a asei toh lhon in JAC in NH-102 (Imphal-Moreh) road a Feb. nisim 14 jan nidan 6:00 akon nidan 24 bandh bol ding’a anaphondoh’u chu anavohai tauvin ahi.

Manipur High Court in ‘quarrying license’ peh ding phal talou

Imphal, Feb 14(ET): Court in abol tahlou dinga thuso anei vanga ‘quarrying lease order’ 5 kisodoh na chunga Manipur High Court in Thursday nikhon alunglhai louna thu aseiyin chule court phalna beiya ‘quarrying licence ahilouleh lease’ kisodoh theilou ding ahi, tin thutanna anei uvin ahi.

Chief Justice leh Justice Kh Nobin panna High Court Division bench in ‘Thoubal River’ huhna dinga Public Interest Litigation (PIL) kipeh thu a thutanna anei ahi. Court order dungjuiya Trade, commerce and industries Director in affidavit apehna a July 2019 ni a court order kipalkehna avetsah ahi. Officer pa hint u masanga jong court thuhilna apalkeh a chule court henga ‘lease’ koima akipe poi, tia jouthu ahil ahi.

July 2019 ni a court in thutanna aneiya hi director, trade in May 25, 2019 ni a case ni a ‘quarrying license’ apeh ahi. Affidavit a hi Act chule dan toh kitoh louva ‘mining plan’ aumpoi, tia kicheh tah a kisei ahi. Court in iti dan a court thupeh nung’a court thupeh palkehna a ‘quarrying lease’ kipe ham ti personal affidavit a ahilchen dinga thuhilna apeh ahi.

August 19, 2019 ni a court thupeh jui louva officer pa in provisional license aphal ahi’in, court thupeh ima akijui lou avetsah ahi. Department in ‘lease’ akipepoi, ati hi ajou asei ahi. Order 5 a beneficiary hiho jousen additiona AG, S Rupachandra a kon address abol diuvin court in aseiyin, hiche hi amaho thusei akingaipeh nading phat kipehna ahi. Trade, commerce and industries director C Arthur Worchuiyo in beneficiary ho addressing a apan diuva hetsahna anei ding ahi, ati.

Trade, commerce and industries department official ho panna a authority koiman order nga kipeh thu a beneficiary ahilouleh amaho agent ho ‘quarrying permit’ apeh lou diuvin thuhilna aneiyun chule kho le veng (environment) atohkhah dan ‘impact assessment status’ jong mopohna nei authority ho apeh diuvin asei uvin ahi.

Mines and Minerals (Development and Regulation) Act 1957 leh Manipur Minor Minerals Concession Rules, 2012 a hi ‘provisional quarrying lease’ thu kisei lou ahi. Arthur in ‘provisional quarrying lease’ hi itobang dan noiya aphatsah peh ham ti asei dinga court in aseiyin, ahivanga Arthur in asei theipon, mining lease a document a angaicha (prerequisite) mining plan ahi’in, hiche hi aumlou jeh a provisional mining lease kipe ahi, ati.

State Environment and Climate Change Department in vadung, twi lam, leh adang dang ho a environmental impact assessment asem’a court heng chule Forest and Environment department henga apehlut ding ahi. “Environment Impact Assessment akisem kahse’a vadung chule kho le veng venna ding lampi umlou ding ahi”, tin court in aseibe in ahi.

 

YFPHR in lampi a mejoh ho tosotna nei

Imphal, Feb 14(ET): Youth’s Forum for Protection of Human Rights (YFPHR) hon kailhang sung chang joulou lampi a mejoh nupi ho tosotna in thuseina anei uvin, asei nauva chun mejoh nupi ho ding in hindah hahsatna kibe ahi in Chief Minister pa heng a jong nupi ho boina ngailhahpeh a alampi ding khat gonsah ding in lekha jong akipelut tai tin asei uvin tukum Jan 15 nikho apat tuni chan in lampam a koima mejoh ding akiphal hih lai in ahi.

YFPHR hon CM pa ana hetsah nauva chun tuleh tu dinmun hin lampi a nupi mejoh mi 2000 tobang aum uvin amauho hin akihinso nading ule a insung uva neh leh chah chohna ding holna in nikhat in aniempen in dk 300 leh 500 kikah bou akimu uvin tua asum holnau akikha peh kit hi amauho ding a lungboina tah khat asohdoh tan hiche hi govt. in ahin ngaikhoh ding in ana hetsah uvin ahi.

Aseibe nauva chun kailhang a nupi phabep in koi agent noiya natong ahi kihe louhon nupi ho me ajoh theina ding uva ID card bolpehna ding in dk 1,300 leh 2000 kikah alakhom uvin koi thupeh noiya abol uham jong kihelou hiche jong hi aki saipi authority hon akholdoh ngai uh ahi ati. Masang achun hiche card semna ding in dk 250 apt 500 kikah jong ana dolkhom uvin hinlah tuni chan in sum alahpeh houvin card jong amudeh pouvin ahi. Right body hon Chief Minister pa heng ah mejoh nupi hon atou lou sung uh compensation abolpeh ding in jong sei uvin chule Police department hon mejoh nupi ho heng a card sempeh nading a sum dong ho jong kholdoh sah ding in ngehna anei uvin ahi.