11th Manipur Legislative Assembly 9th Session kipan ta Opposition MLA hon...

11th Manipur Legislative Assembly 9th Session kipan ta Opposition MLA hon ILP thu’a sorkar thudoh phabep nei; Jan 1 teng ILP chepi nading ‘Gazette notification’ kiso ding ahi, tia Chief Minister N Biren in sei

149
0
SHARE

11th Manipur Legislative Assembly 9th Session kipan ta

Opposition MLA hon ILP thu’a sorkar thudoh phabep nei; Jan 1 teng ILP chepi nading ‘Gazette notification’ kiso ding ahi, tia Chief Minister N Biren in sei

Imphal, Dec 18(ET): Congress MLA Khumukcham Joykishan leh RK Imo in Bengal Eastern Frontier Regulation (BEFR), 1873 noiya Inner Line Permit (ILP) akichepi thu Wednesday nikho a kipan 11th Manipur Legislative Assembly 9th Session a apodoh uvin, hiche akichepi nadinga guideline chungchang a thudohna anei uvin ahi.

House lamkai Chief Minister N Biren Singh in ILP chepi nadinga ‘guidelines’ state sorkar in asem ahi’in, January nisim 1, 2020 masanga official gazette kisodoh ding ahi, tin aseiyin ahi. “BEFR 19873 noiya President Ram Nath Kovind in December nisim 11 nikho a Manipur gam a ILP chepi dinga asei na a hi ‘official gazette notification’ akisodoh na um em? State sorkar sei dungjuiya December nisim 13 nikho a ILP permit a gamsung a hunglut masapen gamdang mi hi Union Minister Ram Madhav hi ahi’in, achutileh December 11 leh December 13 sunga gamsung hunglut ho ‘modus operandi’ ipi ham? December 13 nikho a kon ILP regulation akichepi pan a ahileh hitobang permit a gamdang mi ijat hunglut tam? Gamsunga aumsa gamdang miho hi ILP a kon kingaijang ding ham? tin MLA Khumukcham Joykishan in athu Chief Minister in asuhtheng dinga aseiyin ahi.

Congress MLA RK Imo injong BEFR a ‘base year’ umlou ahi, tin aseiyin chule gamsung huhna dinga ichan a phachom ding ham, tin aseiyin ahi. MLA tenin ‘attention motion’ abol Chief Minister Biren in adonbutna’a gamsunga BEFR chepi nading ‘guidelines’ sorkar in asem lai ahi, tin aseiyin ahi. Ahivanga India President in December 11 nikho a ILP akichepi thu Official Gazette Notification a asodoh ahitan, hiche jouva kon Citizenship Amendment Act in eihop tha louvu ahi, ati.

ILP chepi ding hi gamsung mihon sot a kon anathum jing ahi’in, Parliament a CAB akiphatsah toh kitoh a Union government in eiphatsah peh u ahitai, tin CM in aseiyin chule hiche jeh a kipa ding ahi’in, phat sottah lungtup eibulhit peh uva sorkar pachat ding ahi, ati. Union Minister Ram Madhav ahung thu a Biren in, gamsunga India sorkar in ILPS achepi ahitoh kilhon a Union Minister pa in ‘gazette notification’ jana pehding akhohsah a hiche jeh a state Home Department in gamsung hunglut nading ‘permit’ apeh ahi, ati.

Gamsung hunglut nading form hi Deputy Commissioner ho a kon kihom ding ahi’in chule agom a entry point 7-8 – Mao, Jiribam, Moreh leh adang dang a kihong ding ahi. Online a entry form pehna ding a softwar kisem ding ahi’in, akitoh jouteng gamdang mi ahung hon ILP bailam tah a apply abol theidiu ahi. ILP kichepina gam kinaipi ho ‘penal provision’ phatah a kikhol a gamsunga Rules and Regulation a pha kisa ho kipansah ding ahi, tin aseibe in ahi.

Gamsunga ILP akichepi alunglhaina thu aseiyin, gamsung miho, MLA ho, CSO ho, Meira paibi holeh political party ho panlah jal ahi, tin aseiyin ahi. Centre sorkar in gamsung mi dihtah ho huhna dinga hitobang dan eiphal peh jeh uva kipana vetsah ding ahi’in, gamsung mi dihtah ho huhna a pang tei teiding ahi, ati. ‘Base year’ chungchang a Biren in NRC jong kipan vahding ahi’in, NRC hi Centre sorkar in India pumpi a chepi dinga adei ahijeh a dan dihlouva gamsung hunglut ho kholdoh nadinga gamsung in boina anei louding ahi, tin aseiyin ahi.

Ruling party a um MLA 16 kihouna a pang lou; Ministry kikhel ding thumna jeh’a panglou ahiuve tia kisei

Imphal, Dec 18(ET): 11th Manipur Legislative Assembly 9th Session Wednesday nikhon akipan in, Chief Whip MLA P Sharat panna a BJP lamkaina sorkar a MLA 16 kikhopna a Speaker pa hetsahna mas ape louva kihouna a apang pouvin ahi.

Session hi ‘emergency’ ahilouleh ‘special’ ahilou vanga Citizenship (Amendment) Act, 2019 kiphatsah jouleh gamsunga BEFR 1873 noiya ILP akichepi jouva kon gamsung mihon thumna anei khat ahi. Ruling party a kon member 2 panna a member adang 3 jong kikhopna a apng poyvin, ahin, House Speaker MLA Ginsuan leh MLA Korungthang in ‘leave application’ apeh ahi, tin phondohna aneiyin ahi.

House Leader leh Chief Minister N Biren Singh in Agriculture Minister V Hangkhanlian hi Delhi khopi a sorkar toh kisai thukhoh tah a che ahi, tin aseiyin ahi. Ahin, member 40 val apan jeh a house boina umlouva achelha in ahi. Deputy Speaker panna a member 16 apanlou na ajeh kihe loulai ahi. Member hohin Assembly session a apan theilou nadiu ajeh jong official tah a asei louvu ahi.

Ahin, thulhut dungjuiya member 16 hohin Ministry kikhelna aumding thumna aneijeh uva kikhopna a pang louvu ahi, atin chule BJP MLA 17 in jong cabinet reshuffle dia CM lekhathot anapeh u ahin, January 15, 2020 masang’a minister kikhelna um ding’a jong aseiyu ahi. MLA hohin Hotel Classic a camp abol u ahi, tin thulhut chun aseibe in ahi. MLA anahi Okram Joy in thuso miho akimupi na’a, session thupitah a member tamtah ache lou hi mipin thudohna aneitei ding ahi, ati.

Hetthei khat chu COCOMI leh opposition ho jaona a political party dang dang in gamsung gamgu, identity leh kivaipohna thu a kilolna sem nadinga ‘special’ ahilouleh ‘emergency assembly session’ kou dinga thumna anei jing u ahi’in, Indo-Naga thu in gamsung asuhkhah louna dinga pan alah diuva aseiyu ahi.

Manipur Legislative Assembly in tunin 28 Thanga assembly constituency a kon MLA anahi Salam Ibohal Singh thi lunghempina anei uvin, jana vetsahna a ‘minute 2’ thipchet a aum uvin ahi. CM Biren in Salam Ibohal Singh hi gamsung leh gamsung miho khantouna dinga pan la chule khonung ding mu a lamkai ahi, tin aseiyin ahi. 90 khanga political career apat a chule 1990 leh 2002 kum a MLA nivei kilhengdoh ahi’in, amahin RD & PR, YAS, Power leh portfolio dang dang anatuh ahi, ati.

Loktak Lake leh Keibul Lamjao huhna dinga pan anala a social activist jong ahi’in, ama athi hi gamsung manna ahi, tin insung mite alunghempi na thu aseiyin ahi. Opposition Leader Okram Ibobi Singh injong MLA anahi Salam Ibohal Singh thi alunghempina thu aseiyin, lamkai dihtah chule imalam jouse khantou nadinga pan la mi ahi, tin a it na thu aseiyin ahi.

Govindas Konthoujam leh TN Haokip injong houlimna anei lhonin, Salam Ibohal Singh hi lamkai dihtah chule Youth Policy semna dinga pan alah ahi, ati. TN Haokip injong Salam Ibohal apachatna thu aseiyin, ahinkho lhung a gamsung dinga na atoh ahi, tin aseibe in ahi.

Angaina bang a thao kihomdoh kit ding ahitai, tia Minister Karam Shyam in phongdoh

Imphal, Dec 18(ET): Citizenship Amendment Act (CAA) thu a Assam gamsung boina paolap a thaokhuh nei ho le kivei mi phatchomna hol ho le kinopchepna tuhtang a suhdih nading a petrol le diesel hi jing a pat ni 3 sung angai a mipi kom a homdoh ding in tuni CAF & PD Minister  Karam Shyam in aphongdoh in ahi.

Ama office conference hall a thuso miho kom a tunia hung kipolhung petrol truck 25, diesel truck 42,  SK oil truck 3, LPG truck 53 le petrol-diesel truck 5 ho chu jing a pat homdoh hiding a Karam Shyam chun thuso miho kom a aphondoh ahi.

Karam Shyam in thao umsa le tunia hung kipolhung hohi mipi hop pih dia lhingsel ahi in chule nohphahna hethem mipi jong pachatna apen ahi.

Karam Shyam in Malom Oil Depot hi petrol kilolitre 5592 le HS diesel kilolitre 10,980 ket ahi in, petrol hi ni 15 sung le diesel hi ni 20 sung bou kikoi thei ahi in, apohlut na jong Dimapur lampi sang a Jiri lampi hi nomjo ahi in, ni 3-4 thao hahsat phatsung mipi nohphahna hojal in jong thupha choina aneiyin ahi.

KCA le KSO Khengjoi Block in phattep lou bandh akou HTC Moreh in tosot ding

Moreh, Dec 18(ET): Khengjoy agamlat le khantoulou paome a Model Residential School Khengjoy kho a sah dia umsa Chandel District Head Quarter hopsung Chingkhir kho a chondoh dia thu aum hi HTC le anoidou kiloikhom na hon hatah a doudal ding in kigotna anei tauve.

HTC in madel ding le lung doi nei a government in tohgon asem ji hi nuijat jong aum in, akigongsa bang a Khengjoy a Model Residential School sahding tohgon kichon thei lou ding, chonding lunggel nei hon gelda jeng hen, phachom lou ding ahi, ati.

Khengjoy Block dia kigong tohgon chu Khengjoy a umding ahi tia aphondoh tolhon a hiche thu toh kimat a KCA le KSO Khengjoy Block in phat tep bei bandh akou hi tosot a nitcheh ding in HTC in mipi temna aneiyin ahi.

ZUF in Soubunglong kho sung’a kon NSCN (U) ho nodoh ta

Imphal, Dec 18 (ET): Noney District hopsung Soubunglong (Laishok) kho sung’a khosa NSCN (U) camp chu tunin Zeliangrong United Front (ZUF) hon anadoh tauvin ahi. Hiche camp sung’a chun AK Rilfe -1, 9mm pistol – 1 chuleh Lenevo laptop khat jong anamudoh uvin ahi tin thulhut kimu chun aseiyin ahi.

Hetthei khat chu Soubunglong (Laishok) kho hi Zeliangrong te chenna gamkai ahitoh lhon’a phat masa lam’a kon avel vel’a NSCN (U) hon adalhah ding uvin gihna ana kinei jing in chuleh gamkai sung’a kai leh doh, contractor kipuimang chuleh khosung mipi te lungmong leh lhamong injong ana chensah thei pouvin ahi tin ZUF akon thuso kimu chun aseiyin ahi. Chuleh ZUF active na mun hi Noney leh Tamenglong District ahi tinjong aseibei.

Kamminthang that a pang mi 3 matdoh hita

Ccpur, Dec 18(ET): Churachandpur police in Henglep kho mi tu a Lajangphai a cheng Paokam Haokip chapa Kamminthang Haokip tahsa kum 23 that a pang mi 3 amandoh tan ahi.

Bishnupur police kithopina jal a district police hon December 16 nia chu Bishnupur district  hopsung Tronglaobi Makha Leikai a cheng (L) Keisham Lukhoi chapa Keisham Boicha kum 24 amatdoh uva ama thudoh a kon mithat a akithopi teni Churachandpur Tollen a Lamkhokam chapa Ginneithang Thangboi kum 34 le Kwakta Ward No 7 a cheng Md Majibur Rahman chapa Md Mahidur Rahaman kum 31 chu matdoh hipai ahi.

Hitolhon a kholchilna aban chelhah laitah ahi e tin thulhut kimu chun aseiye.

16th State level Orange Festival khumkha hita

Tamenglong, Dec 18(ET): ‘Tamenglong Oranges the Centennial’s Pride’ ti thupi a achesa December nisim 16 nikho a State Level Orange Festival 16th edition kipan tunin Tamenglong district headquarter Lower Ground a khumkhana anei tauvin ahi.

Dr.Lorho Pfoze, MP, Outer Lok Sabha Manipur, Namsinrei Panmei, Chairman, ADC, Tamenglong khumkhana kin gon a Chief guest leh Guest of honour a apang lhonin ahi. Tamenglong district a Orange Festival 16 channa akiman vanga Tamenglong district a komla ho choisang nading leh kholtup thei nadinga ‘cold storage’ ingaichat u ahi, tin aseiyin ahi.

Gamsung mihon mipi thakhel dinga eilhen jeh uvin kakipah’e, tin aseiyin chule Parliament member kahi kum 5 sunga hi Tamenglong district a ‘model village’ alhompen a 5 semdoh ding kagot ding ahi, ati. Tamenglong MLA, ADC member leh District administration in hiche thu a project asem dinga temna kaneinom ahi, ati.

‘Beti Bachao Beti Padhao’ thupi noiya numei Volleyball tournament final abol uvin ahi. Orange Festival cum Centenary kingon kimanna a Choir competition a United Baptist Church (UBC) in first prize akisan uvin ahi. Kin gon a Tamenglong district a um MDC jouse jong ‘special guest’ a apang uvin ahi.

LPG, thao leh adang dang kipohna truck 250 vel Imphal ahung lhungtai, tia CM in sei

Imphal, Dec 16(ET): Thao chule LPG kiti angaicha khoh ho alhahsam jeh a boina olding ahi, ajeh chu Jiribam langa kon tuni jingkah a petrol tanker 25, diesel tanker 42, LPG kipohna truck 53 chule ngaichat khoh thil dang dang kipohna truck 128 gamsung hunglut ahitai, tin Chief Minister N Biren Singh in Congress MLA Govindas leh MLA Surjakumar Okram thudoh donbutna aneiyin ahi.

Thil man akal jing vetup dinga Price Fixation Committee tobang committee semdoh angaidan thu MLA tenin ngaidan asei CM in agelkhohna thu aseiyin, sumkol vei phabep in bandh, blockade ahilouleh tu tobang dinmun a thil man adei banga agon sorkar in agelkhoh ding ahi, ati. Dukan bol hon thil man akalsah vettup ding thu aseibe in ahi.

PDS anchang (superfine) hi kailhanga joh louding ahi, tin MLA Govindas thudoh donbutna aneiyin ahi. Govindas in superfine anchang hi kailhang a kg a dangka 27 a kijoh ahitai, tia asei ahi. Thulhut dungjuiya NFSA card a akilah thei ding hop 82 in anchang amanlhom a akilah ahi’in, ahivanga NFSA beneficiary kilomtah phabep amuding amu louva um ahi. Sekmai a meithal cha thum nei numei khat genthei val jeh a ama leh ama kitha ding agot thu MLA Okram Surjakanta in asei ahi.

Tukum go juh loujeh a gamsunga lousoh ga khesuh ahi’in, hiche jeh a Targeted Public Distribution System (TPDS) noiya anchang quota kithum be ahi, ati. State sorkar in gamsung a twi hah ahi tia phondohna anei ahitan, Central  Government official ho vil uva dinmun vetlhahna aneiyu ahi. Dangka crore 151 thumna kinei ahi’in, hiche lah acrore 9.9 sanction abol u ahitai. Go juh loujeh a hahsatna toh a loubol miho compensation dihtah a kihom ding ahi, ati.

Agriculture Department in dangka crore 12 athum lah a Planning Department in dangka crore 6 sanction abol ahitan, chule muchi jong kihom pan ahitai. Opposition member Govindas Konthoujam leh Surjakumar Okram in thil man akal thu apohdoh a ngaichat khoh ho chule thao thil ho man akal cheh cheh vettup nadinga sorkar in pan alah dinga temna anei ahi. Ngaichat khoh thil ho amantam (black) ajoh ho chunga action lah dinga Surjakumar Okram in aseiya chule itidan a sorkar in petrol ni 18 a ding leh diesel ni 23 nikho a dinga koi khol tei ngai avettup joulou ham, tin aseibe in ahi.

Myanmar University delegate hon CM Biren kimupi

Imphal, Dec 18(ET): International seminar a pang dinga Imphal khopi a tua um Myanmar delegate hon Chief Minister N Biren Singh tunin a inmun a akimupi uvin ahi.

Delegate hohi Manipur University faculty member hon ahin kilhonpi uva kihouna a pang u ahi. Manipur University leh Monywa University of Economics, Monywa, Myanmar in ‘Building Economic Corridors on the Trilateral Highway’ ti thupi a agon ‘International Seminar cum Workshop program’ a pang dinga Myanmar delegate ho hung kholjin u ahi.

‘Academia Exchange and Joint Research’ thu a University tenin Thursday nikho teng MoU soi akai diu ahi. CM Biren toh akimuto nauva CM pa in Myanmar leh Manipur academy hon pan alahkhom a ‘education, human resource development leh border trade’ kiti sector chom chom a Act East Policy noiya gamsung teni kiloikhomna akhantou amachalna ding tohgon asem ding akinepna thu aseiyin ahi.

Tukhang a hi sorkar hon tohgon anei jouse alolhinna dinga academician ho ngaidan adoh a kingapna a anei ahi, tin aseiyin chule University tenin research program abol khom na a recommendation abol ho jui dinga jong aseibe in ahi.

 Saikawt kho in kum 100 lhinna Centenary loupi tah’a kimang

B.Lalboi Gangte

CCpur. Dec 19 (ET): Saikawt Centenary Celebration Committee (SCCC) ho lamkai nan tunin Saikawt Youth Club Hall mun’a Saikawt kho kum 100 lhin Centenary lopna ananei uvin kingon achun Jin-gun in Thangminlen Kipgen, State President, NPP Manipur in Centenary song kitung hondoh na ananei in chuleh Centenary Lumsong chu Rev. Dr. V. Lalnghakthang Khawbung in Pathen heng’a lhandohna ananei in ahi. Saikawt khosung’a deilhen chom’a kilheng doh mi 100 in centenary dahpi chupna jong ananei uvin ahi.

Hiche toh lhon’a kingon phatsung in Centenary Choir hon Halleluiah Chorus asa vin, James Cole, Chief of Saikawt in Centenary kiman lona ajeh tahlang na aneiyin ahi. Chuleh Rev. Joseph Lalneilien in Centenary mel muthei ahina chung’a Pathen heng’a kipathu seina phat ala in chuleh Award chom chom pehdoh na jong ananeiyin ahi.