11th Manipur Legislative Assembly 9th session khumkha hita House in Naga...

11th Manipur Legislative Assembly 9th session khumkha hita House in Naga Peace Talk thu’a Resolution 121 tuhchah na nei, Manipur-Nagaland gamgi thu’a Nagaland team hotoh Saturday teng kihouna neidiu

133
0
SHARE

11th Manipur Legislative Assembly 9th session khumkha hita

House in Naga Peace Talk thu’a Resolution 121 tuhchah na nei, Manipur-Nagaland gamgi thu’a Nagaland team hotoh Saturday teng kihouna neidiu

Imphal, Dec 20(ET): 11th Manipur Legislative Assembly 9th session Friday nikhon khumkhana anei tauvin ahi.

Session kichai nikho a House in Manipur Goods and Service Tax (Second Amendment) Bill, 2019 phatsahna anei uvin ahi. Session a thumvei toukhomna aneiyu ahi’in, hiche a hi ‘obituary reference’ khat, Starred Question 18, Unstarred Question 9, Committee Report khat, Short Notice Quenstion khat, Paper kipe 2, Discussion on Matter of Public Interest khat, Calling Attention Motion 4, Government Bill khat chule Resolution suhdetna khat anei uvin ahi.

9th Session toukhomna achaina a House in July 23, 2018 ni a kilolna aneiyu avel a suhdetna aneikit uvin ahi. MLA Km Mirabai in Zero Hour a ‘Naga Peace Talk’ thu apohdoh in, House lamkai N Biren Singh in hiche thu hi gamsunga dinga thukhoh tah ahi, tin aseiyin ahi. House in tuchan a kilolna (Resolution) 12 aneiya chule sorkar in hiche thu a kipodoh resolution ni athupi dan hetpehna anei ahi, tin CM in aseiyin ahi.

Indian Constitution Article 3 ‘amendment’ bol ding ngehna neidinga kilolna anei uvin, state thah kisemna ahilouleh aumsa state min kikhel na a atohkhah state ho phatsahna lah masat dinga asei uvin chule India sorkar in Framework Agreement thu hohi state sorkar hetsahna aneiya chule gamsung kivaipohna khel louding, gamsung hoilai mun hijong leh Naga thu a autonomy kikhel nading phatsahna apeh lou nading ngehna nei dinga jong kilolna anei uvin ahi.

House lamkai in Manipur leh Nagaland gamgi thu a Committee sem dinga aseiyin chule December 21 kah a Naga Minister hotoh meeting bol dinga jong aseiyin ahi. Committee in Tungjoy kho, Senapati district, Manipur leh Khezhakeno kho, Phek district, Nagaland gam teni kikah a gamgi chungchanga kinel baotamna thu asuhlhap dinga aseiyin ahi.

PHE Minister L Dikho Chairman hina a Committee kisemdoh a hi Tribal Affairs and Hills Minister N Kayisii member hina chule mopohna district DC leh SP ho panna a committee hi December nisim 7, 2018 ni a kisemdoh ahi. Committee a hi Senapati leh Ukhrul district a kon civil organization member hojong pang ahi’in, Tungjoy kho leh Dzuko Valley gam kichuna thu seilhah nadinga pan alah diu ahi.

MLA Ranjit Singh leh MLA DD Thaisii in ‘Attention Motion’ akou House lamkai in adonbutna a meeting alolhin ding atahsanna thu aseiyin ahi. Achesa 1982 kum a kon Manipur leh Nagaland gam teni hi gamgi thu a kiboi pan ahitai, ati. January 8, 1992 kum a State level meeting  a state sorkar in gamgi survey bol dinga chule gamgi kichuna suhlhap dinga India Surveyor General henga ngehna anei ahi’in, ahivanga hiche survey record umlou ahi.

Centre in pan alah a gamsung teni toh kihouna aneiya athu asuhlhap nadinga ngehna neidinga jong aseiyin ahi. Kh Joykisan Singh in MOBC noiya fund adih louva akimang’e, tia kisei thu apohdoh a chun MOBC in charge jong hi a CM BIren in MLA pa in asei ho kholtoh a chule department a adih louva na kitong um em, ti kholdinga aseiyin ahi.

Simlai hilou phabep in simlai ho dinga kisem scholarship akilah uve, ti thulhut aum ahetpehna thu aseiyin, department suhthengna dinga officer phabep chunga action jong kila ahi, ati. Contractor hon anatoh chai louva fund advance a akilah doh auma ahileh amin u blacklist bol a chule dan dungjuiya akilahdoh u sum nunglah dinga jong aseibe in ahi.

India gam mi inn bahara a cheng ho a inneite in ‘certify’ abol leh voter list a amin khumthei dinga CM in sei

Imphal, Dec, 20(ET): 11th Manipur Legislative Assembly 9th session achai nikho a Chief Minister N Biren Singh in hoilai constituency hijongleh India gammi in bahara a cheng innei hon certify abol a ahileh aumna constituency voter list a amin kikhum theiding ahi, tin aseiyin ahi.

Congress MLA Khumukcham Joykishan in ‘Question Hour’ sunga thudoh anei adonbutna a asei ahi. “India gam mi hi a Adhar card dihtah nei in bahara a cheng ho a innei ten ‘certified’ abol a ahileh voter list a amin kikhum theiding ahi’in, ahivanga constituency chom a hon constituency adang a voter list a amin akhum theilou ding ahi”, ati.

Chief Minister in thudoh adonbutna a, jail chule legal custody dang dang a um, hospital, khutdo ho umna, asylum leh adang dang a umho hi institution aumna constituency a electoral roll a amin kikhum louding ahi, ati. Electoral roll a voter list adih leh alhem ho district authority hon phatah a akhol diuvin CM in thuhilna aneiyin ahi.

Adih louva min kikhum aumlou nadinga MLA hotoh akithuto diuvin aseibe in ahi. MLA Surjakumar Okram in GST (Goods and Service Tax) noiya gamsung in revenue amu jat adoh Chief Minister in adonbutna’a, 2017 kum (July a kon December, 2017) sunga GST kimu hi dangka crore 310 ahi’in, 2018-19 kum a dangka crore 695 ahi’in chule April a kon October lha, 2019 kum a crore 468 ahi. MGST Act 2017 hi semphatna kinei ahi’in chule GST Council in recommend abol dungjuiya GST Council Secretariat a Committee of Officer kisemdoh ahi.

MLA Surjakumar in thudoh anei Information and Public Relations Minister Th Bishwajit in adonbut na a, retired journalist leh family pension hon lha a amu diu kalsah nadinga natoh achelhah laitah ahi’in, administration procedure dungjuiya Law Department henga kithot ahi, ati. Chule pension hi akit Assembly Session kah a kalsah dinga aseibe in ahi.

2018-19 kum sunga sorkar in media mangcha a advertisement (display) 13 asodoh ahi’in, dangka 93,42,755 lut ahi chule 2019-20 kum a dangka 23,51,784 lut a advertisement 6 kiso ahi, tin Th Biswajit in House a aseiyin ahi. Chule akisei sum jat lah a dangka 21,77,475 bou kipe ahi’in, adang 93,17,064 hi pending a um a chule sorkar in pehdoh soh ding agot ahi, tin aseibe in ahi.

Gamsung mihon CAA douna a boina sem louva kiphinna neiyu

Imphal, Dec 20(ET): Iroishemba mun a gamsung mi phabep in Citizenship Act (CAA) douna a boina sem louva kiphinna abol uvin, Assam, Tripura chule northeast state dang dang a kiphinna bol ho tosotna anei uvin ahi.

Kiphinna abol nauva artist, filmmaker leh lamchom chom a kon mi tamtah in pan ala uvin, CAA douna lekha kisun chule la a Act demna anei uvin ahi. Lasa Akhu Chingabam la ‘Lainingthou lairenbi gi manairensa, kumsi di army yam lakkani hairiye’ kiti la hi Iroishemba a kiphinna bol ho dinga kitilkhouna tah ahi.

Chomkhat jouva kiphinna bol ho Khwairamband Ema Keithel lang a ache uvin, police hon lamkai a alamtin uvin, lampam a aumsah uvin, kiphinna bol honjong kiphinna vetsahna la asajom uvin ahi. Mi phabep in kiphinna abol nau ajeh asei uvin, “CAA douna a kiphinna kabol u ahi’in, organization ima toh kisaina kanei pouve. Kacham uva keima hina a pan kalah u ahi”, tin kiphinna bol mikhat in aseiyin ahi.

“Manipuri hina a north east state ho kadinpi uve. CAA hin ibon uva eitohkhah diu ahi’in, hiche hi het ngai ahi”, ati. “Sorkar thipbeh a aum’a chule centre sorkar in asei jouse anoppeh jeh a hitobang kiphinna hi aum ngai ahi. Sorkar in ILP kichepi kipapina a ‘thabal chongba’ abol uvin chule kiphinna bol aumleh mat dinga gihna thu aseiya, mipi suhthip ding ati ahi, tin aseibe in ahi.

Mipin kiphinna abol louding chule social media a ima asei louding a  gamsung kigih ahi’in, RK Echanthoibi jeng jong amat u ahi. Kagol khat BJP worker (local) khat in agih e”, tin jong aseiyin ahi. Kiphinna bol mikhat in, “Gam kinaipi ho tosotna chule hinkho amang ho jana kipe ahi. Manipur in CAA adoudal e, ti thuthot nading ahi. Kichatna hui anung in, ipi kichat ngaiyem, tihi kadoh nom ahi. Hitobang kiphinna a pan jeh a koiman jail a nakoi louding ahi”, ati.

Kiphinna bol a pang ho mat dinga state in thuhilna aneijeh a mipi kicha ahi’in, hiche hi kichat ding ahipoi, tin aseiyin chule ILP in eihuh loudiu ahi, ahi. CAB umna gam dang a aching hon citizenship akilah theiyu ahi’in chule northeast a ILP a hung diu ahi. Economy tongkha thei hohi muphah ngai ahi. Tu dinmun a thipbeh a ium uleh jachat umtah hiding ahi”, ati.

Kiphinna a pang Rongmei numei khat in, “Gamsung a thilsoh ho kakhohsah jeh a CAA douna a kiphinna bol a kapan ahi’in, igam uva kiloikhomna khatcha in ima abol louhi kalunghang ahi”, ati. CSO chule simlai kiloikhomna hohin kiphinna phabep a langneina aneiyu ahijeh a eima tah icham a kipat dinga kagel ahi, tin jong aseiyin ahi.

“Mi tamtah in tua sorkar vote apeh u ahijeh a sorkar chunga tahsanna anei uva thil umdan abon a ahet louvu ahi. Natohna, insung ho ikhohsah jeh uva jong kiphinna sang lou ahi’in, hiche jeh a mipi jong ngohthei ahipoi”, tin aseibe in ahi. Khwairamband Keithel a kiphinna bol ho chungchang thu journalist khat in alah a chun police hon film alah ding ajahda uvin ahi.

Khwairamband Keithel, Imphal a kiphinna bol holah a pang simlai kiloikhomna lamkai anahi Sarangthem Manjit police hon aman kigo uvin ahi. Police ni in kaidoh ding agot phat a social activist KH Monika in police ho akimaitopi jenga sepai ho khut a kon achudoh ahi.

Uttar Pradesh a CAA douna a nidan 24 sunga  kiphinna bol mi 7 thi ta; boina athah thah soh

Imphal, Dec 20: Uttar Pradesh gam a Citizenship Act douna a kiphinna bol holeh police ho khopi chom chom a akinoto nauva mi 6 athi in, hitobang thilsoh a thi achesa nidan 24 sunga mi 7 alhingtan ahi.

Meerut, Sambhal, Kanpur leh Firozabad a mikhat cheh chule Bijnor a mi 2 athi in, chule kiphinna abol nauva mi 20 val jong akisukha in ahi. Uttar Pradesh gamsung district phabep a boina asang in, Bulandshahr a song a kise to naleh meithal kikap thu akiseiyin ahi. Gorakhpur, Firozabad, Kanpur chule Hapur a jong kinotona sangtah aumin ahi.

BJP toh kiloikhom leh Bihar CM hi a Nitish Kumar injong gamsung pumpi a NRC leh Citizenship Law thah douna a kiphinna aum laiya Bihar gam a National Register of Citizens chepi lou dinga aseiyin ahi.  Karnataka chule Uttar Pradesh gam phabep a mobile internet leh SMS service kikhah ahita, police holeh kiphinna bol ho Gorakhopur a athah a akinoto kit uvin ahi.

Mangaluru a police ho mithal kap jeh a mi ni athi in chule Lucknow a mikhat athi in, Thursday nikhon khopi chom chom a jong aban ban a kiphinna abol uvin ahi. New Delhi khopi a Friday taona ahitoh kilhon a security akhousah uvin, chule mun khoh lai laiya curfew akoi uvin ahi.

Ahin, taona anei jou uvin Jama Masjid a mipi kiphinna sangtah aum paiyin, Bhim Army chief Chandrashekhar Azad jong ama umna kiloikhomna hon police a kon phalna la louva kiphinna abol jeh uva aman uvin ahi. Uttar Pradesh gam a mobile internet leh SMS service ho akhah uvin, Lucknow leh mun danga jong telecom operation ho sorkar in service kha dinga thupeh anei uvin ahi.

Mangaluru a mi 2 athi toh kilhon a Kerala gam a jong police hon northern district a kiginna sangtah anei uvin ahi. Kiloikhomna chom chom akijot uvin, train leh bus alamtin uvin ahi. CAA douna a kiphinna bol hon Karnataka RTC bus Kozhikode mun phabep a akhah uvin, Mangaluru police ho chonchan demna thu asam uvin ahi. Kerala Road Transport Corporation (KSRTC) in Mangaluru a bus service avohai tauvin ahi.

Congress worker tamtah in Kozhikode lamlen akhah uvin, tyre ahal uvin chule activist phabep in Home Minister Amit Shah lim kisemthu meiya ahal uvin ahi. Karnataka police hon Kerala a kon Mangaluru a mi alut ding akhah uvin, Kerala gam a kon train a hung numei leh pasal 50 nailam khopi sunga identity card beiya alut kigot jeh uva aman uvin ahi.

Thursday ni a meithal kikapna a thi ho post mortem kibolna Government Wenlock hospital a lut jeh a media mi phabep jong aman uvin ahi. Police thulhut dungjuiya kiphinna bol hon curfew kikoi apalkeh uva Mangaluru a police station lokhum a police ho bulu ding agot jeh uva hunam kimang ahi, tia aseiyu ahi.

Chief Minister BS Yediyurappa in gamsung miho hitobang tohgon nei chule thulamleng sei ho a kon akikangse diuva temna aneiyin chule sorkar in gamsung mi jouse ‘rights’ aventup ding ahi, ati. Karnataka sorkar in Thursday jan a Mangaluru khopi leh Dakshina Kannada district a nidan 48 sung mobile internet data kha dinga thupeh anei ahi.

Ahin, Assam gam a ni 10 internet service akikha jouva akihong pan tan ahi. UP gamsung Aligarh a jong ‘red alert’ asdoh uvin, khopi sunga sepai tamtah akoi uvin ahi. Aligarh Muslim University simlai ho kinokhum jou ahi. Boina asona khopi a bank service leh sumkol veina ho ni nga kijom a kikhah ahitai.

West Bengal gam a boina thilsoh thah akisei tapon,ahin, police hon gamsung mun chom chom a thilse aso louna dinga kiginna sangtah anei uvin ahi.

High Court winter vacation kilha

Imphal, Dec 20(ET): Ahunglhungding December nisim 23 akon January nisim 10 chan a High Court Winter Vacation toh kisai a suty kilha na um ding ahi.

Hiche phat sung ahi Single Bench Vacation Court 2 ahunglhungding December nisim 27 ni nidan 10:30 Justice LS Jamir touding chuleh ahunglhungding January nisim 6 nikho nidan 10:30 le Justice Kh Nobin Singh tou ding ahi akiti.

Kino tah a cicil le criminal file bol ho ding a ahunglhungding nisim 26 nikho le January nisim 4 nikho kihong ding ahi. High Court a natong ho in ahunglhungding December nisim 26 le 27 chuleh January nisim 4 le 6 tilou a ana toh na u angai bang a atoh ding u ahi akiti.

N. Zilphai khosung miten Kum 25 lhinna mang

Saikul, Dec 20(ET): Kangpokpi district, Saikul Sub-Division sung’a um N. Zilphai houbung le khosung miten tuni chun kho chenkal Kum 25 lhinna loupitah in amang tauvin ahi. Hiche kingon a chun Dr. T Lunkim chu Kimthempu in apang in chule Pastor Ngulkholet khongsai in Jubilee song hondohna aneiyin ahi.

Kinthempu Dr. T Lunkim in khosunga haosa mopohna, kho chagaho umding dan thu’a hilna leh houbung khantouna dingle  namsung damna dingin mipi anahil in ahi. Chule Yamthong Haokip Saikul- MLA, gamsunga hou lhacha, houbung Upa chule gamkai CSO lamkai chule Kuki Inpi Kangpokpi lamkai Seimang Lupho in jong Jubilee kipa thuseina le namsunga khantouna dingin houlimna aneijin ahi. Thankam  Lupheng Executive Member ADC in jong khochen dol le khangthahte ho panlah ding dan thu’a houlimna aneiyin ahi. Thangjakam Misao Vice Chairman Sadar Hills ADC leh khosunga kon anachaodoh hon jong pan analauvin ahi.

NIA hon 2nd MR Arms Kote a kon meithal kiguhdoh thu a ‘charge sheet’ ani channa sem

Imphal, Dec 20: National Investigation Agency in Wednesday nikhon 2nd Manipur Rifles a meithal kiholmo/kiguh thu akholna a akiholmo Kuki National Front-P (KNF-P) thingnoi khat panna a mi 2 chunga ‘charge sheet’ (supplementary) ani channa asem uvin ahi.

Charge-Sheet hi H Talung Phungpinemei leh Lunsei Kipgen @ Jesis, KNF-P chunga kisem ahi’in, Unlawful Activities Prevention Act, Arms Act chule Indian Penal Code section chom chom noiya kisem ahi. NIA hon Tuesday nikho a special NIA Court, Imphal a chargesheet asem ahi.

2nd Manipur Rifles Arms Kote a kon 9 mm pistol 56 akiguhmang thu toh kisaiya case kisem ahi’in, akiholmo meithal hohi thingnoi chom chom khut a lut ahi, tin official hon thuso anei uvin ahi. Hiche thu toh kisaiya thukholna umjing nalai ahi.

Manipur Police  abon uva  mi 44,388 ahiuve: CM

Imphal, Dec 20 (ET): Chief Minister le Home Minister tuhtha N. Biren Singh in tuni  Assembly a MLA Surajkumar Okram thudoh adonbutna achun, Manipur gamsung ah Manipur police abon in mi 44,388 aum uvin hiche lah achun, Civil police mi 15,556 ahiuvin, MR/IRB 14,395 ahiuvin, Staff 2791 ahiuvin, VDF mi 9611 ahiuvin chule Home Guard mi 2035 ahiuve ati. Chule BSF battalion 2, CRPF battalion 6, Mahila CRPF platoon ni, chule tunaicha chun BSF company 6 ahunglut be thu aphong doh in ahi.

CM in aseibena achun, State government hetpeh louvin gamsung ah security force ahunglut be aumpon, State Govt. in Centre heng ah athumbe phat lebou ahin sollut uh ahi ati. Gamsung a thingnoi hat jeh a tua central force umsa ho panpi ding a ahin sollut be diuva jong state in kithum jing ahi ati.