11th January, 2021 News

11th January, 2021 News

51
0
SHARE

Bandh kiladoh

Imphal, Jan 10(ET): KACA leh KAYA in Imphal-Ccpur lampi indefinite bandh bol ding’a thuphon ananei chu kihoutohna umjeh in ana kinunglah doh tan ahi.

Hetthei khat chu achesa January 6, 2021 nilhah nidan 9:20 vel’a K. Lhangnem, Tiddim Road a gari in atakhah akon Lalkhohao Kipgen S/o (L) Lhukholal Kipgen, Boljol in thina anato thu’a ngehna umho nidan 12 sung’a suhbulhit ahilou leh Tiddim Road bandh bol ding’a KACA leh KAYA in thuphon ana nei ahi.

Thilsoh chung chang thu’a Koitelui Area Chief Association(KACA) le Koitelui Area Youth Association (KAYA) chule Khaipao, Chairman ADCC, SDO Tuibong, Additional S.P. Ccpur chule OC Ccpur cheng jao na a janilhah a kihoulhah na aum tah jeh’a indefinite bandh chu ana nunglahdoh u ahi.

Xxxxxxx

Manipur a COVID-19 case thah nikhat sung’a kimu 15 noi hita; thina toh umlou

Imphal, Jan 10(ET): Nikho phabep sunga nikhat sunga 50 chunglam ana hi jing in, hinla Sunday nikho chun hatah in ana khesuh in, hinla vangphat umtah in thina toh ana umbe pon ahi. Thina tuobe ana umlou toh kilhon in thina toh agomin 365 ahi nalaiyin ahi tin State COVID-19 Common Control Room thusodoh chun atahlangin ahi.

Central Armed Police Force  3 pan na in mi 14 natna nei ahi mudohbe in aum in ahi. Saturday nikho chun COVID-19 natna nei mi 67 mudohbe in ana um in ahi tin thusodoh chun atahlangin ahi.

Milham lah a natna nei kimudoh ho lah a mi 4 hi Imphal West akon ahiuvin, 3 hi  Imphal East, Bishnupur leh Churachandpur akon mi 2 cheh ahiuve tin jong thusodoh chun aseiyin ahi.

Alangkhat ah, natna a kon in mi 39 in damdohna ana neikit un, hiton lhon chun Central Security personne 3,364 jaona in damdohna nei agomin 27,805 alhing tan chuleh Recovery Rate 97.01 per cent alhing tan ahi.

Tu le tua Active Case um jong 500 ana phajing chu 21 Central Security personnel jaona in 490 alhing suh tan ahi. Chuleh natna nei kimudoh thah mi 14 ho jaona in  tuni chan a Positive Cases kimudoh agomin 3,389 Central Security Personnel jaona in mi 28,660 alhing tan ahi.

COVID-19 natna nei hotoh tahsa kisuhkhahna nei jouse akinthei pen a chom umdoh diu, Covid Control room ahi louleh District CMO ho Testing bol nadia akijahmatpi diuva hetsah ahi. Thukin leh boina neihon akinthei pen a phatseh a Covid Common Control Room Number-1800-345-3818 Call abol jing thei diu ahi. Chuleh Home Isolation toh kisai jouse Home Isolation Helpline Numbers- 0385-2414009 (State head quarter) leh – 8415944151 (Thoubal) Call abol jing theiyu ahi tinjong State Health Services in atahlahbe in ahi.

Chuleh koi hijong leh Government Doctor ho Online a doh le sah neinom jousen Sunday nikho tailouva (10am – 3 pm) gei Google Play Store a eSanjeevaniOPD app Download ahilou leh www.esanjeevaniopd.in akon a bol jing thei ahi.

Lungthim boina nei hon Number 104 Manipur Mental Health Helpline (9 am to 9 pm) sung Call abolthei diu ahidan jong State Health Department in atahlang in ahi.

Xxxxxxx

Kaani lei kisumang hohi aga kilahdoh jouva kivatse ahileh “War on Drugs” kichepi hi aphatchomna bei ahi: UFM

Imphal, Jan. 10(UNA): United Front Of Manipur (UFM) in State Government henga Kaani lei kilhou ho aga kilah masanga kivatse/kisumang ham ole aga kilah jouva suhmang/kivatse ham kichehtah hetsahna anei diuvin ngehna aneiyun ahi.

UFM Chairman Sapam Samungou Singh in Press Club mun a Press Meet a aseina ah, State Government in State sunga thinglhang gam a Kaani lei State Police hon asuhmang ho hi neocha ahi lai a kisumang ham ahilou leh aga kilah jouva suhmang na kinei ham tihi photchetna apeh diuvin ngehna aneiyun ahi.

Kaani lei kibol ho aga kilo masang leh neocha ahilai a kisumang ahileh mopohna nei Government hohi pachat umtah hiding ahi. Hinla aga kilah nunga kisumang ahileh “War on Drugs” kiti thupi mangcha a tohgon kinei hi aphatchom na bei hiding ahi tin atahlangin ahi.

Chuleh mopohna nei Department NAB, Forest and Horticulture in Kaani lei kilho til a pat a kholchilna aneiya Kaani lei lho ding aphatlou dan thu leh suhtang nadinga pan alahlou ham tinjong aseiyin ahi.

Hitobang lhahsam na hin State sunga atoh ding kihetlou ahina ban a Drugs suhbei nading leh Kaani lei suhbei nadinga pan alah nadinga alosam dan aphongdoh in ahi tinjong aseiyin ahi.

Manipur hi gam neocha leh 22,327 Square Area Kilometres a len bep ahi in, Kaani lei kilhona kholchilna dinga ni 2-3 bou lut jou ding ahi. Agamkai a mopohna nei Deputy Commissioner hon pan hoitah a alah uva Manipur Revenue Act 1960 phatah a manchah ahileh Kaani lei kilho naho phatah a khol dohna umthei ding ahi tinjong aseibei.

Hitoh kilhon in UFM in State Government hengah ahithei leh Vangleng Huikong ho mangcha a dantoh kitohlouva Kaani lei bol ho kholdohna leh gotna jong apeh uva, gamsung a Drugs toh kisai suhbeina natoh jong hung lolhing thei dingahi tinjong aseiyin ahi.

Xxxxxxx

Tourism Minister O. Lukhoi Singh in “SWACCHTA Campaign” hondohna nei

Imphal, Jan 10(ET): Tourism Minister Oinam Lukhoi Singh in tunin Imphal West District hopsung konthuoujam Lairembi, Konthoujam mun’a “Let us join hands and make a dream village” kiti thupi pansa in “cleanliness campaign” hondohna ana neiyin ahi. Chuleh hiche campaign hi SWACCHTA Scheme noi’a North Eastern Council (NEC) tosot nanoi’a Department of Tourism, Government of Manipur in agon ahi.

Hiche toh lhon’a Jin-gun Minsiter O. Lukhoi in houlimna aneina’a society jouse in  thenna (cleanliness) kiti hi apoimo pen’a akoi ding’u chuleh adeh’a tahsa damthei na ding leh hinkho nom tah’a manthei nading’a grassroots level a kipat ngai ahi ati. Chuleh hiche SWACCHTA campaign hi Prime Minister Narendra Modi in Mahatma Gandhi’s in lunggel/bol ding’a adeisah tichu gamsung pumpi thengtah’a koi jing ding anati toh lhon’a thenna ding toh kisai’a mass movement anabol ahi. Aman aseibena’a thenna kiti hi mihem te ding’a apoima pen khat ahi naban’a gamsung’a thenna aum teng tahsa damthei na um in tin chuleh sector jouse a khantouna nasatah hung um doh thei ding ahi. Chuleh hiche Konthoujam Lairembi khantou nading’a budget a jaosah ahi nading’a CM toh kihoukhom na jong kanei ding ahi tinjong aseibei.

Kingon achun Jin-ja-um in Chairman, Tourism Corporation of Manipur Limited (TCML) leh Jiribam A/C, Md. Ashab Uddin, Advisor to CM/MLA, Konthoujam A/C chuleh Kin-neipa in Dr. Sapam Ranjan anapang lhon in ahi.  Chuleh Commissioner (Tourism), Devesh Deval, Director (Tourism), Ibohal Singh leh Department akon official hon jong pan anala uvin ahi.

Xxxxxxx

Brown sugar sem nading’a kimangcha thil keu phabep NAB team in mi 2 akon mandoh

Imphal, Jan 10(ET): NAB PS team khat in janni ( Jan. 9) chun Thoubal District hopsung Irong Khunou IVR mun’a kon in brown sugar sem nading’a kimangcha thil (component) tamtah mi 2 akon in anamandoh uvin ahi. Hiche matdoh’a um teni hi Thoubal District hopsung Thoubbam Irong Thokchom akon Md Apik chapa Md Abas Khan (32) leh Thoubal District hopsung Moijing Awang Leikai akon Md Tayed Ali chapa md Arab Ali (41) ahi akiti. Chuleh amani chung’a Police hon case khat ajih khum utoh lhon’a achung thu lhon kholchibe na jong anei ding’u ahi.

Hiche toh lhon’a NAB team in brown sungar sem nading’a kimangcha thil le lo amatdoh hochu alhit nading pon 5, camouflaged pon 6, steel bucket 1, plastic tub 5, lime jaona white colour plastic bag 2, aluminium pot 1, plastic container 2, wooden plank 2, wooden stand 2, yellow colour rubber hand glove 1, thil ten a (weighing equipment) leh brown sungar semdoh nading’a opium agom’a kg. 84 ahi.

Xxxxxxxxx

Jiribam a Sub-Jail kimang talou chu Piggery Farm leh melei a kimang ta

Jiribam, Jan. 10(ET):  Jiribam Sub-Jail hi Manipur State sunga ding a alui loi ahitan, manchah thei a aum tahlou toh kilhon in Vohcha vahna mun leh ann me honlei bolna in akimang tan ahi.

Hiche jail hi November 9, 1964 a ana kisemdoh toh kilhon in hoitah in 1996-97 sung chun Jailor ho makaina in ana kimangcha in ahi. Hinla, hiche jail manchah ahilou phat in Jiribam Sub-Division a thilong koina (Morgue) tumbeh a aneilou jeh chun mithi koi na in ana kimang kit in ahi. Hiche jou chun chomkhat a ding in Security Force ho pansatna ding in ahung kimang kit in ahi

Mopohna neiho in ahiding bangtah a vetkolna aneilou jeh chun Jiribam District a thunei vaihom ho ding in hahsat na leh boina lentah ana sodoh in ahi.

Thunei vaihom holeh dan leh thupeh vengtup a umhon themmona nei ahin matdoh teng uleh, Jail a koi ding khat chu Jiribam akon a kms 222 a gamlha Imphal ah ahin pui diu angaiji tan ahi.

Jiribam Sub Division jong District a suhpilhing ahung hitoh kilhon in District a sem pilhing ahitoh kilhon in lam chom chom a suhpilhing ahung hitoupeh in chuleh thilsoh dei umlou tah tah jong ahung punbe jing in, hiche hin Jiribam a Sub Jail aumlou akhoh dan mudoh in aum in ahi.

Achesa December 26, 2018 chun Manipur a Law Minister L. Jayenta Kumar leh Jiribam Assembly MLA Md. Ashab Uddin in manchah hitalou Sub Jail vilna ana nei lhon in, semphat ahi nadin mipi ho hengah kitepna jong ana neiyun hinla tuni chan in aga muthei in aum naipon ahi.

XXXXXXXX

India a Covid-19 +ve case thah 18,645 kimudoh; thina toh 201 agom’a 150,999 lhing ta

New Delhi, Jan 10: India a nikhat sung’a Covid-19 case thah 18,645 mudoh ahitoh lhon’a agom’a case 10,450,284 alhing tan ahi tin Union Health Ministry chun tunin aphongdoh in ahi. Chuleh Covid natna akon damdoh mi 19,299 aumbe nachung’a agom’a adamdoh jat 10,075,950 alhingtan hiche naban’a thina toh mi 201 aumbe toh lhon’a agom’a 150,999 alhing tan ahi. Active case 223,335 aum in chuleh tule tun recovery rate 96.41%, active case 2.15% leh death rate 1.45% in aum in ahi.

Hetthei khat chu India in nationwide vaccination drive ding’a kigotna achelhah pi jing lai tah in Covid-19 +ve case ahung punbe kit tan ahi. Vaccine 2 tichu Oxford University-AstraZeneca’s Covishield leh Bharat Biotech International Limited Covaxin teni hi tu lha masang chun Drugs Controller General of India (DCGI) in Emergency Use Authorization (EUA) ding in phatsah na anapen ahi. Ahin Covishield hi Pune-based Serum Institute of India (SII) a kisem ding chuleh Covaxin hi Covid-19 doudal nading’a indigenous vaccine masapen jong ahi. Vaccine dang Ahmedabaad- based Zydus Cadila’s SyCoV-D jong phase 3 trial abol thei ding in phatsah na akipe tan ahi.

Alangkhat’a janni (Jan. 9) nikho chun Government in nationwide vaccination drive hi ahung lhung ding Jan. nisim 16 nikho akon kipan ding in phondoh na ananei in ahi. Chuleh January nisim 2 leh 8 nikhon Two pan-India vaccination dry run anachelha in ahi.  Hetthei khat chu tu le tu hin India hi leiset chung’a Covid-19 caseload lah’a a ni channa ahitan akhat na’a hin Unite State aum in chuleh athum channa’a Brazil ahi. Chuleh leiset chung’a ding’a USA leh India hin Covid-19 case million 10 akhel tan ahi.

XXXXXXX

AR in Mei in akah Hope Baptist Childrens Home kithopina pe

CCpur, Jan. 10 (ET): Churachandpur District hopsung Rengkai mun’a um Hope Baptist Childrens Home mun janni nikho’a mun phabep mei in anakahvam nachung’a Assam Rifle hon kithopina anape in ahi. Hiche mei kah chu kitchen a kon kipan ahi in ahin hiche thilsoh nachung’a Children’s Home a um chapang koima vang anakisukha pon ahi. Assam Rifle hon thilsoh thu ajah jah uvin Home a um chapang 42 ding in kithopina anape uvin ahi.

xxxxxxxx

AR hon CCpur Royal Riders ho interaction neipi

CCpur, Jan. 10 (ET) : Assam Rifle leh Churachandpur Royal Riders (alocal youth organisation) kithokhom nanoi in janni (Jan. 9) nikhon Churachandpur District mun’a 3rd Manipur Royal Rider’s Meet ananei uvin ahi. Hiche kingon chun khangthah holeh security force ho kikah’a kingailut na asuhhat cheh nabsan’a maban’a hitobang’a kingailut na mipi leh khanthah ho toh anei’u achelhah jing ding’u adeisah nao jong aphongdoh uvin ahi.

xxxxxxxxx

AR hon “Women Empowerment” chung thu’a awareness ananei

Bishnupur, Jan. 10 (ET) : Bishnupur mun’a um Assam Rifle hon tunin Bishnupur District hopsung Shantipur kho mun’a “Women Empowerment” chung thu’a awreness lecture ananei uvin ahi. Hiche kingon hi gamkai sung’a um numei chapang holeh nupi hon education system leh society sung’a khangtou nading pan mun anei dan ho hettohsah nading deisah najal’a anei’u ahi.

Hiche toh lhon’a kingon phatsung’a pan hung laho heng’a scheme jat chom chom um phatchom nading ho chuleh State leh Central Government in society sung’a numei ho status damsang nading’a policy agon ho hilthem na anei uvin ahi. Kingona chun gamkai sung mun chom chom akon numei 57 val in apan anala uvin ahi.

xxxxxxxx

Assam Rifle hon Community service leh Covid awareness drive anabol; Village Chiefs’ Conclave kibol

Senapati, Jan. 10 (ET) : Assam Rifle hon tunin Senapati District hopsung Phaimol kho mun’a Covid-19 toh kisai’a community service leh awareness drive ananei uvin ahi. Kingon chu community service in anakipan in chu jou in Phaimol Baptish Church mun’a interaction jong ananei khom uvin ahi. Kingon toh kisai in Assam Rifle hon Covid-19 natna akon kivenbit nading’a bol ding leh bol ding chung thu’a thuhilna ananei in chuleh mipi in ahi theichan’a mask akibol ding chuleh social distancing phatah’a ajui ding uvin temna anei in ahi.

Hiche toh lhon’a kingon phatsung’a pan laho jouse Covid-19 natna akon kivenbit na anei thei cheh nading uvin mask, sanitizer leh pamphlet ho hopdoh najong ananei uvin ahi. Hitobang tohgon Assam Rifle hon anei nao chung’a kho sung mipi leh lamkai hon kipa thu jong aphongdoh uvin ahi.

Chandel District hopsung Modi kho mun’a jong tunin Assam Rifle ho makai nanoi in Village Chief’s Conclave anachelha in ahi. Hiche phatsung in gamsung’a tule tu’a security ding mun, Covid-19 natna doudal na chung leh Manipur gamsung drug free ding thu’a kihoukhomna ananei uvin ahi. Kingon achun kho 10 akon in Haosa, Secretary leh member hon pan anala uvin ahi.

Hiche toh lhon’a Conclave a chun gamkai sung’a security ding mun aseikhom masa uvin chu jou in khamnathei jeh’a khangthah tamtah hinkho asuhset naban’a khamnathei a kivei ho chung thu’a kihoukhomna anei uvin ahi.

Alangkhat’a Lilong mun’a jong tunin Assam Rifle hon Secuirty meet ananei uvin hiche phatsung’a chun kho Haosa, Youth Club member leh kho kimvel akon kho sung mipin pan anala uvin ahi. Kingon achun tule tu’a security din mun dan leh pan alah dan ho seikhomna anei uvin ahi. Chu naban’a Covid-19 doudal na chung thu ajong kihoukhom na anei uvin ahi.

Xxxxxx

Kodompokpi, Khanarok le Hiyanglam a Lhukhosei kilhadoh deilou jeh’a toumun kiphinna um

Imphal, Jan 10(ET): Achesa June 2018 kum a Crore 27 lam man khamnathei a inn mun a an akiman doh Autonomous District Council (ADC), Chandel a Chairman ana hi Lhukhosei Zou mona nei lou ahi tia achesa December nisim  17 nikho a ND & PS court in lhadoh na deilou vetsah na in tuni in jingkah lam nidan 11.30 vel akon in Imphal West District sung a um Kodompokpi Mamang Leikai Keithel Shang mun a Yaipha Ihou Women’s Association le  CADA Unit in kithokhom in  kihoukhomna ana nei uvin ahi.

Kingon achun Geetchandra Mangang – Secretary General, CADA in ahoulimna a Manipur govt le Lhukhosei Zou kimai tona case ahi toh lhon a kiloikhomna dang in court asang jep a case chung chang pohdoh na anei thei lou ahi toh lhon a govt in pohdoh na anei a mipi in atahsa thei ding khat a thulhut ahung kinei na ding in jong ana sei in ahi. Mipi in akidei chu khamnathei a kivei ho ahiding bangtah a matdoh a aum ding hi ahin, case chung chang a drug sample man kiti ho akon hetdoh thei chu aboi aum in ahi ti ahi tin lamkai pa chu ana sei in ahi.

Alangkhat a tuni sunkim nidan 1 vel chun Imphal East District sung a um Khanarok Mayai Leikai Community Hall mun a jong Khanarok Women’s Development Association le CADA in kithokhom in Lhukhosei Zou mona nei lou ahi tia kilha doh an chung chang a deilou na vetsah na in toumun kiphinna le kihou khomna ana nei uvin ahi. Kingon achun Dipanjit Ningthoujam – Vice-President, CADA  in houlimna ana nei in, judge thulhut neina mipi in atahsan thei lou le apom thei lou hi a innmun a khamnathei chujat man kiman doh a mona anei poi kiti hi ahi tin ana sei in ahi.

Xxxxx

Loubol kiphinna nei ho ngahsah na ding chung chang SC in ngailhah na nei ding

New Delhi, Jan 10: Supreme Court in jing nikho le Delhi gamgi ho a loubol kiphinna nei ho apat pat a lahdoh an ding chung chang a plea hung kinei ho ngailhah na anei ding ahi akiti. Hetthei khat chu Delhi gamgi a loubol ho in kiphinna ahin nei uhi lha khat lam ahung vaal tah toh lhon a boina jat chom chom um jing toh lhon a ngahsah ding ahilou le bolsah lou ding a ngehna hung kinei ho ngai lhah a kinei peh ding ahi akiti.

Hiche ngailhah na dinga chu Chief Justice S A Bobde, Justice A S Bopanna le Justice V Ramasubramanian ho pan na bench in thulhut anei ding u ahi akiti. Hihe plea file kibol ngailhah ding masa pen chu law student Rishabh Sharma akon ahin, ama pa hin gamgi a kiphinna um jeh a boina jat chom chom tona aum jing toh lhon a ngehna chu ana nei ahin hiche toh lhon a covid toh kisai a hitabang kipum khomna mun ho a natna pun be jing thei ahi toh lhon a kha ding a ngehna ahin nei ahi akiti. Loubol kiphinna nei ho chu Burari mun a Nirankari ground a kiphinna neiding a hetsah na ana kinei ahin hinlah hiche ding chu deilou a gamgi atin jing uva boina asem jing u ahi ti jong ana sei in ahi.

Sahrma chun hiche kiphinna chu natna um kichai teng abol thei kit dan u jong ana sei in ahi. Hetthei khat chu farm law toh kisai ahi govt in daan kisem ho chu suhdih ding tohgon ana nei u ahin hinlah loubol ho hin abon a nung lahdoh ding a ana sei u ahi. Govt in kiphinna hung kipat akon a loubol lamkai hotoh kihou na an anei jing u ahin hinlah tuni chan a imacha seilhah a umlou lai ahi. Akit kihou na hi ahunglhungding January 15 le umding ahi akiti.

Xxxxxx

Covid vaccine hi tahlel ho peh masat ding dol ahi: BSP

New Delhi, Jan 10: Covid vaccine hi tahlal ho peh masat ding dol ahi tin Bahujan Samaj Party (BSP) in tuni in ana sei uvin ahi. BSP national spokesperson Sudhindra Bhadoria in asei na a party supremo Mayawati in phase masa pen ahi tahlal ho vaccine peh masat ahi a man bei a pehding adei dan tahlang na an anei ahi tin ana sei in ahi.

Kum lhung kei in mipi aboi in mitin in genthei atoh in hinlah tahlal ho ding a hitabang vaccine kikap na manbei le amsa pen a pehding kiti hi Mayawati bou ahinalai in ahi tin Bhadoria chun asei in ahi. Mipi kap ding vaccine jong ahiding dolt ah a patep na akihai jou a kap ding adei dan jong tahlang na ana nei in ahi. Loubol ho kiphinna chung chang a ahoulimna a Spokesperson pa in loubol ho in dap laitah a gamgi a hitobang tah a kiphinna anei uhi govt in vetsui na anei ding dol u ahin, dap jeh a mi 50 lam in thina ato jjeng tah vang uvin govt in kihetmosah in don in akoi po in, kihetmosah jong ule govt in mo akipoh idng u ahi tin ana sei in ahi.

 Rajasthan mun a BJP lamkai ho  in loubol kiphinna nei ho in sa le nga anop no pane uvin ahi tia asei an chung uva loubol mi 60 lam in thina toh ta a hitabang thu kisei thei nalai hi vangset umtah ahi tin ana sei in ahi.

Xxxxxxxxxxx

Tourism Department in Shree Shree Govindajee Temple a thil-le-luo kilam doh ho Temple Committee henga pehdoh  na nei

Imphal, January 10(ET): Sagolband mun a um Shree Shree Bijoy Govindajee Temple mun adia Swadesh Darshan Scheme of Ministry of Tourism noiya thil-le-luo kilamdoh hochu Temple Committee ho heng’ah Temple Complex mun a Department of Tourism, Government of Manipur a Director, Manipur Tourism Department in pehdoh na ana nei tan ahi.

Kin-gon kimanna sunga N. Biren Singh in Jingun hina a ahoulimna a chun Prime Minister Narendra Modi in khantou machalna lampang agelkhohna chungah pachatna sangtah anape in ahi. Ama lamkaina noiyah Central Government in Swadesh Darshan Scheme mangcha in gamsunga Tourism lampang ah khantou machalna lentah ahin lhut in ahi.

Sagolband mun a um Thangapat a Boat Race kineina jing mun jong suhpilhing leh venbitna kinei ding ahi tinjong N. Biren Singh in aseiyin ahi. Kumseh a ana kibol jing hiche Boat Race hi chondan leh pupa khanga pat ana kichepi jing ahitoh kilhon a suhpilhing ahiding dan jong aseiyin ahi. Ahunglhung ding Heikru Hidongba festival teng leh Tourism Department in in Thangapat leh Palace Compound a hiche Boat Race thupitah a ahin gondiuvin jong temna aneiyin ahi.

State sunga dan leh thupeh jong tule tua Government thah ahung kisemdoh apat in phatlam amano jing in, State Government in mipi ho dingin cham leh lungmonna aki gelkhoh jingin ahi tinjong aseiyin ahi. Chuleh ama Government in Gamgi toh kisaiya kiboina ho suhlhap ahi nading leh kinaipi State hotoh Police Station, Barrack ho semdoh a boina ho suhlhap nadinga pan kila jing ahidan jong aphongdoh in ahi.

Khantou machal na umjing thei na dinga State sunga um nam chom chom ho kichamdel a umjing ding angaikhoh dan jong aseiyin ahi.

Kin-gon kiman na a Kin-neipa a pang Tourism Minister Shri Oinam Lukhoi in aseina ah, Manipur sung hi gamnom tah leh vethoitah ahi toh kilhon in, State Government in N. Biren Singh makaina noiyah Thinglhang leh Phaicham mun a Tourist mun ho suhpilhing ding leh semhoi nading tohgon akinei jinge tinjong aseiyin ahi. Chuleh State sunga Assembly Constituencies (ACs) 60 umho jouse a Eco Tourism Park khatcheh jong Tourism department akon a dangka 30 Lakh cheh leh agamkai MLA ho akon a Local Area Development Funds dangka 20 Lakh cheh pehdohna kinei ding ahi tinjong aseiyin ahi.

Hetthei khat chu  N. Biren Singh in Swadesh Darshan Scheme  noiyah Shree Shree Bijoy Govoindajee Temple hondohna chu Spiritual Circuit in Manipur noiya Union Minister of State for Tourism and Culture (I/C) panna in achesa ningkum 21st December chun Manipur State Film Development Society mun a kin-gon kimanna achun ana hongdoh in ahi.

MP, Rajya Sabha Maharaja Sanajaoba Leishemba, Chairman, Loktak Development Authority L. Susindro, MLA Sagolband AC Shri R.K. Imo , MLA Kshetrigao AC Nahakpam Indrajit, Additional Chief Secretary M.H. Khan, Commissioner (Tourism) Devesh Deval, Secretary to Chief Minister Shri N. Geoffrey leh Director (Tourism) W. Ibohal  leh adang dang hon kin-gon kimanna a chun pan ana lauvin ahi.

xxxxxxxx

Brown sugar sem nading’a kimangcha thil keu phabep NAB team in mi 2 akon mandoh

Imphal, Jan 10(ET): NAB PS team khat in janni ( Jan. 9) chun Thoubal District hopsung Irong Khunou IVR mun’a kon in brown sugar sem nading’a kimangcha thil (component) tamtah mi 2 akon in anamandoh uvin ahi. Hiche matdoh’a um teni hi Thoubal District hopsung Thoubbam Irong Thokchom akon Md Apik chapa Md Abas Khan (32) leh Thoubal District hopsung Moijing Awang Leikai akon Md Tayed Ali chapa md Arab Ali (41) ahi akiti. Chuleh amani chung’a Police hon case khat ajih khum utoh lhon’a achung thu lhon kholchibe na jong anei ding’u ahi.

Hiche toh lhon’a NAB team in brown sungar sem nading’a kimangcha thil le lo amatdoh hochu alhit nading pon 5, camouflaged pon 6, steel bucket 1, plastic tub 5, lime jaona white colour plastic bag 2, aluminium pot 1, plastic container 2, wooden plank 2, wooden stand 2, yellow colour rubber hand glove 1, thil ten a (weighing equipment) leh brown sungar semdoh nading’a opium agom’a kg. 84 ahi.

Langkhat ah Jani sunkim nidan 1 vel in North AOC mun a Lilong akon Guwahati lam jon Tata khat ana kivetchil na a savon khum a kichun heroin chun 105 lam anakimudoh in ahi. Hiche heroin kimandoh chu 1.383 kg lam a gih ahi akiti. Akimandoh thil ho chu koi a ahi hetdoh ahi toh lhon in anei ho matdoh ding in antoh na achelha jing in ahi.

Xxxxxxx

Jilkung hon kiphinna kingasa banjom diu, Class ho kila louding ahi ti gihna nei

Imphal, Jan. 10(UNA): Federation Government Colleges Teachers’ Association (FEGOCTA) ho kiphinna ana neiyu angah nung un avel a January 28, 2021 apat a Government in January 27, 2021 kah a 7th UGC Pay and Regulation, 2018  Order asodoh lou leh kiphinna nei ding in aphongdoh un ahi.

Sunday nikho a Manipur Press Club mun a Manipur Press Club mun a Thulakhom ho akimupi nauva chun General Secretary Dr. N. Somorendro Singh  in Government in January 27 kah a phutna kinei ho suhbulhit na anei lou leh ahunglhung ding January 28 apat a Government College Teacher hon Order thah aso masang se a kiphinna kichelhahpi ding ahi tin aseiyin ahi. College Jilkung hon Online/Offline Class, NACC leh Academic Activities dang dang ho Boycott January 28, 2021 apat a kipan ding ahi tinjong aseibei.

Dr. Somorendro in aseina ah, tuchan in Government in August 6, 2020 a Cabinet in phatsahna anei nung in 7 th UGC Pay and Regulations, 2018 Order sodohna aneipon ahi. Hiche hi UGC National Policy toh kikal ahi in chuleh Good Governance toh kikal ahi tin aseiyin ahi. Hiche hi FEGOCTA in Education Minister leh State Government a mopohna nei Official ho henga pehlutna lekha chim chom um nunga jong nahsah a umlouahi atim

Achaina ding a ngehna chu Chief Minister heng’ah achesa nisim January 2, 2021 nichun ahung kikumlut nading in pehlut in ana um in ahi. Manipur Government a Employee dang dang ho ding in 7th Pay hi manchah in aumtan ahi.

Kum thum masang chun Prime Minister Narendra Modi lamkaina in Union Cabinet in 7th Paychu University leh College hoa jilkung ho ding in jong phatsahna ana neiyin ahi. November 2, 2017 chun MHRD in State Government jouse heng’ah 7th Pay chepi cheh dingin hetsahna anabol in ahi. BJP ho vaihomna jao pumin gamsung a State chom chom in hiche 7th UGG Payamangcha tauvin ahi.

Dr. Somorendro in aseibe na ah, UGC in July 18, 2018 chun UGC Regulations, 2018 ana chepi pan in ahi. December 2018 apat chun FEGOCTA in 7th UGC Pay and Regulations, 2018 manchah ahina din phutna ana kineiyin ahi. Government in nahsah a ana neilou jeh in FEGOCTA in achesa September 2019, November, 2019, February, 2020 leh July, 2020 chun kiphinna 4 vei gei ana kibol in ahi tinjong aseibei.

xxxxxxxxxxx

Manipur State sunga Jonglha amang thei dinga aum thu’a mipi hetdinga thuphon um

Imphal, Jan 10(ET): Manipur State sunga Jonglha (Tree bean) amang (dying) dinga aum thua One Day Seminar; Remedies and Steps Towards Conservation ti thupi manga V. C.s Court Hall, Manipur University, Canchipur ah ahunglhung ding January 16, 2021 leh Governor of Manipur, Dr Najma Heptullah Chief Guest hina noiya umdinga gon ahi. Hiche seminar ah hin Jonglha tuding danleh market hoa ajoh dingdan ho promote jong bol hiding ahi. Hichea Seminar umding chu Manipur Agricultural University, Iroishemba, CSIR-NEIST, ICAR, MOMA leh Apunba Imagi Machasing (AIMS) Manipur in agon ding ahi.

AIMS in press release aso nauvah Jonglha (Tree bean) hi Manipuri mihoa dinga traditional diet khat ahi atin ahi. Nutritional value anei seh hilouva Jonglha hi Protein, fats, carbohydrates, minerals leh vitamins tamna khat jong ahi. Jonglha hin depression, anemia, blood pressure, constipation, heartburn, stroke, eye-illness leh indigestion hojong asuhnem thei ahi. Jonglha tuhi summuna phatah jong ahi in, chuleh hichea kona hi season khat sunga a lakh a sim a income muna thei jong ahi. Press release kiso chun aseibena ah, ajeh chom chom ho insects leh fungus attack, tui hah jeh, ecosystem kikhel jeh, pollinated ganhing bah ho alhomjeh leh management lampang ahoilou jeh in Manipur sunga Jonglha hi amang thei ding dinmun in aumtan ahi ati.

Chuleh tuhin local a kona Jonglha kondoh hochu market a muthei alhom lheh in ahi. Chuleh achesa kum 10 sunga Jonglha Farm bolho chunga socioeconomic lam a aha tohkhah jeh in Farm bolhon sumhol nathei lampi dang ana kihol tauvin ahi. Hiche holah ah khat chu kani lei kibol jong hi khat ahi. Hitobang dinmun ahitah jeh a Jonglha tudoh ahikit nadinga phat lemchang ahi in chuleh avaigei masanga conservation bol angaiyin ahi. Hiche Seminar hi stakeholders, farmers, researchers, Scientists, Academicians, individuals, functionaries, NGOs, Financial Institutes, Line Department etc ho leh Jonglha tudoh ahikit nadinga lunglut na neiho jousea dinga hon hiding ahi.

Xxxxxxxxxx

Jiribam Police Multipurpose Hall leh District Police Arms Kote hondoh a um

Jiribam, Jan 10(ET): Jiribam District Police in Multipurpose Hall leh District Arms Kote, hondoh na tuni chun Jiribam Police Station, Manipur Police Department noiya Rs 30 lakhs a sanction noiya ana kisa chu hondohna kin ana nei uvin ahi.

Inspector General of Police, Zone II Manipur, Clay Khongsai, IPS in hichea Multipurpose Hall leh District Arms Kote hondoh na chu Jiribam S. P Jiribam Moirangthem Mubi Singh, Addl. S. P (Ops), Jiribam Akhoijam Sadananda Singh, Addl. S. P (LO), Jiribam Heisnam Basulal Singh, SDPO Jiribam Th Sanatomba Singh leh Officer in Charge (OC), Jiribam Laishram Khogen Singh ho umna ah ana hongdoh tan ahi.

Clay Khongsai, IGP Zone II, Manipur in aseina ah Police Department in chouna chom chom hoa boina atoh jing in ahi, hinla Police personnel ho panlah najeh in suhlhap in aumin ahi.

Aman Jiribam S. P leh Deputy Commissioner natohdan jong aseiyin, chuleh hichea hin Covid 19 natna um sunga jong hangsan tah a sunleh jan a natong ahiuvin chuleh state danga kona train akona state sunga hung hojong amaho district cheh uva anasol uvin ahi ati.

Clay Khongsai in Police Department in aboina houva kithopina ana peho jong apachat nathu aseiyin ahi. Jiribam District a Superintendent of Police, Mubi Moirangthem in ahoulimna ah Jiribam District sunga Police Department hi infrastructure lama alhasam lheh in ahi, hinla IGP, Zone II in Jiribam District Police semphat ahina dinga kipanhu ding ahi tin Mubi in aseiyin ahi.

Aman aseibena ah Multipurpose Hall leh District Police Arms Kote sahna dinga natohna hochu VDF personnel ho panlah najeh a jothei a um ahi tin aseiyin ahi. Chuleh hichea inaugural programme ah chun VDF personnel phabep hochu kipa thilpeh (gifts) jong peh anahiuvin ahi.

Hiche kingon ah chun Deputy Commissioner, Jiribam, W. Malemnganba Chenglei, Col. Sakhawat Singh, 37 Assam Rifles, A Biren Singh, Ex-minister, Government of Manipur; N. Budhachandra Singh Social Worker leh adang phabep jong ana jau uvin ahi.

Xxxxxxxxxx

Covid 19 Vaccine kapna dinga volunteer khat Bhopal a thi; Bharat Biotech in poison jeh a thi hidinga ginmo na phongdoh

Mumbai, Jan 10: Bharat Biotech-ICMR in asem Covid 19 damdoi “Covaxin” Phase III trial a kikap ding a kipedoh niseh a nikhotha a sumlo kum 45 mi chu December 21, 2020 chun People’s Medical College and Hospital, Bhopal Madhya Pradesh ah akikap jou nikho 9 jouvin thina anatoh tan ahi tin Hospital records kimu chun atahlang in ahi.

Hichea thina anatoh pa minchu Deepak Marawi, cha 3 neimi ahi, chuleh amahi poison jeh a thi hidingin Post Mortem report akonin mudoh ahi. Bharat Biotech in thuso anei nauva hichea damdoi kikap hochu hatah a affect aumlou nadinga ki kholchil ahi in chuleh hichea hin damdoi jeh ahipoi tin aseiyin chuleh Government akonin jong ginmo na thuphon aumpon ahi.

Hichea hin hetthei khat chu damdoi kikap dinga kipedoh chu agoma mi 1750 ahi in chuleh Marawi jong amaho lah a khat ahi. Marawi chu Gandhi Medical College and Hospital (Hamidia) a achapa Suraj kum 24 mi in apohlut achu athisa ahitan ahi. Chuleh Post Mortem report in aseina ah amahi “cardiac respiratory failure” jeh a thi ahi in chuleh hiche hi poison jeh hiding ahi ati. Chuleh hichea viscera hojong Regional Forensic Laboratory ah test bol dingin thotdoh anahitan ahi.  Covid 19 Vaccine trial dungjuiya Marawi thina chu Institutional Ethics Committee, Central Drugs Control Standards Organisation and Data Safety Monitoring Board ah hetsahna peh anahitan ahi. Chuleh hichea thina anatoh Marawi toh Vaccine kikapna thua kimatna mudoh ahilou toh kisai in hichea Covid 19 Vaccine trial jong hospital ah achelha jing in ahi.

Hichea report bol chu four members ethics committee ahiuvin chuleh hichea hin retired judge jauna ana peh u ahi in chuleh hichea results hochu lha khat jouleh umdinga ginchat ahi. MP Government injong member 6 jauna committee injong damdoi kikap jeh a thi ahipoi tin aseiyin ahi. Hiche committee chu Arun Kumar Shrivastav, head of Pharmacology Department, Gandhi Medical College in alamkai ahi. Bharat Biotech in ICMR noiya guidelines asemho jong phatah a jui ahi tin aseiyin ahi.

New Drugs and Clinical Trials Rules (NDCT rules 2019) dungjuiya hichea thilsoh chu Institutional Ethics Committee, Central Drugs Control Standards Organisation (CDSCO) leh Data Safety Monitoring Board (DSMB) koma hetsah na ana um tan ahi.

Xxxxxxxx

Dugs thu hi Political Issue a heidoh lou ding ahi:AMUCO President

Imphal, Jan 10(TFM): All Manipur Club’s Organisation (AMUCO) President Ph Nando Luwang in Sunday nikho chun Drugs toh kisai hi Politicise lou ding in temna aneiyin, chuleh hiche thu hi achombeh in aki heidoh tai tin aseiyin ahi

Nando Luwang in Manipuri Students’ Federation (MSF) saina noiya AMUCO office, Kwakeithel, Imphal Conference Hall mun a nikhat chelha ding Open Online Slogan Competition “Drug Use Prevention” cum “Prize Distribution Ceremony”  kin-gon kiman na achun aseiyin ahi.

Aman aseibe na a chun, Drugs toh kisai thu hi Political issue a lahlou ding chuleh jabol channa dia mikhat suh minset leh khat hina suhnempeh na a man lou ding ahi tinjong aseiyin ahi.

Aman aseina a chun, mi phabep in Lhukhosei Zou lhadoh na kinei thu ah doudalna aneiyin, chuleh mi phabep in lemna anei kit in ahi. AMUCO President in aseina ah, hiche hi Lhukhosei Zou kilhadoh leh kilhadoh lou thu ahipon, athupi pen chu State sunga Drugs suhbei leh mipi ho huhdoh ding hi athupi pen ahi.

Aseikitna a chun, State sunga Drugs toh kisai chi ni aum in ahi. Khat chu State sunga mipi ho henga joh ding tihi ahi in, adang khat chu Manipur hi apohna lampi a man a State pamlanga joh ding tihi ahi. Drugs a kiveina a Manipur apohna lampi a mang ho hi ‘White Colkar Terrorists’ ahiuvin ahi tin aseiyin, chuleh hiche hi State mopohna tahtah ahipoi tin aseiyin ahi. Hiche sanga gelkhoh joh ding chu State sunga um khangdong ho henga kijoh ho hi gelkhoh ding ahi. Chukit leh State sung hinjotpa a hung kipo Drugs ho State sunga kithejah ham tijoh khol angaiyin ahi tinjong aseiyin ahi.

National leh Local Media ho a niseh a Drugs thu a thulu a hung kisei jing hin State sunga dinga minsetna ahin pohlut thei ahijeh in, State minphat naleh jabol na achanthei nading jong gelkhohjep angaiyin ahi tinjong aseiyin ahi.

Poirei Leimarol Meira Paibi Apunba President L Memchoubi, in aseina ah, achesa 1975 kum chun nupi honkhat lampi a ahung kijot un, dan toh kitohlou khamna thei adeh a judon doudalna in pan ahin lauvin, tuhin khamna theu drugs im vai ahin homtan ahi tin aseiyin ahi. Migun jaum tah tah ho Drugs ah aki kumlut tauvin, Manipur Chief Minister leh Prime Minister kithutoh tah a pan alah angaitai tin aseiyin ahi.

Khuraijam Anil, International Certified Addiction Professional leh Priyadarshini M Gangte, Asst Prof History Department, SK Women College, in Resource Persons hina in houlimna ana neilhon in ahi.

All Manipur Women’s Voluntary Association (AMAWOVA) President Y Kunjarani leh MSF President Sazad Bhuiyamayum jong Kin-nei hina in pan ana lalhon in ahi.

Xxxxxxxxxx

Republic Day Chief Guest dinga akigotna ana vohai UK PM Boris Johnson khela Indian-Origin mi Suriname President Chan Santokhi pang tading

New Delhi, Jan 10: Republic Day Chief Guest a pang dinga kigong UK PM Boris Johnson in akigotna avoh hai tah toh lhona ama khela January 26 nileh Indian-Origin mi Republic of Suriname President, Chandrikapersad Santokhi pang ding ahitai, tin Sunday nichun thulhut khat chun aseiyin ahi.

Tu kal sung masangjep a chu, Santokhi hi Ministry of External Affairs kingon na noiya ana kimang Pravasi Bharatiya Divas Convention a jong chief guest a ana panga, houlimna jong ananei ahi.

India in United Kingdom Prime Minister Boris Johnson chu chief guest a dinga temna ana nei ahi, hinlah vangset umtah in British PM in ama gamsunga coronavirus dinmun leh covid natna thah leh khohcheh hung soudoh jeh a akigotna avohhai lo ahitai.

Santokhi in ama party, Progressive Reform Party (PRP) in election a seat 51 lah a 20 anajo toh lhona July, 2020 apat Suriname gama president panmun ana tuhpan ahi. Election a ama goljona a kon Dési Bouterse lamkaina dictatorial rule jong anabei ahi. Dutch paove Vooruitstrevende Hervormingspartij ahilouleh VHP tia kihe, PRP alhangpia Indian community ho represent abol ahi. Chuleh til’a chu United Hindustani Party ana kiti ahi.

Suriname gam hi masanga chu Dutch colony anahi in, agamsunga mihem chengjat agoma mi 587,000 lah a 27.4 percent hi Indian descent mi ahiuvin, ethnic group lah a atampen ahiuve.

Xxxxxx

India in NDRF a dinga UN IDRF Tag neivah tading

New Delhi, Jan. 10: United Nations (UN) noiya um International Disaster Rescue Operation a India injong pan alah vah tahding ginchat aumin ahi. India in agamsunga dinga federal contingency force a anei, National Disaster Rescue Force (NDRF) hi vannoi het a tukum sunga standardize akibol tah ding ginchat ahidan, top ranking official khat in ana seiyin ahi.

Hiche a dinga chu Switzerland gama a headquarter um, International Search and Rescue Advisory Group (INSARAG) in authorization apeh ding ahi. INSARAG hi urban search and rescue related issues ho a dinga UN noiya um gam 90 leh organization ho pan lahkhomna network ahi.

India a Bureau of Indian Standards banga UN agency, INSARAG in vannoiya disaster response team ho standardise abolji ahi’n, chehi international gold standard ahi, tin NDRF director general S N Pradhan in aseiyin ahi.

XXXXXXXXX

Sora a gari accident jeh a Former Minister Hemanta in nepi thi

Thoubal, Jan. 10(ET): Gari a toset ato jeh a Manipur Pradesh Congress Committee(MPC) former Minister and Vice President, Moirangthem Hemanta inneipi in Sunday nikho chun aleiset hinkho ana beitan ahi.

Hiche tosetna hi National Highway 102 juiya um Kakching District hosunga um Sora leh Langthabal kikah a thilsoh ahi. Former Minister Hemanta in a’inneipi Dr. P.Pratita(51) toh Bolero MN04A 6575 a hung kitol lhona, Kakching ahinphah lhon laitah a amasang lhon chu kelcha khat in ahinpel jeh a kelcha otdoh nadinga gari ahei ganchel leh Pallel langa kon hung Registration no MN01G 4663 nei Mahindra KUV 100 khat aphutkhat ahi.

Hemanta chu aha kisuhkhah behpon, Jeevan Hospital, Kakching a first aid apeuvin, chujouvin Shija Hospital a chonlut anahi. Ahin ajinu vang chu vangset umtah in ana mollem tan ahi.

xxxxxxxxx

Accident

Keithelmanbi, Jan. 10: Thulhut kimu dungjuiyin Sunday nichun Imphal-Kangpokpi road juiya um Keithelmanbi Military Colony W/No.1 muna garineo/2-wheeler 2 ana kitat to in, thilsoh a kon ana litongkha mi 2 chu apet pet in local mihon Kangpokpi Civil Hospital ana kilhut uvin ahi.

Toset toh, ahilouleh akitongkha teni lah a khat chu KMC Ward No.6 a cheng Letboi ahi, ti hetdoh ahitan, hinlah khatpa hi koi ahi het ahinaipon ahi.

xxxxxxxx

National Reconciliation Day 2021 man a um

Imphal, Jan 10(ET): United People’s Front (UPF) Manipur in Iningthou Nongdrenkhomba thina kum 187 lhinna January 9 chun, ‘ National Reconciliation Day 2021’ tin Lamyanba Shanglen Palace Compound ah anamang uvin ahi. Hiche kingon ah chun UPF President W Second, Kabui Union Manipur General Secretary Lanbon Kabui, Kuki Inpi President Mangcha Haokip, Tangkhul Naga Foothill Organisation (TNFO) Vice President RV Son Zimik hochu ana jau uvin chuleh hichea hin Professor MC Arun Manipur University, Assistant Professor Dr Abdul Salam, Thoubal College leh Associate Editor, Imphal Review of Arts and Politics, RK Bobichand hochu resources person in ana pang uvin ahi. Hichea hin floral tribute jong ana peuvin ahi. Iningthou Nongdrenkhomba 187 death anniversary kimanna a ahoulimna ah MC Arun in aseiyin, ethnic communities group chom chom hoa kona kitho khomna aum angaije tin aseiyin ahi. Aman aseiben Chinglen Nongdrenkhomba panlah najeh a ethnic communities chom chom hon Manipur athahbeh a Burmese Sepai Manipur dou a hungho ajo uva kona asemdoh thei u ahi tin aseiyin ahi. Manipur history ah jong akimu in, Leng Chinglen Nongdrenkhomba, Leng Nara Singh leh Herachandra hon Burma Sepaiho Manipur hung dou dinga hung ho chu ana nodoh un ahi. Hitobang ma a chu tu dinmun a jong Manipur territorial integrity venbit ahina dinga panlah khom angaiye ati.

Associate Editor Imphal Review of Arts and Politics RK Bobichand in aseina ah tu dinmun a Manipur umdan toh kisai Manipur territorial integrity dinmun hi boithei din aum in ahi ati.