10th January, 2021 News

10th January, 2021 News

178
0
SHARE

State in Maharaj Gambhir Singh thi nikho ana mang; Dzukou Valley venbit jou ahitai tia Manipur CM Biren in sei

Imphal, Jan 9(ET): Tuni chun State in Maharaj Gambhir Singh thi a 187th channa nitna leh ama geldoh jingna ana neiyin ahi. Hiche nikho nitna chu Maharaj Gambhir Singh Samadhi complex, Canchipur mun ah Chief Minister N. Biren Singh Jin-gun hina in ana kimang in ahi.

Samadhi complex mun ah Chief Minister makaina in Minister ho, MLA ho MP ho leh Government official holeh ahungkhom mipi hon 1826 a Burma(Awa) ho ho vaihomna Seven Years of Devastation doudalna dinga pan anala Maharaja Gambir Singh lim kisem chungah pahvui O-peh na leh jana ana peuvin ahi.

Hiche jou chun Manipur Rifles ho a kon in jana leh Gun Salute pehna jong Maharaj Gambhir Singh, Meidingu Narasingh leh gamsung ngailutna jal a ahinkho ana tohdoh ho chungah ana peuvin ahi.

Chief Minister injong Maharaj Gambhir Singh, Meidingu Narasingh leh Sana Herachandra lim semthu ho chungah pahvui O-peh na jong aneiyin ahi.

Thulakhom ho henga ahoulimna ah, N. Biren Singh in aching athem holeh khang thusim hetna nei hotoh Samadhi complex mun a Fencing ho a 33 AD apat a Manipur sunga Lengho thusim jihlut ding thu seikhomna jong umjing ahi dan aseiyin ahi.

Tu le tuhin hiche Complex vesui ding mi 2 akikoi in ahi tin Chief Minister in aseiyin ahi. Hinla, hiche Complex vetsuina neiding Committee angaikhoh dan jong aseiyin ahi.

Dzuko Valley a gam meikah toh kisaiya ahoulimna a chun, Chief Minister in Manipur langkai a meika ho phelmit leh venbit in aum tan ahi. Nagaland Chief Minister Neiphiu Rio toh Dzuko chan lhung ding lampi  Government of Manipur in semdinga tohgon aneina a mi honkhat in doudalna anei thu a kihoumatpi na aneithu jong aseiyin ahi.

Firefighter ho kichol ngah na ding mun 2 in aki semdoh tan chuleh Guest House sah nading in Manipur Police Housing Corporation Ltd.akon Engineer ho amun ah kholchilna nei ding in aki sollut in ahi.

Public Health Engineering Minister L. Dikho injong phatseh in Dzuko thu toh kisaiyin  amun vilna anei jing in ahi tinjong aseibei.

Tourism and Art and Culture Departments a Official hojong Maopungdong village mun a Guest House sahdoh thei hiding ham tia vilna anei diuvin jong hetsahna akinei tai tinjong aseiyin ahi.

Xxxxxxxx

Manipur a COVID-19 jeh a thina toh 365 lhingta

Imphal, Jan 9(ET): COVID-19 jeh in Imphal West, Manipur a kon a mikhat in thina ana tuobe kit toh kilhon in thina toh agomin 365 aphatan, chuleh natna nei athahbeh a mi 67 mudohbe ahikit toh kilhon in State sunga tuni chan a natna nei ana kimudoh agomin 28,646 alhitai tin State Health Department in Saturday nia thusodoh aneina ah aseiyin ahi.

Achesa nikhat sung chun milham lah a kon in mi pasal 37 leh numei 30 jaona in mi 67 athahbeh a natna nei ahi mudoh in aum in ahi tin COVID-19 Common Control Room thusodoh in atahlang in ahi.

Milham lah a natna thahbeh a kimudoh ho lah a mi 42 hi Imphal West akon ahiuvin, 12 hi Imphal East, Thoubal leh Noney akon mi 2 cheh, Bishnupur, Kakching leh Chandel akon mi khat cheh leh Churachandpur akon mi khat ahi tinjong atahlang in ahi.

State Health Services Spokesperson leh Additional Director Kh Sasheekumar Mangang in thusodoh a aseina ah, natna nei kimudoh ho chunga vetkolna achelhah jing toh kilhon a anungu kholchilna kinei jing ahidan jong aseiyin ahi.

Alangkhat ah, natna akon in Home Isolation akon a mi 20 jaona in mi 31 in damdohna ana neikit in ahi. Hitoh kilhon chun Central Security Personnel mi 3,363 jaona in 27,766 in damdohna aneitan ahi. Chuleh Recovery Rate 96.92 per cent ahi tai.

Tuni chan a natna nei kimudoh agoma mi 25,260 lah in Central Security Personnel 3,386 ajaovin, chuleh tu le tua Active Case 515 lah in Central Security Personnel 19 ajaovin ahi tinjong atahlahbe in ahi.

COVID-19 natna nei hotoh tahsa kisuhkhahna nei jouse akinthei pen a chom umdoh diu, Covid Control room ahi louleh District CMO ho Testing bol nadia akijahmatpi diuva hetsah ahi. Thukin leh boina neihon akinthei pen a phatseh a Covid Common Control Room Number-1800-345-3818 Call abol jing thei diu ahi. Chuleh Home Isolation toh kisai jouse Home Isolation Helpline Numbers- 0385-2414009 (State head quarter) leh – 8415944151 (Thoubal) Call abol jing theiyu ahi tinjong State Health Services in atahlahbe in ahi.

Chuleh koi hijong leh Government Doctor ho Online a doh le sah neinom jousen Sunday nikho tailouva (10am – 3 pm) gei Google Play Store a eSanjeevaniOPD app Download ahilou leh www.esanjeevaniopd.in akon a bol jing thei ahi.

Lungthim boina nei hon Number 104 Manipur Mental Health Helpline (9 am to 9 pm) sung Call abolthei diu ahidan jong State Health Department in atahlang in ahi.

Xxxxxx

AMSU in BOSEM a Post ong ho huhdim loi nadinga ngehna nei

Imphal, Jan 9(UNA): All Manipur Students’ Union (AMSU) in State Government heng’ah tukum a High School Leaving Certificate examination hung um ding toh kilhon a BOSEM Secretary leh Exam Controller panmun ong huhdim loi ahi nadin ngehna aneiyun ahi.

AMSU Publicity & Information Secretary Lhunpao Lhupheng in Friday nikho a thusodoh aneina a chun, COVID-19 natna hilen jeh in State sunga Private School phabep in e-Class leh lam chom chom in simlai ho ding in kithopina aneijing uvin, hinla Government School hon hitobang tohgon anei pouvin, simlai tamtah makhankho ding lung tijatna asodoh in ahi.

Government School ho a simlai ho dinga akisaipi mopohna neihon lampi ahin gelkhoh peh diuvin jong simlai kiloikhom hon temna anei uvin, chuleh Private School hon Board Exam um ding toh kisaiya hunam chuleh alou theilouva simlai ho School Boarding ho a umsah lou ding in jong hetsahna aneiyun ahi.

Xxxxx

Ccpur, Kangvai Police outpost akon human a meipum kila kinungmat doh ta

Imphal, Jan 10(ET): Achesa December 12, 2020 a Churachandpur district, Kangvai Police Outpost a kon hunam a thal ana kiladoh chu Security forces hon ana nunmu taovin ahi.

Hiche manchah chu Friday nikho a Security Forces hon thuguh amu dungjui uva Senapati District sung’a operation abol naova manchah dang phabep toh ana matdoh thau ahi tin tahsan umtah thulhut chun aseiyin ahi.

Hetthei khat chu Police Outpost Kangvai a achesa Dec. 12, 2020 jingkah khovah masang nidan 1:30 leh 2:00 kikah’a Sentry a duty poho thal namphu’a melhetlou hon ana lahpeh u ahi. Hiche thilsoh toh kisaiyin Police hon natoh achelhahpi jing uvin tuchan hin mi 6 leh manchah phabep jong ana mandoh taovin ahi.

Xxxxxxxxxx

Simlai kiloikhom hon JDO umchan kilomlouva aum demna nei

Imphal, Jan. 9(UNA): All Inpui Students’ Union (AISU); Liangmai Naga Katimai Ruangdi (LNKR) Rongmei Naga Student’s Organization Manipur (RNSOM) leh Zeme Student’s Organization Manipur (ZSOM) hon Jiribam District Organization (JDO), Jiribam in Tamenglong District sunga nam neo Khedagar Khasia leh Rongmei Community ho chunga January 6 nikho a Khedagar Village leh DC Tamenglong chunga JDO in ngohna anei hi adihlou chuleh bul le bal neilou ahi tin aphongdoh un ahi.

Kiloikhomna a kon General Secretary ho jouse soikaina a thusodoh chun aseina ah, Khasia Village hi Tamenglong District sunga um Tousem Sub-Division vaihopna hopsunga um ahi in, Jiribam hopsunga um hidan in aseiyin ahi. Chuleh Jiribam Valley hopsunga kho tamtah jong Tamenglong District a Hill House Tax ana kipe jing ahi in, hinla Jiribam a Major Community hon asuse gam tauvin ahi. Nam len jep jep hon Tamenglong District Territorial Boundary jong ahin lahbe jing uhi Government injong kichetah in ahe in ahi. District Administration Tamenglong leh agamkai MLA Tamei-Tousem in hiche chungthu a kikumlutna anei uva athu aseidiu chuleh District Administration Jiribam in semthu leh bul le bal neilouva gam achu nau hi angah diuvin jong kiloikhomna 4 hon hetsah na aneiyun, thinglhang chu thinglhang hintin, phai cham jong phaicham hijing ding ahi tinjong aseiyun ahi. Thinglhang gam ho chu itih hijong leh phaicham kiti thei louding ahi, chuleh phaicham jong thinglhang kiti thei lou ding ahi.

Media chom chom a Video ana kilhadoh a chun JDO leh Bengali pao tho Volunteer phabep in moltum leh thil chom chom kichoi in Khedagar Khasia village a Chairman leh Rongmei Community tolsung mi phabep gihna ana nei uvin ahi. Chuleh Khedagar Khasia village Chairman chung in jong hunam in thu adihlou tah in phondohna JDO in aneisah in ahi. Nam neojep hochu nam len hon kichepna in anei jing uvin ahi tinjong thusodoh chun aseiyin ahi.

Deputy Commissioner Tamenglong henga Chairman, Khadgar Khasia Village Authority in hehna lekha pehlutna aneina a chun JDO leh Bengali pao tho Volunteer phabep in Chairman pa phailei langa apui uva thu dihlou tah a phondohna anei sah’u ahidan jong aseiyin ahi.

Gamsung kivaipohna toh kitohlou beh in Sub Deputy Collector Jiribam in Chairman-Khedagar Khasia Village Authority chu hunam in Blank Paper ah soi ana kaisah in, hitobang natoh hi hetna neilou Government natong ahina aphotchet ahi. Hehna lekha chun aseibe na ah, gam aguh a hin lahbe hon Khedagar Khasia ho chungah gihna leh engkhan na chom chom ana neijingu ahidan jong hetdoh in aum in, hitobang thilsoh umjing ahitoh kilhon a Government in thutanna ahin nei dinga ngehna kinei ahi. Kiloikhomna chom chom hon mipi hahsat gentheina ho suhlhapna ding in lekha pehlutna chom chom ana kinei jing in hinla tuchan in Government akon in donbutna imacha akimupon ahi tinjong avellin kiloikhomna hon hetsahna aneiyun ahi.

Tamenglong District Administration leh State Gin akinthei pen a gamsung kivaihomna leh thinglhang mite ding gelna a khonung leh thilse ahung sobe lou nadinga pan ahinlah uva JDO leh Volunteer ho chunga themmo chan ahi nadiuvin ngehna aneiyun ahi.

Chuleh simlai kiloikhom hon State sunga koi hijong leh bul le bal neilou chuleh jouthu a gam leiset chung chang thu a gam neiho deilou leh chamna suse thei ding boina sem lou dingin jong ngehna aneiyun ahi.

Xxxx

ZUF in NSCN akon kiloikhomna a hung kinungle ho lemna nei

Imphal, Jan 9(UNA): Zeliangrong United Front (ZUF) a ZUF Chairman Jeanchui Kamei,  leh kiloikhomna sunga Rank chom chom ho jousen Soubunglong Village a um Lumlou Riamei in Saturday nikho a NSCN (U) a kon’a ahung kinungle a ZUF ahin nung jotlut kit toh kilhon in lemna sangta aneiyun ahi.

ZUF a kon a Information & Publicity Secretary KD. Gangmei min a thusodoh in aseina achun, Zeliangrong nam mite dinga hinkho phal ngam a ana kipedoh khangdong tamtah Raitu Chawang leh a Gang chankhompi hon ana puiseu vin, chuleh amite dinga tup le doi kicheh neilou ahijeh uvin Zeliangrong khangdong tamtah muthim noiyah ana puimang uvin ahi.

Khangdong thahat lai tamtah jong Zeliangrong Homeland muna dinga gam le nam a dinga ana kipedoh hojong lamkai ho alosam dan ahwt tah jeh uvin ana kithecheh in amachang phatchomna ding bouvin aki mangcha gam tauvin ahi.

Lamkai losam ho noiya kinepna anei tahlou jeh uvin, khangdong lung gelthem tamtah, gam le nam a dinga athahbeh a pan lanom hon athahbeh in kiloikhomna a pan lakit ding in ahung kinung le un ahi tinjong thusodoh chun aseiyin ahi.

Chuleh ZUF in NSCN (IM) akon a hung doh a ZUF kiloikhomna hin bel Private Takliangmei Gonmei jong sangtah in lemna aneiyun ahi.

Xxxxxxxxxx

Virtual a kona Cherry blossom Festival kiman na a CM jong pang

Imphal, Jan 9(ET): Chief Minister N Biren Singh in tuni chun Virtual a kigong Cherry blossom Festival, Mao ah chun  ana jau in ahi. Hiche festival ah chun, Mao town sunga limlah holeh Cherry blossom pahcha hochu live a nidan 2pm akon chun muthei din YouTube, Facebook, Twitter, Instagram etc hoa lhadoh anahitan ahi. Hiche kingon na ah chun traditional dances holeh Special ballet, ‘Cheryl Nachom’ jong virtual kingon ah chun ana umin ahi. Vannoi munchom chom a kona online a veho koma ahoulimna ah CM N Biren Singh chun aseiyin Mao hi tourist destination lentah ahi keuseh hilouva Dzuko Valley leh Mount Iso jotna dingah hill station leh a lampi poimo tah khat jong ahi tin aseiyin ahi. Mount Iso hi Manipur sunga dinga moul sangpen ahi naban ah, Dzuko Valley jong hi National wealth khat jong ahi ati. Aman masang deuva Mount Iso leh Dzuko Valley jong mei in ana kah nachung ah, NDRF, Indian Air Force, SDRF, State Police, Fire Service, Forest Department, District Administration, Village volunteers, MMTA, Assam Rifles etc ho panlah na jeh in suhmit in aumtai tin aseiyin ahi. Chuleh hichea Cherry blossom Festival,  Mao town sunga umhi Manipur Sangai Festival toh kigom dinga phatsahna ana um ahi tan ahi. Hiche kingon hi virtual a kigong hijongleh hiche hi tourism lampang promote bolna dinga phatah ahi ati.

Aman aseiben hichea virtual a kingon umhi muntin a online a kona vehoa dinga kinepna leh kitilkhouna asosah ding akinepna thu jong aseiyin ahi. Chief Minister in hiche Cherry blossom Festival kingon hi kumkit langleh International event khat hithei ding ahi tin aseiyin ahi. State government in Japan akona delegates ho koukhom dingin agongin ahi, ajeh chu Japan ajong Sakura festival jong man a umji ahi.

Virtual Cherry blossom Festival, Mao kingon chu Department of Tourism, Government of Manipur leh Indian Council of Cultural Relations (ICCR), Shillong hon Organizing Committee Flower Festival, Mao toh kitho khoma ana gon u ahi.

Hiche kingon ah chun Tourism Minister Oinam Lukhoi, Tourism Corporation of Manipur Ltd (TCML) Chairman Ashab Uddin leh Commissioner (tourism) Devesh Deval hojong ana jau uvin ahi.

Xxxxxxxxxx

India a Covid-19 Vaccine kapna January 16 teng kipan tading

New Delhi, Jan 9: India sunga Coronavirus natna (Covid 19) damdoi kapna ding chu January 16 akona kipan ding ahi tin Union Ministry of Health and Family Welfare in Saturday nichun aphongdoh in ahi.

Hiche hi ahung lhung ding festival ho, Lohri, Makar Sankranti, Pongal, Magh Bihu etc ho umding toh akito khah jeh a Covid 19 Vaccination chu January 16, 2021 akona kipanding ahi tin Health Ministry in thuso anei na ah chun atahlang in ahi.

Hichea thuphon chu Prime Minister Narendra Modi in gamsunga States leh Union Territories hoa Covid 19 natna toh kisai a high level meeting ana kou laitah jong ahi.

PM Modi in Centre tohgon ho, State leh UT government ho toh kitho khoma maban a damdoi kapding dan thujong ana seiyin ahi. Covid 19 Vaccine kapna dinga hopdoh na chu Health care workers leh frontline workers (million 30 tobang umdia ginchat ahi) holeh kum 50 chunglang miho leh Kum 50 noilam natna chom chom neiho (million 270 tobang umdia ginchat ahi) koma hopdoh masat hiding ahi. Prime Minister Narendra Modi in Co-WIN Vaccine Delivery Management System, unique digital platform jong Vaccine stocks, storage temperature leh individualized tracking beneficiary hoa dinga jong information apeh diu ahi. Hiche platform hin Programme manager hojong akithopi ding chuleh beneficiary muhoa dinga pre-registered jong automatic a apehdoh ding chuleh digital certificate semdoh nadinga jong verification apeh ding ahi ati. Tuchan a beneficiary register kibol jatchu ahileh, million 7.9 alhing tan ahi.

Vaccine kapna dinga hin Vaccinator holeh Vaccine Administrator mi 2360 tobang hochu training peh ana hiuve. Hichea hin Programme manager 61,000 leh Vaccination team dang 370,000 hochu states, district leh block level hoa training peh in ana umin ahi.

Chuleh hichea hin Dry Run jong Phase thum a India pumpi huop a ana kigong in chuleh hichea third run dry chu Friday nikhoa chu district 615 leh session sites 4895 leh States 33 leh UT hoa gonin ana umin ahi.

Xxxxxxx

DMU Jilkung ho lahlutna dinga kiphinna chejom jing

IMPHAL, Jan 9(UNA): Dhanamanjuri University noiya um abahkai College ho a Ad hoc Committee hon University Campus sungah mopohna neihon Jilkung thahbeh a akilah masangse a Dhanamanjuri University (DMU) bahkai College hoa jilkung ho lahlut ahina ding in akisaipi mopohna neiho hengah Saturday nikho chun kithokhom in toumun kiphinna aneiyun ahi.

DM Commerce Teachers Forum a General Secretary Dr Jayenti Ningombam in thulakhom ho henga aseina ah, hiche toumun kiphinna hi DM College of Commerce in DMU a jilkung ho jouse toh kithokhom a AD HoC Committee kisemdoh toh kilhon a phutna kinei ho suhbulhit ahina dinga kiphinna kineipan ahi tin aseiyin ahi.

Mopohna neihon phutna kinei ho gelkhoh pehna ahin neilou leh University sunga abahkai College hon kiphinna sangjo cheh kichepi ding ahi tinjong aseibe in ahi.

Committee in January 6 apat College bahkai ho Campus sunga kilhahtho a toumun kiphinna kichejompi ding chuleh January 5 apat UG & PG Class ho a Online leh Offline Class jong chejomsah lou ding in kithulhuhna aneiyun ahi.

Xxxxxxx

Lhukhosei Zou case: CADA in Anti-Drugs galsatna nei dinga kouna nei

Imphal, Jan 9(ET): CADA Imphal East District Committee Secretary Organisation Nongthombam (O) Medha in khonunga hung khanglen ding ho huhdoh nadingin tuhi Drugs leh khamtheina chunga galsat kipat phat ahitai, thipbeh a moh umthim phat ahi tapoi tin tunia Wakha Community Hall mun a Chandel ADC Chairman Lhukhosei Zou achesa 2018 kum a Multi-Crore Drugs Case toh kisaiya ND&PS Court in themmona aneipoi tia lhadohna anei deilou vetsahna a toumun kiphinna kineina a chun ana phonhdoh in ahi. Hiche toumun kiphinna chu Wakha Nupi Samaj Association, Wakha Youth Club leh Coalition Against Drugs and Alcohol (CADA) kithokhom a kinei ahidan thusodoh chun atahlangin ahi.

Medha in aseibe na ah, Lhukhoshei Zou chenna Official Quarter mun a kon a photchetna ding Drugs tampi toh kimatdoh tha nunga photchetna lhahsam jeh a kilhadoh kiti hi mipi hon akipom theipoi tin aseiyin ahi. Government in dan dungjuiya Drugs a kivei ho chunga gotna peh ahina dinga Court sangjo cheh a apehlut uva athahbeh a kholchilna aneidiu ahi tinjong phutna aneiyin ahi.

Hiche thu toh kisaiya CADA Vice-President Ningthoujam Doren in ahoulimna a chun, Manipur Government in cham del a kiphinna kinei ho gelkhohna apeh louleh hisanga khojoh kiphinna hung kinei nalai ding ahi tinjong aseiyin ahi. Lhukhosei Zou kilhadoh hi Government dinga gol lelna lentah ahina ban’a jachat um tah ahi. Hiche Case akisei til a pat in mipi hon ginmo na lentah ana kineiyin, hibang chun Drugs Sample akimansah in chuleh Chargesheet chunga lungthim thuhtah in na akitong in ahi tinjong aseibei.

Kiphinna a chun “Punish Drug Smugglers”, “Eradicate Drugs completely from the state1′, “Don’t make War on Drugs a joke”, tiho mangcha in kholhang sapna jong aneiyun ahi.

XXXXXX

Dorcas Venga MGNREGS Social Audit ana um

Ccpur, Jan. 9(ET): Financial Year 2019-2020 ahung lhuntoh lhonin 4th Jan apat 9th Jan, 2021 sungin Dorcas veng a um YPA Hall muna MGNREGS Gram Sabha Social Audit chu ana kibolin ahi. Hiche audit a pan anala hochu ahileh Manipur Social Audit Team, Lamka Block Staff,VA lamkai ho chuleh Job Card holders jouse ahiuve. Miss Kimneithem, VRP in Recording Secretary leh vaihomtoh in ana pangin, Block Staff thalhengin Ginmuan Ngaihte SDO/BDO, Luntinlal, Section Officer leh MIS Incharge in pan anala uvin ahi.

  1. Vahboi, District Auditor in thaman kimudoh holeh semphat diho hilchinna aneitoh lhonin, Sorkar akon scheme hungho ahiding banga phatchompi ahi theina dinga phate a na tohding adeisahna aseiyin ahi. Hiche scheme hohi govt employee ho a ding ahipon,service bolhon Job Card ho surrender /cancel bolding ahi, ati.

MIS Incharge in nikho thaman Bank Account a alut man a natong lou a sum kimuthei ahi poi, hijeh chun phate a natoh na a panlah cheh ding ahi, tin ana aseiyin ahi.

Job Card holder mi phabep in account a sum lutlou report abol uvin, MIS incharge henga details pehlut ahitai.

Village Authority record, Block Sanction, chuleh MIS update veltlhahna anaum akon akitohlou phabep mudoh ahi. Hiche ho suhtupna dia VA hon pan nasatah a alah uva, akitong louho agang thei penna tong dingin Auditor in tepna aneiyin ahi. Dorcas veng a natoh kipe hochu Shingling, Culverts, Pucca drain, Kucha drain, Deepening and Rennovation of Lanva Stream,  etc ahi hinlah Deepening and Rennovation of Lanva Stream hi akitongpon ahi. Chuleh Kucha drain le Pucca drain a CIB akitung pon ahi. Geotagged jong akimupon, Register jong phaten maintain akibolpon ahi.

MGNREGS sum hi Ministry of Rural Development in sanction abol ahi. SDO/BDO Lamka South TD Block in Republic masanga ni 10 nikhotha hunglut ding ahi, tin aseiyin, na phatah a tong dingin ngehna aneiyin ahi.

Xxxx

Inn meika

Imphal, Jan 9:  Tuni nilhah lam nidan 5:30 vel in Kangjam Rajmani Devi 63 yrs W/O Mathurabashimayum Yaima Sharma, Keisamthong Elangbam Leikai akon store room chu mei in ana kah in ahi. Hiche meikah achun thil mantam ima vang akalha pon, aahtui koi naho bou ana kalha in ahi. Hiche meikah chu dhup kihal akon hiding in akisei in ahi.

Xxxxxx

MMCM in Lhukhosei Zou lemna kingon ana nei

Tengnoupal, Jan 9(ET): Manipuri Muslim Council Moreh (MMCM) in tuni in kiloikhomna conference hall a Lhukhosei Zou lemna ana nei uvin ahi. Hiche lemna kingon chu tuni nilhah lam nidan 3:30 vel a ana kibol in ahi. Tuni kingon achun deichom in Lhukhosei Zou jaona in president, SWYC, Tamil Sangam, HTC, MMCM  le Gorkha Samaj lamkai ho kouna ana kinei in ahi.

Mipi kiloikhomna chom chom ho in kingon  a ahoulimna uva Lhukhosei Zou thu kitan chai a ahung kile na chung chang a kipa thusei na ana nei uvin ahi. Lamkai ho chun Chandel ADC ahilai a atoh doh le athamdoh ho chung chang a jong houlimna ana nei uvin ahi.

Chairman apoh lai a khentum neilou a nam chom chom jouse kibang chat a vaipoh na aneipi jing a district sunga  khan tou na jat chom chom ana boldoh dan ho jong ana sei uvin ahi. Ahunglhungding ADC election a jong ama ma ma atun kit nom dan u jong tahlang na ana nei uvin ahi. Kingon a Lhukhosei Zou in ahoulimna a khopi sung a mipi ho in achung chang thu het them na an anei an u chung a kipa thusei na anei toh lhon in, khamnathei chung chang a ama anat phat loud an thu jong hilchetna ana nei in ahi. Court in hiche khamnathei kimat na chung chang a ona nei teni gotna apeh tah dan jong tahlang na ana nei in ahi.

Lhukhosei in ahoulimna a khamnathei um Mantripukhri a kisel ahi hetdoh ahi toh lhon a Th Brinda makai na NAB team khat in  khamnathei chu matding a ahin hol utoh lhon a  khamnathei neipa Chinliankhup in a driver pa  Thangminlun chu khamnathei sel ding a ana nganse toh lhon a khamnathei chu ama room sung a ana sel ahin, ama inn ahin jot uchu mun dang khat a phabep ahin matdoh jou u ahidan jong tahlang na ana nei in ahi. Kuki te chondan dungjui a Lhukhosei chu mona nei lou ahi tia phndoh na ana kinei jou a Chinliankhup Zou chu mona nei a ana kisei a tuni chan a kisel nalai ahi akiti. Chinliankhup Zou insung mite in jong ama insung mite ang a ngaidam ahung thum tah dan u jong tahlang na an anei in ahi.

Hiche ngaidam thumna chu Kuki te chondan dungjui a achesa 28th  December 2019 a ana nei u ahidan jong hetsah na ana nei in ahi. State sung mipi ho in ama chung a ginmo na anei nah lai ule Pathen ang a kitepna anei ngap nahlai dan jong tahlang na an anei in ahi. AMa in maban a khopi sung mipi ho kihtopina ding a natoh nom na anei nom nahlai dan jong tahlang na ananei in ahi.

Xxxxxxxxx

Major General Ss Deusi, VSM ADG Assam Rifles In Manipur SFS ho vilna nei

Ccpur, Jan. 9: Major General SS Deusi, VSM, Additional DG Assam Rifles in January 7 apat jJanuary 9 sungin Churachanpur leh Pallel a kilhalut/posting lha AR ho vilna ana neiyin ahi. Sector chom chom vilna anei sungchun operational leh administrative aspect ho vetlhahna ana neiyin, Assam Rifles troop hon gamsunga chamna umna dinga pan alah dan u chunga alunglhai dan ana seiyin ahi. Xxxxxxx

Manipur Police in SoP juilou mi 279 anaman

Imphal, Jan. 9: COVID-19 Pandemic toh kisaiya State Government leh State Disaster Management Authority in juidinga dan asemho juilou ahilouleh palkeh mi 279, Saturday nichun Manipur Police Department in ana hentang uvin ahi.

Chujouvin amaho cheng chu dan phatah a jui dingin hilchahna leh gihna pumin lhadoh in aumtauvin ahi. Akiman ho cheng akonin dan dungjuiyin Dk. 36,200/- fine dondoh anahi, tin IGP(Ops), Nodal Officer (Covid-19) for Manipur, E. Priyokumar in thuso ana bolin ahi. IGP Priyokumar in thuso abolna achun dan palkeh ho chunga National Disaster Management Act 2005 noiya dan dungjuiya sction khoutah a kilading ahi, tin gihna jong aneiyin ahi.

Xxxx

Lalkhohao Kipgen sukha ho nidan 12 sung’a matdoh ahilou leh phattep louva bandh bol ding’a KACA leh KAYA in phongdoh

B.Lalboi Gangte

CCpur. Jan 9 (ET): Koitelui Area Chief Association (KACA) leh Koitelui Area Youth Association akon Information & Publicity thuso kimu dungjui’a achesa Jan. nisim 6 nilhah nidan 9.20 pm vel’a K. Lhangnem Village Tiddim Raod mun’a gari in asuhkhah Lalkhohao Kipgen S/o (L) Lhukholal Kipgen of Boljol village chu akisuhkhah na thoh jou lou in kivetkol na mun RIMS mun’a thina anato nachung’a pohnat naleh lunghem pi na anei uvin ahi. Chuleh  CCpur Police Station mun’a toset nikho jaan mama in report anakibol in ahin athi jou chan in jong imacha progress akimulou chung’a phamo asahdan aphongdoh in ahi. Chuleh hiche chung thu’a Higher Authority or District Administration in vaihom naleh mopoh na khat alah lou leh thilong jong kilalou ding ahi tin hetsah na jong anei in ahi.

Hiche toh lhon’a thilsoh chung’a nidan12 sung’a ima progress aum lou leh jing (Jan.10) jingkah nidan 6:00 am akon phattep louva Koite Lui Area in ahopsung National Highway  CCpur to Imphal lampi bandh kikou ding ahi tin kiloikhomna tenin aphongdoh in ahi. Hiche phat kipeh sung’a koima che leh valeh um lou ding chuleh thupeh nahsah louva boina toh aum leh koi man Area lamkai ho themmo achan thei lou ding ahi tin jong thuso chun atahlang in ahi.

Xxxxxxxx

Hope Baptist School campus sung’a room phabep mei in anakalhah; Dk. Lakh 20 vel man ding thil leh lo kavam

B.Lalboi Gangte

CCpur. Jan 9 (ET) : Churachandpur District hopsung Bible hill, Rengkai aum Hope Baptist School mun’a tuni jingkah matah nidan 2:30 vel’a mei nasatah’a anakah jeh in thilkeu imacha lahdoh man lou in anakavam soh kei tan ahi tin thulhut chun aseiyin ahi. Hiche mei kah jeh chun Hope Baptist School campus sung’a chapang ho ann honna inn sung’a um kong leh bel chueh thilkeu chom chom kikoina store room anakavam in ahi. Meikong hi Store room akon hung kipan ahin chuleh meikah phelmit ding in akom vel’a cheng mipi holeh Fire Brigade in anaphelmit in ahi.

Hiche phatsung in School vesui leh School aum chapang ho chuleh akimvel’a cheng mipi hon meikong phelmit ding ago uvin ahin meikong chu phelmit thei ding dinmun’a aum lou phat in inn dang ho akahmat lou nading joh in Fire brigade toh kithokhom in anaphalmit jo uvin ahi. Hiche inn ka hi achung langva abang leh alhong thingpeh ahin chuleh room 3 tichu ann honna , chang inn leh store room ahi naban’a ann honna mun tilouva room dang ho’a meivah aki-fit lou jeh hin meikong hi meivah akon hilouva thildang akon hung kipan hi ding in agingchat nao aphongdoh uvin ahi. Chang inn ah changhum pot 100 akalha in chuleh thil keu dang akahlhah jouse asum sei ding in Dk. Lakh 20 man vel ahi.

xxxxxxxxxxxxxxx

MLA V. Hangkhanlian in Salem vengsung black topping kibol thah leh Salem veng community hall hondohna nei

B.Lalboi Gangte

CCpur. Jan 9 (ET) : Salem Veng Village Authority lamkai nan tunin Salem vengsung black topping kibol leh Salem veng Community hall hondohna kingon anaum in ahi. Kingon achun Jin-gun in MLA V. Hangkhanlian anapang in chuleh hiche phatsung’a T. Paukhanlian, Ex-chairman, ADC CCpur, V. Khaikhanmung, Ex-MDC, kho Haosa leh khosung mipin jong pan anala uvin ahi. Kingon phatsung’a MLA V. Hangkhanlian in Salem vengsung black topping kibol thah leh Salem Veng Community hall hondohna ananei in ahi.

Hiche toh lhon’a Community hall kisah natoh kisai’a K. Zatawna in report apeh na’a Salem vengsung ding’a Community Hall hi MLA V. Hangkhanlian in Dk. Lakh 15 sanction abolna akon achesa June 2018 kum’a anakipan ahi. Hiche Community Hall sahchai ahi thei nading’a pan nasatah’a la MLA pa chung’a akipana thu jong aphongdoh in ahi. MLA V. Hangkhanlian in houlimna aneina’a gamsung’a ding’a natoh lunglut mi khat kahi na’a khantou na ding toh kisai kangai poimo toh lhon’a lamlen, Culvert, singling kiti ho Government akipat leh keima mimal sum mangcha’a khopi sung mun chom chom in akibol in ahi. Chuleh maban’a khopi sung jaona’a kilometer 33 asao lampi semna ding jong hungpot pai ding, khopi sung lamlen tamjo sem jou’a um ding ahidan aphongdoh in ahi. Natoh natoh kisai’a khat leh khat kipa chat to ding dan thep ding hichu atong ho ding’a jong thanop um ahi ati. Gamsung khantou na ding’a Village level hi hen, MDC, MLA level hi jong leh mipi in natong thei ding lamkai lhen dan athep’u poimo ahi. Chuleh mipi jong lamkai ho toh pangkhom’a khat leh khat ki nung thop to chet’a na tohkhom ahi teng gamsung nasatah’a hung khantou ding ahi tinjong aseibei.

xxxxxxxxxxxxxx

Singngat AC sung’a kho 124 a JJM scheme toh molso ahi nading’a MLA Ginsuanhau makai na’a gamkai Haosa hon kihoukhomna nei

B.Lalboi Gangte

CCpur. Jan 9 (ET) : 60-Singngat Assembly Constituency MLA Ginsuanhau Chairman, MANIREDA Govt. of Manipur in  tuni jingkah nidan 11:00 vel in Singngat Assembly Constituency sung’a Jal Jeevan Mission (JJM) toh molso na ding toh kisai in Haosa ho toh kihoukhom na ananei in ahi. Chuleh nilhah lam nidan 1:00 in Sangaikot Sub-division sung’a Haosa ho toh jong seikhomna ananei uvin ahi.

Hetthei khat chu Jal Jeevan Mission (JJM) hi National Rural Drinking Water Program (NRDWP) akon kisem thah ahi in hiche hin inn tin’a twi neh, twi kai mu ding tihi atup thupi pen ahi. Hiche Mission noiya Singngat Assembly Constituency sung’a Suangdoh Sub-Division sung’a kho 22, Singngat area a kho 22, Behiang area a kho 44 leh Sangaikot area a kho 58 agom’a kho 124 hopkah ding’a kingon kibol ahidan MLA pun ana phongdoh in ahi. Alangkhat’a gamsung mipin JJM Scheme akon twi-theng man ding leh don ding kining lhing tah’a amuthei na ding’a natoh ho asungon kaiding imacha umlouva tohmol so ahithei nading’a Haosa ho toh kihoukhomna anei’u ahi. Hiche natoh hohi contractor lamkai na’a toh molso ding ahi jeh in mitakip in kithopina apeh cheh ding uleh kiloikhom na chom chom hon jong asuhboilou ding uvin temna leh ngeh na anei in ahi.

xxxxxxxxxxxx

Mata Lambulane Youth Club in kum 46 lhinna Rising cum Prize distribution  2021 kingon ananei

B.Lalboi Gangte

CCpur. Jan 9 (ET) : Mata Lambulane Youth Club kum 46 lhinna  Rising cum Prize distribution 2021 kingon tunin Mata Lambulane Community Hall mun’a ananei uvin ahi. Kingon achun Jin-gun in T. Khaikhomang MDC 12-Lanva, Jin-ja um in Chandra Kumar RO Forest Department chuleh Kin-neipa in Tongsanglen Deputy Commandant BSF ho anapang uvin ahi. Kingon phatsung in Jin a kikou ho Khotol Haosa Letkhohao Haokip in Memento khat cheh anape in chuleh Seithang, Secretary VA in Youth Club history tahlang naleh member ana mollem saho geldohna phat ana lamkai in ahi.

Hetthei khat chu MLYC hi achesa 1974 kum a register ana kibol ahin tuni hi kum 46 lhinna ahi tan ahi. Chuleh Youth Club hin podoh masapen chu (L) T. Otkhojang Haokip leh Thongjathang ahi lhon in aban’a lamkai thah hochu Lamkhoneng leh aloi ho anahi uvin ahi. Seithang leh aloi ho hin akhang 3 chan ahin poh’u ahitan hitobang’a achelhah thei na chung’a Pathen thangvah na jong anape uvin ahi.

Hiche toh lhon’a Kin-neipa Tongsanglen Haokip in houlimna aneina’a simlai holeh khangthah ho jouse hin hinkho’a tup le-doi kicheh tah neipum’a lolhin tei ding agot cheh ding’u poimo pen ahi ati. Jin-gun T. Khaikhomang in houlimna aneina’a kho sung’a Youth Club lamkai ho hin simlai chapang ho khankho ding gelkhoh na jal’a Free Coaching Class bol’a themjil na lam hatah’a amachal sah ding chuleh agannathei pen’a Community Urinal shed leh Public toilet sem ding in jong aphongdoh in ahi. Chuleh Youth Club hon thilpha abol nao chung’a kithopina jong anape in ahi.

xxxxxxxxxxxx

Lungthulien akon Ccpur jon passenger gari khat in accident toh; mi 8 kisukha

B.Lalboi Gangte

CCpur. Jan 9 (ET) : Pherzawl District hopsung Lungthulien akon Churachandpur hin jon passenger po DI Pick up MZ-04 3902 brake fail jeh in tuni sun nidan 12:00 vel in Songpi kho aum ICAR office noi Pearsonmun kho sah Tipaimukh Road jui’a toset anatoh in ahi. Hiche toset na’a chun passenger mi 8 akitong kha in hiche lah’a mi 3 nasatah in akisukha in ahi.

Hiche toh lhon’a toset na toh ho T. Khaikhomang, Chief of Pearsonmun & Honble EX-MDC Lanva in amun tah in vilna anei in chuleh Kuki Khanglai Lawmpi GHQ lamkai hon amun’a kitongkha ho tomngai tah leh gangtah in Hospital ana lhut uvin ahi. District Police hon jong amun tah’a spot enquiry anabol uvin ahi. Toset jeh’a akitong kha ho chu Vasti (14), Ramhluomawi (20), Japhet (22), Lalvarmawi (47), Baby Ellen Lalngailien (1), Buongthangmawi (21), Joseph (16) chuleh M. Lalringsang (15) ahi.

Hetthei khat chu gari neipa hi Rothlung Bethel kho mi ahin toset na chung’a passenger lah’a khat in aseina’a gari driver pa hi mi phatah ahi dan asei in chuleh ahung kipat doh til uva kon gari machine boina ana umpon ahi. Songpi kho noi’a KNT Taona muol kahin phah uva kon brake fail ahi ahetdoh phat in lampi dang um lou jeh chun driver pa in lamlai’a gari asuhlhuh ahi dan aseiyin ahi.

xxxxxxxxxxx

DIET student hon teacher issue chungchanga second year session boycott ding kigo

Imphal, Jan 9: District Institution of Education and Training (DIET), Imphal East a simlai hon jilkung beiya um simlai ho dinga state government in regular teacher agonpeh louleh phat teplouva DIET, Imphal East second-year session boycot boldingin gihna anei uvin ahi.

DIET, Imphal East a Subject 4 -Mathematics, Music, English chuleh Meitei-Mayek- hilding jilkung aumpoi, tin DIET, Imphal East a trainee, RK Echal in Saturday ni a Manipur Press Club, Imphal muna thuso miho koma ahoulimna achun ana seiyin ahi. Simlai hon CM koma jilkung lhahsam jeh a boina ato uho chungchang CM henga vel ejat hamkhat lekha athot u ahitai, ahin tuni chanin a-uhpohpoi, tin aseibe in ahi. Simlai ho thalhengin Echal in simlai ho gimna leh amakho diu ngaito puma bolding dol ho government in abolpeh diuvin ngehna aneiyin ahi.

Xxxxx

Manipur govt in akitep na bang in natoh na anei poi tia Chadong khomiten sei

Imphal, Jan 9: Chadong khomite in Thoubal Multipurpose Project tu naicha a  Union Home Minister Amit Shah in thenso na ana neina chung a khosung miho kho chenna chung chang a Manipur govt in akitep na bang a kithopina apeh chai masang a project thenso na kinei chu adeiliu dan u hetsah na ahin nei uvin ahi. Manipur govt in akitep na bang a kho chon na chung chang na toh le khomite ho ahiding bangtah a kihtopina apeh chai lou lai u dan jong tahlang na ahin nei uvin ahi. Hetthei khat chu Mapithel dam kisem akon a Chadong kho lui chu twi in ana chup toh lhon a akho chu ana kichon tou a mun mol chung lam a kisem ahi.

Hetthei khatchu Chief Minister N Biren Singh in CHadong khomite ahidang bangtah a kihtopina peh ahiding dan tahlang na ana nei toh lhon a phate a khosung vetsui ahina ding a kithopina pehding a kitepna ana nei ahi. Chadong lho ahi inn 455 lam um ahin, hiche ho hin govt akon kithopina anga jing lai uva itabang tah a proect thenso na kinei hi adih lou ahi tin jong khomite in hetsah na ahin nei uvin ahi. Hiche project akon a twi hung let in akho u asuh mang toh lhon a tu chan gei a akile doh lou insung ijat ham aum nahlai dan jong tahlang na ahin nei uvin ahi. Chadong khothah kisah na a school ho hihen ipi lam pang hile govt in abol ding dol abol loi ule khomite mangthah gam ding ahidan jong tahlang na ana nei utoh lhon in, hou inn thah sahnading hihen, chapang ho anganwadi centre hihen PHC sah na ding hile agan nathei pena tohgon ahung kinei na ding in jong khomite in hetsah na ahin nei uvin ahi.

Khosung school hi sahchai tobang a um ahitan, Local MLA K Leishiyo in Jacintha Lazarus, secretary, water resources department ang a achesa June, 2019 a school building chu education dept a pehlut tahding a lekha thot ana nei ahin hinlah tu channa natoh ima kibol lou lai ahi. Village authority ho in jong ningkum akon a Chief Minister pa ang a school thenso na nei loi ding a hetsah na ana nei jing vang uva tu channa natoh maban achal tah loudan jong hetsah na ahin nei uvin ahi.

xxxxxxxx

India a UK Covid-19 natna nei 90 alhingtai tia Health Ministry in phongdoh

New Delhi, Jan: Central Government in Saturday nikhoa aphondoh na ah tuchan a India sunga UK a kimudoh COVID 19 natna thah neijat 90 alhingtai tin Union Health Ministry in thuso anei in ahi.

Ministry in aphondoh dungjuiya hichea natna nei kimudoh mi 90 tobang hochu single room isolation, health care facilities State government cheh ah koi ahiuvin ahi. Chuleh hichea hin akinaipi insung mite jong quarantine a koi ahitauvin ahi.

Chuleh hichea positive hia mudoh mihon ahin kilhon pihou jong contact tracing, family contact jong bolin aumin ahi. Ministry in aseina ah Genome sequencing jong gonin aumjing in ahi ati. Friday nichun United States akona flight hung kile mi 246 ana umin ahi. Chuleh hichea hin UK akona flight hojong government in Friday nichun ahong kittan ahi, government in UK akona flight hunglut dingho jouse chu December 23 a chu ana kha ahi.

December 29 nikhoa chu UK akona hung kile mi 6 tobang hochu Covid 19 natna thah positive ahiu mudoh ahi. Chuleh hichea hin hetthei khat chu UK a kimudoh COVID 19 natna thah chu Denmark, Netherlands, Australia, Italy, Sweden, France, Spain, Switzerland, Germany, Canada, Japan, Lebanon, leh Singapore hoa mudoh anahitan ahi.

November 25 leh December 23 kikah ah chun Indian Airport ah UK a kona hung kile mi 33,000 tobang ana umin ahi. Hichea passenger ho jouse chu States leh UTs hoa RT-PCR test jon bolin ana um in ahi.

Union Ministry in aphondoh dungjuiya State ho komah surveillance, containment, testing leh sample ho labs hoa pehlut naleh Covid 19 natna thua advice peh ahiuve tin aseiyin ahi.

Xxxxxxxxx

CM in Manipur Hockey website hondohna nei

Imphal, Jan 9, 2021(DIPR): Chief Minister N Biren Singh in tuni chun Hotel Classic Grande, Chingmeirong, Imphal East District function ah Manipur Hockey website (www.manipurhockey.com) hondoh na ana nei in ahi.

Aman hichea aseina ah State Government in gamsunga sports lampang a semphat nading natoh agong jingin ahi ati. Khuman Lampak Main Stadium leh Hockey Stadium hoa jong flood lighting facilities koi ahitai ati. N Biren Singh hi Manipur Hockey a Patron in-chief jong ahi, in chuleh hockey astro turf jong State sunga district 16 hoa agangthei pena semdoh hiding ahi tin aseiyin ahi.

Chief Minister in aseina ah I League a kichem NEROCA leh TRAU FC teni chungah Rs 50 lakhs cheh peh anahitan ahi. Aman aseiben KRYPHSA-FC jong hitobang a hi peh hiding ahi ati. Hetthei khat chu hiche KRYPHSA-FC hi Indian Women’s League a kichem ahiuvin ahi. Chief Minister in aseibena ah International players chan geiya hinsemdoh thei Clubs ho chunga grants jong kipe diu ahi tin aseiyin ahi.

Aman hichea Organisation jouse leh sports association chom chom ho koma amaho kikah a groupism leh infighting ho bol loudin temna aneijin ahi. Aman aseina ah amaho sehi leadership khat noiya um uva natong khom dingin ngehna anei in, chuleh Organisation hon personal interest hoa kona kikangse dingin ngehna jong anei in ahi.

Chief Minister in aseina ah tua Gyanendro Ningombam, India Hockey a President ahipet a hi performance ho suhsang a chuleh hockey game jong suh minche phat ahi ati. India Hockey President Gyanendro Ningombam leh Hockey Manipur President Basudev Singh jong kouvin ana um in ahi.

Xxxxx

Mizoram a Lockdown jouva kon Drug supply akhang’e tia State excise department in sei

Aizawl, Jan 9: Mizoram toh akinaipi gamhoa lockdown umjou a kipan chun Myanmar akona Drug supply hatah in ana khangtou in ahi, tin State excise leh Narcotics Department in Friday nichun aseiyin ahi.

Gamsung pumpi huop a lockdown ana kiphondoh jouva, Mizoram injong state-wide lockdown jong May 2020 chan geiya dinga ana phondoh ahi. Aizawl in September lha a chu complete lockdown ana phongdoh in ahi.

Mizoram ah hin Drug supply, adeh a heroin joh leh ane hatah in akhang tou in ahi. Hiche toh kilhon a State excise leh Narcotics Department in tukum  2021 a dingin hapta masapen in heroin gram 278 ana mandoh uvin ahi. 2021 hapta masa sunga pasal mi 2 kum 41 vel chu Drug abuse jeh in ana thi in ahi tin thuso anei nauva aphongdoh un ahi.

State excise leh Narcotics Official hon Champhai a Zote kho Myanmar toh gamgi ah heroin gram 203 tobang Thursday nichun ana mandoh uvin ahi. Department a spokesperson Peter Zohminthanga in aseina Myanmar mi Thanglanchin (41), Myanmar, Fartlang a um akonin dan in aphal lou, drugs Rs 5.25 lakh man matdoh in aum in ahi. Ama chungah hin Narcotics Drugs and Psychotropic Substance Act, 1985 noiyah pehlut ahitai tin Zohminthanga in aseiyin ahi. Excise leh Narcotics Department personnel hochun Friday nichun Phunchawng leh Rangvamual mun holeh Aizawl vellah ana khol nauvah ju kisemna mun phabep jong ana suseuvin ahi. Mizoram hi India sunga Drug kiha manna munlah a atampen ahi in chuleh hichea Drug supply hochu Myanmar akona atamjo pohlut anahie. Mizoram sunga heroine akona thina anatoh masapen chu 1984 kuma chu ana umin ahi chuleh hichea hin mi 1648 tobang Numei 193 jauna Drug abuse jeh in thina anatoh uvin ahi.

2020 sunga jong mi 67 tobang Numei 6 jauna heroin drug neh jeh in thina anatoh uvin ahi. Hetthei khat chu 2019 a chu Drug abuse jeh a thi jat chu 55 anahie. Hiche toh kilhon in Government, civil societies leh churches hon Drug abuse douna natoh aboljing uvin ahi.